Matioo̱ 23 - Xo̱jo̱n eén Néná

Kjisoo̱ bi̱ tsꞌén yíngítaꞌin já fariseoo̱ ko̱jo já chji̱ni̱e̱kjo̱a̱kitii̱

¹ Kósꞌe̱ Kjisoo̱ tsíchji̱a̱jo xota̱ kjiín ko̱jo xota̱ tsi̱ꞌe̱, kó bi̱ katsoó:

² –Já chji̱ni̱e̱kjo̱a̱kitii̱ ko̱jo já fariseoo̱ kuí xí tjiín xá nga ndyi̱bokoyá kjo̱a̱botíxomaa̱ Moisee̱.

³ Kuíni nga jún chjiéngá ko̱nda̱ꞌyáꞌénjnú, kó ti̱ꞌánjnú ngayeje ni xi ka̱tso̱jnú, ta̱nga ngata̱ niꞌánjínjnú xikótsꞌèn kuí xotaa̱, ngatꞌa̱ ngo ni xi chji̱a̱ kó kje̱ꞌe ni xi tsꞌén.

⁴ Ngatꞌa̱ kjo̱a̱botíxoma xi ꞌniú niꞌin ꞌbínieé xotaa̱, ta̱nga kui jaá nde ngo tsja tsꞌéntíyàjiín tsi̱ꞌe̱ nga sa̱ꞌínkjatjosón kui kjo̱a̱botíxomaa̱.

⁵ Ngatꞌa̱ tsꞌén ngayeje nii̱, tsi̱ꞌe̱ nga xotaa̱ sku̱i̱e̱ ko̱jo ku̱i̱ꞌíndikón, kuíni nga tjín én xí kjitꞌa xo̱jo̱n eén Néná xi ꞌbítꞌa ngo ndí xo̱jo̱n, sꞌe̱ ngo koxa̱ tji̱xin mindyiá, sꞌe̱ xtjien ko̱jo tjiaa̱ ꞌbítꞌa, kó sa yiꞌi, sa yiꞌi tsꞌén kuí koxa̱a̱ ko̱jo tsje̱je̱é ńjñoo̱, tsi̱ꞌe̱ nga ngayeje xotaa̱ sa̱ꞌínkjó nga ta̱nisién bendikón Néná,

⁶ kó tsꞌéntjó kui yáxíríe̱ xi tjón síndo nínga chinie ṉño̱o̱, ko̱jo ki̱a̱ ndiꞌa nínga ndokjo̱a̱ eén Néná,

⁷ ko̱jo mejeén nga ndikóntsꞌèn si̱ꞌantindé ndi̱tse̱e̱n, ko̱jo nga xotaa̱ mostro̱ ka̱tso̱o̱.

⁸ Ta̱nga jún ngata̱ chiyájínjnúu̱ nga mostro̱ ka̱tso̱jnú xotaa̱, ngatꞌa̱ ta̱ ngo tsí má Mostroo̱, kó ngayejejnú ta̱ ngo ntsꞌiejnú.

⁹ Kó ngata̱ ꞌyàjín xi na̱ꞌmi ꞌmíjnú kꞌi̱e̱ tꞌanangii̱, ngatꞌa̱ ngo tsí má xi Na̱ꞌmijnú, kó Néná boá, kó ndiꞌakꞌajmi jàn tikón.

¹⁰ Ngata̱ boeꞌéndièjínjnú nga tjín xota̱ xi mostro̱ ka̱tso̱jnú, ngatꞌa̱ ta̱ ngo tsí má Mostro̱jnú, kó Kristoo̱ boá.

¹¹ Kó kui nda̱ xi ꞌniú nkꞌa ngase xaá, kuí xí sa̱ꞌínseén ngayeje xota̱ xi ngasee̱.

¹² Ngatꞌa̱ xota̱ xi je kꞌo̱xié yojoo̱, ni̱ma̱kjo̱a̱ si̱ꞌanjo̱, kó xi ni̱ma̱kjo̱a̱ kꞌo̱xié yojoo̱, kuí xí je ko̱ꞌna̱xié.

