Matioo̱ 25 - Xo̱jo̱n eén Néná

Bi̱ tsꞌén íjñá chi̱bo̱a̱ Kjisoo̱ énkjiín xi tie ínchjín xo̱ngo̱ò

¹ Nínga botíxomaa̱ Néná xikónií tie ínchjín xo̱ngò xí iskjíbé ndiꞌíxoò, sꞌe̱ kijí nínga kjo̱chó nda̱ xi ku̱i̱xaa̱n.

² Ún kui ínchjiín xi chi̱ni, kó ún xi xi̱ꞌinkjo̱a̱.

³ Xi chi̱nii̱ iskjíbé ndiꞌíxoò, ta̱nga tsiejín ndátí tsaꞌa,

⁴ ta̱nga ínchjín xí xi̱ꞌinkjo̱a̱a̱ iskjíbé ndiꞌíxoò, kó yaꞌatꞌa ngase ndátí.

⁵ Kó nga achichí tsꞌandíyaá nda̱ xi ku̱i̱xaa̱n, ti̱chaa̱n tsindińjñá, sꞌe̱ kisꞌifé ngayeje ínchjiín.

⁶ Nga kamá masien ni̱xtji̱e̱e̱n, kandaꞌyá ngo xi askjandáyà xi bi̱ katsó: «¡Kꞌi̱e̱ ndibá nda̱ xi ku̱i̱xaa̱n, tji̱taxi̱e̱jnú kó tangínchja̱ꞌáyindi̱yàjnú!»

⁷ Kósꞌe̱ ngayeje ínchjín xo̱ngo̱ò jastjíe̱n kó íjñanda ndiꞌíxoò.

⁸ Ta̱nga ínchjín xi chi̱nii̱, bi̱ katsoó ínchjín xi xi̱ꞌinkjo̱a̱a̱: «Chií ndátíjnú te̱ꞌéjne̱, ngatꞌa̱ jè kjiꞌbo ndiꞌíxòjne̱.»

⁹ Ta̱nga ínchjín xí xi̱ꞌinkjo̱a̱a̱, bi̱ katsó: «Ka̱májín ko̱e̱ꞌéjne̱, ngatꞌa̱ kjo̱chóꞌájín tsi̱ꞌe̱ ndiꞌíxòjne̱ ko̱jo ndiꞌíxòjnú, ta̱sá tangínjnú nínga síndo xi botiñá ndátií, tsi̱ꞌe̱ nga si̱ꞌantsiéjnú ngase.»

¹⁰ Kó tji̱e̱nga kijíkꞌatsie ndátí kui ínchjiín, jachó nda̱ xi ku̱i̱xaa̱n, kó ínchjín xí je síndondaa̱ tsꞌasꞌien nínga kjima ndiꞌibixaa̱n, sꞌe̱ kisichjá nga̱ntjo̱a̱a̱.

¹¹ Ti̱chaa̱n jachó ínchjín xo̱ngò xí ngasee̱, sꞌe̱ bi̱ katsó: «¡Ndi̱a̱, ndi̱a̱, chjáxꞌéjne̱ nga̱ntjo̱a̱a̱!»

¹² Sꞌe̱ bi̱ kiꞌmií: «Ja̱koxi̱ ni xi xiánjnúꞌun, bejín an ꞌyání jún.»

¹³ Kósꞌe̱ bi̱ katsó Kjisoo̱: –Kuíni, ngata̱ tsjayojoféjínjnú, ngatꞌa̱ yàjínjnú ni̱xtjin ko̱jo chi̱bo̱a̱ nga kjo̱e̱ꞌe ndií nda̱ xi̱ꞌii̱n.

Bi̱ tsꞌén íjñá chi̱bo̱a̱ Kjisoo̱ énkjiín to̱o̱n

¹⁴ Ngatꞌa̱ nínga botixómá Néná xikónií ngo nda̱ xi kjin kijí, sꞌe̱ tsíchji̱a̱a̱ já mosoo̱, kó katsꞌénkꞌasꞌiee̱n ni xi tjiín.

¹⁵ Kó ngo moso̱ xi katsjaá ún to̱n talentoo̱, ingo xi jó katsjaá, sꞌe̱ ingo xi ngo katsjaá, nga ngo nga ngo katsjaá xikótsꞌèn ka̱maa̱ sa̱ꞌínxájo̱ kui to̱o̱n, sꞌe̱ kjin kijí ngijee̱.

¹⁶ Kó nda̱ xi katseꞌeé ún to̱n talentoo̱ kijí kó katsꞌénxájo̱, kó ngi ún katsꞌén ngase,

¹⁷ kó nda̱ xi katseꞌeé jó to̱n talentoo̱, ngi jó katsꞌén ngase.

¹⁸ Ta̱nga nda̱ xi ngo tsi katseꞌeé, ngo ti̱xa̱ katsꞌén tꞌanangii̱, sꞌe̱ ki̱a̱ íjña ꞌma to̱o̱n ndi̱a̱a̱.

