Matioo̱ 21 - Xo̱jo̱n eén Néná

Bi̱ tsꞌén tsꞌasꞌien Kjisoo̱ na̱xi̱ńdáꞌniú Jerusale̱n

¹ Kó ngije ma kjachó tiña na̱xi̱ńdáꞌniú Jerusale̱n, jachó na̱xi̱ńdáꞌniú Betfaje̱, kó ki̱a̱ kisꞌińdo tji̱ngi̱ nínga tjín yáꞌoliboo̱, kó Kjisoo̱ katsangiya jó xota̱ tsi̱ꞌe̱,

² xi bi̱ katsoó: –Tangínjnú kui ndí nangi xi tikón kje̱e̱n, kó ngije ku̱i̱tjásꞌi̱e̱njnú kui ngi̱ndiee̱, sa̱kójnú ngo bórró chjo̱on ko̱jo ngo ndí bórró xíꞌín xi ndyi̱a̱taꞌniú, chjándójnú, kó ndibájo̱jnúꞌun.

³ Kó tsi tjín xí kó ka̱tso̱jnú, bi̱ tꞌínjnúu̱: Ndi̱a̱a̱ xí chjieén, kó jaskan xò tsja̱ꞌóyá nginíjnú.

⁴ Kó kui nii̱ kamá tsi̱ꞌe̱ nga jatjosón ni xi katsó nda̱ chji̱ni̱e̱ꞌe̱én Néná, nga bi̱ tsꞌén ítꞌa xo̱jo̱n:

⁵ Bi̱ tꞌínjnúu̱ xota̱ na̱xi̱ńdáꞌniú Jerusale̱n: «Jànꞌa̱n, ki̱a̱ tsꞌéndibákoón nda̱ Rée̱, nda̱ xi ntꞌiéꞌeén, kó ngo bórró tikónsoón, ngo ndí bórró, ndií cho̱ xi bonkꞌá chꞌià.»

⁶ Kó xota̱ tsi̱ꞌe̱ Kjisoo̱ xi katsangiya, katsꞌén ni xi kiꞌmií.

⁷ Jachójo̱ bórró chjo̱ón, ko̱jo ndí bórró chichií, kó kui jaá ísoón ńjñoo̱, sꞌe̱ Kjisoo̱ kisꞌijñasoón kui cho̱o̱.

⁸ Kó xota̱ kjiín yítie ńjñoo̱ ngi̱ya ndi̱ya̱à, kó kje̱ꞌe xí tjiaa̱ yá tsatie, kó ngi̱ya ndi̱ya̱à yíyojo.

⁹ Kó xota̱ xi tjimátjoón ko̱jo xi yajátji̱ngii̱ askjandáyà má, nga bi̱ katsó: ¡ꞌNa̱xiéꞌéjne̱, ji xota̱ tji̱e̱e̱ Ndabi̱! ¡Ngatamachikonñé xi ndibání ngajoo̱ Ndi̱a̱ná! ¡Kó ꞌna̱xiéꞌéjne̱ jàn ndiꞌakꞌajmi jàn!

¹⁰ Kó nga tsꞌasꞌien Kjisoo̱ na̱xi̱ńdáꞌniú Jerusale̱n, ngayeje xotaa̱ kamákjaán, kó tjín xí bi̱ katsó nga asíyá: –ꞌYání bo̱a̱ kui nda̱a̱.

¹¹ Kó xota̱ kjiín, bi̱ katsó: –¡Kjisoo̱, nda̱ chji̱ni̱e̱ꞌe̱én Néná boá, nda̱ xi chji̱a̱ni na̱xi̱ńdáꞌniú Nasaree̱t, nangii̱ Ngalilea̱!

Bi̱ tsꞌén tsꞌaxié Kjisoo̱ já xí ndyi̱botiñá cho̱ ndi̱tsee̱n na̱ngo̱xi̱i̱

¹² Kó nga jachó Kjisoo̱ ndi̱tsen na̱ngo̱xi̱i̱ Néná tsangatji̱ngii̱ ngayeje xota̱ xi ndyi̱botiñá ko̱jo xi ndyi̱ꞌbotsie ni, kó tsꞌajmitójó yámíxa̱a̱ xota̱ xi ndyi̱bosíkjo to̱n, ko̱jo tsꞌajmitójó yáxíríee̱ xota̱ xi ndyi̱botiñá tójoo̱,

¹³ kó bi̱ katsoó: –Jè kjitꞌa xo̱jo̱o̱n nínga bi̱ tsoó: «Ndiꞌana, ndiꞌa nínga ku̱i̱chji̱a̱a̱ Néná ngayeje xota̱ kꞌuiín», ta̱nga jún ndo̱bo̱a̱a̱ chejé jè kiniꞌánjnú.

