Matioo̱ 16 - Xo̱jo̱n eén Néná

Bi̱ katsó Kjisoo̱ kjiꞌanga kichjiáꞌaá ngo kjo̱a̱ndikón

¹ Kó já fariseoo̱ ko̱jo já sanduseoo̱ jachókoón Kjisoo̱ tsi̱ꞌe̱ nga skótꞌayákón, kó tsíꞌaá ngo chi̱bo̱a̱a̱ ndiꞌakꞌajmii̱.

² Ta̱nga Kjisoo̱, bi̱ katsoó: –Tsi kjiꞌa ngije ma ngixoón, bi̱ ꞌmíjnú: «Nda chon ka̱ma ni̱xtjii̱n, ngatꞌa̱ iní ngindie jàn.»

³ Kó tsi nga ta̱jño̱ó, bi̱ ꞌmíjnú: Stsé ko̱jo tjo̱ ka̱ma, tsi iní ngindie jàn ko̱jo tsi ṉdi̱ ndyi̱a̱. ¡Xota̱ jókje̱n! Ánní nga yàjnú nga nda, axa̱ ndajín ka̱ma ni̱xtjii̱n nga tsitsijenjnúu̱ kókjiꞌi nkꞌa jàn. Kó ánní nga makjínjínjnú chi̱bo̱a̱ xi tjisꞌíjñá kui ni̱xtjii̱n.

⁴ Kui xota̱ xi ndajiín ko̱jo xi ndyi̱tsꞌèntꞌaa̱ kjo̱a̱ Néná ndyi̱míꞌá ngo chi̱bo̱a̱, ta̱nga jmí chi̱bo̱a̱ ko̱e̱ꞌéjiín, ta̱kuítsí chi̱bo̱a̱a̱ nda̱ chji̱ni̱e̱ꞌe̱én Néná xi ꞌmí Jonaa̱. Sꞌe̱ Kjisoo̱ índomasien kui jaá, kó kijí.

Bi̱ tsꞌén akóyá Kjisoo̱ nga íjñá chi̱bo̱a̱ kjo̱a̱a̱ nisaa̱n nda̱ꞌyo̱paa̱n já fariseoo̱

⁵ Kjisoo̱ ko̱jo xota̱ tsi̱ꞌe̱ jachó ngándá xí ingoboaá ndáchíkoón Ngalileaa̱, ta̱nga kichíyaá nga ko̱a̱ꞌa̱ pan.

⁶ Kósꞌe̱ Kjisoo̱, bi̱ katsoó: –Chónjnú yojojnú kjo̱a̱a̱ nisaa̱n nda̱ꞌyo̱paa̱n já fariseoo̱ ko̱jo já sanduseoo̱.

⁷ Sꞌe̱ bi̱ katsó ja̱kꞌi̱e̱ ja̱ngajaán xkjín xota̱a̱ Kjisoo̱: –Kui nii̱ xi tsó, ngatꞌa̱ jmí pan kichꞌiá jàn.

⁸ Kó Kjisoo̱ kamákjiín kui nii̱, kó bi̱ katsoó: –Míkjo̱a̱a̱ nga jmí panjínjne̱ ndyi̱ꞌmìjnú, jún xota̱ xi sꞌijinjiín.

⁹ A kji̱e̱ makjínjínjnú, kó a jè ngiti̱ foaꞌátsjienjínjnú kui pan xi uún, xi ún mi̱ xota̱ katsꞌenkjaꞌasóo̱n, kó kótjín kamá ni̱se̱nyá xí kachjaꞌáꞌyájnú.

¹⁰ A ti̱nde foaꞌátsjienjínjnú kui pan xi yitoo̱, xi nijón mi̱ xota̱ katsꞌenkjaꞌasóo̱n, kó kótjín kamá ni̱se̱nyá xí kachjaꞌáꞌyájnú.

¹¹ Kótsꞌèn nga kamákjínjínjnú nga kjo̱a̱a̱ panjín xi tsꞌénchji̱a̱ an, nga kixianjnúꞌun nga xchónjnúu̱ yojojnú kjo̱a̱a̱ nisaa̱n nda̱ꞌyo̱paa̱n já fariseoo̱ ko̱jo já sanduseoo̱.

¹² Kósꞌe̱ kjiꞌanga kamákjiín kui jaá nga jmí tsi kjo̱a̱a̱ nisan xi mindyiaa̱ nda̱ꞌyo̱ pan xi tsꞌénchji̱a̱ Kjisoo̱, kuí ni xi katsó kjo̱a̱a̱ ni xi ndajínkjiꞌi xi bokoyá já fariseoo̱ ko̱jo já sanduseoo̱.

Bi̱ tsꞌén katsóyà Peé nga Kjisoo̱ boá xi Kristoo̱

¹³ Kó ngije jachó Kjisoo̱ xtji̱e̱e̱n nangi Sesarea̱ nínga tikón xtitjón Ngiripee̱, bi̱ katsó nga asíyaá xota̱ tsi̱ꞌe̱: –Kó tsó xotaa̱, kjo̱a̱a̱ ꞌyá xóní xi ndií nda̱ xi̱ꞌii̱n.

