Markoo̱ 7 - Xo̱jo̱n eén Néná

Bi̱ tsꞌén akóyá Kjisoo̱ ni xi sa̱ꞌíndándí xotaa̱ ngindyi̱ko̱n Néná

¹ Kó kamátikónié Kjisoo̱ já fariseo̱, ko̱jo já chji̱ni̱e̱kjo̱a̱kiti xi kjindibáni na̱xi̱ńdáꞌniú Jerusale̱n.

² Kó kui jaá tsíchji̱a̱taꞌin xota̱ tsi̱ꞌe̱ Kjisoo̱ nga kamábe nga tjín káꞌá xi aniéjónjín tsja nga iskjinie nichinie.

³ Ngatꞌa̱ já fariseoo̱, ko̱jo ngayeje já jundíoo̱, kisꞌiee̱ ngo kjo̱a̱xcha̱á xota̱ xi xchaá, nga skji̱ni̱e̱jín ṉño̱ tsi tjónjín ꞌniú nda ko̱niéjón tsja.

⁴ Ko̱jo ngije kjo̱e̱ꞌení ndi̱tse̱e̱n, tsi tjónjín ko̱niéjón tsja, jmí ni skji̱ni̱e̱jín. Kó kjín ngase kjo̱a̱xchá xí tsꞌén kuí jaá xikoó nga tsꞌénkjiénjín ni xi ꞌbiyá ndáfoaa̱, ko̱jo ti̱jìndáfoaa̱, ko̱jo tikóki̱cha̱a̱, ko̱jo ṉchaa̱n tsi tjónjín sa̱ꞌíntsjie kui nii̱ xikótsꞌèn tikoón nga sa̱ꞌín.

⁵ Kó já fariseoo̱ ko̱jo já chji̱ni̱e̱kjo̱a̱kitii̱, bi̱ katsó nga asíyaá Kjisoo̱: –Míkjo̱a̱a̱ nga xota̱ tse̱ ndyi̱bendikónjín kjo̱a̱xchá xí íjñá xota̱ xi xcháná, ngatꞌa̱ ndyi̱monièjónjín tsja nga ndyi̱kjinie nichinie.

⁶ Sꞌe̱ Kjisoo̱, bi̱ katsó: –Xota̱ jókje̱n, kjénní ni xi tsíchji̱a̱ nda̱ chji̱ni̱e̱ꞌe̱én Néná xi ꞌmí Isayaa̱, nga bi̱ tsꞌén ítꞌa xo̱jo̱n: Kui xota̱ na̱xi̱ńdaá ta̱ tsꞌoa tsí nga bendikónna, ta̱nga ini̱ma̱a̱ achichí kjin tikónnii̱ an.

⁷ Ta̱kjo̱a̱ndaní nga ndyi̱tsꞌéndíkónna, ngatꞌa̱ ni xi ndyi̱bokoyá, kjo̱a̱botíxomaa̱ xotaa̱ boá.

⁸ Ngatꞌa̱ jún ꞌbíjñátꞌaxínjnú kjo̱a̱botíxomaa̱ Néná, kó ꞌniú ndyi̱mongintjingí ngasejnú kjo̱a̱xcha̱á xotaa̱.

⁹ Kó bi̱ katsó ngase Kjisoo̱: –Jún jè yàjnú kjo̱a̱botíxomaa̱ Néná, ta̱nga ndyi̱ꞌbíjñátꞌaxínjnú ta̱ngatꞌanii̱ nga ndyi̱niꞌánkjatjosónjnú kjo̱a̱xchájnú.

¹⁰ Bi̱ tsꞌén ítꞌa Moisee̱ xo̱jo̱n eén Néná: “Che̱ndikín jí na̱ꞌmíi̱ ko̱jo na̱áa̱n”, ko̱jo ti̱ ítꞌa nga “Xi ngatꞌíko̱joo̱ ka̱tso̱o̱ na̱ꞌmii̱ ko̱jo na̱aa̱n, jè katsꞌénkꞌién yojoo̱ xi̱ꞌba̱.”

¹¹ Ta̱nga jún bi̱ ndyi̱ꞌmìjnú, nga ngo ndí, ka̱ma bi̱ ka̱tso̱o̱ na̱ꞌmii̱ ko̱jo na̱aa̱n: Ka̱májín kosiko̱joo ngatꞌa̱ ngayeje ni xi tjínna jè korba̱n kamá. (Chji̱e̱ xi je katsjáa̱ Néná, tsó kui eén),

¹² kó ti̱ bo̱a̱ ꞌmíjnú nga kui xota̱ xi kui nii̱ ka̱tso̱, ngiti̱ jmíjiín kjo̱a̱ꞌniú nga ko̱síko̱jo ngase na̱ꞌmii̱ ko̱jo na̱aa̱n.

