Markoo̱ 9 - Xo̱jo̱n eén Néná

¹ Kó Kjisoo̱ ti̱ bi̱ ti̱ katsó ngase: –Ja̱koxi̱ ni xi xiánjnúꞌun nga tjín káꞌá xi síndojinná kꞌi̱e̱e̱ xi ko̱yàjín ngaskande nga sku̱i̱e̱ nga kjo̱e̱ꞌe ngaꞌniuú Néná nga ko̱tíxoma.

Bi̱ tsꞌén kasasikjo a̱sie̱én Kjisoo̱

² Jun ni̱xtjin ngijee̱, Kjisoo̱ kijíjo̱tꞌaxín Peé, ko̱jo Sandiyaá, ko̱jo Juaa̱, kó ngo tji̱ngi̱ nkꞌa kijíjo̱ soboá kui jaá, kó ngindyi̱ko̱n kui jaá kje̱ꞌe kisꞌie Kjisoo̱.

³ Ńjño xi yajá Kjisoo̱ tiboa xó xó kamá, ꞌniú tiboa kamá xikoó ńchꞌaán. Nde ngojín xota̱ xi ꞌniú maá monié ńjño xi tjín kuí nga̱sondiee̱ xi bo̱a̱ tsꞌén tiboa sa̱ꞌín.

⁴ Kó ki̱a̱ jatjokjàtꞌaa̱ nda̱ chji̱ni̱e̱ꞌe̱én Néná xi ꞌmí Moisee̱, ko̱jo Eliyaa̱ nga ndyi̱chji̱a̱jo Kjisoo̱.

⁵ Kósꞌe̱ Peé, bi̱ katsoó Kjisoo̱: –Mostro̱, ¡ata̱ ndakjíꞌí nga kꞌi̱e̱ tindyión xtín! Ka̱ma si̱ꞌanda ján ndiꞌańkꞌién: Ngo tse̱, ngo tsi̱ꞌe̱ Moisee̱, sꞌe̱ ngo tsi̱ꞌe̱ Eliyaa̱.

⁶ Nde bejín mí xí ka̱tso̱ Peé, ngatꞌa̱ ndyi̱tsakjónní kui jaá.

⁷ Kósꞌe̱ ngo ṉdi̱ kitsjien xi katsꞌéntji̱nkꞌi̱e̱én nínga síndo kui jaá. Kó ngi̱jii̱n kui ṉdi̱i̱ kandaꞌyáa̱ ngo nda̱ xi bi̱ katsó: –Kuí xi̱ꞌbi̱ xi ndí tjóna, kui ndaꞌyájnúu̱.

⁸ Kó ti̱ kjiꞌa askotsijen nginí kui jaá nga ngo foaꞌatjiyajoo̱n, kó nde ngojín xi kamábe, ta̱kuítsí Kjisoo̱ xi tikón soboá.

⁹ Kó nga ndyi̱fotjajen tji̱ngi̱ nkꞌaa̱, Kjisoo̱ bo̱a̱ katsoó nga jmíjín xi ka̱tso̱yaa̱ ni xi kamábe, ngaskande nga ndií nda̱ xi̱ꞌii̱n kjo̱a̱ꞌáꞌyaá ngi̱jii̱n xota̱ xi je jesoón.

¹⁰ Kó kuíni nga ta̱ kui kixindyiajin soboárií kui eén, ndatsi asíyá ja̱kꞌi̱e̱ ja̱ngajaán xkjín, kjo̱a̱a̱ mí ni xi mejeén tsó nga kjo̱a̱ꞌáꞌyaá ngi̱jii̱n xota̱ xi je jesoón.

¹¹ Kó bi̱ katsó kui jaá nga asíyaá Kjisoo̱: –Míkjo̱a̱a̱ nga já chji̱ni̱e̱kjo̱a̱kitii̱ tsó nga tjón xò Eliyaa̱ kjo̱e̱ꞌe.

¹² Kó Kjisoo̱, bi̱ katsó: –Ja̱koxi̱ nga tjón Eliyaa̱ kjo̱e̱ꞌe, kó kuí xí sa̱ꞌíndaya ngayeje nii̱. Kó kótsꞌèn tjítꞌa xo̱jo̱n eén Néná kjo̱a̱a̱ ndií nda̱ xi̱ꞌii̱n. Tsó nga tsie xò kjo̱a̱ni̱ma̱ kjo̱a̱ꞌatio ko̱jo nga si̱ꞌanchꞌo xò.

