Markoo̱ 5 - Xo̱jo̱n eén Néná

Bi̱ tsꞌén katsꞌéndaya Kjisoo̱ ngo nda̱ xi tjíjii̱n a̱si̱énni̱xtjii̱n xindajín

¹ Kó nga jachó ngándá xí ingoboaá ngi̱ndi̱o̱ò, nangii̱ xota̱ Jerasa̱.

² Nga jatjajen Kjisoo̱ tjotso jee̱, tji̱e̱nmá jachókoón ngo nda̱ xi tjíjii̱n ngo a̱siénni̱xtjin xi ndajín.

³ Kui nda̱a̱ na̱xi̱mikꞌien kjindibáni, ngatꞌa̱ ki̱a̱ kisꞌijña, kó ta̱ꞌyajín xi kamá iskjíbé, ndatsi ńꞌniúki̱cha̱ ítꞌa.

⁴ Ngatꞌa̱ je sa kjín ndi̱yà ikꞌítꞌaꞌniú ńꞌniúki̱cha̱ se ko̱jo tsja, kó ta̱ngongá iskjítindsó ńꞌniúki̱cha̱a̱, kó ta̱ꞌyajín xi kamáꞌniuú.

⁵ Kó ni̱xtjin ko̱jo ni̱xtji̱e̱n kistsoꞌbá nga askjandáyaboa ngi̱jin kꞌijñaá, ko̱jo na̱xi̱mikꞌiee̱n, kó katsꞌénꞌón maá yojoo̱ nga tsatiee̱ ndi̱jo̱ kui nda̱a̱.

⁶ Kó ta̱ kjin tsꞌéndibání Kjisoo̱ nga kamábe kui nda̱ tsobeé, kó tsanga má kijíkoón, sꞌe̱ tji̱e̱nmá asiéntꞌaa̱tikoó.

⁷ Kó askjandáyà má, nga bi̱ katsoó Kjisoo̱: –Mí xí tjiín kjo̱a̱a̱ an, Kjiso̱, ndií Néná xí tikón ndiꞌakꞌajmi jàn. ¡Ti̱ꞌingatꞌee̱ Néná, nga jmí kjo̱a̱ni̱ma̱ niꞌínkjeꞌejínní!

⁸ Bo̱a̱ tsꞌén tsíchji̱a̱ kui nda̱ tsobeé ngatꞌa̱ Kjisoo̱, bi̱ katsoó: ¡Ji a̱siénni̱xtjin xi ndajín, tji̱taxi̱e̱jíi̱n ngi̱jin yojoo̱ kui nda̱a̱!

⁹ Kó Kjisoo̱, bi̱ katsó nga asíyaá: –Kó ꞌmií. Kó bi̱ katsoó kui nda̱a̱: –Lejio̱n ꞌmíjne̱, ngatꞌa̱ ta̱nisién kjín má ji̱n.

¹⁰ Kó kui nda̱a̱ achichí ꞌniú tsíꞌaá Kjisoo̱ tsi̱ꞌe̱ nga kjinjín sa̱ngíyá ngayeje kui a̱siénni̱xtjin xi ndajiín.

¹¹ Kó ki̱a̱ tꞌa tji̱ngi̱i̱ tjimá kjín chi̱nga̱ xi ndyi̱kjién ngi̱jin ndi̱xcho̱o̱,

¹² kó kui xindajiín, ꞌniú tsíꞌaá Kjisoo̱, nga bi̱ katsoó: –Nangíyéjne̱ nínga síndo kui chi̱nga̱a̱, tsi̱ꞌe̱ nga ku̱i̱tjásꞌi̱e̱njinjne̱ yojoo̱.

¹³ Kó Kjisoo̱ katsjaákjo̱a̱, kó kui a̱siénni̱xtjin xi ndajiín jataxiejin ngi̱jin yojoo̱ kui nda̱a̱, sꞌe̱ tsꞌasꞌienjin ngi̱jin yojoo̱ chi̱nga̱ kjiín. Kui chi̱nga̱a̱ mara̱ tsi ta̱ jó mi̱, kó ta̱xkiya tsanga tsobé ngo nínga nkꞌa, kó ki̱a̱ ixó ngi̱jii̱n ndáchíkoón nínga jesón ngándá ngayejee̱.

¹⁴ Kó kui já xí ndyi̱koo̱n kui chi̱nga̱a̱, tsanga má kijí ngi̱jin na̱xi̱ńdáꞌniuú ko̱jo tꞌa ṉdi̱a̱a̱ nga íni̱jmì ni xi kamá ki̱a̱a̱, kó xotaa̱ ngije kiꞌmíyaà, kijíkatsijee̱n mí ni xi kamaá.

