Matioo̱ 20 - Xo̱jo̱n eén Néná

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín já xí ndyi̱tsꞌènxá nínga maxchá tostsi̱je̱è

¹ Nínga botíxomaa̱ Néná, xikónií ngo nda̱ xi achichí ta̱jñó kijíngase já xí sa̱ꞌínxaá ngi̱ndiee̱ nínga maxchaá tostsi̱je̱è.

² Ngije índajo̱ kui jaá nga ngo to̱n ndenario̱ tsja̱á nga ngo ni̱xtjin, katsangiya ngi̱ndie nínga sa̱ꞌínxá.

³ Mara̱ tsi ta̱ chi̱bo̱a̱ nijan nga ta̱jñó, nda̱ xi tsi̱ꞌe̱ xaá jatjo nginí ndiꞌaa̱, kó kamábe nga kje̱ꞌe já xí xió síndo ndi̱tse̱e̱n xi aa̱,

⁴ kó bi̱ katsoó: «Tangínni̱ꞌanxájnú ngi̱ndiena nínga maxchá tostsi̱je̱è, kó nda tsꞌén kꞌuichjíjnúꞌun.» Jo̱ꞌo katsó kui jaá, sꞌe̱ kijítsꞌénxá.

⁵ Nga kamándisꞌueé, ko̱jo nga kamá chi̱bo̱a̱ jàn nga kamángixón, nda̱ xi tsi̱ꞌe̱ xaá ti̱ bo̱a̱ ti̱ katsꞌén nginí.

⁶ Kó ngije kamá chi̱bo̱a̱ ún nga kamángixoón, ti̱ kijí nginí ndi̱tse̱e̱n, kó ti̱ kamábe nginí ngase já xí aa̱, kó bi̱ katsoó nga asíyaá: «Míkjo̱a̱a̱ nga jmí ni ndyi̱niꞌánjínjnú nga ngo ni̱xtjii̱n.»

⁷ Sꞌe̱ bi̱ katsó kui jaá: «Ngatꞌa̱ jmíjín xi tsjáxájne̱», kó kui nda̱ xi tsi̱ꞌe̱ xaá, bi̱ katsoó: «Tangínni̱ꞌanxájnú ndatsa jún ki̱a̱ nínga maxchá tostsi̱je̱è, kó nda tsꞌén ka̱machjíjnú.»

⁸ Kó ngije kamájñoó, ndi̱a̱ xi tsi̱ꞌe̱ xaá tsíchji̱a̱a̱ nda̱ ngito̱ko̱o̱ xaá, kó bi̱ katsoó: «Ndokjoée̱ já xí ndyi̱tsꞌènxaá kó tꞌíchjíi̱, tjón má kui tꞌíchjíi̱ xi jeꞌetsꞌénxá nga fetꞌani, sꞌe̱ nga fetꞌa tꞌíchjíi̱ xi tjón jeꞌetsꞌénxaá.»

⁹ Sꞌe̱ jachókjaꞌáchjí já xí mara̱ chi̱bo̱a̱ ún nga jachótsꞌénxaá, kó ngo to̱n ndenario̱ kamáchjií.

¹⁰ Kó nga jaꞌáchjí já xí ta̱jñó jachótsꞌénxaá, katsꞌénkjó nga tsie ngase ka̱machjií kuí, ta̱nga ta̱ ngo tsi to̱n ndenario̱ katseꞌeé nga.

¹¹ Kó ngije iskjíbé to̱o̱n, ítsꞌi̱yanii̱ nga tsíchji̱a̱taꞌin nda̱ xi tsi̱ꞌe̱ xaá,

¹² nga bi̱ katsó: «Já xí chi̱bo̱a̱ ún jachótsꞌénxá ngo tsí ora̱ katsꞌénxá, kó ti̱ bo̱a̱ ti̱ kjiꞌi ikꞌíchjíi̱ xikoó ji̱n xi nga ngo ni̱xtjii̱n kiniꞌánxájne̱ ngi̱jin ndoboaá.»

¹³ Ta̱nga nda̱ xi tsi̱ꞌe̱ xaá, bi̱ katsoó ngo kui jaá: «Nda̱ amingo̱, ndakjíꞌí ni xi tjítsꞌenjoo̱. A mí tsi nga ngo ni̱xtjin ngo to̱n ndenario̱ kꞌuichjií kixiaan nga ikꞌínda tsi̱ꞌe̱ nga si̱ꞌinxé.

