Matioo̱ 10 - Xo̱jo̱n eén Néná

Bi̱ tsꞌén jaꞌájin Kjisoo̱ nga tiejó já apostroo̱

¹ Kó Kjisoo̱ ngije tsíchji̱a̱a̱ nga tiejó xota̱ tsi̱ꞌe̱, katsjaá xá tsi̱ꞌe̱ nga ka̱maa̱ kꞌo̱xié a̱siénni̱xtjin xi ndajín, ko̱jo tsi̱ꞌe̱ nga ka̱maa̱ sa̱ꞌíndaya ngayeje to̱ko̱ya chiꞌin.

² Jaꞌeén nga tiejó já apostroo̱ kuí bí xi̱ꞌbi̱: Ximoo̱ boá xi tjoón, kui xi ti̱ Pé kiꞌmí nga, ko̱jo ntsꞌi̱e̱ kui nda̱a̱ xi ꞌmí Jandree̱, ko̱jo Sandiyaá, ko̱jo ntsꞌi̱e̱ kui nda̱a̱ xi ꞌmí Juaa̱, ndií Sebedeoo̱,

³ ko̱jo Ngiripee̱, ko̱jo Bartolomee̱, ko̱jo Tomaa̱, ko̱jo Matioo̱, nda̱ xi foaꞌáꞌyá to̱n xi machjítjé nii̱, ko̱jo Sandiyaá ndií Alfeoo̱, ko̱jo Tandeoo̱,

⁴ ko̱jo Ximo̱ nda̱ kananistaa̱, ko̱jo Junda̱ Iskariotee̱, nda̱ xi katsꞌénkꞌasꞌien Kjisoo̱.

Kjisoo̱ bi̱ tsꞌén katsjáxaá nga tiejó xota̱a̱

⁵ Nga tiejó kui xotaa̱ xi katsangiya Kjisoo̱, kó bi̱ katsoó ngindiee̱ nga ko̱e̱je̱: –Ngata̱ mongínjínjnú nínga síndo xota̱ xi jundío̱jín, ti̱nde ngata̱ bitjasꞌi̱e̱njínjnú ngo na̱xi̱ńdá nínga síndo xota̱ xi chji̱a̱ni nangi Samaria̱,

⁶ ta̱sá ki̱a̱ tangínchonjnúu̱ kui xota̱ xi xikó maá cho̱tsa̱nga̱ xi kichajá xi chji̱a̱ni Israee̱l.

⁷ Kó tji̱e̱nga kongínjnú tꞌíni̱jmìjnúu̱ éntjatsi̱e̱e̱ Néná nga bi̱ kꞌuínjnúu̱: Néná jè ko̱tíxoma.

⁸ Ti̱ꞌandayajnú xota̱ xi oo̱n, ko̱jo ti̱ꞌankjaꞌáꞌyájnúu̱ xota̱ xi je jesón, ko̱jo ti̱ꞌantsjiejnú xota̱ xi tjiín chiꞌin xi tsꞌénkjátsón tji̱xin yojoná, ko̱jo ꞌna̱xiéjnú a̱si̱énni̱xtjii̱n xindajín. Kó ngata̱ chjeꞌéchjíjínjnú nga si̱ꞌánjnú ngo kjo̱a̱nda, ngatꞌa̱ Néná ta̱ katsjájnú kui kjo̱a̱ndaa̱.

⁹ Ngata̱ jmí to̱nsinié, ko̱jo to̱ntiboa, ko̱jo to̱nkobree̱ chꞌiájínjnú ndáyájnú nga kongínjnú,

¹⁰ ti̱nde nga chꞌiájínjnú stsa tsi̱ꞌe̱ ndi̱ya̱à, ti̱nde nga chꞌiájínjnú jó ꞌniú ńjño, ti̱nde ndiétjíbo̱a̱, ti̱nde yánísié, ngatꞌa̱ nda̱ xi tsꞌénxaá tjínrií kjo̱a̱nda nga sa̱ko̱ó ni xi skji̱ni̱e̱.