¹⁹ Kó ngije jaꞌa kjín ni̱xtjin, ndi̱a̱ xi kjin kijií jeꞌekón nginií já mosoo̱, tsi̱ꞌe̱ nga sa̱ꞌínjo̱ xki̱.

²⁰ Kó jachó nda̱ xi ún to̱n talentoo̱ katseꞌeé, kó jachójo̱ ngi ún xi katsꞌén, sꞌe̱ bi̱ katsó: «Ndi̱a̱, ún má to̱n xi kiniꞌínkꞌasꞌínní, kꞌi̱e̱ tikón kꞌi̱e̱e̱, kó ngi ún má xi katsꞌen an.»

²¹ Sꞌe̱ ndi̱a̱a̱, bi̱ katsoó: «Ndakjiꞌi, ngo moso̱ xi nda ko̱jo xi maꞌniátakón boá ji, kó nga nda kichíi̱n ni chiboa xi katsjaa, tsie ngase nina xchíi̱n. ¡Ja̱bíꞌi̱n, kó nijan si̱ꞌantsjà!»

²² Sꞌe̱ jachó nda̱ moso̱ xi jó to̱n talentoo̱ katseꞌeé, sꞌe̱ bi̱ katsó: «Ndi̱a̱, jó ma to̱n xi katseꞌéní, kꞌi̱e̱ tikón kꞌi̱e̱e̱, kó ti̱ kꞌi̱e̱ tikón ngi jó xi katsꞌen an.»

²³ Sꞌe̱ ndi̱a̱a̱, bi̱ katsoó: «Ndakjiꞌi, ngo moso̱ xi nda ko̱jo xi maꞌniátakón boá ji, kó nga nda kichíi̱n ni chiboa xi katsjaa, tsie ngase nina xchíi̱n. ¡Ja̱bíꞌi̱n, kó nijan si̱ꞌantsjà!»

²⁴ Kó nga jachó nda̱ xi ngo to̱n talentoo̱ katseꞌeé, bi̱ katsó: «Ndi̱a̱, jè be an nga ngo nda̱ xi ta̱nisién tajá ji, kó nga chjeꞌéꞌyé ji ni xi maxchá xi ikꞌítji̱e̱jín ji, ko̱jo nga chjeꞌéꞌyé ji ni xi maxchá xi akatítsejejín,

²⁵ kuíni nga katsakjon an, kó íjña ꞌma an to̱n talentóo̱ ngi̱jin tꞌanangii̱, kꞌi̱e̱ tikón kꞌi̱e̱e̱ ni xi tse̱.»

²⁶ Sꞌe̱ ndi̱a̱a̱, bi̱ katsoó: «Moso̱ xi ndajín, ko̱jo xi tsiꞌé, tsi ja̱bo̱a̱ je ye ji nga foaꞌaꞌyá an ni xi maxchá xí itji̱e̱jín an, ko̱jo nga foaꞌaꞌyá an ni xi maxchá xí atitsojojín an.

²⁷ Kó kuíni nga chjiéngá tsi kui já xí chji̱a̱ni bankoo̱ kiniꞌínkꞌasꞌíi̱n to̱nna, ki̱a̱ ka̱ma nga kjoéꞌe̱ an, kiniꞌánkꞌasꞌienna to̱nna ko̱jo ndyi̱ko̱n.»

²⁸ Sꞌe̱ bi̱ katsoó xota̱ xi síndo ki̱a̱a̱: «Chje̱ꞌéxínjnúu̱ to̱n talentoo̱, kó xi je tie kamá tsi̱ꞌe̱, kui te̱ꞌéjnúu̱.

²⁹ Ngatꞌa̱ xi tjiín, ko̱e̱ꞌeé, kó tsie ngase kꞌuieé, kó xi jmíjiín, ngaskande ni xi tjiín xi chje̱ꞌéxiín.

³⁰ Kó kui moso̱ xi májiín tsꞌénxaá, ꞌna̱xiéjnú ndi̱tsen nínga jñoó, kó ki̱a̱ boá nínga skja̱ndá ko̱jo nínga skji̱ni̱e̱ya ṉꞌni̱u̱ kui xotaa̱.»

Bi̱ tsꞌén katsóyà Kjisoo̱ kjo̱a̱a̱ nga ka̱majeé ngayeje na̱xi̱ńdaá

³¹ Kjiꞌanga ndií nda̱ xi̱ꞌii̱n kjo̱e̱ꞌéjo̱ kjo̱a̱jee̱ ko̱jo ngayeje ndítsjiee̱, kjiꞌá boá nga ko̱tíxoma nínga tikón kjo̱a̱jee̱,

³² kó xota̱ xi chji̱a̱ni ngayeje na̱xi̱ńdá kjo̱e̱ꞌekíndyiá kje̱n, kó xín ku̱i̱ꞌíndo xota̱ xi ndajín, kó xín ku̱i̱ꞌíndo xota̱ xi nda, xikó má tsꞌén ngo nda̱ xi koo̱n cho̱tsa̱nga̱a̱ nga foaꞌájin cho̱tsa̱nga̱a̱ ngi̱jii̱n tindsoo̱,

³³ kó cho̱tsa̱nga̱a̱ nga kixi̱i̱ ku̱i̱ꞌíndo, sꞌe̱ tindsoo̱ nga skoón ku̱i̱ꞌíndo.

