Markoo̱ 4 - Xo̱jo̱n eén Néná

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ ngo nda̱ xi atítsojo xojmá

¹ Kó ingo ndi̱yà nginí akóyá Kjisoo̱ tꞌa ndáchíkoón, kó achichí má xota̱ xi kamátikótꞌaa̱ nga ngo foaꞌatjiyajoo̱n, kó Kjisoo̱ ngo tjotso je kijíkꞌíjñaya, tji̱e̱nga ngayeje xotaa̱ tꞌa ndáchíkoón kisꞌińdo.

² Kó achichí má ni xi tsíchji̱a̱jo nga katsꞌénkjién énkjín, bi̱ katsó nga akóyaá:

³ –Ndaꞌyájnú kui nii̱: Ngo nda̱ xi ꞌbítji̱e̱, kijíkꞌítji̱e̱ xojmá.

⁴ Kó nga ítji̱e̱ xojmaá, ngo tjín xí ixó tꞌa ndi̱ya̱à, kó kjindibá ni̱sie xi tjín nkꞌa jàn, sꞌe̱ iskjinie.

⁵ Ingo tjín kuí xojmaá xi ixó ngi̱jin ndi̱jo̱o̱, nínga tsiejín ńdie tjín, kó tsá katjońtsꞌién, ngatꞌa̱ na̱nga̱jín tikón ńdiee̱,

⁶ ta̱nga nga jatjo tsꞌueé, katsꞌénchjaán, ngatꞌa̱ ꞌniújín na̱nga̱ síndo ja̱ma̱a̱, kó kixí.

⁷ Ingo tjín kuí xojmaá xi ixó ngi̱jin yándáꞌyaá, kó nga kamánkꞌá yándáꞌyaá, katsꞌénxí, kó jmí to kisꞌiejiín.

⁸ Ta̱nga ingo tjín kuí xojmaá xi ixó tꞌanangi xi ndaa̱, íntsꞌién, kó kamáxchá, kó kisꞌiee̱ to, tjín xí katsjá kantié to, tjín xí katsjá ichítié ko̱jo tie, kó tjín xí katsjá úchán to nga ngo nga ngo.

⁹ Sꞌe̱ bi̱ katsó ngase Kjisoo̱: –Xi tjín tji̱bo̱a̱nijon nga ku̱i̱ntꞌiè, ngatasiénníjón kui eén.

Bi̱ tsꞌén katsóyà Kjisoo̱ míkjo̱a̱a̱ nga énkjín katsꞌénkjién

¹⁰ Kó jaskan ngije kisꞌijña soboá Kjisoo̱, xota̱ xi kisꞌińdotꞌaa̱ ko̱jo nga tiejó xota̱ tsi̱ꞌe̱, asíyaá kjo̱a̱a̱ kui énkjín xi katsóyà.

¹¹ Kó Kjisoo̱, bi̱ katsoó: –Jún je kiꞌmíyàjnú ni xi tjiꞌmaá xikótsꞌèn botixómá Néná, ta̱nga kui xota̱ xi síndo ndi̱tsén jàn énkjín xí tjindókjo̱a̱jo nga tjíꞌmíyaá ngayeje nii̱,

¹² tsi̱ꞌe̱ nga ndatsi skotsíjen, sku̱i̱e̱, ta̱nga ka̱makjínjiín, kó ndatsi ko̱siénnijon, ku̱i̱ntꞌiè, ta̱nga ka̱makjínjiín, tsi̱ꞌe̱ nga ko̱síkjoyájín yojoo̱, kó si̱ꞌanjetakónjiín jeé.

¹³ Kó Kjisoo̱, bi̱ katsoó nga: –A makjínjínjnú kui énkjiín. Ja̱ kótsꞌèn ka̱makjínnijnú énkjín xi ngasee̱.

¹⁴ Nda̱ xi ꞌbítji̱e̱ xojmaá, kuí xí ꞌbítji̱e̱ eén Néná.

¹⁵ Kó kuí bí xota̱ xi xikoó xojmá xi ixó tꞌa ndi̱ya̱à: Kui xota̱ xi ngije ikꞌítji̱e̱jii̱n eén, ta̱nga ngije ntꞌié, ta̱ tji̱ꞌni̱u̱ ndibá xindajín Satanaa̱, kó foaꞌáxiín kui eén Néná xí je kamátji̱e̱ ngi̱jin ini̱ma̱a̱.