¹¹ Kó ta̱jñà na̱xi̱ńdání ko̱jo tsi ngo ndí nangi xi ku̱i̱tjásꞌi̱e̱njnú, ti̱ndyi̱séjnú ngo xota̱ xi ka̱maꞌniátakónjnú, kó ki̱a̱ tindyiónjnú ngaskande nga kjo̱tjo nginíjnú.

¹² Kó nga ku̱i̱tjásꞌi̱e̱njnú kui ndiꞌaa̱, ti̱ꞌantindéjnú xotaa̱, kó xió ngatjaꞌbéjnú tꞌínjnúu̱.

¹³ Kó tsi kui xotaa̱ tsja ka̱maa̱ nga kjóchójnú, kjo̱a̱xiójnú kꞌuijñá kui ngi̱ndiee̱, ta̱nga tsi jmí, kui kjo̱a̱xioó kji̱ndi̱bákón nginíjnú.

¹⁴ Kó tsi tjín káꞌá xota̱ xi sa̱ꞌínkjaꞌájínjnú nga kjóchójnú, kó tsi ku̱i̱ntꞌièjín énjnú, kjiꞌanga kjo̱tjojnú kui ndiꞌaa̱ ko̱jo tsi kui na̱xi̱ńdaá, tꞌítsaniejnú xa̱a̱ ndsa̱kojnú.

¹⁵ Kó ja̱koxi̱ ni xi xiánjnúꞌun nga kui na̱xi̱ńdaá ni̱xtjin nga ka̱majeé xotaa̱, jé xí sa̱ko̱ó ta̱nisién tsie ngase ta̱bo̱a̱jiín jé xí sa̱ko̱ó na̱xi̱ńdáꞌniú Sondoma̱ ko̱jo na̱xi̱ńdáꞌniú Ngomorra̱.

Bi̱ tsꞌén katsóyà Kjisoo̱ nga si̱ꞌanchꞌo já apostroo̱

¹⁶ Kꞌi̱e̱ tsꞌéntsangiyajnúꞌun xikó maá cho̱tsa̱nga̱ xi tjimá ngi̱jii̱n cho̱lobo̱, kó kuíni nga ti̱ndyiondajnú xikó maá ngo ye̱, ta̱nga inda ini̱ma̱ ngatamajnú xikó maá ngo tójo.

¹⁷ Kó chónjnú yojojnú ngi̱jii̱n xotaa̱, ngatꞌa̱ si̱ꞌankꞌasꞌienjnú ngi̱ya tsja jáxaá, kó ngi̱ya ndiꞌa nínga ndokjo̱a̱ eén Néná kjoájnú.

¹⁸ Kó ngaskande ngindyi̱ko̱n xtitjón ko̱jo re kongínjo̱jnú ta̱ngatꞌanii̱ an, tsi̱ꞌe̱ nga ko̱ndókjo̱a̱jnú kjo̱a̱a̱ an ngindyi̱ko̱n kui xotaa̱ ko̱jo xota̱ xi jundío̱jiín.

¹⁹ Ta̱nga nga si̱ꞌankꞌasꞌienjnú ngi̱ya tsja jáxaá, ngata̱ nda̱jín májnú kjo̱a̱a̱ ni xi ko̱ndókjo̱a̱jnú ko̱jo tsi kótsꞌèn ko̱ndókjo̱a̱jnú ngo ni, ngatꞌa̱ ti̱ kuii̱ chi̱bo̱a̱ kꞌuiyájnú ni xi ko̱ndókjo̱a̱jnú.

²⁰ Ngatꞌa̱ jmí tsi jún xi ko̱ndókjo̱a̱jnú, A̱si̱énni̱xtjii̱n Na̱ꞌmijnú boá xi ku̱i̱chji̱a̱ ngajojnú.

²¹ Kó ngo ntsꞌie, ti̱ kuii̱ sa̱ꞌínkꞌasꞌien xi ingo ntsꞌiee̱ nga si̱ꞌankꞌien, kó na̱ꞌmii̱ sa̱ꞌínkꞌasꞌien ndií, kó ti̱ kui ndií kondra̱ ko̱e̱je̱e̱ xi xchaá, kó sa̱ꞌínkꞌién xkjín.