¹⁴ Kó xota̱ xi ti̱ka̱ ko̱jo xi fí ni̱ma̱ tꞌa, jachókoón Kjisoo̱ ki̱a̱ na̱ngo̱xi̱i̱, kó katsꞌéndaya.

¹⁵ Já ngito̱ko̱o̱ chináꞌmii̱ ko̱jo já chji̱ni̱e̱kjo̱a̱kitii̱ achichí katsꞌénxchán nga kamábe kjo̱a̱ndikón xí katsꞌén Kjisoo̱, ko̱jo nga tsintꞌié nga jákjíndií bi̱ katsó nga askjandáyà ki̱a̱ ngi̱ya na̱ngo̱xi̱i̱: «¡ꞌNa̱xiéꞌéjne̱, ji xota̱ tji̱e̱e̱ Ndabi̱!»

¹⁶ Sꞌe̱ kui jaá, bi̱ katsoó Kjisoo̱: –A ndaꞌyé ji ni xi ndyi̱tsó kui jákjíndií. Sꞌe̱ Kjisoo̱, bi̱ katsó: –Jo̱o̱n, ntꞌié an. Ta̱nga, kó a kji̱e̱ niꞌányàjínjnú ni xi tsó xo̱jo̱o̱n: Tsꞌoa jákjíndií ko̱jo ndínda xi sꞌe̱ ndyi̱boki chikii̱, katsꞌéndaya cha̱n cha̱n Néná só xi ndaa̱ kui.

¹⁷ Sꞌe̱ jatjo Kjisoo̱ na̱xi̱ńdáꞌniú Jerusale̱n, kó na̱xi̱ńdáꞌniú Betania̱ kijí nínga jaꞌaa̱ ni̱xtji̱e̱n.

Bi̱ tsꞌén katsꞌénxchánjo̱ Kjisoo̱ ngo yáꞌingo̱ xi jmí to tsjájín

¹⁸ Kó nga ta̱jño̱ó, Kjisoo̱ kijí nginí na̱xi̱ńdáꞌniú Jerusale̱n, kó kamábojoó.

¹⁹ Kó nga kamábe ngo yá xí boajaá toꞌingo̱ tꞌa ndi̱ya̱à, kijí nínga tikón kui yaá, kó jmí to kasakojiín, ta̱ xka̱ tsí xi tjiín yaá. Kósꞌe̱ Kjisoo̱, bi̱ katsoó kui yaá: –¡Nga nginijánjín ko̱a̱ja̱a̱ to! Kó ti̱ kjiꞌa kixí kui yaá.

²⁰ Kó nga kamábe kui ni xi kamaá, xota̱ tsi̱ꞌe̱ Kjisoo̱ kijíndikoón, kó bi̱ katsó nga asíyaá Kjisoo̱: –Kótsꞌèn nga kixí kjiꞌá má kui yáꞌingoo̱.

²¹ Sꞌe̱ Kjisoo̱, bi̱ katsoó: –Ja̱koxi̱ ni xi xiánjnúꞌun nga tsi ꞌniú sꞌijinjnú Néná, kó nga jmí tsi jó tsi ján kꞌuijñájnúu̱ ini̱ma̱jnú, jmí tsi ta̱kuítsí nii̱ yáꞌingoo̱ xi ka̱majnú, ngaskande ka̱ma tsi bi̱ kꞌuínjnúu̱ kui tji̱ngi̱i̱: «Ti̱xín ji kꞌi̱e̱e̱, kó tjajmijin yojòo̱ ngi̱jii̱n ndáchíkoón», kó bo̱a̱ ka̱ma.

²² Kó ngayeje ni xi chji̱a̱ꞌajnú nga ko̱ndókjo̱a̱jnúu̱ Néná, tsi sꞌijinjnú, sa̱kójnú.

Bi̱ kamá nga jáxaá asíyaá Kjisoo̱ ꞌyá xí katsjáxaá

²³ Kó nga jachó Kjisoo̱ ndi̱tsen na̱ngo̱xi̱i̱, kó tji̱e̱nga tsꞌénbokoyá ki̱a̱a̱, jachókón tiñaa̱ já ngito̱ko̱o̱ chináꞌmii̱ ko̱jo já xchá ngito̱ko̱o̱ na̱xi̱ńdaá, kó bi̱ katsó nga asíyaá: –Mí xá xí tjiín nga kui nii̱ niꞌín ji. Kó ꞌyá xí katsjaá kui xaá.