¹⁴ Ja̱ chjábé jí chjíi̱, sꞌe̱ tꞌen ꞌne̱, ta̱nga án xí mejénna nga ti̱ bo̱a̱ ti̱ kjiꞌi kꞌuichjíi̱ nda̱ xi katsꞌénxá nga fetꞌaa̱ xikó kjiꞌi tsꞌéntsjaa ji nga.

¹⁵ A jmíjínna kjo̱a̱nda nga ta̱ ni xi mejénna sa̱ꞌìi̱n ni xi tjínna. Axa̱ a kjimaꞌonkon ji kjo̱a̱a̱ nga nda an xota̱.»

¹⁶ Sꞌe̱ Kjisoo̱ katsꞌénkjietꞌa eén, nga bi̱ katsó: Kuíni nga kui xota̱ xi tjón ngotꞌe̱, kuí xí kju̱i̱e̱tꞌa ka̱ma, kó xi fetꞌa ngotꞌe̱, kuí xí tjón ka̱ma ngijee̱, ngatꞌa̱ achichí má xi ko̱ndókjo̱a̱a̱, ta̱nga ta̱ chiboa tsí má xi xtjo̱ꞌójin.

Kjisoo̱ bi̱ tsꞌén katsóyà nginí xi ma jaán ndi̱yà nga ko̱yà

¹⁷ Kó nga ndyi̱fínijíngí Kjisoo̱ xtji̱e̱e̱n na̱xi̱ńdáꞌniú Jerusale̱n, tsíchji̱a̱tꞌaxiín nga tiejó xota̱ tsi̱ꞌe̱, kó bi̱ katsoó:

¹⁸ –Tsitsíjenjnúu̱ nga kꞌi̱e̱ ndyi̱mongínnijíngí xtji̱e̱e̱n na̱xi̱ńdáꞌniú Jerusale̱n, kó ndií nda̱ xi̱ꞌii̱n si̱ꞌankꞌasꞌiee̱n já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, kó kuí xí tsja̱akjo̱a̱ nga si̱ꞌankꞌien,

¹⁹ kó si̱ꞌankꞌasꞌiee̱n xota̱ xi jundío̱jín, tsi̱ꞌe̱ nga ko̱jno̱kie, ko̱jo ko̱ꞌon, ko̱jo ko̱ótꞌa kro, ta̱nga xi ma jaán ni̱xtjin kjo̱a̱ꞌáꞌyaá.

Na̱aa̱n Sandiyaá ko̱jo Juaa̱ bi̱ tsꞌén tsíꞌaá ngo kjo̱a̱nda Kjisoo̱

²⁰ Kósꞌe̱ kijíkóntiñaa̱ Kjisoo̱ na̱aa̱n ndií Sebedeoo̱ ko̱jo ndií kui xota̱chjo̱on, asiéntikoó kje̱n Kjisoo̱, kó tsíꞌaá ngo kjo̱a̱nda.

²¹ Sꞌe̱ Kjisoo̱, bi̱ katsoó: –Mí xí mejeén. Sꞌe̱ bi̱ katsó kui xota̱chjo̱on: –Te̱ꞌé ji kjo̱a̱ tsi̱ꞌe̱ nga nínga ko̱ti̱xome ji kꞌuíndotꞌaa̱ nga jó ndína, ngo ngatꞌíjñá nga fojníi̱, sꞌe̱ ngo ngatꞌíjñá nga skóo̱n.

²² Kósꞌe̱ Kjisoo̱, bi̱ katsoó: –Yàjínjnú ni xi ndyi̱chjiáꞌájnú. A kjo̱chíkjo̱a̱jnú nga on xcha̱jnú xikótsꞌèn on xcha̱na an, kó a kjo̱chíkjo̱a̱jnú kjo̱a̱ni̱ma̱ xi kjo̱a̱ꞌatio an. Kó bi̱ katsó kui jaá: –Jo̱o̱n kjo̱chíkjo̱a̱jne̱.

