Markoo̱ 2 - Xo̱jo̱n eén Néná

Bi̱ tsꞌén katsꞌéndaya Kjisoo̱ ngo nda̱ xi májín fí

¹ Kó ngije jaꞌa chiboa ni̱xtjin, tsꞌasꞌien nginí Kjisoo̱ na̱xi̱ńdáꞌniú Kapernau̱n, kó tsintꞌié xotaa̱ nga ngi̱ya ndiꞌa tikón Kjisoo̱.

² Kó achichí má xota̱ kamátikó, ngaskande ngiti̱ kisꞌiénjín ngase tꞌa nga̱ntjo̱a̱a̱ ndiꞌaa̱. Kó Kjisoo̱ ki̱a̱ íni̱jmì eén Néná.

³ Kósꞌe̱ jachó xtji̱e̱e̱n nínga tikón Kjisoo̱ nijón já xí ndyi̱yaꞌankꞌá ngo nda̱ xi ni̱ma̱ xi májín fí.

⁴ Kó nga kamájiín jachójo̱ tiñaa̱ Kjisoo̱ kui nda̱ xi ni̱ma̱a̱, ngatꞌa̱ achichí xota̱ xi tjín, iskjíxꞌá nkꞌaá ndiꞌaa̱, kó ki̱a̱ katsꞌénkjatjajen ṉchan xi kjiꞌisoón nda̱ xi májín fií.

⁵ Kó nga kamábe Kjisoo̱ nga sꞌijii̱n Néná kuí jaá, bi̱ katsoó nda̱ xi ni̱ma̱a̱: –Ji ndí, jée̱ jè kiniꞌánjetakoón.

⁶ Ta̱nga ngi̱jii̱n kui xotaa̱ kisꞌińdojin já chji̱ni̱e̱kjo̱a̱kiti xi bi̱ tsꞌén yíjin kon:

⁷ “Ánní nga bo̱a̱ tsꞌénchji̱a̱ kui nda̱a̱. Néná chꞌo tjítsoó. ꞌYání xi ka̱maa̱ sa̱ꞌínjetakón ngo jé, a mí tsí ta̱kuítsí Néná.”

⁸ Kó Kjisoo̱ kamákjín tji̱ꞌni̱u̱ú a̱si̱énni̱xtjii̱n ni xi yíjin kon kui jaá, kó bi̱ katsó nga asíyaá: –Míkjo̱a̱a̱ nga bo̱a̱ tsꞌén ndyi̱fojintakónjnú.

⁹ Mí ni xi niꞌínjín kjiꞌi ngase xi kꞌuiín ngo nda̱ xi májín fí: A nga bi̱ kꞌuiín: “Jée̱ jè kiniꞌánjetakoón”, axa̱ nga bi̱ kꞌuiín: “Ti̱sítji̱n, chjábé ṉcháa̱n, kó tꞌen ji”.

¹⁰ Ta̱nga tsi̱ꞌe̱ nga xcha̱jnú nga ndií nda̱ xi̱ꞌii̱n tjiín ngaꞌniú kui tꞌanangii̱ tsi̱ꞌe̱ nga ka̱maa̱ sa̱ꞌínjetakón jé. Kósꞌe̱ bi̱ katsoó nda̱ xi májín fií:

¹¹ –Kó jí bi̱ tꞌíxiaán, ti̱sítji̱n ji, chjábé ṉcháa̱n kó tꞌen ndiꞌàa̱.

¹² Kósꞌe̱ kui nda̱ xi ni̱ma̱a̱, tji̱e̱nmá jastjíe̱n, iskjíbé ṉchaa̱n, sꞌe̱ jataxie nga kamábe ngayeje xotaa̱, kó achichí kijíndikoón ngayejee̱, kó katsjaá kjo̱a̱je Néná, nga bi̱ katsoó xkjín: –Kji̱e̱ ngo ndi̱yà yàjne̱ ngo ni xi xikoó xi̱ꞌbi̱.

Kjisoo̱ bi̱ tsꞌén tsíchji̱a̱a̱ Matioo̱

¹³ Kó ti̱ kijí nginí Kjisoo̱ tꞌa ndáchíkoón, kó kjín xota̱ kijíkóntiñaa̱, kó Kjisoo̱ akóyaá kui xotaa̱.

¹⁴ Kó nga jaꞌa ki̱a̱a̱, kamábe nda̱ xi ꞌmí Lebii̱ kui xi ndií Alfeoo̱ nga tikóntꞌa yámíxa̱ nínga machjítjé nii̱, kó bi̱ katsoó: –Ndibétji̱ngíní. Kó Lebii̱ jastjíe̱n, kó kijítji̱ngii̱ Kjisoo̱.

¹⁵ Ngo ndi̱yà nga Kjisoo̱ tikóntꞌa yámíxa̱ nga tsꞌénkjinie ṉño̱ ndiꞌaa̱ Lebii̱, achichí má já xí foaꞌáꞌyá to̱n xi machjítjé ni, ko̱jo xota̱ jé, ko̱jo xota̱ tsi̱ꞌe̱ Kjisoo̱ xi síndotꞌajo̱, ngatꞌa̱ achichí kamá xota̱ xi kijítji̱ngii̱.