²⁴ Sꞌe̱ Kjisoo̱, bi̱ katsoó: –Ti̱ bo̱a̱ ti̱ tsꞌén kosíyájnúꞌun ngo ni, kó tsi ka̱ma kꞌuiyájnúꞌun, ti̱ bo̱a̱ ti̱ tsꞌén ka̱ma xiyàjnúꞌun mí xá xí tjínna nga tsꞌen an kui nii̱.

²⁵ ꞌYá xí katsangiya Jua̱ xi botíndaá nga atíndá xotaa̱. A Néná, axa̱ xotaa̱. Kósꞌe̱ kui jaá ítsꞌi̱yanii̱ nga bi̱ katsoó xkjín: –Tsi Néná xí katsangiya tsi kꞌuíi̱n, «Kó ánní nga kisꞌijinjínjnú», ka̱tso̱ná,

²⁶ kó tsi xotaa̱ xí katsangiya tsi kꞌuíi̱n, ndokón xota̱ na̱xi̱ńdaá, ngatꞌa̱ ngayeje xotaa̱ xi katsó nga Juaa̱ xí ngo nda̱ chji̱ni̱e̱ꞌe̱én Néná.

²⁷ Sꞌe̱ bi̱ katsó kui jaá: –Yàjínjne̱. Kó Kjisoo̱, bi̱ katsó nga: –Ja̱ ti̱ xiyàjínjnúꞌun mí xá xí tjínna nga tsꞌen an kui nii̱ nga.

Bi̱ tsꞌén íjñá chi̱bo̱a̱ Kjisoo̱ énkjiín nda̱ xi síndoo̱ jó ndí

²⁸ Sꞌe̱ Kjisoo̱, bi̱ katsó nga asíyaá: –Kótsꞌèn bee̱takónjnú kjo̱a̱a̱ kui nii̱. Ngo nda̱ kisꞌijñaa̱ jó ndí, kó ngo xi bi̱ katsoó: «Ndí, tꞌen niꞌinxé jí ngotꞌe̱ ngi̱ndiena nínga maxchá tostsi̱je̱è.»

²⁹ Ta̱nga kui ndií, bi̱ katsó: «¡Jmí, mejénjínna kjuín án!» Ta̱nga ngi̱chí sájín katsꞌénkꞌoyá yojoo̱ kui ndií, kó kijí nínga katsangiya na̱ꞌmii̱.

³⁰ Sꞌe̱ kijíkoón ndií xi ingoo̱, kó ti̱ bo̱a̱ ti̱ katsoó nga. Kó kui ndií, bi̱ katsó: «Ka̱ma kjuín án na̱ꞌmi.» Ta̱nga kijíjín kui ndií.

³¹ ꞌYání nga jó kui ndií xi katsꞌén ni xi katsoó na̱ꞌmii̱. –Xi tjón kanangiyaa̱. Katsó xota̱a̱ Kjisoo̱. Kó Kjisoo̱, bi̱ katsó: –Ja̱koxi̱ ni xi xiánjnúꞌun nga kui já xí foaꞌáꞌyá to̱n xi machjítjé nii̱ ko̱jo ínchjínmasieén, kuí xí tjón kꞌo̱sꞌien nínga botixómá Néná, ta̱bo̱a̱jiín jún.

³² Ngatꞌa̱ Jua̱ xi botíndaá jeꞌe tsi̱ꞌe̱ nga kui xi ko̱kóyájnú ndi̱ya̱à kjo̱a̱kixi̱i̱, ta̱nga jún kisꞌijinjínjnú, ta̱nga kui já xí foaꞌáꞌyá to̱n xi machjítjé nii̱ ko̱jo ínchjínmasieén kisꞌijinrií. Ta̱nga jún, ndatsi kamáyàjnú ngayeje kui nii̱, ti̱nde bo̱a̱ tsꞌén kiniꞌánkꞌoyàjínjnú yojojnú nga kisꞌijinjnú.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín moso̱ xi ndajiín

³³ Ndaꞌyájnú ingo énkjín: Ngo nda̱ íjñanda ngo jno̱ nínga maxchá tostsi̱jè, kó íchjáꞌyá, sꞌe̱ katsꞌénda ngo ngi̱ndie nínga ꞌnaxié ndaá kui too̱, kó ti̱ katsꞌénda ngo tarié xi nkꞌa, kósꞌe̱ katsjá chjínangií já xí tsꞌén kuí xaá. Sꞌe̱ kui nda̱ xi katsjá chjínangí kui ngi̱ndiee̱ kjin kijí.