¹⁶ Kó ti̱ bo̱a̱ ti̱ kon xota̱ xi xikoó xojmá xí kamátji̱e̱ tꞌanangi nínga tjín ndi̱jo̱o̱: Ngije ntꞌié eén Néná, ti̱ kjiꞌa achichí tsja maá nga kjíbé,

¹⁷ ta̱nga nga jmí ja̱ma̱jiín, kuíni nga ta̱ chiboa tsí ꞌbondíyaá, ngatꞌa̱ kjiꞌanga ta̱ngatꞌanii̱ eén Néná foaꞌatio ngo kjo̱a̱ni̱ma̱, ko̱jo tsi miyotji̱ngii̱, tji̱e̱nmá ꞌbijñámasien ni xi tsi̱ꞌe̱ Néná.

¹⁸ Kó kje̱ꞌe xota̱ xi bi̱ kon xikoó kui xojmá xí kamátji̱e̱ ngi̱jin ndaꞌyaá: Ntꞌié eén Néná,

¹⁹ ta̱nga ta̱soboá nda̱ kjimaa̱ ni xi tjiín kui nga̱sondiee̱, kó kjo̱a̱chꞌáṉchaa̱ kjo̱a̱cho̱o̱n ko̱jo kjo̱a̱ndikonkoón nii̱ ꞌbosꞌieén, kó tsꞌénxí eén Néná, kó kui nii̱ xi tsjandièjín nga boajaá to.

²⁰ Kó kuí xi̱ꞌbi̱ xi ikꞌítji̱e̱ tꞌanangi ndaa̱: Xota̱ xi ntꞌié eén Néná kó nda kjíbé, kó kuí xí xikoó xojmá xí tsjá kantié, ko̱jo ichítié ko̱jo tie, ko̱jo ngaskande úchán to nga ngo nga ngo.

Bi̱ tsꞌén akóyá Kjisoo̱ kjo̱a̱a̱ ndiꞌií

²¹ Kó Kjisoo̱, ti̱ bi̱ ti̱ katsoó kui jaá nga: –A tjín xota̱ xi ku̱i̱ꞌítí ngo ndiꞌíxò, tsi̱ꞌe̱ nga ku̱i̱ꞌíjñá ngindiee̱ ngo kojo̱, ko̱jo tsi ngindiee̱ ngo ṉchan. A mí tsí ngo ndiꞌíxò nínga ꞌbítíyá ndiꞌí xí tsꞌentsíjee̱n ꞌbíjñá tsi̱ꞌe̱ nga sa̱ꞌíntsijen.

²² Ngatꞌa̱ jmíjín ni xi tjiꞌmá, xi xcha̱jín mí nii̱ bo̱a̱, ti̱nde jmíjín ni xi tikónꞌmá xi xcha̱jín nínga tsijee̱n.

²³ Xi tjín tji̱bo̱a̱nijon nga ku̱i̱ntꞌiè, ngatasiénníjón kui eén.

²⁴ Kó Kjisoo̱, bi̱ katsó ngase: –Nda nda ma tasiénijónjnúu̱ ni xi ndyi̱ndaꞌyájnú, ngatꞌa̱ xikótsꞌèn nda ko̱si̱e̱nnijónjnú, bo̱a̱ tsꞌén tsie ngase ko̱e̱ꞌéjnú nga ka̱makjínjnú, kó ngaskande kjósón ngasee̱.

²⁵ Ngatꞌa̱ xi ntꞌié ni xi bokoyá an, tsie ngase ko̱e̱ꞌeé nga ka̱makjiín, ta̱nga xi ntꞌiéjín, chja̱ꞌáxiín ngaskande ni xi chií makjiín.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín xojmá xi foaꞌá soboaá

²⁶ Kó ti̱ bi̱ ti̱ katsó Kjisoo̱ nga: –Nínga botixómá Néná, bo̱a̱ fóyanii̱ xikoó ngo nda̱ xi ku̱i̱ꞌítji̱e̱ xojmá ngi̱jin tꞌanangii̱.

²⁷ Kui nda̱a̱ tsi kjófé ko̱jo tsi kjo̱stjíe̱n, tsi nga ni̱xtjin ko̱jo tsi nga ni̱xtji̱e̱n, ta̱nga kui xojmaá kjiꞌbíńtsꞌién, kó kjimankꞌa, ndatsi kui nda̱a̱ nde bejín kótsꞌèn kjimaxchání.

²⁸ Ngatꞌa̱ tꞌanangii̱ tjítsꞌén xchá soboá kui xojmaá: tjón xka̱a̱ tjo, sꞌe̱ tjo ńtiín, sꞌe̱ mato ńtiín.