³⁴ Kósꞌe̱ nda̱ Ree̱, bi̱ ka̱tso̱o̱ ngayeje xi síndo nga kixi̱i̱: «Ja̱bíjnúꞌun, jún xi je katsꞌénchikonñéjnú Na̱ꞌmina, chjábéjnú ngi̱ndie nínga botíxoma xi je tikónndajnú ndeskande koó nga ítsꞌi̱yanii̱ nga kamánda nga̱sondiee̱.

³⁵ Ngatꞌa̱ kamábojóna, kó jún katseꞌéjnúꞌun nichinie, kamáxíndána, kó jún katseꞌéjnúꞌun ni xi ꞌyó, kistsoꞌbásón an, kó jún katseꞌéndièjnúꞌun ngo ngi̱ndie nínga jajña an,

³⁶ kistsoꞌbákjiꞌixtí an, kó jún katseꞌéjnúꞌun ńjño xi tsajá an, kamáꞌonna, kó jún tsangínchonjnúꞌun, kisꞌijña an ndo̱bo̱a̱yà, kó jún tsangíntsitsijénjnúꞌun.»

³⁷ Kósꞌe̱ xota̱ xi kixi̱i̱, bi̱ ka̱tso̱ nga ku̱i̱chji̱a̱: «Ndi̱a̱, kjiꞌání nga kamábojoó, kó ji̱n katseꞌéjne̱ nichinie, axa̱ kjiꞌání nga kamáxíndaá, kó ji̱n katseꞌéjne̱ ni xi ꞌyó.

³⁸ Axa̱ kjiꞌání nga kamáyàjne̱ nga kisꞌiṉtje̱sén, kó ji̱n katseꞌéjne̱ nínga tsjayojo, axa̱ kjiꞌání nga kisꞌiṉtje̱kjiꞌixtí, sꞌe̱ ji̱n katseꞌéjne̱ ńjño.

³⁹ Axa̱ kjiꞌání nga kamáꞌoón, axa̱ kjiꞌání nga kixindyin ndo̱bo̱a̱yà, kó ji̱n tsangínchonjne̱.»

⁴⁰ Sꞌe̱ bi̱ ka̱tso̱o̱ kui nda̱ Ree̱ nga ku̱i̱chji̱a̱: «Ja̱koxi̱ ni xi xiánjnúꞌun nga ngayeje ni xi kiniꞌánjo̱jnú ngo nda̱ ntsꞌié án xi ꞌniú ni̱ma̱a̱, ja̱ án boá xi bo̱a̱ kiniꞌánjo̱jnúꞌun.»

⁴¹ Kósꞌe̱ bi̱ ka̱tso̱o̱ xota̱ xi síndo nga skoón: «Ti̱xiónboaꞌájnúꞌun jún xota̱ xi ndajín, tangínjnú nínga tikón ndiꞌí xí jmíni̱xtjin kꞌo̱ xi je tikónnda xi tsi̱ꞌe̱ xindajín ndiabloo̱ ko̱jo ndítsjiee̱.

⁴² Ngatꞌa̱ nga kamábojóna, kó katseꞌéjínjnúꞌun ni xi chinie, kamáxíndána, kó katseꞌéjínjnúꞌun ni xi ꞌyó,

⁴³ kistsoꞌbásón an, kó katseꞌéjínjnúꞌun ngo ngi̱ndie nínga jajña an, kistsoꞌbákjiꞌixtí an, kó jmí ńjño katseꞌéjínjnúꞌun, kamáꞌonna ko̱jo ndo̱bo̱a̱yà kisꞌijña an, kó tsangíntsitsijenjínjnúꞌun.»

⁴⁴ Kósꞌe̱ kui jaá, bi̱ ka̱tso̱o̱: «Ndi̱a̱, kjiꞌání nga kamáyàjne̱ nga kamábojoó, nga kamáxíndaá, nga kisꞌiṉtje̱sén ji, nga katsjaxtí, nga kamáꞌoón, nga kixindyin ndo̱bo̱a̱yà kó kiniꞌánsénjínjne̱.»

⁴⁵ Kósꞌe̱ bi̱ ka̱tso̱o̱ nda̱ ree̱: «Ja̱koxi̱ ni xi xiánjnúꞌun nga ngayeje ni xi kiniꞌánjínjnúu̱ ngo nda̱ ntsꞌié án xí ꞌniú ni̱ma̱a̱, ja̱ ti̱nde an kiniꞌánjínjnúꞌun kui nii̱.»

⁴⁶ Kó kui xota̱ xi ndajiín, ka̱majeé nínga jmíni̱xtjin kju̱i̱e̱ jeé, kó xota̱ xi kixi̱i̱ sa̱ko̱ó kjo̱a̱mindyion ngatsjéni̱xtjii̱n.