¹³ ¡Ni̱ma̱ xò jún já chji̱ni̱e̱kjo̱a̱kiti ko̱jo já fariseo̱, jókje̱n! Ngatꞌa̱ jún ndyi̱ꞌbíchjajnúu̱ nga̱ntjo̱a̱a̱ nínga botíxomaa̱ Néná xota̱ xi ngasee̱, kó ngaskande jún bitjasꞌi̱e̱njínjnú, kó ti̱nde boeꞌéndièjínjnúu̱ nga kꞌo̱sꞌien xi je ndyi̱ꞌbosꞌiee̱n.

¹⁴ ¡Ni̱ma̱ xò jún já chji̱ni̱e̱kjo̱a̱kiti ko̱jo já fariseo̱, jókje̱n! Ngatꞌa̱ jún ndyi̱niꞌánkjiéjnú ndiꞌaa̱ ínchjín kꞌán xi je kꞌien xi̱ꞌii̱n, kó ti̱xꞌi̱a̱n achichí ndojó ndyi̱niꞌánjnú énjnú nga ndyi̱ndokjo̱a̱jnúu̱ Néná. Ta̱ngatꞌanii̱ kui nii̱ nga tsie ngase ka̱majéjnú.

¹⁵ ¡Ni̱ma̱ xò jún já chji̱ni̱e̱kjo̱a̱kiti ko̱jo já fariseo̱, jókje̱n! Ngatꞌa̱ ndyi̱mongínjnú ngi̱jin ndá ko̱jo ngi̱jin kixí, tsi̱ꞌe̱ nga sa̱kójnú ngo xota̱ xi ko̱e̱je̱tji̱ngi kjo̱a̱na̱ngo̱xi̱jnú, sꞌe̱ ngije kasakojnú, jó ndi̱yà ngase nga ndií ndo̱bo̱a̱ṉkꞌi̱e̱e̱n ndyi̱niꞌánjnú kui xotaa̱ ta̱bo̱a̱jiín jún.

¹⁶ ¡Ni̱ma̱ xò jún, xota̱ xi bokoó ndi̱yà xota̱ ti̱ka̱! Nga bi̱ ꞌmíjnú: «Tsi tjín káꞌá xota̱ xi ngiboanéná ka̱tso̱, kó na̱ngo̱xi̱i̱ ku̱i̱ꞌíjñangi eén, jmí ni chjíjiín, ta̱nga tsi tjín káꞌá xi eén ku̱i̱ꞌíjñangi to̱nsinié xi tjiín na̱ngo̱xi̱i̱, chjiéngá sa̱ꞌínkjatjosón ni xi ka̱tso̱.»

¹⁷ ¡Xota̱ ti̱ka̱ chi̱ni! Mí ni xi chjí ngasenii̱, a to̱nsinieé, axa̱ na̱ngo̱xi̱ xi tsꞌéntsjie kui to̱nsinieé.

¹⁸ Ti̱ bi̱ ti̱ ꞌmíjnú nga: «Tsi tjín káꞌá xota̱ xi ngiboanéná ka̱tso̱, kó tsi ni xi tikón ṉchandikoón Néná ku̱i̱ꞌíjñangi eén, jmí ni chjíjiín, ta̱nga tsi eén ku̱i̱ꞌíjñangi ni xi je kiniꞌánkꞌasꞌiee̱n Néná, chjiéngá sa̱ꞌínkjatjosón ni xi katsó.»

¹⁹ ¡Xota̱ ti̱ka̱ kitikjo̱a̱! Mí ni xi chjí ngasenii̱, a ni xi je kiniꞌánkꞌasꞌiee̱n Néná, axa̱ ṉchandikoón Néná xi tsꞌéntsjie kui ni xi je kiniꞌánkꞌasꞌiee̱n Néná.