¹³ Ta̱nga an xiyàjnúꞌun nga Eliyaa̱ jè jeꞌe, kó ta̱ ni xi mejénrií xotaa̱ ni xi katsꞌénjo̱, xikótsꞌèn kjitꞌa xo̱jo̱n eén Néná kjo̱a̱a̱ kui.

Bi̱ tsꞌén katsꞌéndaya Kjisoo̱ ngo nda̱ xi tjíjii̱n ngo a̱siénni̱xtjin xindajín

¹⁴ Kó nga jachó Kjisoo̱ nínga síndo xi ngase xota̱ tsi̱ꞌe̱, kamábe nga ngo sen xota̱ jaꞌatjindee̱, kó tjín já chji̱ni̱e̱kjo̱a̱kitii̱ xi tsíchji̱a̱tijo̱ kui jaá.

¹⁵ Kó kjiꞌanga kui xota̱ kjiín kamábe Kjisoo̱, ngayejee̱ nga kijíndikoón, kó tsanga má nga kijítsꞌentínde Kjisoo̱.

¹⁶ Kó Kjisoo̱, bi̱ katsó nga asíyaá: –Mí ni xi ndyi̱chiboátijo̱jnú kui jaá.

¹⁷ Kó ngo nda̱ jatjojin ngi̱jii̱n xota̱ kjiín, xi bi̱ katsó: –Mostro̱, kꞌi̱e̱ kjoéꞌe̱joo̱ ndína, ngatꞌa̱ ngo a̱siénni̱xtjin xi ndajín tikónjii̱n yojoo̱ xi je katsꞌénni̱ma̱, májín chji̱a̱,

¹⁸ kó ta̱ nínga kjíbé kuí a̱si̱énni̱xtjii̱n ꞌbojmitójó tꞌanangii̱, kó ngaskande xó má siꞌa tsꞌoa, kó kjinieya má ṉꞌni̱u̱, kó tsjien tajá. Jè tsíꞌáa̱ xota̱ tse̱ tsi̱ꞌe̱ nga kꞌo̱xié kui a̱si̱énni̱xtjii̱n, ta̱nga kamájiín.

¹⁹ Kó Kjisoo̱, bi̱ katsoó: –¡Xota̱ xi sꞌijinjiín! Ngaskande kjiꞌání nga chjiéngá kotíjña̱jojnúꞌun. Ngaskande kjiꞌání nga ta̱kó sa̱ꞌinchíkjo̱a̱jnúꞌun. ¡Ndibájo̱jnúꞌun kꞌi̱e̱e̱!

²⁰ Kó jachóchinií kui nda̱chií Kjisoo̱. Kó kjiꞌanga kui a̱si̱énni̱xtjii̱n kamábe Kjisoo̱, ítsanieyá xchán kuí nda̱chií, tsꞌákatójó tꞌanangii̱ kó ítikjáꞌíńña, kó ngaskande xó má kisiꞌa tsꞌoa.

²¹ Kó Kjisoo̱, bi̱ katsó nga asíyaá na̱ꞌmii̱ kui nda̱chií: –Ndeskande kjiꞌání nga bi̱ maa̱. Sꞌe̱ na̱ꞌmii̱ kui nda̱chií, bi̱ katsó: –Ndeskande koó nga chichí.

²² Kó kui a̱siénni̱xtjin xi ndajiín je sa kjín ndi̱yànií nga ꞌbojmijin ngi̱jin ndiꞌií, ko̱jo ngi̱jin ndáfoaa̱, tsi̱ꞌe̱ nga sa̱ꞌínkꞌién. Ja̱ kuíni, tsi ka̱ma xi si̱ꞌin, ngatamani̱ma̱a̱ ji̱n, kó tasíke̱jejne̱.

²³ Kó Kjisoo̱, bi̱ katsó: –Kótsꞌèn nga tsi ka̱ma xi si̱ꞌin se ji. ¡Ngayeje xota̱ xi sꞌijii̱n Néná, ka̱márií ta̱jmì niní!

²⁴ Ti̱ kjiꞌa na̱ꞌmii̱ nda̱chií askjandáyà má, nga bi̱ katsó: –¡Sꞌijinna Néná, kó tasíke̱jení tsi̱ꞌe̱ nga ꞌniú ngase sꞌi̱jinna!

²⁵ Kó nga kamábe Kjisoo̱ nga ta̱sasá kamátikó xota̱ kjiín, katsꞌénxchánjo̱ kui a̱siénni̱xtjin xi ndajiín, nga bi̱ katsoó: –¡A̱siénni̱xtjin xi ndajín xi ni̱ma̱ ko̱jo xi xtiya, án xí bo̱a̱ tꞌíxiaán, tji̱taxi̱e̱jíi̱n ngi̱jin yojoo̱ kui nda̱chií, kó nga ngiti̱ nijánjín ki̱a̱ bitjasꞌi̱jíi̱n!