¹⁵ Kó ngije jachó kui xota̱ kjiín nínga tikón Kjisoo̱, kó nga kamábe nga ki̱a̱ tikóntꞌaa̱ kui nda̱ xi kisꞌijñajii̱n xindajiín, nga je tsꞌényajá ńjñoo̱, kó nga je nda tikón, achichí katsakjónní kui xotaa̱.

¹⁶ Kó kui xota̱ xi kamábe ni xi kamaá kui nda̱ xi kisꞌijñajii̱n xindajiín, ko̱jo ni xi kamaá chi̱nga̱a̱, íni̱jmi̱ì xota̱ xi ngasee̱.

¹⁷ Kó xotaa̱ ꞌniú tsíꞌaá Kjisoo̱ tsi̱ꞌe̱ nga kjo̱tjo kui ngi̱ndiee̱.

¹⁸ Kó nga tsꞌasꞌien Kjisoo̱ ngi̱ya tjotso jee̱, nda̱ xi kisꞌijñajii̱n xindajiín ꞌniú tsíꞌaá tsi̱ꞌe̱ nga kjo̱jo.

¹⁹ Ta̱nga Kjisoo̱ katsjandièjiín, ta̱sá bi̱ katsoó: –Ta̱sá tꞌen ndiꞌàa̱, tꞌenchíi̱n xingi̱ ji, kó tꞌíni̱jmìi̱ ni je xi katsꞌénjoo̱ Néná, ko̱jo kótsꞌèn nga Néná kamáni̱ma̱a̱ ji.

²⁰ Kó kui nda̱a̱ kijí, kó ítsꞌi̱yanii̱ nga íni̱jmi̱ì ngayeje xota̱ na̱xi̱ńdá xi chji̱a̱ni nangi Ndekápoli̱ kjo̱a̱a̱ ni xi katsꞌénjo̱ Kjisoo̱, kó ngayeje xotaa̱ achichí kijíndikoón.

Bi̱ tsꞌén katsꞌéndaya Kjisoo̱ ngo tsa̱kjìn ko̱jo ngo xota̱chjo̱on

²¹ Kó nga kijí nginí Kjisoo̱ ngándá jàn nga jaꞌatioya ngo tjotso je, achichí xota̱ kamátikótꞌaa̱, kó kui ki̱a̱ kisꞌijña tꞌa ndaá.

²² Kó jachókoón Kjisoo̱ ngo nda̱ ngito̱ko̱o̱ ndiꞌa nínga ndokjo̱a̱ eén Néná xi ꞌmí Jairo̱, kó ngije kamábe Kjisoo̱, asiéntꞌaa̱tikoó,

²³ kó achichí ꞌniú tsíꞌaá Kjisoo̱, nga bi̱ katsoó: –Ndí tsa̱kjìnchína jè kjiꞌme, tꞌenje̱ chiíní, kó tꞌenkꞌíjñisée̱n ndse̱ tsi̱ꞌe̱ nga kjo̱tjoꞌa, ko̱jo tsi̱ꞌe̱ nga kꞌuijñá nginí ndína.

²⁴ Kósꞌe̱ Kjisoo̱ kijíjo̱ Jairoo̱, kó achichí xota̱ nijan kijíjo̱ xi ngaskande ndyi̱ꞌbindyióꞌniú má.

²⁵ Kó ngo xota̱chjo̱on xí tiejó nónií nga tjiín chi̱xójín,

²⁶ achichí kjo̱a̱ni̱ma̱ je jaꞌatio nga kjín chji̱ni̱e̱ndiki xi je katsꞌénjo̱, kó je katsꞌénkjié ngayeje to̱o̱n, kó jmí ni kamáchjíjiín ni xi je kiniꞌaán, ngatꞌa̱ ta̱sá ma kamáꞌniú ngase chiꞌii̱n.

²⁷ Nga tsintꞌié kuí xota̱chjo̱on ni xi tjítsꞌén Kjisoo̱, ngi̱jii̱n xota̱ kjiín kijíkóntiñaa̱ xtji̱e̱e̱n nga̱xto̱n Kjisoo̱, kó katsꞌénjo̱ nga̱ndee̱ ńjñoo̱.

²⁸ Ngatꞌa̱ bi̱ katsó: “Tsi ndeta̱ ńjñoo̱ xí sa̱ꞌinjo̱ an, kjo̱tjoꞌa an.”

²⁹ Ti̱ kjiꞌa kixixió chi̱xójiín, kó tsijen kamaá yojoo̱ nga je kamándaya kui chiꞌin xi koo̱n.