²⁰ Kjiꞌanga tjín xí ngiboanéná ka̱tso̱, kó ṉchandikoón Néná ku̱i̱ꞌíjñangi eén, jmí tsi ta̱ ṉchandikoón Néná tsí tsꞌénꞌbijñángí, ko̱jo ngayeje ni xi tikoón kui ṉchaa̱n boá,

²¹ kó xi na̱ngo̱xi̱i̱ tsꞌénꞌbijñángí eén, jmí tsi ta̱ na̱ngo̱xi̱i̱ tsí xi tsꞌénꞌbijñángí, ko̱jo Néná xi tikón ki̱a̱a̱ xí tsꞌénꞌbijñángí nga.

²² Kó xi ndiꞌakꞌajmi jàn tsꞌénꞌbijñángí eén, nínga botixómá Néná xí tsꞌénꞌbijñángí, kó ti̱ tsꞌénꞌbijñángí Néná kui xi tikónsón kui ngi̱ndie ndikoón nga.

²³ ¡Ni̱ma̱ xò jún já chji̱ni̱e̱kjo̱a̱kiti ko̱jo já fariseo̱, jókje̱n! Ngatꞌa̱ boeꞌéjnú jún ngo tjín xi tie nga úchaán xka̱ mentaa̱, xka̱ anii̱ ko̱jo xka̱ kominoo̱, ta̱nga niꞌánkjatjosónjínjnú kjo̱a̱botíxoma xi ꞌniú nkꞌaá kjo̱a̱kitii̱: Nga kixi̱ ka̱majnú, nga ni̱ma̱ ka̱majnú ngayeje xotaa̱, ko̱jo nga sꞌi̱jinjnú Néná. Chjiéngá si̱ꞌan kui nii̱, ta̱nga ti̱ chjiéngá si̱ꞌan ni xi ingoo̱ nga.

²⁴ ¡Ni̱ma̱ xòjnú jún xota̱ ti̱ka̱ xi bokoó ndi̱yà xotaa̱, nga niꞌánkaꞌájnú ngo ndi̱ꞌi̱ xi kꞌo̱kajin ndáfoa xi ndyi̱ꞌyòjnú, ta̱nga jnájénjnú ngo cho̱toꞌoyitsꞌe̱n!

²⁵ ¡Ni̱ma̱ xò jún já chji̱ni̱e̱kjo̱a̱kiti ko̱jo já fariseo̱, jókje̱n! Ngatꞌa̱ niꞌántsjiejnú nga̱xto̱n ti̱bo̱a̱jnú ko̱jo boso̱jnú, ta̱nga ngi̱yaa̱ tjikítsie má ni chejé ko̱jo kjo̱a̱ꞌontakón.

²⁶ ¡Nda̱ fariseo̱ ti̱ka̱, tjón mára ti̱ꞌintsjiejín ngi̱yaa̱ bosoo̱ ko̱jo ti̱bo̱a̱a̱, sꞌe̱ bo̱a̱ tsꞌén nga ka̱matsjie nga̱xto̱n nga!

²⁷ ¡Ni̱ma̱ xò jún já chji̱ni̱e̱kjo̱a̱kiti ko̱jo já fariseo̱, jókje̱n! Ngatꞌa̱ jún ja̱koxi̱ nga bo̱a̱ kónjnú xikó maá ngo nga̱tsjo̱ó xí tiboa niꞌánkꞌi xi achichí tsjá ꞌbé, ta̱nga ngi̱yaa̱ tjikítsie má ńdaa̱ ini̱ma̱ ko̱jo ni xi ndándí.

²⁸ Ti̱ bo̱a̱ ti̱ kónjnú jún, ja̱koxi̱ nga kje̱njnú bokó nga xota̱ kixi̱jnú ngi̱jii̱n xotaa̱, ta̱nga ngi̱jii̱n ini̱ma̱jnú tjikítsie maá kjo̱a̱jókje̱n ko̱jo ni xi ndajín.