²⁶ Kósꞌe̱ askjandáyà kui a̱siénni̱xtjin xi ndajiín, kó ngije ítsanieyá xchán kuí nda̱chií jatjoxiejii̱n ngi̱jin yojoo̱, kó kui nda̱chií kisꞌie kꞌien kꞌien, ngaskande xota̱ kjiín jè kꞌien kui nda̱chií katsó.

²⁷ Ta̱nga Kjisoo̱ iskjíbé tsja, kó katsꞌénkjastjíe̱n, kósꞌe̱ kasasienkixi̱ kui nda̱chií.

²⁸ Kó ngije tsꞌasꞌien Kjisoo̱ ngo ndiꞌa, xota̱ tsi̱ꞌe̱ asíyátꞌaxiín, nga bi̱ katsoó: –Ánní nga ji̱n kamájínjne̱ kaꞌnaxiéjne̱ kui a̱siénni̱xtjin xi ndajiín.

²⁹ Kó Kjisoo̱, bi̱ katsoó: –Kui xkjín kui xindajiín, ta̱xkiya fotjojín, ta̱ ngototo nga ndokjo̱a̱a̱ Néná, ko̱jo nga niꞌánkjaꞌa kjindiá yojoná.

Bi̱ tsꞌén katsóyà nginí Kjisoo̱ xi ma jó ndi̱yà nga ko̱yà

³⁰ Kó ngije jatjo kui ngi̱ndiee̱ Kjisoo̱ ko̱jo xota̱a̱, jaꞌa nangi Ngalilea̱, kó kamámejénjiín nga tjín xí sku̱i̱e̱ nga ki̱a̱ jaꞌa,

³¹ ngatꞌa̱ xota̱ tsi̱ꞌe̱ akóyaá, kó bi̱ katsoó: Ndií nda̱ xi̱ꞌii̱n ngi̱ya tsja xotaa̱ si̱ꞌankꞌasꞌien, kó sa̱ꞌínkꞌién, kó ngije kiniꞌánkꞌién, xi ma jaán ni̱xtjin kjo̱a̱ꞌáꞌyaá.

³² Ta̱nga kui jaá kamákjínjiín kui eén, kó katsakjónní nga asíyaá.

Bi̱ tsꞌén katsóyà Kjisoo̱ ꞌyání xi chjí ngasenii̱ nínga botixómá Néná

³³ Kó jachó na̱xi̱ńdáꞌniú Kapernau̱n. Kó ngije síndo ngi̱ya ndiꞌaa̱, Kjisoo̱, bi̱ katsó nga asíyaá xota̱a̱: –Mí xí ndyi̱nchiboájnú ngi̱ya ndi̱ya̱à nga ndyi̱ndibá ngoye.

³⁴ Ta̱nga kui jaá xió kisꞌińdo, ngatꞌa̱ nga tjimáyà ngi̱ya ndi̱ya̱à ndyi̱fotí kjo̱a̱a̱ ꞌyání xi chjí ngasenii̱ ngi̱jii̱n kui jaá.

³⁵ Kó Kjisoo̱ kisꞌijñando, sꞌe̱ tsíchji̱a̱a̱ nga tiejó xota̱a̱, kó bi̱ katsoó: –Tsi tjín káꞌá xota̱ xi mejeén nga tjón ka̱ma, chjiéngá kui xi kju̱i̱e̱tꞌa ka̱ma, kó kuí boá xi sa̱ꞌínseén ngayeje xi ngasee̱.

³⁶ Sꞌe̱ iskjíbé ngo nda̱chí, kó ngamasiee̱n kui jaá íjñá, sꞌe̱ iskjíbé tjiaa̱ nda̱chií, kó bi̱ katsó:

³⁷ –Ta̱ ꞌyání xi skjíbéní ngajona ngo nda̱chí xikoó xi̱ꞌbi̱, ti̱ tsꞌénkjíbéna án nga, kó xi tsꞌénkjíbéna án, jmí tsi an xi tsꞌénkjíbéna, kuí Néná xi katsangiyana xi tsꞌénkjíbé.