³⁰ Sꞌe̱ Kjisoo̱ kamákjín tji̱ꞌni̱u̱ú nga ngo ngaꞌniú jatjoo̱ yojoo̱, kó bi̱ katsó nga asíyaá xota̱ kjiín: –ꞌYá xí katsꞌénjo̱ ńjñona.

³¹ Kósꞌe̱ bi̱ katsó xota̱ tsi̱ꞌe̱: –Ye nde nde ji nga xota̱ kjiín tsꞌénꞌbindyióꞌniuú kó: “ꞌYá xí katsꞌénjo̱na.” Tꞌísé ji.

³² Kó askotsijee̱n xotaa̱ nga ngo foaꞌatjiyajoo̱n, tsi̱ꞌe̱ nga sku̱i̱e̱ ꞌyání xi katsꞌénjo̱.

³³ Kósꞌe̱ kui xota̱chjo̱on, katsakjónní kó jatsiéndíkón má ngatꞌa̱ je be ni xi katsꞌén, kó kijíkasiéntꞌaa̱tikoó kje̱n Kjisoo̱, kó ki̱a̱ katsóyà ja̱koxi̱ ngayeje ni xi kamaá.

³⁴ Kó Kjisoo̱, bi̱ katsoó: Ji chjo̱on, kjo̱a̱sꞌijìi̱n xí je tsꞌaxiéꞌaá, tꞌen xió xió ji, jè kamándaya chiꞌin xi koo̱n.

³⁵ Ti̱ tsꞌénchji̱a̱ ngase Kjisoo̱, nga jachó já xí kjindibáni ndiꞌaa̱ nda̱ ngito̱ko̱o̱ ndiꞌa nínga ndokjo̱a̱ eén Néná, nga bi̱ katsoó na̱ꞌmii̱ kui tsa̱kjìnchií: –Jè kꞌien tsa̱kjìnchíi̱, mí tsjá tiniꞌínxtì ngasee̱ Mostroo̱.

³⁶ Ta̱nga Kjisoo̱, nde ki̱a̱jín katsꞌénseén kui jaá, kó bi̱ katsoó nda̱ ngito̱ko̱o̱ ndiꞌa nínga ndokjo̱a̱ eén Néná: –Ngata̱ ndakinjín ma ji, ta̱ ti̱ꞌinsꞌijin tsí ji.

³⁷ Kó Kjisoo̱ katsjandièjín nga kje̱ꞌe xota̱ xi kijítji̱ngii̱, ta̱ Peé tsi, ko̱jo Sandiyaá, ko̱jo Jua̱ ntsꞌi̱e̱ Sandiyaá xi kijíjo̱.

³⁸ Kó ngije jachó ndiꞌaa̱ nda̱ ngito̱ko̱o̱ ndiꞌa nínga ndokjo̱a̱ eén Néná, kamábe Kjisoo̱ nga xotaa̱ je kjima xa̱n xa̱n nga ndyi̱kjandà.

³⁹ Kó nga tsꞌasꞌien Kjisoo̱ ndiꞌaa̱, bi̱ katsó: –Míkjo̱a̱a̱ nga kjima xa̱n xa̱njnú ko̱jo nga ndyi̱chaꞌájnú. Tsa̱kjìnchií kji̱e̱ ꞌméjín, ta̱ kjiꞌifé tsí.

⁴⁰ Kó xotaa̱ tsajnókie Kjisoo̱. Ta̱nga kui katsꞌénkjataxie ngayeje xotaa̱, kó tsíchji̱a̱a̱ na̱ꞌmii̱ ko̱jo na̱aa̱n kui tsa̱kjìnchií, ko̱jo xota̱ xi tsoꞌbájo̱, kó tsꞌasꞌien nínga kjiꞌijña tsa̱kjìnchií.

⁴¹ Kó Kjisoo̱ iskjíbé tsja tsa̱kjìnchií, kósꞌe̱ bi̱ katsó: –Talita Kumi (Tsa̱kjìnchií, jí xí tsꞌénchji̱a̱joo, ti̱sítji̱n ji: tsó kui eén).

⁴² Kó ti̱ kjiꞌa, kui tsa̱kjìnchí xi tiejó noó, jastjíe̱n kó kistsoꞌbá. Kó xotaa̱ achichí kijíndikoón kui ni xi kamaá.

⁴³ Kó Kjisoo̱ bo̱a̱ katsoó xotaa̱, tsi̱ꞌe̱ nga ta̱ꞌyajín xi kꞌuiyaá kui ni xi katsꞌén, kó tsíꞌá tsi̱ꞌe̱ nga ko̱e̱ꞌeé nichinie kui tsa̱kjìnchií.