Matioo̱ 17 - Xo̱jo̱n eén Néná

Bi̱ tsꞌén kasasikjo a̱sie̱én Kjisoo̱

¹ Jun ni̱xtjin ngijee̱, Kjisoo̱ kijíjo̱tꞌaxín Peé, Sandiyaá ko̱jo ntsꞌi̱e̱ kui nda̱a̱ xi ꞌmí Juaa̱, kó ngo tji̱ngi̱ nkꞌa kijíjo̱ soboá kui jaá,

² kó ngindyi̱ko̱n kui jaá kje̱ꞌe kisꞌie Kjisoo̱, kó kje̱n ꞌna̱ kamá xikó maá tsꞌueé, kó ńjño xi yajá tiboa xó xó kamá.

³ Kó ki̱a̱ jatjokjàtꞌaa̱ nda̱ chji̱ni̱e̱ꞌe̱én Néná xi ꞌmí Moisee̱ ko̱jo Eliyaa̱ nga ndyi̱chji̱a̱jo Kjisoo̱.

⁴ Kósꞌe̱ Peé, bi̱ katsoó Kjisoo̱: –Ndi̱a̱, ata̱ ndakjíꞌí nga kꞌi̱e̱ tindyión xtín, tsi mejeén ka̱ma si̱ꞌanda ján ndiꞌańkꞌién: Ngo tse̱, ngo tsi̱ꞌe̱ Moisee̱, sꞌe̱ ngo tsi̱ꞌe̱ Eliyaa̱.

⁵ Tji̱e̱nga tsꞌénchji̱a̱ ngase Peé, ngo ṉdi̱ ꞌna̱ kitsjien, kó ki̱a̱ kasasien nínga síndo kui jaá, sꞌe̱ ngi̱jin kui ṉdi̱i̱ kandaꞌyá ngo nda̱, xi bi̱ katsó: –Kuí xi̱ꞌbi̱ xi ndí tjóna, tsjátjínna ngatꞌaa̱ kui, ndaꞌyájnúu̱.

⁶ Kó nga tsintꞌié kuí nii̱ xota̱ tsi̱ꞌe̱ Kjisoo̱, achichí katsakjónní, kó ítꞌa maá kje̱n tꞌanangii̱.

⁷ Kó Kjisoo̱ jachókón tiñaa̱ kui jaá, katsꞌénjo̱, kó bi̱ katsoó: –Ti̱sítji̱e̱njnú, ngata̱ ndakonjínmájnú.

⁸ Kó nga askotsijennijíngí kui jaá, kamábe nga ta̱kuítsí Kjisoo̱ xi tikón soboá.

⁹ Kó nga ndyi̱fotjajen tji̱ngi̱i̱, Kjisoo̱, bi̱ katsoó: –Ngata̱ ꞌyàjín xi ꞌmíyajnú ni xi kamáyàjnú ngaskande nga ndií nda̱ xi̱ꞌii̱n, kjo̱a̱ꞌáꞌyaá ngi̱jii̱n xota̱ xi je jesoón.

¹⁰ Kó xota̱ tsi̱ꞌe̱ Kjisoo̱, bi̱ katsó nga asíyaá Kjisoo̱: –Míkjo̱a̱a̱ nga já chji̱ni̱e̱kjo̱a̱kitii̱ tsó nga tjón xò Eliyaa̱ kjo̱e̱ꞌe.

¹¹ Sꞌe̱ Kjisoo̱, bi̱ katsó: –Ja̱koxi̱ boá nga tjón Eliyaa̱ kjo̱e̱ꞌe, kó kuí xí sa̱ꞌíndaya ngayeje nii̱.

¹² Ta̱nga an xiyàjnúꞌun nga Eliyaa̱ jè jeꞌe, kó kui xotaa̱ kamábejín nga kui, kó ta̱ ni xi mejénrií katsꞌénjo̱, ti̱ bo̱a̱ ti̱ tsꞌén tsie kjo̱a̱ni̱ma̱ kjo̱a̱ꞌatio ndií nda̱ xi̱ꞌii̱n ngi̱ya tsja kui xotaa̱.

¹³ Kósꞌe̱ xota̱ tsi̱ꞌe̱ Kjisoo̱ kamákjiín nga kjo̱a̱a̱ Jua̱ xi botíndaá boá xi tsꞌénchji̱a̱ Kjisoo̱.

Bi̱ tsꞌén katsꞌéndaya Kjisoo̱ ngo nda̱ xi tjíjii̱n ngo a̱siénni̱xtjin xindajín

¹⁴ Kó nga jachó nginí nínga síndo xota̱ kjiín, ngo nda̱ jachókón tiñaa̱ Kjisoo̱ xi asiéntikoó kje̱n, nga bi̱ katsoó:

¹⁵ –Ndi̱a̱, ngatamani̱ma̱a̱ ndína kó tasíke̱je ji, achichí ndajín tjiín, kó xikoó tsi ꞌmeya, ꞌbitíkjá ꞌbińña, kó achichí je kjín ndi̱yà nga ꞌbókajin ngi̱jin ndiꞌií ko̱jo ngi̱jin ndáfoaa̱.