Bi̱ tsꞌén katsóyà Kjisoo̱ kjo̱a̱a̱ nga xota̱ xi kondra̱nájín, kjo̱a̱nda tsa̱ñá tikón

³⁸ Kó Juaa̱, bi̱ katsoó Kjisoo̱: –Mostro̱, ngo nda̱ kamáyà ji̱n xi ngajo tse̱ tsꞌénꞌboxiéni xindajín, ta̱nga kui kꞌi̱e̱jín tji̱e̱nginá, kó ikꞌíchjájne̱ ngatꞌa̱ jmí tsi kꞌi̱e̱ tsoꞌbátji̱ngíná.

³⁹ Ta̱nga Kjisoo̱, bi̱ katsoó kui nda̱a̱: –Ngata̱ ꞌbíchjájínjnúu̱, ngatꞌa̱ ngayeje xi sa̱ꞌín ngo kjo̱a̱ndikón ngajona, ka̱májín ti̱ kjiꞌa chꞌo ka̱tso̱na.

⁴⁰ Ngatꞌa̱ xi kondra̱nájín tikón, kjo̱a̱nda tsa̱ñá tikón.

⁴¹ Kó ta̱ ꞌyání xi tsja̱ajnú ngo boso̱ ndáfoa ngatꞌa̱ an timatji̱ngijnúꞌun, ja̱koxi̱ ni xi xiánjnúꞌun nga sa̱kórií ni xi je katsꞌén.

Bi̱ tsꞌén akóyá Kjisoo̱ kjo̱a̱a̱ xota̱ xi ta̱ngatꞌanii̱ kui nga tsꞌénjé xota̱ xi ngasee̱

⁴² Ta̱ ꞌyání xi sa̱ꞌín ngo ni tsi̱ꞌe̱ nga ngo kui jákjíndí xí sꞌijii̱n an sa̱ꞌínjé, ta̱sá ngo ndi̱jo̱je ngatítꞌa kjásén, sꞌe̱ ngatꞌajmijin yojoo̱ ngi̱jin ndáchíkoón.

⁴³ Kuíni nga tsi ndse̱ ko̱ngijeé, ta̱sá ti̱chékjé jí, ta̱sá nda tsi ka̱tòn ndse̱ nga kꞌuieé kjo̱a̱mindyion ngatsjeé, ta̱bo̱a̱jiín tsi síndo nga jó ndse̱ nga kꞌuin jí ndo̱bo̱a̱ṉkꞌi̱e̱e̱n, ngi̱jii̱n ndiꞌí xí jmíni̱xtjin ꞌboo̱,

⁴⁴ nínga chi̱ndoo̱ kui xotaa̱ fesónjín, ti̱nde ndiꞌií jmíni̱xtjin ꞌbo.

⁴⁵ Kó tsi ndsa̱ki ko̱ngijeé, ta̱sá ti̱chékjé jí, ta̱sá nda tsi ka̱tòn ndsa̱ki nga kꞌuieé kjo̱a̱mindyion ngatsjeé, ta̱bo̱a̱jiín tsi síndo nga jó ndsa̱ki nga ku̱i̱chíjmijii̱n ndo̱bo̱a̱ṉkꞌi̱e̱e̱n, ngi̱jii̱n ndiꞌí xí jmíni̱xtjin ꞌboo̱,

⁴⁶ nínga chi̱ndoo̱ kui xotaa̱ fesónjín, ti̱nde ndiꞌií jmíni̱xtjin ꞌbo.

⁴⁷ Kó tsi ndyikin sku̱i̱e̱ ngo ni xi ko̱ngijeé, ꞌna̱xié ji, ta̱sá nda ngase nga ta̱ ngo tsi ndyikin ndyi̱a̱ nga ku̱i̱tjásꞌi̱n nínga botixómá Néná, ta̱bo̱a̱jiín tsi nga jó ndyikin ndyi̱a̱ nga ku̱i̱chíjmijii̱n ndo̱bo̱a̱ṉkꞌi̱e̱e̱n,

⁴⁸ nínga chi̱ndoo̱ kui xotaa̱ fesónjín, ti̱nde ndiꞌií jmíni̱xtjin ꞌbo.

⁴⁹ Ngatꞌa̱ ndiꞌí boá xi si̱ꞌandiani ngayeje xotaa̱.

⁵⁰ Nda na̱xa̱a̱, ta̱nga tsi ngiti̱ ndiajín ka̱ma, mí xí ko̱e̱ꞌéngaꞌniú nginíjnú nga ka̱mandia. Ngasꞌiejnú na̱xa̱ ngi̱jinjnú, kó ngatꞌiéjnú kjo̱a̱xió ja̱kꞌi̱e̱ ja̱ngaján.