Matioo̱ 13 - Xo̱jo̱n eén Néná

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ ngo nda̱ xi atítsojo xojmá

¹ Kui ni̱xtjii̱n Kjisoo̱ jataxie ngi̱ya ndiꞌaa̱, kó kijíkꞌíjñátꞌa ndáchíkoón,

² kó achichí kamá xota̱ xi kamátikótꞌaa̱, kó ja̱chon nga Kjisoo̱ kijíkꞌíjñaya ngo tjotso je, sꞌe̱ ngayeje xotaa̱, ki̱a̱ kixindyia kixi̱ tꞌa ndáchíkoón.

³ Kó achichí má ni xi tsíchji̱a̱jo nga katsꞌénkjién énkjín, nga bi̱ katsoó: –Ngo nda̱ xi ꞌbítji̱e̱, kijíkꞌítji̱e̱ xojmá.

⁴ Kó tji̱e̱nga ítji̱e̱ xojmaá, ngo tjín xí ixó tꞌa ndi̱ya̱à, kó kjindibá ni̱siee̱ sꞌe̱ iskjinie.

⁵ Ingo tjín kuí xojmaá xi ixó ngi̱jin ndi̱jo̱o̱, nínga tsiejín ńdie tjín, kó tsá katjońtsꞌién, ngatꞌa̱ na̱nga̱jín tikón ńdiee̱,

⁶ ta̱nga nga jatjo tsꞌueé, katsꞌénchjaán, ngatꞌa̱ ꞌniújín na̱nga̱ síndo ja̱ma̱a̱, kó kixí.

⁷ Kó ingo tjín kuí xojmaá xi ixó ngi̱jin yándáꞌyaá, kó nga kamánkꞌá yándáꞌyaá, katsꞌénxí.

⁸ Ta̱nga ingo tjín kuí xojmaá xi ixó tꞌanangi xi ndaa̱, kó kisꞌiee̱ to, tjín xí katsjá kantié to, tjín xí katsjá ichítié ko̱jo tie, kó tjín xí katsjá úchán to nga ngo nga ngo.

⁹ Xi tjín tji̱bo̱a̱nijon nga ku̱i̱ntꞌiè, ngatasiénníjón kui eén.

Bi̱ tsꞌén katsóyà Kjisoo̱ míkjo̱a̱a̱ nga énkjín katsꞌénkjién

¹⁰ Kósꞌe̱ xota̱ tsi̱ꞌe̱ Kjisoo̱ kijíkóntiñaa̱, kó bi̱ katsoó nga asíyaá: –Míkjo̱a̱a̱ nga énkjín ndokjo̱e̱je ji xotaa̱.

¹¹ Kó Kjisoo̱, bi̱ katsó: –Ngatꞌa̱ jún jè kiꞌmíyàjnú ni xi tjiꞌmaá xikótsꞌèn botixómá Néná, ta̱nga kui xotaa̱ kji̱e̱ ꞌmíyajiín.

¹² Ngatꞌa̱ ta̱ꞌyaní xi ntꞌié ni xi bokoyá an, tsie ngase ko̱e̱ꞌeé nga ka̱makjiín, kó ꞌniú ka̱makjiín, ta̱nga xi ntꞌiéjín, chja̱ꞌáxiín ngaskande ni xi chií makjiín.

¹³ Ta̱ngatꞌanii̱ kui nii̱ nga énkjín chji̱a̱jo an, ngatꞌa̱ ndatsi skotsíjen, sku̱i̱e̱jín, kó ndatsi ku̱i̱ntꞌiè, ka̱makjínjiín.

¹⁴ Kó bo̱a̱ tsꞌén nga kjo̱tjosón kjo̱a̱a̱ kui xotaa̱, ni xi katsó nga tsíchji̱a̱ nda̱ chji̱ni̱e̱ꞌe̱én Néná xi ꞌmí Isayaa̱, nga bi̱ katsó: Ndatsi ko̱nda̱ꞌyájnú, ka̱makjínjínjnú, kó ndatsi stsitsíjenjnú, ti̱ ka̱makjínjínjnú nga.