²² Kó ngayeje xota̱ xi sa̱ꞌínchꞌójnú ta̱ngatꞌanii̱ jaꞌénna, ta̱nga xi sa̱ꞌínchíkjo̱a̱ ngaskande nga kju̱i̱e̱tꞌa, kuí xi̱ꞌba̱ xi kjo̱tjoꞌa.

²³ Kó kjiꞌanga ku̱i̱yotjíngíjnú ngo na̱xi̱ńdá, xín ti̱yójnú, ngatꞌa̱ ja̱koxi̱ ni xi xiánjnúꞌun nga nde kji̱e̱ mongínyejejínjnú nangi Israee̱l nga kjo̱e̱ꞌe ndií nda̱ xi̱ꞌii̱n.

²⁴ Nda̱ xi tjibókoyaá ꞌniújín ngase ka̱maa̱ ta̱bo̱a̱jínnii̱ mostroo̱, ti̱nde ngo moso̱ ꞌniújín ngase ka̱maa̱ ta̱bo̱a̱jiín ndi̱a̱a̱ xaá.

²⁵ Jè ndakjiꞌi tsi nda̱ xi tjibókoyaá ka̱ma xikoó mostro̱ xi akóyaá, ko̱jo tsi mosoo̱ ka̱ma xikoó ndi̱a̱ xi tsi̱ꞌe̱ xaá. Tsi nda̱ xi tsi̱ꞌe̱ ndiꞌaa̱, xindajín Belsebu̱ kiꞌmií, achichíra̱ ni xi kꞌuín ngasee̱ xota̱a̱ kui ndiꞌaa̱.

Bi̱ tsꞌén akóyá Kjisoo̱ kjo̱a̱a̱ ꞌyá xí ko̱ndoko̱nní

²⁶ Ja̱ kuíni nga ngata̱ ndakonjínmájnú, ngatꞌa̱ jmíjín ni xi tjiꞌmá, xi xcha̱jín mí nii̱ bo̱a̱, ti̱nde jmíjín ni xi tikónꞌmá xi xcha̱jín.

²⁷ Ni xi nínga jñó xiyàjnúꞌun, tꞌíyájnú nínga tsijee̱n, kó ni xi kꞌuiyájnú ngi̱yaa̱ tji̱bo̱a̱nijónjnú, chaꞌayàjnú ndeskande nkꞌaa̱ ngo ndiꞌa.

²⁸ Ngata̱ ndakonjínmájnú xi tsꞌenkꞌién yojoná, ta̱nga májiín tsꞌenkꞌién ini̱ma̱ná, ta̱sá ti̱nda̱kònjnú kui xi maa̱ tsꞌénkjí ini̱ma̱jnú ko̱jo yojojnú ndo̱bo̱a̱ṉkꞌi̱e̱e̱n.

²⁹ A ku̱i̱e̱je̱njiín ngo ndí to̱n ún ndí ni̱sie. Ta̱nga nde ngojín xi kꞌo̱ka tꞌanangii̱ tsi kuijín Néná xí Na̱ꞌmijnú xi tsja̱akjo̱a̱.

³⁰ Ngatꞌa̱ ngaskande tsja̱ xi tjiín tokojnú tjixki̱.

³¹ Kó kuíni nga, ngata̱ ndakonjínmájnú, ngatꞌa̱ chjí ngasenii̱ jún ta̱bo̱a̱jiín kjín ni̱sie.

³² Ngayeje xota̱ xi ka̱tso̱yà ngindyi̱ko̱n xotaa̱ nga bena, ti̱ bo̱a̱ ti̱ tsꞌén xiyà an nga be an kui ngindyi̱ko̱n Na̱ꞌmina xi tikón ndiꞌakꞌajmi jàn,

³³ ta̱nga ta̱ ꞌyání xi ka̱tso̱yà nga bejínna ngindyi̱ko̱n xotaa̱, ti̱ bo̱a̱ ti̱ tsꞌén xiyà an nga bejín an kui ngindyi̱ko̱n Na̱ꞌmina xi tikón ndiꞌakꞌajmi jàn.