²⁹ ¡Ni̱ma̱ xò jún já chji̱ni̱e̱kjo̱a̱kiti ko̱jo já fariseo̱, jókje̱n! Ngatꞌa̱ niꞌándajnúu̱ nga̱tsjo̱ó já chji̱ni̱e̱ꞌe̱én Néná, kó niꞌánnaxójnú nínga kjiyojonijín xota̱ xi kixi̱ kamá,

³⁰ kó bi̱ ꞌmíjnú: «Tsi ji̱n xi kixindyionjne̱ ni̱xtjii̱n xota̱ tji̱e̱ xcháná, nijánjínra̱ kamájne̱ kui xota̱ xi katsꞌénkꞌién já chji̱ni̱e̱ꞌe̱én Néná.»

³¹ Bo̱a̱ tsꞌén ti̱ juún xi ndyi̱bokojnú yojojnú nga jún xí tji̱e̱e̱ xota̱ xi katsꞌénkꞌién já chji̱ni̱e̱ꞌe̱én Néná.

³² ¡Ja̱, ti̱ꞌando̱jojnú tsobo̱a̱, ni xi je ítsꞌi̱yanii̱ xota̱ xi xchájnú!

³³ ¡Xota̱ xi ndisojnú ko̱jo xota̱ xi ndajínjnú, xikó maá ye̱! Kótsꞌèn ka̱majnú ku̱i̱yòjnúu̱ jeé ndo̱bo̱a̱ṉkꞌi̱e̱e̱n.

³⁴ Kuíni nga an sangiyájnúꞌun já chji̱ni̱e̱ꞌe̱én Néná, já chji̱ni̱e̱ xi kjínkón ko̱jo chji̱ni̱e̱kjo̱a̱kiti, ta̱nga tjín kuí jaá xi si̱ꞌankꞌiénjnú ko̱jo tjín xí kjótꞌajnú kro, tjín xí kjoájnúu̱ ngi̱ya ndiꞌa nínga ndokjo̱a̱ eén Néná, kó kje̱ꞌe xi ku̱i̱yotjingíjnúu̱ xki̱ na̱xi̱ńdá,

³⁵ kó bo̱a̱ tsꞌén nga jún sꞌi̱niéjnú nga ka̱majéjnú kjo̱a̱a̱ ngayeje jiín xota̱ xi kixi̱ xi kiniꞌánkꞌién kꞌi̱e̱ tꞌanangii̱, xi yaꞌanii̱ ndeskande nga kiniꞌánkꞌién Abe̱ nda̱ xi kixi̱i̱, ngaskande nga kiniꞌánkꞌién Sakariyaa̱, xi ndií Berekiyaa̱ kamá, kui nda̱ xi kiniꞌánkꞌiénjnú jún ngi̱ndyió na̱ngo̱xi̱i̱ ko̱jo ṉchandikoón Néná.

³⁶ Ja̱koxi̱ boá nga xota̱ xi tjín ngotꞌe̱ sa̱tíjeé nga ku̱i̱ꞌíchjí kjo̱a̱a̱ ngayeje kui nii̱.

Bi̱ tsꞌén kamándasee̱n Kjisoo̱ kjo̱a̱a̱ xota̱ na̱xi̱ńdáꞌniú Jerusale̱n

³⁷ ¡Jún xota̱ na̱xi̱ńdáꞌniú Jerusale̱n, jún xota̱ na̱xi̱ńdáꞌniú Jerusale̱n, xi niꞌánkꞌiénjnú já chji̱ni̱e̱ꞌe̱én Néná, kó ndi̱jo̱ foyàjnú xota̱ xi nangiyajnú! ¡Kótjín ndi̱yà kamámejénna itikojnúꞌun, xikótsꞌèn ꞌbitíkó ndií xo̱nda̱na̱aa̱n ngindie nga̱a̱, kó kamámejénjínjnú!

³⁸ Ngotꞌe̱ ꞌne̱, ngi̱ndiejnú kꞌuijñámasien.

³⁹ Ngatꞌa̱ xiyàjnúꞌun nga ngiti̱ xcha̱jínjnúꞌun, ngaskande nga kjo̱chó ni̱xtjin nga bi̱ kꞌuínjnú: «Ngatamachikonñé xi ndibání ngajoo̱ Ndi̱a̱ná.»