¹⁵ Ngatꞌa̱ ini̱ma̱a̱ kui xota̱ na̱xi̱ńdaá jè ta̱nisién tajá kamá, je kisichjá tji̱bo̱a̱nijon, kó je kisichjá ndyi̱ko̱n, tsi̱ꞌe̱ nga sku̱i̱e̱jín, ti̱nde ku̱i̱ntꞌièjín, tsi̱ꞌe̱ nga ka̱makjínjiín ini̱ma̱a̱, ti̱nde sa̱ꞌínkꞌoyàjín yojoo̱, ko̱jo tsi̱ꞌe̱ nga sa̱ꞌindayajín an.

¹⁶ Ta̱nga achichíra̱tsjaa̱ ndyikonjnú, ngatꞌa̱ be, ko̱jo tji̱bo̱a̱nijónjnú, ngatꞌa̱ ntꞌié.

¹⁷ Ngatꞌa̱ ja̱koxi̱ ni xi xiánjnúꞌun nga achichí má já chji̱ni̱e̱ꞌén ko̱jo xota̱ kixi̱i̱ Néná xí kamámejeén nga sku̱i̱e̱ ni xi ndyi̱yajnú ngotꞌe̱, ta̱nga kamábejín, kó kamámejeén tsintꞌié, ni xi ndyi̱ndaꞌyájnú ngotꞌe̱, ta̱nga kamájín tsintꞌié.

Bi̱ tsꞌén katsóyà Kjisoo̱ kjo̱a̱a̱ énkjiín nda̱ xi atítsojo xojmaá

¹⁸ Ndaꞌyájnú ni xi mejeén tsó énkjiín nda̱ xi ꞌbítji̱e̱ xojmaá:

¹⁹ Kjiꞌanga ngo xi ntꞌié eén, kó makjínjiín xikótsꞌèn botixómá Néná, xikónií kui xojmá xi ixó tꞌa ndi̱ya̱à, ngatꞌa̱ ndibá xindajín, kó foaꞌáxiín ni xi je tjitjíe̱ nga̱són ini̱ma̱a̱.

²⁰ Kui xojmá xi ixó tꞌanangi nínga tjín ndi̱jo̱o̱, kuí xí xikoó xota̱ xi ntꞌié eén Néná, kó ti̱ kjiꞌa achichí tsja maa̱,

²¹ ta̱nga nga jmí ja̱ma̱jiín, kuíni nga ta̱ chiboa tsí ꞌbondíyaá, ngatꞌa̱ kjiꞌanga ta̱ngatꞌanii̱ eén Néná foaꞌatio ngo kjo̱a̱ni̱ma̱, ko̱jo tsi miyotji̱ngii̱, tji̱e̱nmá ꞌbijñámasien ni xi tsi̱ꞌe̱ Néná.

²² Kó kui xojmá xí ixó ngi̱jin ndaꞌyaá, kuí xí xikoó xota̱ xi ntꞌié eén Néná, ta̱nga ta̱soboá nda̱ kjimaa̱ ni xi tjiín kui nga̱sondiee̱, kó kjo̱a̱chꞌáṉchaa̱ kjo̱a̱cho̱o̱n tsꞌénxí eén Néná, kó kui nii̱ xi tsjandièjín nga boajaá to.

²³ Ta̱nga kui xojmá xí ixó tꞌanangi xi ndaa̱, kuí xi̱ꞌbi̱ xi xikoó xota̱ xi ntꞌieé eén Néná, kó makjiín, kó kuí xí xikoó xojmá xí tsjá úchán, ichítié ko̱jo tie, ko̱jo kantié to nga ngo nga ngo.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín to ndso̱ko̱a̱n ṉño̱pan ko̱jo kꞌijñá xi ndajiín

²⁴ Kjisoo̱ katsóyaà ingo énkjín, xi bi̱ tsó: –Nínga botíxomaa̱ Néná xikónií ngo nda̱ xi ítji̱e̱ xojmá xí nda jno̱ nínga tsꞌénxá,

²⁵ ta̱nga tji̱e̱nga kjiyojofé ngayeje kui jaá, jachó kondra̱a̱, kó xka̱ xi ndajín ítji̱e̱jin to ndso̱ko̱a̱n ṉño̱paa̱n, sꞌe̱ kijí.