¹³ Kó bo̱a̱ tsꞌén niꞌánchjíjínjnúu̱ eén Néná, nga kui kjo̱a̱xcha̱á ndyi̱bokoyájnúu̱ xotaa̱. Kó kjín ngase ni xi xikoó xi̱ꞌbi̱ xi ndyi̱niꞌánjnú.

¹⁴ Kó Kjisoo̱ tsíchji̱a̱a̱ ngayeje xota̱ kjiín, kó bi̱ katsoó: –Ndaꞌyájnúꞌun ngayejejnú, kó ngatamakjínjnú kui nii̱:

¹⁵ Ngayeje ni xi ndibání ndi̱tsén jàn xi kꞌo̱sꞌien ngi̱jin yojoo̱ xotaa̱, kuijín nii̱ xi tsꞌénndándí ngindyi̱ko̱n Néná, ta̱nga kuí ni xi fotjoo̱ ini̱ma̱a̱ xi tsꞌénndándí.

¹⁶ Xi tjín tji̱bo̱a̱nijon nga ku̱i̱ntꞌiè, ngatasiénníjón, kó ngatamakjiín kui eén.

¹⁷ Kó ngije íjñámasien Kjisoo̱ kui xota̱ kjiín, tsꞌasꞌien ngo ndiꞌa, kó xota̱ tsi̱ꞌe̱ asíyaá kui énkjín xi tsíchji̱a̱.

¹⁸ Kó Kjisoo̱, bi̱ katsoó: –A ti̱nde jún makjínjínjnú. A kó makjínjínjnú nga ngayeje ni xi skji̱ni̱e̱ xotaa̱ nga kuijín nii̱ xi sa̱ꞌíndándí ngindyi̱ko̱n Néná,

¹⁹ ngatꞌa̱ jmí tsi ini̱ma̱a̱ kꞌo̱sꞌien ni xi skji̱ni̱e̱, nga̱tsꞌo̱a̱ boá nínga kꞌo̱sꞌien, kó ngijee̱ ndiꞌamindí jàn fochó kuí nii̱. Kó kui nii̱ katsó, ngatꞌa̱ tsjie boá ngayeje ni xi chiniee̱.

²⁰ Kó bi̱ katsó ngase Kjisoo̱: –Kuí ni xi fotjoo̱ tsꞌoa xotaa̱ xi tsꞌénndándí ngindyi̱ko̱n Néná.

²¹ Ngatꞌa̱ ngaskande ngi̱jin ini̱ma̱a̱ xotaa̱ ndibánií ni xi chꞌokjiꞌi xi tsꞌénkjó, xikoó xota̱ xi ndyi̱tsꞌèntꞌaa̱ kjo̱a̱ xkjín, ko̱jo xota̱ xi tondo̱, ko̱jo xota̱ xi ndyi̱tsꞌènkꞌién ini̱ma̱,

²² ko̱jo xota̱ xi ndyi̱tsꞌènchéjé, ko̱jo xota̱ xi xke̱é ni, ko̱jo xota̱ xi ndyi̱tsꞌèn kjo̱a̱ton, ko̱jo xota̱ xi ndyi̱ꞌboṉcha̱, ko̱jo xota̱ xi mejeén chꞌo sa̱ꞌínjo̱ yojoo̱, ko̱jo xota̱ xi onkon, ko̱jo xota̱ xi chꞌo a, ko̱jo xota̱ xi nkꞌa xi yiꞌi ꞌboxié yojoo̱, ko̱jo xota̱ xi tá kitikjo̱a̱ maa̱ yojoo̱.

²³ Ngayeje kui ni chꞌokjiꞌii̱ xi ngi̱jin ini̱ma̱a̱ xotaa̱ fotjonii̱, kó kuí nii̱ xi tsꞌénndándí ngindyi̱ko̱n Néná.

