Matioo̱ 19 - Xo̱jo̱n eén Néná

Bi̱ tsꞌén akóyá Kjisoo̱ kjo̱a̱a̱ xota̱ xi je ixán kó ꞌbíndo nginí xkjín

¹ Kó ngije katsó kui nii̱ Kjisoo̱, jatjo nangi Ngalilea̱, kó kijí xtji̱e̱e̱n nangi Jundea̱ xi tikón xtji̱e̱e̱n xi ingoboaá ndejèꞌ Jorndaa̱n.

² Kó achichí má xota̱ xi kijítji̱ngii̱, kó ki̱a̱ katsꞌéndaya kjín xota̱ xi oo̱n.

³ Kósꞌe̱ já fariseoo̱ jachókón tiñaa̱ Kjisoo̱, tsi̱ꞌe̱ nga askotꞌayákón, sꞌe̱ bi̱ katsoó: –A tsjandiè kjo̱a̱kitii̱ nga ngo nda̱ xi je ixán sa̱ꞌínkjié kjo̱a̱bixaa̱n ta̱ngatꞌanii̱ ngo ni.

⁴ Ta̱nga Kjisoo̱, bi̱ katsó: –A kji̱e̱ niꞌányàjínjnú ni xi tsó xo̱jo̱n eén Néná nga kuí xí katsꞌéndaná ndeskande nga ítsꞌi̱yanii̱ nga̱sondiee̱, «nga xi xi̱ꞌin ko̱jo xi chjo̱on katsꞌénda».

⁵ Kó bi̱ katsó: «Kuíni nga nda̱ xi̱ꞌii̱n ku̱i̱ꞌíjñá na̱ꞌmii̱ ko̱jo na̱aa̱n, kó kꞌuijñájo̱ chjo̱ón, kó ta̱ ngo tsí yojo ka̱ma nga joó.»

⁶ Kó bo̱a̱ tsꞌén nga jè ngiti̱ jójín má, ta̱ ngo tsí yojo ma nga joó, kó kuíni nga ni xi je katsꞌéngo Néná, ka̱májiín kꞌo̱xiékjo xotaa̱.

⁷ Sꞌe̱ já fariseoo̱, bi̱ katsó nga asíyaá: –Ja̱ kó míkjo̱a̱a̱ nga Moisee̱ íjñá ngo kjo̱a̱botíxoma xi tsó nga ka̱ma xò tsí ngo nda̱ xi je ixán, skjinínkꞌá ngo xo̱jo̱n nínga je je kjo̱a̱bixaa̱n, kó nga ka̱ma xò ku̱i̱ꞌíjñá chjo̱ón.

⁸ Sꞌe̱ Kjisoo̱, bi̱ katsó: –Ta̱ngatꞌanii̱ nga tá tajá ini̱ma̱jnú kuíni nga Moisee̱ katsjandiè, tsi̱ꞌe̱ nga ka̱ma kꞌuijñá xi chjo̱ón, ta̱nga ndeskande koó nga ítsꞌi̱yanii̱ nga̱sondiee̱ jmí tsi bo̱a̱ kamá.

⁹ Kó án xiyàjnúꞌun nga tsi ngo nda̱ ku̱i̱ꞌíjñá chjo̱ón, kó tsi kjo̱a̱a̱ nga kjo̱a̱tondo̱jín, kó tsi kje̱ꞌe chjo̱on ku̱i̱xanjo̱, tsꞌén bendikónjín kjo̱a̱bixaa̱n, kó kui nda̱ xi ku̱i̱xanjo̱ chjo̱on xí ikꞌíjñaá, ti̱ tsꞌén bendikónjín kjo̱a̱bixaa̱n nga.

¹⁰ Sꞌe̱ xota̱ tsi̱ꞌe̱ Kjisoo̱, bi̱ katsó: –Tsi kui nii̱ maa̱ ngo nda̱ xi ku̱i̱xanjo̱ chjo̱ón, ja̱ ta̱sá ndakjiꞌi tsi ku̱i̱xánjín.