¹⁶ Jè jéꞌe̱jóo̱ xota̱ tse̱, ta̱nga kamájiín katsꞌéndaya.

¹⁷ Kó Kjisoo̱, bi̱ katsó: ¡Xota̱ xi sꞌijinjiín ko̱jo xi ndajín! Ngaskande kjiꞌání nga chjiéngá kotíjña̱jojnúꞌun. Ngaskande kjiꞌání nga ta̱kó sa̱ꞌinchíkjo̱a̱jnúꞌun. ¡Ndibájo̱jnúꞌun kꞌi̱e̱e̱!

¹⁸ Kó Kjisoo̱ katsꞌénxchánjo̱ kui xindajín xi tjíjii̱n kui nda̱a̱, kó jataxiejin yojoo̱, kó ti̱ kjiꞌa kamándaya.

¹⁹ Kósꞌe̱ xota̱ tsi̱ꞌe̱ Kjisoo̱ tsíchji̱a̱jotꞌaxín Kjisoo̱, kó bi̱ katsó nga asíyaá: –Ánní nga ji̱n kamájínjne̱ kaꞌnaxiéjne̱ kui a̱siénni̱xtjin xi ndajiín.

²⁰ Kó Kjisoo̱, bi̱ katsó: –Ngatꞌa̱ ꞌniújín sꞌijinjnú, ngatꞌa̱ ja̱koxi̱ ni xi xiánjnúꞌun nga tsi ndeta̱ chií tsí sꞌijinjnú Néná xikó má tsꞌén xi̱xi̱ xojmaá mostasaa̱, ka̱ma bi̱ kꞌuínjnúu̱ kui tji̱ngi̱i̱: «Xín tꞌen ji», kó xín ko̱e̱je̱, kó ngayeje nii̱ xi ka̱ma si̱ꞌánjnú.

²¹ Ta̱nga kui xkjín xindajiín, ta̱xkiya fotjojín, ta̱ ngototo nga ndokjo̱a̱a̱ Néná ko̱jo nga si̱ꞌankjaꞌá kjindiá yojoná.

Bi̱ tsꞌén katsóyà nginí Kjisoo̱ xi ma jó ndi̱yà nga ko̱yà

²² Kó tji̱e̱nga tikónjo̱ xota̱a̱ nangi Ngalilea̱, Kjisoo̱, bi̱ katsó: Ndií nda̱ xi̱ꞌii̱n ngi̱ya tsja xotaa̱ si̱ꞌankꞌasꞌien,

²³ kó sa̱ꞌínkꞌién, ta̱nga xi ma ján ni̱xtjin kjo̱a̱ꞌáꞌyaá. Kó achichí ndasen kamaá kui jaá kjo̱a̱a̱ kui ni xi kiꞌmií.

Kjisoo̱ bi̱ tsꞌén íchjítjé na̱ngo̱xi̱i̱

²⁴ Kó nga jachó Kjisoo̱ ko̱jo xota̱a̱ ki̱a̱ na̱xi̱ńdáꞌniú Kapernau̱n, já xí ndyi̱foaꞌáchjí to̱n xi machjítjé na̱ngo̱xi̱i̱ kijíkoón Peé, kó bi̱ katsó nga asíyaá: –A ꞌbíchjíjín Mostroo̱ to̱n xi machjítjéni na̱ngo̱xi̱i̱.

²⁵ Sꞌe̱ bi̱ katsó Peé: –Jo̱o̱n, ꞌbíchjí. Kó nga tsꞌasꞌien Peé ngi̱ya ndiꞌaa̱, Kjisoo̱ tjón tsíchji̱a̱, kó bi̱ katsó: –Kótsꞌèn bee̱takín, Ximo̱. Já ree̱ tꞌanangii̱, ꞌyá xí foaꞌáchjií to̱n xi machjítjé nii̱. A xi ndií, axa̱ xota̱ xi kje̱ꞌe.

²⁶ Kó Peé, bi̱ katsó: –Xota̱ xi kje̱ꞌe. Kó bi̱ katsó ngase Kjisoo̱: –Ja̱ xota̱ xi ndií, chjiénjínra̱ nga tjín ni xi ku̱i̱ꞌíchjí.

²⁷ Ta̱nga tsi̱ꞌe̱ nga sa̱ꞌínxchánjín já xí foaꞌáchjí to̱n xi machjítjé nii̱, tꞌen ji ndáchíkoón, kó tjajmijin ji tsitìi̱n, kó ngije kjo̱yaa̱ tji̱o̱ xi tjoón, chjábé jí, kó chjáxꞌé ji tsꞌoa, kó ki̱a̱ sa̱ko̱ó ngo to̱n, chjábé jí kui to̱o̱n, kó tꞌíchjítjéní án ko̱jo tꞌíchjítjé ji yojòo̱.