Bi̱ tsꞌén katsꞌéndaya Kjisoo̱ tsa̱kji̱ín ngo xota̱chjo̱on xi jundío̱jín

²⁴ Kó ngije jatjo Kjisoo̱ ki̱a̱a̱, kijí nangi Tiroo̱ ko̱jo nangi Sindo̱n. Kó nga tsꞌasꞌien ngo ndiꞌa, kamámejénjiín nga tjín xí sku̱i̱e̱ nga ki̱a̱ tikón, ta̱nga kamáꞌmájiín yojoo̱,

²⁵ ngatꞌa̱ ngo xota̱chjo̱on xí tikoón ngo tsa̱kjìn xí tikónjii̱n ngo a̱siénni̱xtjin xi ndajín, ngije tsintꞌié kjo̱a̱a̱ Kjisoo̱, kijíkoón, kó nga jachó nínga tikón, asiéntꞌaa̱tikoó.

²⁶ Kui xota̱chjo̱on, xota̱chjo̱on jundío̱jín boá, ngatꞌa̱ nangi Sirofenisia̱ katsen. Kó ꞌniú tsíꞌaá Kjisoo̱ tsi̱ꞌe̱ nga kꞌo̱xié kui xindajín xi tjíjii̱n tsa̱kji̱ín.

²⁷ Kó Kjisoo̱, bi̱ katsoó kui xota̱chjo̱on: Tjón mára nda nga tsiee̱ ndíjnú, ngatꞌa̱ ndajínkjiꞌi nga chje̱ꞌéxiín paa̱n ndíjnú, sꞌe̱ ńñaá ko̱e̱ꞌéjnúu̱.

²⁸ Kó kui xota̱chjo̱on, bi̱ katsó: –Jo̱o̱n Ndi̱a̱, bo̱a̱ kjiꞌi ni xi tꞌísé, ta̱nga tsi ngindie yámíxa̱a̱ síndongí ńñaá, ti̱ kuí xí kjinieni xi̱i̱ pan xi bixóngií i̱xtii.

²⁹ Kó Kjisoo̱, bi̱ katsó: –Ta̱ngatꞌanii̱ én xí kandokjo̱e̱ ji, tꞌen ꞌne̱. Kui xindajín xi tjíjii̱n tsa̱kjíi̱n, je jatjo.

³⁰ Kó ngije jachó ndiꞌaa̱ kui xota̱chjo̱on, kamábe nga je xió tikón tsa̱kji̱ín nga̱són ṉchaa̱n, kó kui xindajiín je jatjojii̱n yojoo̱.

Bi̱ tsꞌén katsꞌéndaya Kjisoo̱ ngo nda̱ xi xtiya ko̱jo xi tsakjaꞌá

³¹ Kó ngije jatjo nginí Kjisoo̱ nangi Tiroo̱, jaꞌa xtji̱e̱e̱n nangi Sindo̱n, sꞌe̱ jachó nínga tikón ngi̱ndi̱o̱ Ngalilea̱ nga jaꞌa ki̱a̱ nangi xi tjín Ndekápoli̱.

³² Kó ki̱a̱ jachóchinií ngo nda̱ xi xtiya ko̱jo xi tsakjaꞌá, kó kichjiáꞌaá Kjisoo̱ tsi̱ꞌe̱ nga ku̱i̱e̱njénnié tsja kui nda̱a̱.

³³ Kó Kjisoo̱ kijíjo̱tꞌaxín kui nda̱a̱, kó katsangisꞌien ngo xtiín tsja ti̱xa̱nijon, sꞌe̱ atítiá, kó ndáńti̱a̱á ítꞌaa̱ na̱je̱n nda̱a̱,

³⁴ kó askotsijen nkꞌa jàn, iskjiendá, kó bi̱ katsoó kui nda̱a̱: ¡Efatá! (Ngatjoxꞌá, tsó kui eén).

³⁵ Kó ti̱ kjiꞌa katjoxꞌá tji̱bo̱a̱nijon, ko̱jo kamándaya na̱je̱n, kó nda tsíchji̱a̱ kui nda̱a̱.

³⁶ Kó Kjisoo̱ bo̱a̱ katsoó ngayeje xotaa̱, tsi̱ꞌe̱ nga ta̱ꞌyajín xi ka̱tso̱yaa̱ ni xi katsꞌén, ta̱nga ngase ma nga ꞌniú atíxomaa̱ xotaa̱ nga ka̱tso̱yàjín ni xi kamábe, ta̱sá ma íni̱jmì kuí xotaa̱ ni xi kamaá.

³⁷ Kó achichí kijíndikoón xotaa̱ kui nii̱, kó bi̱ katsó: –Ngayeje nii̱ xi nda tjítsꞌén. ¡Ngaskande tsꞌénkíntꞌié xota̱ xi xtiya, ko̱jo tsꞌénkíchji̱a̱ xota̱ xi ni̱ma̱!