²⁹ Kó ngije kichjí too̱, tji̱e̱nmá nangii̱ ki̱cha̱ntꞌi̱u̱a̱ nga bichá, ngatꞌa̱ je jachó ni̱xtjii̱n nga xtì.

Bi̱ tsꞌén íjñá chi̱bo̱a̱ Kjisoo̱ énkjiín xojmaá mostasaa̱

³⁰ Kó ti̱ bi̱ ti̱ katsó Kjisoo̱ nga: –Mí ni xi kꞌuijñá chi̱bo̱a̱yajnúꞌun nínga botixómá Néná, axa̱ mí énkjín xi sa̱ꞌinkakíi̱n.

³¹ Xikónií ngo ndí xojmaá mostasa̱ xi ꞌbítji̱e̱ ngi̱jin tꞌanangii̱, kuí ndí xojmaá xi ta̱nisién ꞌniú chichí ngase ngayeje xojmá xi tjín tꞌanangii̱,

³² ta̱nga ngije sitji̱e̱, maxchá, kó kuí yaá xi ꞌniú je ko̱jo xi ꞌniú nkꞌa ngase ma ta̱bo̱a̱jínnii̱ ngayeje yá xí kjiꞌitjieé xotaa̱, kó achichí ꞌniú tsingá ma tjiaa̱, ngaskande ni̱sie xi tjín nkꞌa jàn, ki̱a̱ fochó tsꞌénda ndo̱bo̱a̱a̱ ngindie tji̱nkꞌi̱e̱én kui yaá.

Bi̱ tsꞌén katsóyà Kjisoo̱ kjo̱a̱a̱ kótsꞌèn katsꞌénkjién énkjiín

³³ Kó kjín énkjín xikoó xi̱ꞌbi̱ xi katsꞌénkjién Kjisoo̱ nga tsíchji̱a̱jo xotaa̱ eén Néná, ta̱ xikótsꞌèn kamákjínrií kui xotaa̱.

³⁴ Jmí ni̱xtjin nga énkjínjín katsꞌénkjién nga tsíchji̱a̱jo, ta̱nga xota̱ tsi̱ꞌe̱ katsóyàtꞌaxín cha̱n cha̱a̱n ngayeje nii̱.

Bi̱ tsꞌén katsꞌénkꞌíxió Kjisoo̱ tjo̱o̱ ko̱jo ndáchíkoón

³⁵ Kui ni̱xtjin jàn ngije kjimajñoó, Kjisoo̱ bi̱ katsoó xota̱a̱: –Tjián ngándá xi ingoboá jàn.

³⁶ Kó katsꞌénkjí xota̱ kjiín, kó tsangínjo̱ Kjisoo̱ ngi̱ya kui tjotso je xi ta̱kó tikoón, kó tjín xota̱ xi kijítji̱ngii̱ xi tjimáyà kje̱ꞌe tjotso je.

³⁷ Kó nga tjimájin ngi̱jin ndaá kjindibá ngo tjo̱ꞌniú xi ndeskande tsꞌenkꞌásꞌién má ndáfoa ngi̱ya tjotso jee̱, kó ngaskande je matingándá má.

³⁸ Kó Kjisoo̱ kjiꞌifé nga̱xto̱n tjotso jee̱, kó ngo nibíngitoko katsꞌénkjién. Kiniꞌánkjaꞌaá, kó bi̱ kiꞌmií: ¡Ji mostro̱! A ndasénjiín nga je matingándá.

³⁹ Kó jastjíe̱n Kjisoo̱, kó ꞌniú tsíchji̱a̱jo tjo̱o̱, sꞌe̱ bi̱ katsoó ndáchíkoón: ¡Xió! ¡Xió tindyin! Kó tji̱e̱nmá kixixió tjo̱o̱, kósꞌe̱ kisꞌie xió xió nga̱són ndáfoaa̱.

⁴⁰ Kósꞌe̱ bi̱ katsoó xota̱a̱: –Ánní nga ndyi̱ndakónjnú. A sꞌijinjínjnú.

⁴¹ Kó achichí katsakjónní kui jaá, kó ja̱kꞌi̱e̱ ja̱ngaján, bi̱ katsoó xkjín: –ꞌYá nda̱a̱ bo̱a̱ xi̱ꞌbi̱, nga ngaskande tjo̱o̱ ko̱jo ndáchíkoón ntꞌiéꞌeén.