¹¹ Ta̱nga Kjisoo̱, bi̱ katsó: –Kui nii̱, jmí tsi ngayeje xota̱ xi makjiín, ta̱kuítsí xota̱ xi Néná je katsjaá tsi̱ꞌe̱ nga ka̱makjiín.

¹² Ngatꞌa̱ tjín xota̱ xi bo̱a̱ tsꞌén katsen nga ka̱májín ku̱i̱xan, kó ti̱ tjín já kꞌán xi xá kiniꞌánkꞌánni, kó ti̱ tjín já kꞌán xi ta̱xà katsꞌénkꞌánni yojoo̱ ta̱ngatꞌanii̱ xaá Néná. Xi ka̱makjiín kui nii̱, ngatamakjiín.

Kjisoo̱ bi̱ tsꞌén tsíchji̱a̱tjé jákjíndí xi̱xi̱i̱

¹³ Kósꞌe̱ jachóchinií Kjisoo̱ jákjíndí xi̱xi̱ tsi̱ꞌe̱ nga ku̱i̱ꞌíjñasoón tsja, ko̱jo tsi̱ꞌe̱ nga ku̱i̱chji̱a̱tjé, ta̱nga xota̱ tsi̱ꞌe̱ Kjisoo̱ katsꞌénxchánjo̱ xota̱ xi jachójo̱ kui jákjíndií.

¹⁴ Ta̱nga Kjisoo̱, bi̱ katsó: –Te̱ꞌéndièjnúu̱ kui jákjíndií nga kjo̱e̱ꞌe̱kónna, kó ngata̱ ꞌbíchjájínjnúu̱, ngatꞌa̱ ndiꞌakꞌajmi nínga botíxomaa̱ Néná kuí xí ka̱ma kꞌo̱sꞌien kui xi xikoó kui jákjíndií.

¹⁵ Kó Kjisoo̱ ngije íjñasoón tsja kui jákjíndií, jatjo kui ngi̱ndiee̱.

Bi̱ tsꞌén tsíchji̱a̱ni̱jmìjo Kjisoo̱ ngo nda̱ cho̱n xo̱ngò

¹⁶ Kó ngo nda̱ jachókoón Kjisoo̱, kó bi̱ katsoó nga asíyaá: –Ji Mostro̱, mí ni xi nda sa̱ꞌin an tsi̱ꞌe̱ nga sa̱kóna kjo̱a̱mindyion ngatsjéni̱xtjii̱n.

¹⁷ Sꞌe̱ Kjisoo̱, bi̱ katsoó: –Míkjo̱a̱a̱ nga an bosíyéní kjo̱a̱a̱ ni xi ndaa̱. Ta̱ ngototo Néná xí nda, ta̱nga tsi mejeén ku̱i̱tjásꞌi̱n ji kjo̱a̱mindyion ngatsjéni̱xtjii̱n, ti̱ꞌinkjatjosén ji kjo̱a̱botíxomaa̱ Néná.

¹⁸ Sꞌe̱ bi̱ katsó kui nda̱ xo̱ngo̱ò: –Ñá kjo̱a̱botíxoma. Kó Kjisoo̱, bi̱ katsoó: –Ka̱májín si̱ꞌinkꞌin ji xota̱, ka̱májín si̱ꞌintꞌée̱ kjo̱a̱ chjóo̱n, ka̱májín si̱ꞌinchejé, ka̱májín kꞌuindísétaꞌin ji ngo xota̱.

¹⁹ Che̱ndikín jí na̱ꞌmíi̱ ko̱jo na̱áa̱n, ti̱ꞌintjé ji xotaa̱, xikó má tsꞌén tjoó yojòo̱.

²⁰ Sꞌe̱ bi̱ katsó kui nda̱ xo̱ngo̱ò: –Ngayeje kui nii̱ je katsꞌenkjatjosón an ndeskande koó nga nda̱chí an. Mí ni xi chaja ngasena nga sa̱ꞌin an.

