Matioo̱ 14 - Xo̱jo̱n eén Néná

Bi̱ tsꞌén kꞌien Jua̱ xi botíndaá

¹ Kui ni̱xtjin jàn Erondee̱ nda̱ xi tjiín xá nangi Ngalilea̱, tsintꞌié kjo̱a̱a̱ ni xi katsꞌén Kjisoo̱,

² kó bi̱ katsoó já mosoo̱: –Kjisoo̱, kuí boá xi Jua̱ xi botíndaá xi jaꞌáꞌyá nginií ngi̱jii̱n xota̱ xi jesoón, kuíni nga tjiín ngaꞌniú nga tsꞌén kjo̱a̱ndikón.

³ Kjo̱a̱a̱ nga Erondee̱ boá xi katsangisꞌien ndo̱bo̱a̱yà Juaa̱ ko̱jo xi ítaꞌniú ńꞌniúki̱cha̱ ta̱ngatꞌanii̱ na̱ Erondíaa̱, chjo̱ón ntsꞌi̱e̱ Erondee̱ xi ꞌmí Ngiripee̱,

⁴ ngatꞌa̱ Juaa̱, bi̱ katsoó Erondee̱: –Kjo̱a̱kitii̱ tsjandièjín nga chjóo̱n ka̱ma chjo̱ón nda̱ ntsꞌie.

⁵ Kó Erondee̱ kamámejeén katsꞌénkꞌién Juaa̱, ta̱nga katsakjónní xota̱ na̱xi̱ńdaá, ngatꞌa̱ xotaa̱ nda̱ chji̱ni̱e̱ꞌe̱én Néná kamaá Juaa̱.

⁶ Ta̱nga ni̱xtjin nga jachónó Erondee̱, tsa̱kji̱ín na̱ Erondíaa̱ kitié ngindyi̱ko̱n xota̱ xi jachó kui sꞌueé, kó achichí tsja kamaá Erondee̱,

⁷ kó kuíni nga Erondee̱ katsjá tsꞌoa nga ta̱ ni xi mejénrií tsja̱á.

⁸ Kó kui tsa̱kji̱ín, nga ja̱bo̱a̱ je índajo̱ na̱aa̱n, bi̱ katsó: –Tꞌíyéti̱bo̱a̱ní to̱ko̱ Jua̱ xi botíndaá nga ko̱e̱ꞌéní.

⁹ Sꞌe̱ achichí ndasen kisꞌijña nda̱ ree̱, ta̱nga kjo̱a̱a̱ nga je katsjá tsꞌoa, kó nga ngayeje xota̱ xi síndojo̱ tꞌa yámíxa̱a̱ tsintꞌié kuí nii̱, katsjákjo̱a̱ tsi̱ꞌe̱ nga ko̱e̱ꞌeé ni xi tsíꞌá kui tsa̱kji̱ín.

¹⁰ Kó katsjákjo̱a̱ nga ikichásén to̱ko̱ Juaa̱ ngi̱ya ndo̱bo̱a̱ya̱à.

¹¹ Kó ngo ti̱bo̱a̱ tjiyá to̱ko̱ Juaa̱ nga jachóchinií, sꞌe̱ kiniꞌánkꞌasꞌiee̱n tsa̱kji̱ín, kó kui tsa̱kji̱ín kijíjoo̱ na̱aa̱n.

¹² Kósꞌe̱ jachó xota̱ tsi̱ꞌe̱ Juaa̱, iskjíbé yojo kꞌiee̱n, sꞌe̱ ínijín, kó kijí kui jaá, sꞌe̱ katsóyaà Kjisoo̱ kui ni xi kamaá.

Bi̱ tsꞌén katsꞌénkjíén Kjisoo̱ ún mi̱ xota̱

¹³ Nga tsintꞌié Kjisoo̱ ni xi kiniꞌánjo̱ Jua̱ xi botíndaá, kijíyà ngo tjotso, sꞌe̱ xtji̱e̱e̱n ngo nangi kjiꞌitiya kijí, kó nga tsintꞌié xotaa̱, jatjoni na̱xi̱ńdaá nga kijíyise.

¹⁴ Kó ngije jachó Kjisoo̱, nga jatjajen tjotso jee̱ achichí má xota̱ xi kamábe, kó ni̱ma̱ kamaá, kó katsꞌéndaya xi oo̱n.

¹⁵ Kó ngije kamángixoón, xota̱ tsi̱ꞌe̱ Kjisoo̱ kijíkóntiñaa̱, sꞌe̱ bi̱ katsoó: –Kjitiya kuí ngi̱ndiee̱, kó achichí je sájín. Ti̱ꞌinkjí kui xotaa̱ ꞌne̱ tsi̱ꞌe̱ nga ko̱e̱je̱ ndí nangi xi síndo tiñaa̱, kó kꞌo̱tsie nichinie.

¹⁶ Kó Kjisoo̱, bi̱ katsó: –Chjiénjín nga ko̱e̱je̱, ta̱sá jún te̱ꞌéjnúu̱ ni xi skji̱ni̱e̱.

¹⁷ Sꞌe̱ bi̱ katsó kui jaá: –Ta̱nga ta̱ ún tsí pan ko̱jo jó tji̱o̱ tikónjne̱.