¹⁴ Kó bi̱ katsó kui jaá: –Tjín xota̱ xi Jua̱ xi botíndaá boá tsó, kje̱ꞌe xí Eliyaa̱ boá tsó, kó kje̱ꞌe xí Jeremiyaa̱ boá tsó, kó ti̱ tjín káꞌá xota̱ xi ngo xò nda̱ chji̱ni̱e̱ꞌe̱én Néná tsó.

¹⁵ Kó Kjisoo̱, bi̱ katsoó: –Kó jún, ꞌyání an, kó ꞌmíjnú.

¹⁶ Kó Ximo̱ Peé, bi̱ katsoó: –Jí xí Kristoo̱, ndií Néná xí tikoón.

¹⁷ Kó Kjisoo̱, bi̱ katsó: –Achichíra̱tsjaa̱ ji Ximo̱, ndií Jonaa̱, ngatꞌa̱ jmí tsi jín ko̱jo tsi yojo xi katsóyaà kui nii̱, Na̱ꞌmina xi tikón ndiꞌakꞌajmii̱ boá xi katsóyaà.

¹⁸ Kó kuíni nga an tꞌíxiaán nga jí xí ꞌmií Peé. Nga̱soón kui ndi̱jo̱o̱ ki̱a̱ sa̱ꞌinda an na̱ngo̱xi̱na, kó ngaꞌniuú kjo̱a̱bo̱yaa̱ ka̱májiín sa̱ꞌiín.

¹⁹ Kó ji tsjaa yibii̱ nínga botíxomaa̱ Néná, kó ngayeje ni xi kuítꞌaꞌní jí tꞌanangii̱, si̱tꞌaꞌniú ndiꞌakꞌajmi jàn, kó ngayeje ni xi chjándé jí tꞌanangii̱ xtjóndó ndiꞌakꞌajmi jàn.

²⁰ Kósꞌe̱ Kjisoo̱ katsóyaà xota̱ tsi̱ꞌe̱, tsi̱ꞌe̱ nga ta̱ꞌyajín xi ka̱tso̱yaa̱ nga Kjisoo̱ xi Kristoo̱.

Bi̱ tsꞌén katsóyàtjón Kjisoo̱ nga ko̱yà

²¹ Ndeskande koó kjiꞌa ítsꞌi̱yanii̱ Kjisoo̱ nga katsóyaà xota̱ tsi̱ꞌe̱, nga chjiéngá ko̱e̱je̱ na̱xi̱ńdáꞌniú Jerusale̱n, kó nga chjiéngá tsie kjo̱a̱ni̱ma̱ kjo̱a̱ꞌatio ngi̱ya tsja já xchá ngito̱ko̱o̱ na̱xi̱ńdaá, ko̱jo já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, kó katsóyà nga chjiéngá si̱ꞌankꞌien, kó nga xi ma jaán ni̱xtjin kjo̱a̱ꞌáꞌyaá.

²² Kósꞌe̱ Peé kijíjo̱tꞌaxín Kjisoo̱, kó bi̱ katsoó nga tajá tsíchji̱a̱jo: ¡Ji Ndi̱a̱, Néná ngatjaꞌáxiín ngayeje kui ni xi̱ꞌba̱! Nga jmí ni ka̱májiín.

²³ Kjisoo̱ askoꞌá Peé, sꞌe̱ bi̱ katsoó: ¡Tji̱taxínboeꞌéní xindajín Satana̱! Ngatꞌa̱ ni xi stingí an kjima ji, ngatꞌa̱ jmí tsi nii̱ Néná xi tifojintakín ji, nii̱ xotaa̱ boá xi tifojintakín.

²⁴ Kósꞌe̱ Kjisoo̱, bi̱ katsoó xota̱ tsi̱ꞌe̱: –Tsi tjín káꞌá xota̱ xi mejeén tsjiengína, ngatsꞌénchíyá yojoo̱, nga kjíbé kroo̱, kósꞌe̱ ngatjandibátjingína.

²⁵ Ngatꞌa̱ ngayeje xi mejeén kꞌo̱xiéꞌá kjo̱a̱mindyioo̱n, kuí xí ta̱sá ko̱yà, kó ngayeje xi ko̱yà ta̱ngatꞌanii̱ an, kuí boá xi sa̱ko̱ó kjo̱a̱mindyioo̱n.

²⁶ Ngatꞌa̱ mí chjínií tsi ngo nda̱ ku̱i̱e̱je̱e̱n ngayeje ni xi tjín kuí nga̱sondiee̱, tsi kichajá ini̱ma̱a̱. Axa̱ mí ni xi tsja̱á ngo nda̱ xi ko̱sítꞌa ini̱ma̱a̱.

²⁷ Ngatꞌa̱ ndií nda̱ xi̱ꞌii̱n, kji̱ndi̱bá nga kji̱ndi̱bájo̱ kjo̱a̱jee̱ Na̱ꞌmii̱ ko̱jo ndítsjiee̱, kó kjiꞌá boá nga tsja̱á nga ngo nga ngo xotaa̱ ta̱ xikó kjiꞌi ni xi katsꞌén.

²⁸ Ja̱koxi̱ ni xi xiánjnúꞌun, nga tjín káꞌá xi síndojinná kꞌi̱e̱e̱, xi ko̱yàjín tsi tjónjín sku̱i̱e̱ nga ndií nda̱ xi̱ꞌii̱n kjo̱e̱ꞌekatixómá.