Matioo̱ 11 - Xo̱jo̱n eén Néná

Bi̱ tsꞌén tsíchji̱a̱jo Kjisoo̱ xota̱a̱ Jua̱ xi botíndaá

¹ Kó ngije kamaá Kjisoo̱ nga tsíchji̱a̱jo nga tiejó xota̱ tsi̱ꞌe̱, kijíkakoyá ko̱jo kijíkꞌíni̱jmì eén Néná na̱xi̱ńdaá kui jaá.

² Kó Juaa̱ nga tjiꞌyá ndo̱bo̱a̱yà, tsintꞌié ngayeje ni xi tjítsꞌén Kristoo̱, kó katsangiya jó xota̱ tsi̱ꞌe̱,

³ kó bi̱ katsoó tsi̱ꞌe̱ nga bi̱ tsꞌén ko̱síyaá Kjisoo̱: –A jí boá kui nda̱ xi kjo̱e̱ꞌe̱é, axa̱ xchiyá xò ji̱n kje̱ꞌe.

⁴ Kó Kjisoo̱, bi̱ katsoó kui jaá: –Tangínjnú, kó tꞌíyájnúu̱ Juaa̱ ni xi je kamáyàjnú ko̱jo ni xi je kandaꞌyájnú,

⁵ tꞌíni̱jmìjnúu̱ nga xota̱ xi ti̱ka̱a̱ je kamátsijee̱n, xi ni̱ma̱ see̱ je ma fí, xi tjiín chiꞌin xi tsꞌénkjátsón tji̱xin yojoná je kamándaya, xi xtiyaa̱ je tsintꞌié, xi kꞌiee̱n je jaꞌáꞌyaá, ko̱jo nga xota̱ ni̱ma̱a̱ je tjíꞌmíyaá éntjatsi̱e̱e̱ Néná.

⁶ Kó achichíra̱tsjaa̱ xi ta̱ngatꞌajiín án nga sti̱ngíni.

⁷ Kó tji̱e̱nga ndyi̱fí xota̱a̱ Juaa̱, Kjisoo̱ ítsꞌi̱yanii̱ nga katsóyaà xotaa̱ kjo̱a̱a̱ Juaa̱, kó bi̱ katsó: –Mí xí tsangíntsitsijenjnúu̱ nangi kixií. A ngo yáxá xí ítsanie tjo̱o̱.

⁸ Mí xí tsangíntsitsijenjnúu̱. A ngo nda̱ xi ńjño tsjakon tsꞌényajá. Jún jè yàjnú nga kui xota̱ xi boajá ńjño tsjakoo̱n, ndiꞌaa̱ re boá nínga síndo.

⁹ Ta̱nga, mí xí tsangíntsitsijenjnúu̱. A ngo nda̱ chji̱ni̱e̱ꞌe̱én Néná. Jo̱o̱n, ja̱ kuí boá xián an, kó nkꞌa ngase xaá ta̱bo̱a̱jiín ngo nda̱ chji̱ni̱e̱ꞌe̱én Néná.

¹⁰ Ngatꞌa̱ kjo̱a̱a̱ kuii̱ bí xi kjitꞌa xo̱jo̱n eén Néná, nínga bi̱ tsoó: Kꞌi̱e̱ sangiyatjoón chji̱ni̱e̱ꞌénna, tsi̱ꞌe̱ nga ko̱e̱je̱tjoón nga ku̱i̱ꞌíjñanda ndi̱yàa̱.

¹¹ Ja̱koxi̱ ni xi xiánjnúꞌun nga kꞌi̱e̱ kui nga̱sondiee̱, kji̱e̱ tsenjín ingo nda̱ xi nkꞌa ngase xaá xikoó Jua̱ xi botíndaá, ta̱nga kui nda̱ xi ꞌniú chichí ngase xaá nínga botíxomaa̱ Néná, nkꞌa ngase xaá ta̱bo̱a̱jiín Juaa̱.

¹² Ta̱nga ndeskande ni̱xtjin nga Jua̱ xi botíndaá tsíchji̱a̱ eén Néná, kó ngaskande ngotꞌe̱, nínga botíxomaa̱ Néná ꞌniú tjíbixkánjo̱, kó kui xota̱ xi ndyi̱kjánjo̱o̱ mejeén sa̱ꞌínkjié.

¹³ Ngatꞌa̱ ngayeje já chji̱ni̱e̱ꞌe̱én Néná, ko̱jo kjo̱a̱kitii̱ kuí xí katsóyàtjón ni xi ka̱ma ngaskande nga jeꞌe Juaa̱,

¹⁴ kó tsi tjín xí mejeén sa̱ꞌínsꞌijin énna, Juaa̱ boá kui Eliya̱ xi ja̱bo̱a̱ kjo̱e̱ꞌe̱é.

¹⁵ Xi tjín tji̱bo̱a̱nijon nga ku̱i̱ntꞌiè, ngatasiénníjón kui eén.

¹⁶ Ta̱nga, mí xí bo̱a̱ má kón, xi kókón kui xota̱ xi tjín kuí ni̱xtjin xi̱ꞌbi̱. Bo̱a̱ má kón xikoó já xo̱ngò xí síndo ngi̱ya ndi̱yàtié xi bi̱ ndyi̱tsó nga ndyi̱kjandàyaá xkjín:

¹⁷ «Kiniꞌánkjaniejne̱ yána̱xo̱ xi foniee̱, ta̱nga jún kichájínjnú, kandajne̱ só xi ndasen tsó, ta̱nga jún kichaꞌájínjnú.»

¹⁸ Ngatꞌa̱ jeꞌe Jua̱ xi botíndaá, xi ta̱xkiya iskjiniejín nichinie ko̱jo ni xi ꞌyó, kó jún bi̱ kiꞌmíjnú nga xindajín tjíjii̱n.