²⁶ Nga kamánkꞌá xka̱a̱ to ndso̱ko̱a̱n ṉño̱paa̱n, jatjo ńtiín, kó ti̱ jatjokjà xka̱ xi ndajiín nga.

²⁷ Kó nga kamábe já mosoo̱ kijítsáyaá kui nda̱a̱, kó bi̱ katsoó: «Ndi̱a̱, a xojmá xí ndajín boá xi ikꞌítji̱e̱ ji ngi̱jin jno̱o̱. Ñá kjindibánii̱ xka̱ xi ndajín xi katokjaá.»

²⁸ Ta̱nga bi̱ katsó kui nda̱a̱: «Ngo kondra̱ xi ítji̱e̱ kui nii̱.» Kó bi̱ katsó já mosoo̱: «A mejeén nga xi̱niéyàjne̱ kui xka̱ xi ndajiín.»

²⁹ Ta̱nga bi̱ katsó kui nda̱a̱: «Jmí, ngatꞌa̱ tsi ta̱ kjo̱a̱ndaa̱ tsi kjiꞌanga ndyi̱chjaníyàjnú kui xka̱ xi ndajiín chji̱niéyájnú ko̱jo to ndso̱ko̱a̱n ṉño̱paa̱n nga.

³⁰ Ta̱sá te̱ꞌéndièjnúu̱ nga nijan ngatamaxchá ngaskande nga je ka̱ma ko̱ꞌna̱je̱n to ndso̱ko̱a̱n ṉño̱paa̱n, kósꞌe̱ kjiꞌa bi̱ xiáa̱n já xí kꞌo̱je̱n: Tjón mára tꞌítikójnú xka̱ xi ndajiín, sꞌe̱ tꞌíꞌniújnú tsi̱ꞌe̱ nga kꞌuití, kó to ndso̱ko̱a̱n ṉño̱paa̱n ngi̱ya ndiꞌa nínga mindyia tindyiàjnú.»

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín xojmaá mostasaa̱

³¹ Ingo énkjín katsóyà Kjisoo̱, xi bi̱ tsó: –Nínga botíxomaa̱ Néná, xikónií ngo ndí xojmaá mostasaa̱, xi ngo nda̱ iskjíbé kó ítji̱e̱ ngi̱jin jno̱o̱,

³² kui ndí xojmaá nga ja̱koxi̱ kuí xí ta̱nisién ꞌniú chichí ngase ngayeje xojmaá, ta̱nga ngije tjontsꞌíén kó maxchá, kuí yaá xi ta̱nisién ꞌniú nkꞌa ma, ngaskande ni̱sie xi tjín nkꞌa jàn, ki̱a̱ fochó tsꞌénda ndo̱bo̱a̱a̱ ki̱a̱ tjiaa̱ kui yaá.

Bi̱ tsꞌén íjñá chi̱bo̱a̱ Kjisoo̱ énkjiín nisan xi mindyiakátjo̱ paa̱n

³³ Ingo énkjín katsóyà Kjisoo̱, xi bi̱ tsó: –Nínga botíxomaa̱ Néná, xikó maá tsi ján chi̱bo̱a̱ nisan iskjíbé ngo xota̱chjo̱on sꞌe̱ ki̱a̱ indyiaá ndso̱ko̱a̱n ṉño̱paa̱n ngaskande nga kaxongatjo̱ ngayeje nda̱ꞌyo̱paa̱n.

Bi̱ tsꞌén katsóyà Kjisoo̱ kjo̱a̱a̱ kótsꞌèn katsꞌénkjién énkjiín

³⁴ Ngayeje kui nii̱ xi tsíchji̱a̱jo Kjisoo̱ xotaa̱, kó jmíni̱xtjin nga énkjínjín katsꞌénkjién nga tsíchji̱a̱jo,

³⁵ tsi̱ꞌe̱ nga jatjosón ni xi katsó nda̱ chji̱ni̱e̱ꞌe̱én Néná nga bi̱ katsó: Énkjín xí sa̱ꞌinkjièn án nga kuichjiájo an xotaa̱, kó xiyàa̱ ni xi tjiꞌmaá Néná ndeskande nga kamánda nga̱sondiee̱.

