Markoo̱ 8 - Xo̱jo̱n eén Néná

Bi̱ tsꞌén katsꞌénkjíén Kjisoo̱ nijón mi̱ xota̱

¹ Kui ni̱xtjin jàn, ti̱ ingo ndi̱yà nginí nga achichí má xota̱ kamátikoó, kó kisꞌiejiín ni xi iskjinie, sꞌe̱ Kjisoo̱ tsíchji̱a̱a̱ xota̱ tsi̱ꞌe̱, kó bi̱ katsoó:

² –Ni̱ma̱ kjimána kui xotaa̱, ngatꞌa̱ je ján ni̱xtjinnii̱ nga síndojo̱na kꞌi̱e̱e̱, kó jmíjiín ni xi skji̱ni̱e̱.

³ Kó tsi sa̱ꞌinkjí kjindiá án ndiꞌaa̱, ko̱yayà ngi̱ya ndi̱ya̱à, ngatꞌa̱ tjín xí kjin kjindibáni.

⁴ Kósꞌe̱ bi̱ katsó xota̱ tsi̱ꞌe̱ Kjisoo̱: –Ta̱nga ñá kongínchjaꞌá ñá kjín pan xi ko̱e̱ꞌée̱ kuí xota̱ kjiín ngo ngi̱ndie xi kjiꞌitiya xikoó xi̱ꞌbi̱.

⁵ Kó Kjisoo̱, bi̱ katsoó: –Kótjín má pan xi tikónjnú. Kó kui jaá, bi̱ katsó: –Yito ma.

⁶ Kósꞌe̱ Kjisoo̱ katsjákjo̱a̱ tsi̱ꞌe̱ nga kꞌuíndo tꞌanangi xota̱ kjiín, kó iskjíbé pan xi yitoo̱, sꞌe̱ ngije katsjaá ndokꞌóchjì Néná, akjángá, kó katsjaá xota̱ tsi̱ꞌe̱, tsi̱ꞌe̱ nga sa̱ꞌínkjaꞌasoón xota̱ kjiín, kó katsꞌén kui jaá ni xi kiꞌmií.

⁷ Kó ti̱ ndyi̱yaꞌa chiboa tji̱o̱ kui jaá nga, kó ngije Kjisoo̱ katsjaá ndokꞌóchjì Néná, ti̱ katsjákjo̱a̱ tsi̱ꞌe̱ nga kiniꞌánkjaꞌasoón xota̱ kjiín.

⁸ Kó ngayeje xotaa̱ nga iskjinie ngaskande nga kitsie cha̱n cha̱a̱n, kó jaꞌátikó pan xi tsꞌangii̱, yito ni̱se̱nyá kamá.

⁹ Mara̱ nijón mi̱ xota̱ xi iskjinie nichiniee̱. Sꞌe̱ Kjisoo̱ katsꞌénkjí ndiꞌaa̱ ngayeje kui xotaa̱.

¹⁰ Kó ti̱ kjiꞌa tsꞌasꞌien ngo tjotso je, ko̱jo xota̱ tsi̱ꞌe̱, kó kijí nangi Ndalmanuta̱.

Bi̱ katsó Kjisoo̱ kjiꞌanga kichjiáꞌaá ngo kjo̱a̱ndikón

¹¹ Kó já fariseoo̱ jachókoón Kjisoo̱, kó tsíꞌaá ngo chi̱bo̱a̱a̱ ndiꞌakꞌajmii̱ tsi̱ꞌe̱ nga skótꞌayákón.

¹² Kó Kjisoo̱ kasasienjiín kui nii̱, kó bi̱ katsó: –Míkjo̱a̱a̱ nga ngo chi̱bo̱a̱ ndyi̱míꞌá kui xotaa̱. Ja̱koxi̱ ni xi xiánjnúꞌun nga nde ngo chi̱bo̱a̱ ko̱e̱ꞌéjiín.

¹³ Kó índo soboá kui jaá, kó ti̱ tsꞌasꞌien nginí ngi̱ya tjotso jee̱, sꞌe̱ kijíngandá xi ingoboaá ngi̱ndi̱o̱ò.

Bi̱ tsꞌén akóyá Kjisoo̱ nga íjñá chi̱bo̱a̱ kjo̱a̱a̱ nisaa̱n nda̱ꞌyo̱paa̱n já fariseoo̱

¹⁴ Kó kui jaá kichíyaá nga ko̱a̱ꞌa̱ pan, kó ta̱ ngo chií pan ndyi̱yaꞌa ngi̱ya tjotso jee̱.