¹⁹ Jaskan jeꞌe ndií nda̱ xi̱ꞌii̱n, nda̱ xi iskjinie, ko̱jo xi katsꞌe, kó jún, bi̱ kiꞌmíjnú: Kꞌi̱e̱ tikón ngo nda̱ xi xki̱ꞌá, nda̱ chꞌi̱, nda̱ amingoo̱ já xí foaꞌáꞌyá to̱n xi machjítjé ni ko̱jo xota̱ jé. Ta̱nga kjo̱a̱kjínkoón Néná ka̱makixi̱ni kjo̱a̱a̱ ndií.

Bi̱ tsꞌén katsóyà Kjisoo̱ kjo̱a̱a̱ xota̱ xi tsintꞌiéꞌénjín

²⁰ Kósꞌe̱ Kjisoo̱ katsꞌénxchánjo̱ xota̱ na̱xi̱ńdá xí síndo nínga katsꞌén kjín kjo̱a̱ndikón, ngatꞌa̱ kui xotaa̱ katsꞌénkꞌoyájín yojoo̱, kó bi̱ katsoó:

²¹ ¡Ni̱ma̱ xò jún, xota̱ xi chji̱a̱ni Korasii̱n! ¡Ni̱ma̱ xò jún, xota̱ xi chji̱a̱ni na̱xi̱ńdáꞌniú Betsainda̱! Ngatꞌa̱ tsi ki̱a̱ na̱xi̱ńdáꞌniú Tiroo̱ ko̱jo tsi na̱xi̱ńdáꞌniú Sindo̱n nínga kamá kjo̱a̱ndikón xí kamá ngi̱jii̱n xota̱jnú, antꞌe̱ra̱na jè katsꞌénkꞌoyá yojoo̱ kui xotaa̱, kjo̱a̱a̱ ni xi ndajín xi katsꞌén, jera̱ tsajá ńjño tokjuie, kó jera̱ indyiaá ndiso to̱ko̱, tsi̱ꞌe̱ nga akó nga ngiti̱ mejénjiín sa̱ꞌínjé.

²² Ta̱nga xiyàjnúꞌun nga kjiꞌanga kjo̱chó ni̱xtjin nga ka̱majé, tsie ngase jé xí sa̱kójnú ta̱bo̱a̱jiín xota̱ xi chji̱a̱ni na̱xi̱ńdáꞌniú Tiroo̱ ko̱jo na̱xi̱ńdáꞌniú Sindo̱n.

²³ Kó jún xota̱ xi chji̱a̱ni na̱xi̱ńdáꞌniú Kapernau̱n, a beriítakónjnú nga ngaskande ndiꞌakꞌajmii̱ xchjanínkꞌajnú. Jmí, ta̱sá xiyàjnúꞌun nga ngaskande ndo̱bo̱a̱ṉkꞌi̱e̱e̱n si̱ꞌankjatjajénjnú, ngatꞌa̱ tsi ngayeje kjo̱a̱ndikón xí kamá ngi̱jinjnú, ki̱a̱ kamá ngi̱jii̱n xota̱ xi chji̱a̱ni na̱xi̱ńdáꞌniú Sondoma̱, kui xotaa̱ asíkjora̱ yojoo̱, kó kui na̱xi̱ńdaá ta̱kó tikónra̱ ngaskande ngotꞌe̱.

²⁴ Ta̱nga xiyàjnúꞌun nga kjiꞌanga kjo̱chó ni̱xtjin nga ka̱majé, tsie ngase jé sa̱kójnú jún, ta̱bo̱a̱jiín xota̱ na̱xi̱ńdáꞌniú Sondoma̱.

Kjisoo̱ bi̱ tsꞌén tsíchji̱a̱a̱ xotaa̱ tsi̱ꞌe̱ nga kjo̱e̱ꞌekoón

²⁵ Kui ni̱xtjin jàn Kjisoo̱, bi̱ katsó: –An tjítsꞌèntsjaà Na̱ꞌmi, Ndi̱a̱a̱ ndiꞌakꞌajmii̱ ko̱jo tꞌanangii̱, ngatꞌa̱ kui nii̱ ikꞌíjñiꞌmíi̱ xota̱ xi kjínkoón ko̱jo xi makjiín, kó akakèe̱ jákjíndií.

²⁶ Jo̱o̱n, Na̱ꞌmi, ngatꞌa̱ bo̱a̱ tsꞌén kamátsjaá ji.

²⁷ Ngayeje nii̱ Na̱ꞌmina boá xí katsꞌénkꞌasꞌienna, kó ta̱ꞌyajín xi be ndií, ta̱kuítsí Na̱ꞌmii̱, kó ta̱ꞌyajín xi be Na̱ꞌmii̱, ta̱kuítsí ndií, ko̱jo xota̱ xi kui ndií mejeén ka̱tso̱yaa̱.

²⁸ Ndibáchonjnúꞌun ngayejejnú jún xota̱ xi je jendajnú nga kiniꞌánxájnú, ko̱jo xi ni xi é kichꞌiájnú, kó án xí sa̱ꞌin an nga si̱ꞌankjaꞌyájnú.

²⁹ Chꞌi̱a̱jnú kui yá é xí tsꞌéntsjájnúꞌun, kó ngatamajnú ni xi tsꞌénbokoyájnúꞌun, ngatꞌa̱ ntꞌiéꞌén án ko̱jo nda ini̱ma̱na, kó bo̱a̱ tsꞌén ka̱ma sa̱ꞌínkjaꞌyá ini̱ma̱jnú.

³⁰ Ngatꞌa̱ yá xí yaꞌa an niꞌínjín chꞌià, kó éjín chꞌiàna.