¹⁸ Kó bi̱ katsó Kjisoo̱: –Ndibájo̱jnúꞌun kꞌi̱e̱e̱.

¹⁹ Kósꞌe̱ ngije katsangiya tsi̱ꞌe̱ nga ku̱i̱ꞌíndotie xotaa̱ ngi̱jin ndi̱xcho̱o̱, iskjíbé pan xi uún ko̱jo tji̱o̱ xi joó, askotsijen nkꞌa jàn, katsꞌénchikonñé, sꞌe̱ akjángá, kó katsjaá kui paa̱n xota̱ tsi̱ꞌe̱, tsi̱ꞌe̱ nga kui jaá sa̱ꞌínkjaꞌasoón ngayeje xota̱ xi ngasee̱.

²⁰ Kó ngayeje xotaa̱, iskjinie kó kitsie cha̱n cha̱a̱n, kó ngi tiejó ni̱se̱nyá tjikítsie kamá pan xi tsꞌangii̱.

²¹ Mara̱ tsi ta̱ ún mi̱ jáxíꞌín xi iskjinie, kje̱ꞌení ínchjín ko̱jo jákjíndí.

Bi̱ tsꞌén kistsoꞌbá Kjisoo̱ nga̱soón ndáchíkoón

²² Kó Kjisoo̱ tji̱e̱nmá katsꞌeén kjo̱a̱ꞌniú xota̱ tsi̱ꞌe̱, tsi̱ꞌe̱ nga ko̱e̱je̱ya tjotso jee̱, nga ko̱e̱je̱tjón ngándá xi ingoboá jàn, tji̱e̱nga katsꞌénkixotꞌa xota̱ kjiín.

²³ Kó ngije kijí ngayeje xotaa̱, Kjisoo̱ kijínijíngí tji̱ngi̱i̱ nga tsíchji̱a̱ soboaá Néná, kó ngije kamájñoó ki̱a̱ kisꞌijña soboá.

²⁴ Tji̱e̱nga je kjochó tjotso jee̱ ngamasiee̱n ndáchíkoón, tjo̱ꞌniuú yeꞌétꞌaa̱ xchaán ngatꞌa̱ kje̱n tjotso jee̱ kasakoo̱.

²⁵ Kó ngije ndibáꞌásie̱én, Kjisoo̱ kijíkoón kui jaá nga kistsoꞌbásón ndáchíkoón.

²⁶ Ta̱nga nga kamábe xota̱ tsi̱ꞌe̱, ta̱ bi̱ ta̱ maa̱, achichí katsakjónní, kó bi̱ katsó: ¡Si̱e̱n boá!

²⁷ Ta̱nga Kjisoo̱ tji̱e̱nmá tsíchji̱a̱jo, nga bi̱ katsoó: ¡Te̱ꞌéngaꞌniújnúu̱ yojojnú, án boá, ngata̱ ndakonjínmájnú!

²⁸ Sꞌe̱ bi̱ katsó Peé: –Ndi̱a̱, tsi kjeén nga ji, te̱ꞌékjo̱e̱ ji nga ka̱makjuínsòn an ndáfoaa̱ nga kjuínkjáꞌaa̱.

²⁹ Kó Kjisoo̱, bi̱ katsó: –Ja̱bíꞌi̱n. Ta̱tra jatjajen Peé tjotso jee̱, kó kijísón ndáfoaa̱, sꞌe̱ kijí xtji̱e̱e̱n nínga tikón Kjisoo̱.

³⁰ Ta̱nga nga kamábe nga ta̱nisién ꞌniú tjitjíe̱n tjo̱o̱, katsakjónní kó kijíngandá, sꞌe̱ bi̱ katsó nga askjandáyà: ¡Ndi̱a̱ ꞌna̱xiéꞌéní!

³¹ Kó ti̱ kjiꞌa Kjisoo̱ iskjíbé tsja Peé, sꞌe̱ bi̱ katsoó: ¡Achichí chiboa sꞌijii̱n! Míkjo̱a̱a̱ nga jó nga ján ikꞌíjñíi̱ ini̱màa̱.

³² Kó ngije tsꞌasꞌien ngi̱ya tjotso jee̱, kixixió tjo̱o̱.

³³ Sꞌe̱ kui já xí síndoyá ngi̱ya tjotso jee̱, katsꞌéndikón Kjisoo̱, kó bi̱ katsoó: ¡Ja̱koxi̱ nga jí xi ndií Néná!

Bi̱ tsꞌén katsꞌéndaya Kjisoo̱ xota̱ xi oo̱n xi tjín nangi Jenesaree̱t

³⁴ Kó ngije jaꞌatio ndáchíkoón, Kjisoo̱ ko̱jo xota̱a̱ jachó nangi Jenesaree̱t.

³⁵ Kó ngije kamábe Kjisoo̱ xota̱ na̱xi̱ńdaá, katsóyaà ngayeje xota̱ xi ngase xi tjín kuí nangii̱, kó jachóchinií ngayeje xota̱ xi oo̱n,

³⁶ kó ꞌniú kichjiáꞌaá tsi̱ꞌe̱ nga ndeta̱ ńjñoo̱ xí si̱ꞌanjo̱, kó ngayeje xota̱ xi oo̱n xi katsꞌénjo̱ ńjñoo̱ Kjisoo̱ kamándaya.