¹⁵ Kósꞌe̱ Kjisoo̱, bi̱ katsoó: –Chónjnú yojojnú kjo̱a̱a̱ nisaa̱n nda̱ꞌyo̱paa̱n já fariseoo̱, ko̱jo nisaa̱n nda̱ꞌyo̱paa̱n Erondee̱.

¹⁶ Kó xota̱a̱ Kjisoo̱ tsíchji̱a̱ni̱jmìjo xkjín, nga bi̱ katsó: –Kuí nii̱ xi tsó, kjo̱a̱a̱ nga jmí pan kichꞌiá jàn.

¹⁷ Kó Kjisoo̱ kamákjiín kui nii̱, sꞌe̱ bi̱ katsoó: –A ndyi̱chiboáni̱jmìjnú nga jmí pan kichꞌiájínjnú. A kji̱e̱ yàjínjnú, kó a kji̱e̱ makjínjínjnú. A ta̱kó tajá síndo ini̱ma̱jnú.

¹⁸ A tjín ndyikonjnú, kó yàjínjnú. A tjín tji̱bo̱a̱nijónjnú, kó ndaꞌyájínjnú. Kó a foaꞌátsjienjínjnú.

¹⁹ Kjiꞌanga akjangáa̱ ún pan ún mi̱ xota̱, kótjín ni̱se̱nyá kamá pan xi tsꞌangi xi kachjaꞌáꞌyájnú. Kó bi̱ katsó kui jaá: –Tiejó ni̱se̱nyá kamá.

²⁰ –Kó nga katsꞌenkjaꞌasóo̱n yito pan nijón mi̱ xota̱, kótjín ni̱se̱nyá kamá pan xi tsꞌangi xi kachjaꞌáꞌyájnú. Sꞌe̱ bi̱ katsó kui jaá: –Yito ni̱se̱nyá kamá.

²¹ Kó Kjisoo̱, bi̱ katsoó: –Kó a ta̱kó kji̱e̱ makjínjínjnú.

Bi̱ tsꞌén katsꞌéndaya Kjisoo̱ ngo nda̱ ti̱ka̱ ki̱a̱ nangi Betsainda̱

²² Kjiꞌanga jachó Kjisoo̱ ko̱jo xotaa̱ nangi Betsainda̱, ki̱a̱ jachóchinií ngo nda̱ xi ti̱ka̱, kó ꞌniú kichjiáꞌaá tsi̱ꞌe̱ nga ku̱i̱e̱njénnié tsja, kó sa̱ꞌíndaya.

²³ Kó Kjisoo̱ iskjíbengí kui nda̱ ti̱ka̱a̱, kó tsꞌaxié ndi̱tsee̱n kui ndí nangií, kósꞌe̱ ndáńti̱a̱á indyiaá ndyi̱ko̱n kui nda̱a̱, yejénnié tsja, sꞌe̱ asíyaá tsi je be chií.

²⁴ Kó nda̱ ti̱ka̱a̱ iskjíxꞌá ndyi̱ko̱n, kó bi̱ katsó: –Jè be chií an xotaa̱, kó xikó maá tsi yá xí tjimá kjimana an.

²⁵ Sꞌe̱ Kjisoo̱ ti̱ yejénnié nginií tsja xtji̱e̱e̱n nga̱són ndyi̱ko̱n, kó kamándaya kui nda̱a̱, nda kamátsijee̱n, kó kamábe cha̱n cha̱n ngayeje nii̱.

²⁶ Kó Kjisoo̱ katsꞌénkjí ndiꞌaa̱, nga bi̱ katsoó: –Ngata̱ bitjasꞌi̱njín ji kui ndí nangií nga tjín xí kꞌuiyée̱ ni xi kamaá.

Bi̱ tsꞌén katsóyà Peé nga Kjisoo̱ boá xi Kristoo̱

²⁷ Kósꞌe̱ jatjo Kjisoo̱ ko̱jo xota̱ tsi̱ꞌe̱ kui ngi̱ndiee̱, kó kijí nínga síndo ndí nangi xi chji̱a̱ni nangi Sesarea̱, nínga tikón xtitjón Ngiripee̱. Kó ngi̱ya ndi̱ya̱à Kjisoo̱, bi̱ katsó nga asíyaá xota̱ tsi̱ꞌe̱: –Kó tsó xotaa̱, ꞌyá xóní án.