¹⁶ Kó já chji̱ni̱e̱kjo̱a̱kitii̱ ko̱jo já fariseoo̱, nga kamábe nga Kjisoo̱ tsꞌénkjiniejo̱ ṉño̱ já xí foaꞌáꞌyá to̱n xi machjítjé nii̱, ko̱jo xota̱ jeé, bi̱ katsó nga asíyaá xota̱ tsi̱ꞌe̱ Kjisoo̱: –Mí ni xi̱ꞌbi̱, nga mostro̱jnú tsꞌénkjiniejo̱ ṉño̱ já xí foaꞌáꞌyá to̱n xi machjítjé ni ko̱jo xota̱ jé.

¹⁷ Kó Kjisoo̱ nga tsintꞌié kuí nii̱, bi̱ katsó: –Xota̱ xi oo̱n xí chjieén chji̱ni̱e̱ndiki, jmí tsi xota̱ xi ndaa̱. Kó án jmí xota̱ xi kixi̱ jéꞌe̱chjiajáa̱n, xota̱ jé xí jéꞌe̱chjiáa̱.

Bi̱ tsꞌén akasíyaá Kjisoo̱ kjo̱a̱a̱ kjindiaá

¹⁸ Ngo ndi̱yà nga xota̱ tsi̱ꞌe̱ Jua̱ xi botíndaá ko̱jo já fariseoo̱ ndyi̱tsꞌènkjáꞌa kjindiá yojoo̱, jachókoón Kjisoo̱, kó bi̱ katsoó: –Míkjo̱a̱a̱ nga xota̱ tsi̱ꞌe̱ Juaa̱ ko̱jo já fariseoo̱ tsꞌénkjáꞌa kjindiá yojoo̱, kó xota̱ tse̱ tsꞌenkjaꞌájín kjindiá yojoo̱.

¹⁹ Kó Kjisoo̱, bi̱ katsoó: –A ka̱márií kꞌuíndo kjindiá xota̱ xi tjimá ndiꞌibixaa̱n, tji̱e̱nga ki̱a̱ tikónjo̱ nda̱ xi ku̱i̱xaa̱n. Tji̱e̱nga ki̱a̱ tikón nda̱ xi ku̱i̱xaa̱n, ka̱májín kꞌuíndo kjindiá.

²⁰ Ta̱nga nga kjo̱chó ni̱xtjin nga xchje̱ꞌéxiín nda̱ xi ku̱i̱xaa̱n, kó kuí ni̱xtjii̱n nga ka̱ma kꞌuíndo kjindiá.

²¹ Ngojín xota̱ xi ńjño tja̱tsi̱e̱ ko̱óyaá nga ku̱i̱ꞌíxtió ńjñoo̱ ngo xtjí xchá, tsi bo̱a̱ sa̱ꞌín, ńjño tja̱tsi̱e̱e̱ skjíndiyá ńjño xchaá, kó tsie ngase xtjóndiyá xtjií.

²² Kó ti̱nde ngojín xota̱ xi ku̱i̱ndyiá bino̱ tja̱tsi̱e̱ ngo ti̱jìtjíxin xchaá, ngatꞌa̱ bino̱ tja̱tsi̱e̱e̱ skjíndiyá ti̱jìtjíxin xchaá, kó binoo̱ ko̱jo ti̱jìtjíxiín jmí chjí ka̱májínnii̱. Kuíni nga bino̱ tja̱tsi̱e̱e̱ ti̱jìtjíxin tja̱tsi̱e̱ ku̱i̱ndyia.

Bi̱ tsꞌén tsíchji̱a̱ Kjisoo̱ kjo̱a̱a̱ ni̱xtjin ndikoón

²³ Ngo ndi̱yà nga ni̱xtjin ndikón Kjisoo̱ ko̱jo xota̱ tsi̱ꞌe̱ jaꞌa ngo ngi̱ndie nínga tjitjíe̱ to ndso̱ko̱a̱n ṉño̱pan, kó kui jaá ítsꞌi̱yanii̱ nga tsꞌenje̱n ńtiín.

²⁴ Kósꞌe̱ já fariseoo̱, bi̱ katsoó Kjisoo̱ nga asíyaá: –Míkjo̱a̱a̱ nga xota̱ tse̱ ndyi̱tsꞌèn ni xi tsjandièjín kjo̱a̱kitii̱ nga niꞌán nga ni̱xtjin ndikón.

²⁵ Ta̱nga Kjisoo̱, bi̱ katsoó: –A jmíni̱xtjin kiniꞌányàjnú xo̱jo̱n xi kjitꞌa ni xi katsꞌén Ndabii̱, ngo ndi̱yà nga kamáchjieén ko̱jo nga kamábojoó kui ko̱jo xota̱ xi tsoꞌbájo̱,

²⁶ kótsꞌèn tsꞌasꞌien ndiꞌaa̱ Néná, nga kamá chináꞌmi xi ꞌniú nkꞌa xaá nda̱ xi ꞌmí Abiataa̱r, kó iskjinie kui ko̱jo xota̱a̱ pan xi je kiniꞌánkꞌasꞌiee̱n Néná, kui xi tsjandièjín kjo̱a̱kitii̱ nga skji̱ni̱e̱ kui ko̱jo xotaa̱, kó ta̱kuítsí já chináꞌmii̱ xi ma kjinie, kó ngaskande katsjaá xota̱ xi tsoꞌbájo̱ nga.

²⁷ Kó bi̱ katsó ngase Kjisoo̱: –Ni̱xtjin ndikoón kamánda ta̱ngatꞌanii̱ xotaa̱, jmí tsi xotaa̱ xi kamánda ta̱ngatꞌanii̱ ni̱xtjin ndikoón.

²⁸ Kó kuíni nga, ndií nda̱ xi̱ꞌii̱n, ngaskande kui botixómaá ni̱xtjin ndikoón nga.