²³ Kó Kjisoo̱, bi̱ katsó: –Ja̱koxi̱ nga jún xchíkjo̱a̱jnú xikótsꞌèn chꞌo xꞌi̱a̱na ko̱jo kui kjo̱a̱ni̱ma̱ xi kjo̱a̱ꞌatio an, ta̱nga nga ki̱a̱ ku̱i̱ndyiontꞌajnúꞌun nga skónna ko̱jo tsi nga fojnína, ánjín tsoboána nga tsja an kjo̱a̱, Na̱ꞌmina xí je tikónndaa̱ ꞌyá xí tsja̱á kui ngi̱ndie xi je íjñanda.

²⁴ Kó nga tsintꞌié kuí nii̱ xota̱a̱ Kjisoo̱ xi ngi tiee̱, achichí katsꞌénxchánjo̱ nga jó kui já ntsꞌiee̱.

²⁵ Kósꞌe̱ Kjisoo̱ tsíchji̱a̱a̱ xota̱ xi ngasee̱, kó bi̱ katsoó: –Jè yàjnú nga kui nga̱sondiee̱, xota̱ xi botixómaá nangii̱, tsjandièjiín xotaa̱ nga ta̱xkiya sa̱ꞌín ngo ni tsi tsja kjo̱a̱jiín. Ko̱jo nga já xí ngito̱ko̱o̱ na̱xi̱ńdaá xi nkꞌa xaá ta̱ ni xi mejénrií tsꞌénjo̱ xota̱ na̱xi̱ńdaá.

²⁶ Ta̱nga chjiénjín nga bo̱a̱ ka̱ma ngi̱jinjnú, ta̱sá kuí xota̱ xi mejeén nga ꞌniú nkꞌa ngase ka̱ma ngi̱jinjnú, kuí xí chjiéngá sa̱ꞌínseén xota̱ xi ngasee̱,

²⁷ kó kui xi mejeén nga tjón ka̱ma ngi̱jinjnú kuí xí chjiéngá sa̱ꞌínseén xota̱ xi ngasee̱,

²⁸ xikó maá nga ndií nda̱ xi̱ꞌii̱n, jmí tsi jeꞌe kui nga̱sondiee̱ tsi̱ꞌe̱ nga si̱ꞌansee̱n, ta̱sá jeꞌe tsi̱ꞌe̱ nga kui xi sa̱ꞌínseén xotaa̱, ko̱jo tsi̱ꞌe̱ nga tsja̱á yojoo̱ tsi̱ꞌe̱ nga ku̱i̱ꞌíchjítáꞌín kjín xota̱.

Bi̱ tsꞌén katsꞌéndaya Kjisoo̱ jó já xí ti̱ka̱

²⁹ Kó nga jatjo Kjisoo̱ ko̱jo xota̱ tsi̱ꞌe̱ na̱xi̱ńdáꞌniú Jeriko̱, achichí má xota̱ xi kijítji̱ngii̱.

³⁰ Kó jó já xí ti̱ka̱ xi síndotꞌa ndi̱ya̱à nga tsintꞌié nga Kjisoo̱ xi kjoaꞌa, bi̱ katsó nga askjandáyà: ¡Ndi̱a̱, ji xi xota̱ tji̱e̱e̱ Ndabii̱ ji, ngatamani̱ma̱a̱ ji̱n!

³¹ Kó xota̱ kjín xi tjimájo̱ Kjisoo̱, katsꞌénxchánjo̱ tsi̱ꞌe̱ nga xió kꞌuíndo, ta̱nga ta̱sá ma ꞌniú askjandáyà ngase, nga bi̱ katsó nginí: ¡Ndi̱a̱, ji xi xota̱ tji̱e̱e̱ Ndabii̱, ngatamani̱ma̱a̱ ji̱n!

³² Kó kasasien Kjisoo̱, tsíchji̱a̱a̱ nga jó já xí ti̱ka̱a̱, kó bi̱ katsoó: –Mí xí ka̱ma sa̱ꞌinjnúꞌun nganda tsa̱jún.

³³ Sꞌe̱ bi̱ katsó kui jaá: –Ndi̱a̱, mejénjne̱ nga xtjóxꞌá ndyikonjne̱.

³⁴ Kósꞌe̱ Kjisoo̱ kamáni̱ma̱a̱ kui jaá, katsꞌénjo̱ ndyi̱ko̱n, kó ti̱ kjiꞌa kamátsijee̱n, sꞌe̱ kui jaá kijítji̱ngii̱ Kjisoo̱ ngijee̱.