²⁸ Kó kui jaá, bi̱ katsoó: –Tjín xí Jua̱ xi botíndaá xò jí tsó, kje̱ꞌe xí Eliyaa̱ xò jí tsó, kó ti̱ tjín xí tsó nga ngo xò nda̱ chji̱ni̱e̱ꞌe̱én Néná jí tsó.

²⁹ Kósꞌe̱ Kjisoo̱, bi̱ katsoó: –Kó jún, ꞌyání án, kó ꞌmíjnú. Kó Peé, bi̱ katsó: –Jí xí Kristoo̱.

³⁰ Ta̱nga Kjisoo̱ atíxomaa̱ tsi̱ꞌe̱ nga ta̱ꞌyajín xi ka̱tso̱yaa̱ kjo̱a̱a̱ ꞌyání kuí.

Bi̱ tsꞌén katsóyàtjón Kjisoo̱ nga ko̱yà

³¹ Kó Kjisoo̱ ítsꞌi̱yanii̱ nga akóyaá xotaa̱ nga ndií nda̱ xi̱ꞌii̱n chjiéngá tsie kjo̱a̱ni̱ma̱ kjo̱a̱ꞌatio, ko̱jo nga sa̱ꞌínchꞌó já xchá ngito̱ko̱o̱ na̱xi̱ńdaá, ko̱jo já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, kó katsóyà nga chjiéngá si̱ꞌankꞌien, kó nga xi ma jaán ni̱xtjin kjo̱a̱ꞌáꞌyaá.

³² Kó katsóyà cha̱n cha̱a̱n xota̱ tsi̱ꞌe̱ kui nii̱. Kósꞌe̱ Peé kijíjo̱tꞌaxín Kjisoo̱, kó katsꞌénxchánjo̱ kjo̱a̱a̱ ni xi katsó.

³³ Ta̱nga Kjisoo̱ katsꞌénkꞌafóyá nga askotsijee̱n ngayeje xota̱ tsi̱ꞌe̱, kó katsꞌénxchánjo̱ Peé, nga bi̱ katsoó: ¡Tji̱taxínboeꞌéní xindajín Satana̱! Ngatꞌa̱ jmí tsi nii̱ Néná xí tifojintakín, nii̱ xotaa̱ boá xi tifojintakín ji.

³⁴ Kósꞌe̱ Kjisoo̱ tsíchji̱a̱a̱ xota̱ tsi̱ꞌe̱, ko̱jo xota̱ kjiín, nga bi̱ katsoó: –Tsi tjín káꞌá xota̱ xi mejeén tsjiengína, ngatsꞌénchíyá yojoo̱, nga kjíbé kroo̱, kósꞌe̱ ngatjandibátjingína.

³⁵ Ngatꞌa̱ ngayeje xi mejeén kꞌo̱xiéꞌá kjo̱a̱mindyioo̱n, ta̱sá sa̱ꞌínchaja, kó ngayeje xi sa̱ꞌínchaja kjo̱a̱mindyioo̱n ta̱ngatꞌanii̱ an, ko̱jo ta̱ngatꞌanii̱ éntjatsi̱e̱e̱ Néná, kuí boá xi kjo̱tjoꞌa.

³⁶ Ngatꞌa̱ mí chjínií tsi ngo nda̱ ku̱i̱e̱je̱e̱n ngayeje ni xi tjín kuí nga̱sondiee̱, tsi kichajá ini̱ma̱a̱.

³⁷ Axa̱ mí ni xi tsja̱á ngo nda̱ xi ko̱sítꞌa ini̱ma̱a̱.

³⁸ Ngatꞌa̱ ngayeje xota̱ xi soboá ka̱maa̱ kjo̱a̱a̱ an, ko̱jo kjo̱a̱a̱ énna kꞌi̱e̱ ngindyi̱ko̱n kui xota̱ xi ndyi̱tsꞌèntꞌaa̱ kjo̱a̱ Néná, ko̱jo kui xota̱jeé, ti̱ bo̱a̱ ti̱ tsꞌén ndií nda̱ xi̱ꞌii̱n soboá ka̱maa̱ kjo̱a̱a̱ kui, nga kjo̱e̱ꞌéjo̱ kjo̱a̱jee̱ Na̱ꞌmii̱ ko̱jo ndítsjiee̱.