²¹ Sꞌe̱ Kjisoo̱, bi̱ katsoó: –Tsi mejeén nga kixi̱ ka̱ma ji, tꞌen, kó tatíñí ji ngayeje ni xi tjiín, kó to̱o̱n kui nii̱ xota̱ ni̱ma̱a̱ te̱ꞌée̱, kó bo̱a̱ tsí tsꞌén nga kꞌuieé ngo kjo̱a̱cho̱n ndiꞌakꞌajmi jàn, sꞌe̱ ndibétji̱ngíní ngijee̱.

²² Ta̱nga nga tsintꞌié kuí nda̱ xo̱ngo̱ò kui eén, achichí ndasen kamaá nga kijí, ngatꞌa̱ achichí ni tjiín.

²³ Kósꞌe̱ Kjisoo̱, bi̱ katsoó xota̱ tsi̱ꞌe̱: –Ja̱koxi̱ ni xi xian an nga achichí niꞌin kjiꞌi nga ngo nda̱ cho̱n kꞌo̱sꞌien ndiꞌakꞌajmi nínga botíxomaa̱ Néná.

²⁴ Ingo ndi̱yà xiyà nginíjnúꞌun nga ta̱sá niꞌínjín kjiꞌi nga ngo cho̱toꞌoyitsꞌe̱n kjo̱a̱ꞌaya ngo ti̱xa̱a̱ ngo ńdo, ta̱bo̱a̱jiín nga ngo nda̱ cho̱n kꞌo̱sꞌien nínga botíxomaa̱ Néná.

²⁵ Kó achichí kijíndikoón xota̱ tsi̱ꞌe̱ Kjisoo̱ nga tsintꞌié ni xi katsó, kó ja̱kꞌi̱e̱ ja̱ngaján, bi̱ katsoó xkjín: –Ja̱ ꞌyání xi kjo̱tjoꞌa tsobo̱a̱.

²⁶ Kjisoo̱ askoꞌá kui jaá, sꞌe̱ bi̱ katsoó: –Ka̱májiín sa̱ꞌín kui nii̱ ngo xota̱, ta̱nga Néná ngayeje nii̱ xi ka̱maa̱ sa̱ꞌín.

²⁷ Kósꞌe̱ bi̱ katsó Peé: –Ja̱ jè yé ji, nga ji̱n ngayeje nii̱ ikꞌíjñámasienjne̱, kó kꞌi̱e̱ timatji̱ngijne̱ ji. Kó mí ni xi sa̱kójne̱.

²⁸ Kó Kjisoo̱, bi̱ katsó: –Ja̱koxi̱ ni xi xiánjnúꞌun nga, nga kjo̱chó ni̱xtjin nga ngayeje nii̱ ka̱matja̱tsi̱e̱ya, kjiꞌanga ndií nda̱ xi̱ꞌii̱n ko̱tíxoma nínga tikón kjo̱a̱jee̱, jún xi timatji̱ngijnúꞌun, ki̱a̱ ku̱i̱ndyionsónjnú nga tiejó yáxíríe̱ nínga botíxomaa̱, tsi̱ꞌe̱ nga bo̱a̱ kꞌuínjnú tsi tjiín ko̱jo tsi jmíjiín jé nga tiejó tji̱e̱e̱ xota̱ xi chji̱a̱ni Israee̱l.

²⁹ Kó ta̱ ꞌyání xi ta̱ngatꞌanii̱ jaꞌénna nga íjñámasien ndiꞌaa̱, ko̱jo ntsꞌi̱e̱, ko̱jo ndichja, ko̱jo na̱ꞌmii̱, ko̱jo na̱aa̱n, ko̱jo ndií, ko̱jo tꞌanangii̱, úchán bo̱a̱ kjiꞌi ngase ko̱e̱ꞌeé kui nii̱, kó sa̱ko̱ó kjo̱a̱mindyion ngatsjéni̱xtjii̱n.

³⁰ Kjín má xota̱ xi tjón ngotꞌe̱, xi fetꞌa ka̱ma, kó kjín má xota̱ xi fetꞌa ngotꞌe̱, xi tjón ka̱ma.