Bi̱ tsꞌén katsóyà Kjisoo̱ nga ta̱ngatꞌanii̱ kui nga ko̱kjanga xotaa̱

³⁴ Ngata̱ niꞌánkjójínjnú nga kjo̱a̱xió jéꞌe̱jóo̱ kui tꞌanangii̱, jmí kjo̱a̱xió jéꞌe̱jojáa̱n, kjo̱a̱xchán xí jéꞌe̱jóo̱.

³⁵ Ngatꞌa̱ jéꞌe̱ án tsi̱ꞌe̱ nga ngo ndí kondra̱ kꞌuijñánii̱ na̱ꞌmii̱, tsi̱ꞌe̱ nga ngo tsa̱kjìn kondra̱ kꞌuijñánii̱ na̱aa̱n, tsi̱ꞌe̱ nga ngo kja̱nda kondra̱ kꞌuijñánii̱ ṉchiꞌyaá,

³⁶ kó nda̱ xi tsi̱ꞌe̱ ndiꞌaa̱, ti̱kuíní xi kondra̱ ka̱maa̱ xota̱ xi síndo kui ndiꞌaa̱.

³⁷ Ngayeje xota̱ xi ꞌniú ngase tjoó na̱ꞌmii̱ ko̱jo na̱aa̱n ta̱bo̱a̱jiín án, ka̱májín xota̱ tsa̱ꞌa̱n ka̱ma. Ngayeje xi ꞌniú mején ngasee̱ ndí xi̱ꞌii̱n ko̱jo tsi ndí chjo̱ón ta̱bo̱a̱jiín án, ti̱ ka̱májín xota̱ tsa̱ꞌa̱n ka̱ma nga,

³⁸ kó xi skjíbéjín kroo̱ sꞌe̱ ko̱e̱je̱tji̱ngina, bokínjiín nga xota̱ tsa̱ꞌa̱n ka̱ma.

³⁹ Xi ka̱mamejeén sa̱ko̱ó kjo̱a̱mindyioo̱n, ta̱sá sa̱ꞌínchaja, kó xi sa̱ꞌínchaja ta̱ngatꞌanii̱ an, kuí boá xi sa̱ko̱ó kjo̱a̱mindyioo̱n.

Bi̱ tsꞌén katsóyà Kjisoo̱ kjo̱a̱a̱ chjí xí ko̱e̱ꞌeé xotaa̱

⁴⁰ Xi sa̱ꞌínkjaꞌajnú ngi̱ya ndiꞌaa̱, án boá xi tjítsꞌénkjáꞌana, kó xi tjítsꞌénkjáꞌana an, ti̱ tjítsꞌénkjáꞌá kui Néná xí katsangiyana.

⁴¹ Ngayeje xota̱ xi sa̱ꞌínkjaꞌa ngi̱ya ndiꞌaa̱ ngo nda̱ chji̱ni̱e̱ꞌe̱én Néná, kjo̱a̱a̱ nga nda̱ chji̱ni̱e̱ꞌe̱én Néná, sꞌe̱ sa̱ko̱ó ni xi je katsꞌén ngo nda̱ chji̱ni̱e̱ꞌe̱én Néná, kó xi sa̱ꞌínkjaꞌa ngo nda̱ xi kixi̱, kjo̱a̱a̱ nga nda̱ xi kixi̱, sꞌe̱ sa̱ko̱ó ni xi je katsꞌén ngo nda̱ xi kixi̱.

⁴² Kó ta̱ ꞌyání xi tsja̱á ngo boso̱ ndáfoa nchꞌàn kui já xí tjimátji̱ngina, kjo̱a̱a̱ nga xota̱ tsa̱ꞌa̱n, ja̱koxi̱ boá nga sa̱ko̱ó ni xi je katsꞌén.