Bi̱ tsꞌén katsóyà cha̱n cha̱n Kjisoo̱ kjo̱a̱a̱ énkjiín xka̱ xi ndajiín

³⁶ Kósꞌe̱ ngije katsꞌénkjí Kjisoo̱ xotaa̱, tsꞌasꞌien ngi̱ya ndiꞌaa̱, kó xota̱ tsi̱ꞌe̱ kijíkóntiñaa̱, sꞌe̱ bi̱ katsoó: –Tꞌíyé cha̱n cha̱njne̱ kjo̱a̱a̱ ni xi mejeén tsó énkjiín xka̱ xi ndajín xi ikꞌítji̱e̱ ngi̱jii̱n jno̱o̱.

³⁷ Sꞌe̱ bi̱ katsó Kjisoo̱: –Nda̱ xi ítji̱e̱ xojmá xí ndaa̱, kuí xí ndií nda̱ xi̱ꞌii̱n,

³⁸ kó jno̱o̱, kuí xí nga̱sondiee̱, kó xojmá xi ndaa̱, kuí xí xota̱ xi tsi̱ꞌe̱ nínga botixómá Néná, kó xka̱ xi ndajiín, kuí xí xota̱ xi tsi̱ꞌe̱ xindajín,

³⁹ kó kondra̱ xi ítji̱e̱ kui xka̱a̱, kuí xí xindajín ndiabloo̱, ni xi kamáxchaá, kuí boá xi nga fetꞌaa̱ nga̱sondiee̱, kó já xí jaꞌáꞌyá kui ni xi kamáxchaá, kuí boá xi ndítsjiee̱ Néná.

⁴⁰ Kó xikótsꞌèn chjaníyá xka̱ xi ndajiín sꞌe̱ ꞌbítí ngi̱jin ndiꞌií, bo̱a̱ ti̱ ka̱ma nga kju̱i̱e̱ kui nga̱sondiee̱,

⁴¹ kó ndií nda̱ xi̱ꞌii̱n sa̱ngíyá ndítsjiee̱, kó kjo̱a̱ꞌáxín ki̱a̱ nínga botixómá ngayeje kui xota̱ xi ta̱ngatꞌanii̱ kui nga kje̱ꞌe xí tsꞌénjé, ko̱jo xi ndyi̱tsꞌèn ni xi ndajiín,

⁴² kó ngo ngi̱ya orjno̱ xi tjítí ko̱na̱ngísꞌién, kó ki̱a̱ boá nínga skja̱ndá ko̱jo nínga skji̱ni̱e̱ya ṉꞌni̱u̱ kui xotaa̱.

⁴³ Kósꞌe̱ ngayeje xota̱ xi kixi̱i̱ kꞌuieé ndiꞌí xikoó tsꞌueé ki̱a̱ nínga botixómá Na̱ꞌmii̱. Xi tjín tji̱bo̱a̱nijon nga ku̱i̱ntꞌiè, ngatasiénníjón kui eén.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín tsi̱ꞌe̱ ti̱jìto̱n xi tikónꞌmaá

⁴⁴ Nínga botíxomaa̱ Néná, xikónií ngo ti̱jìto̱n xi tikónꞌmá ngo ngindie kꞌijñá, kó ngo nda̱ sa̱ko̱ó, kó ti̱ ki̱a̱a̱ ku̱i̱ꞌíjñaꞌma nginí, kó achichí tsja tjiín sꞌe̱ fí ndiꞌaa̱, kó botiñá ngayeje ni xi tjiín, sꞌe̱ ꞌbotsie kui kꞌijñaá.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín ndi̱jo̱ tsjakjiꞌi xi achichí chjií

⁴⁵ Ti̱ bo̱a̱ ti̱ tsꞌén nínga botíxomaa̱ Néná xikó maá ngo nda̱ xi tsꞌénmongase ngo to ixkìꞌ xi ndi̱jo̱ tsjakjiꞌi,