³⁴ Kó nga jachó ni̱xtjin nga je kamáxchaá kui too̱, nda̱ xi tsi̱ꞌe̱ kui ngi̱ndiee̱ katsangiya mosoo̱, tsi̱ꞌe̱ nga kui já xí ndyi̱tsꞌènxá kuí ngi̱ndiee̱ ku̱i̱ꞌíchjií ni xi índajo̱.

³⁵ Ta̱nga kui jaá, katsoboá já moso̱ xi katsangiya ndi̱a̱a̱ kui ngi̱ndiee̱, ngo xi yeꞌeé, ngo xi katsꞌénkꞌién, sꞌe̱ ngo ndi̱jo̱ tsꞌaya.

³⁶ Ndi̱a̱a̱ kui ngi̱ndiee̱ ti̱ katsangiya nginí ngase moso̱, kó ti̱ bo̱a̱ ti̱ kamátaꞌin.

³⁷ Ti̱chaa̱n nga fetꞌa katsangiya ndií, ngatꞌa̱ bi̱ katsó: «Kui jaá sku̱i̱e̱ndikón ndína.»

³⁸ Ta̱nga kui já xí ndyi̱tsꞌènxájin kui ngi̱ndiee̱, nga kamábe ndií ndi̱a̱a̱ kui ngi̱ndiee̱, bi̱ katsoó xkjín: «Kuí xi̱ꞌbi̱ xi tsi̱ꞌe̱ ka̱ma ngayeje kui ngi̱ndiee̱, ta̱sá si̱ꞌankꞌién, ki̱a̱ ka̱maa̱ nga tsa̱ñá ka̱ma ngayeje kui nii̱.»

³⁹ Kó kui jaá katsoboá ndií ndi̱a̱a̱ kui ngi̱ndiee̱, kó katsꞌénkꞌién, sꞌe̱ tsꞌaxié nínga tjitjíe̱ tostsi̱je̱è.

⁴⁰ Sꞌe̱ Kjisoo̱, bi̱ katsó: Nga kjo̱chó ndi̱a̱a̱ ngi̱ndie nínga tjitjíe̱ tostsi̱je̱è, mí xí sa̱ꞌínjo̱ kui jaá.

⁴¹ Sꞌe̱ bi̱ katsó kui xotaa̱: –Sa̱ꞌínkjié ngayeje kui jaá, kó ni̱ma̱jín ka̱maa̱, sꞌe̱ kje̱ꞌe xota̱ tsja̱á chjínangí kui ngi̱ndiee̱, xi ku̱i̱ꞌíchjií nga kjo̱chó ni̱xtjin xikó kjiꞌi ni xi tsoboaá.

⁴² Sꞌe̱ Kjisoo̱, bi̱ katsó: –A jmíni̱xtjin kiniꞌányàjnú xo̱jo̱n eén Néná nínga bi̱ tsoó. Ndi̱jo̱ xi katsꞌénchꞌó já chji̱ni̱e̱xo̱ó, kuí xí ndi̱jo̱ ngaꞌniuú ndiꞌaa̱ kamá. Néná boá xi katsꞌén kui nii̱, kó achichí fíndikoón ndyikón.

⁴³ Ja̱ kuíni nga tsꞌénxiyàjnúꞌun nga nínga botixómá Néná chja̱ꞌáxínjnú jún, kó xota̱ na̱xi̱ńdá xí tsjá to xí ko̱e̱ꞌeé.

⁴⁴ Kó kjo̱a̱a̱ kui ndi̱jo̱o̱, ta̱ ꞌyání xi kꞌo̱kasón kui ndi̱jo̱o̱ ka̱ma xi̱, kó tsi tjín xí kꞌo̱kanieé kui ndi̱jo̱o̱ ka̱ma ndso̱ko̱a̱n.

⁴⁵ Nga tsintꞌié kuí énkjín xi tsíchji̱a̱ Kjisoo̱, já ngito̱ko̱o̱ chináꞌmii̱ ko̱jo já fariseoo̱, kamákjiín nga kuí boá xi tjíꞌmií kui nii̱,

⁴⁶ kó kamámejeén nga katsoboá Kjisoo̱, ta̱nga katsakjónnií ngatꞌa̱ xotaa̱ kisꞌijinrií nga nda̱ chji̱ni̱e̱ꞌe̱én Néná boá Kjisoo̱.