⁴⁶ kó ngije sa̱ko̱ó ngo xi ꞌniú chjií, kijí ndiꞌaa̱, kó atíñá ngayeje ni xi tjiín, sꞌe̱ tsꞌatsie kui ndi̱jo̱o̱.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín nda̱ꞌya̱a̱

⁴⁷ Ti̱ bo̱a̱ ti̱ tsꞌén nínga botíxomaa̱ Néná xikó maá ngo nda̱ꞌya xi ikjien ngi̱jin ndáchíkoón, kó ngayeje to̱ko̱ya tji̱o̱ fíyaá,

⁴⁸ kó ngije kitsie, já xí mején nda̱ꞌya̱a̱ foaꞌáꞌyá, kó fíjo̱ tꞌa chji̱ndi̱e̱e̱, sꞌe̱ foaꞌájin tji̱o̱o̱, kó tji̱o̱ xi ndaa̱ ngo ni̱se̱nyá mindyiá, kó tji̱o̱ xi ndajiín xín ꞌbojmi.

⁴⁹ Bo̱a̱ ti̱ ka̱ma nga kju̱i̱e̱ nga̱sondiee̱: Kji̱ndi̱bá ndítsjiee̱, kó kjo̱a̱ꞌájin xota̱ xi kixi̱i̱, kó xín ku̱i̱ꞌíndo xota̱ xi ndajiín,

⁵⁰ sꞌe̱ ngo orjno̱ xi tjiín ndiꞌí ku̱i̱ndyia xota̱ xi ndajiín, kó ki̱a̱ boá nínga skja̱ndá, ko̱jo nínga skji̱ni̱e̱ya ṉꞌni̱u̱ kui xotaa̱.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ ni xi tja̱tsi̱e̱e̱ ko̱jo ni xi xchaá

⁵¹ Sꞌe̱ bi̱ katsó Kjisoo̱ nga asíyá: –A makjínjnú ngayeje kui nii̱. –Jo̱o̱n, Ndi̱a̱. Katsó kui jaá.

⁵² Sꞌe̱ Kjisoo̱, bi̱ katsó: –Kuíni nga ngayeje já chji̱ni̱e̱kjo̱a̱kiti xi bokoyá kjo̱a̱a̱ nínga botixómá Néná, xikónií ndi̱a̱a̱ ngo ndiꞌa xi ꞌboxié ni xchaá, ko̱jo ni tja̱tsi̱e̱ xi chjí xí síndotjoó.

Bi̱ tsꞌén kijíndikoón xotaa̱ kjo̱a̱a̱ Kjisoo̱

⁵³ Kó ngije tsíchji̱a̱ Kjisoo̱ kui énkjiín, xín kijí.

⁵⁴ Kó nga jachó nangii̱, akóyaá xotaa̱ ki̱a̱ ndiꞌa nínga ndokjo̱a̱ eén Néná, kó achichí má xota̱ xi kijíndikoón, xi bi̱ katsó: –Ñá tsꞌaxiéni kjo̱a̱kjínkón xi tjiín kui nda̱a̱. Kótsꞌèn mánii̱ kjo̱a̱ndikón xí tsꞌén.

⁵⁵ A kuijín nda̱a̱ xi ndií nda̱ chji̱ni̱e̱ya̱á. A mí tsí kui nda̱a̱ xi na̱an manii̱ na̱ Riyaa̱, kó ntsꞌi̱e̱ ma Sandiyaá, Kosiee̱, Ximoo̱ ko̱jo Jundaa̱.

⁵⁶ A kꞌi̱e̱jín síndojo̱na ínchjín ndichja. Ja̱ kó ñá tsꞌaxiéni ngayeje kui nii̱.

⁵⁷ Kó kui xotaa̱ katsꞌénjo̱ꞌojín Kjisoo̱. Ta̱nga Kjisoo̱, bi̱ katsó: –Ta̱jñàní nga yandikón ngo nda̱ chji̱ni̱e̱ꞌe̱én Néná, ngototo ki̱a̱ nangii̱ ko̱jo ndiꞌaa̱ nínga yandikónjín.

⁵⁸ Kó nde kjínjín kjo̱a̱ndikón katsꞌén Kjisoo̱ kui ngi̱ndiee̱, ngatꞌa̱ xotaa̱ kisꞌijinjiín.