Markoo̱ 16 - Xo̱jo̱n eén Néná

Bi̱ tsꞌén jaꞌáꞌyaá Kjisoo̱

¹ Kó ngije jaꞌa ni̱xtjin ndikoón, na̱ Riya̱ Lenaa̱, ko̱jo na̱ Riya̱ na̱aa̱n Sandiyaá, ko̱jo na̱ Salomee̱, tsꞌatsie nisije̱n xi sa̱ngínjón yojoo̱ Kjisoo̱.

² Kó nga ta̱jño̱ó ni̱xtjin tjoón xomanaa̱, ngije tjitjó tsꞌueé, jachó nínga tikón nga̱tsjo̱ó Kjisoo̱,

³ ta̱nga bi̱ katsó ja̱kꞌi̱e̱ ja̱ngajaán xkjín: –ꞌYá xí kjo̱a̱ꞌáxínná ndi̱jo̱ xi kjiꞌixtio nga̱ntjo̱a̱a̱ nga̱tsjo̱ó.

⁴ Ta̱nga nga askotsijen, kamábe nga je kamátíyaá ndi̱jo̱je xi kjiꞌixtio nga̱ntjo̱a̱a̱ nga̱tsjo̱ó.

⁵ Kó nga tsꞌasꞌien ngi̱ya ti̱xa̱nga̱tsjo̱ó, kamábe ngo nda̱ xo̱ngò xí yajá ngo ńjñondio tiboa, xi tikón xtji̱e̱e̱n nga fojnií nínga kisꞌie Kjisoo̱, kó kui ínchjiín achichí katsakjónní,

⁶ ta̱nga kui nda̱ xo̱ngo̱ò, bi̱ katsoó: –Ngata̱ ndakonjínmájnú. Jè be an nga Kjiso̱ xi chji̱a̱ni Nasaree̱t xi ndyi̱mindyiséjnú, nda̱ xi akjatꞌa kroo̱. Jè jaꞌáꞌyaá, jè ngiti̱ jmíjín kꞌi̱e̱e̱, tsitsíjenjnúu̱ ngi̱ndie nínga kisꞌie.

⁷ Ta̱nga tangínjnú, kó tꞌíyájnúu̱ xota̱ tsi̱ꞌe̱, ko̱jo Peé, nga “Kjisoo̱ ki̱a̱ tsꞌénfítjónjnú nangi Ngalilea̱, ki̱a̱ xcha̱jnú kuí, xikó katsó.”

⁸ Kó kui ínchjiín ngije bo̱a̱ kiꞌmií tsanga má nga jataxie ngi̱ya nga̱tsjo̱ó, ngaskande jatsié má nga katsakjónní, nde ta̱ꞌyajín xi katsóyaà kui nii̱ ngatꞌa̱ katsakjónní.

Kjisoo̱ tjón na̱ Riya̱ Lenaa̱ akoó yojoo̱

⁹ Kó ngije jaꞌáꞌyaá Kjisoo̱ nga ta̱jño̱ó, ni̱xtjin tjoón xomanaa̱, tjón má na̱ Riya̱ Lenaa̱ akoó yojoo̱. Kuí xota̱chjo̱on xi Kjisoo̱ tsꞌaxiéjii̱n yito xindajín.

¹⁰ Kijí kui xota̱chjo̱on, kó kijítsáyaá xota̱ xi nijan kistsoꞌbájo̱ Kjisoo̱, ngatꞌa̱ kjén nga ta̱ ndasen síndo ko̱jo ndyi̱kjandà kuí jaá.

¹¹ Kó kui jaá nga tsintꞌié nga tikón Kjisoo̱, ko̱jo nga kamábe an tjítsó kui xota̱chjo̱on, nde kisꞌijinjiín.

Kjisoo̱ bi̱ tsꞌén akoó yojoo̱ jó xota̱ tsi̱ꞌe̱

¹² Kó ngije kamá kui nii̱, Kjisoo̱ kje̱ꞌe kisꞌie nga akoó yojoo̱ jó xota̱ tsi̱ꞌe̱ xi ndyi̱fí ndi̱yà jno̱o̱.

¹³ Kó kui jaá kijítsáyaá já xí ngasee̱, ta̱nga ti̱nde kui kisꞌijinjiín.

Kjisoo̱ bi̱ tsꞌén katsjáxaá ko̱jo katsangiya apostroo̱

¹⁴ Nga fetꞌa Kjisoo̱ akoó yojoo̱ nga tiengo xota̱ tsi̱ꞌe̱ tji̱e̱nga síndotꞌa yeje yámíxa̱, kó katsꞌénxchánjo̱ ngatꞌa̱ kisꞌijinjiín, ko̱jo kjo̱a̱a̱ nga ta̱nisién tajá kamá ini̱ma̱a̱, ngatꞌa̱ nga katsꞌénsꞌijinjiín xota̱ xi je kamábe nga je jaꞌáꞌyaá Kjisoo̱.

¹⁵ Kó bi̱ katsoó: –Tangínjnú ngayeje són nga̱sondiee̱ kó tꞌíni̱jmìjnúu̱ éntjatsi̱e̱e̱ Néná ngayeje xota̱ xi tjiín.

¹⁶ Xi sꞌi̱jii̱n, kó ko̱tíndá yojoo̱, kuí xi̱ꞌba̱ xi kjo̱tjoꞌaa̱ yojoo̱, ta̱nga xi sꞌi̱jinjiín, kuí xi̱ꞌba̱ xi ka̱majeé.

¹⁷ Kó kui chi̱bo̱a̱ xi̱ꞌbi̱ xi kꞌuitsómajo̱ xi sꞌi̱jii̱n éntjatsi̱e̱e̱ Néná: Ngajona kꞌo̱xiéni xindajín, kó ku̱i̱chji̱a̱ éntjatsi̱e̱,

¹⁸ ndatsi skjíbé ngo ye̱, ko̱jo ndatsi kꞌuí ni xi tsꞌenkꞌiénná, jmí ni sa̱ꞌínjiín, kó ti̱ bo̱a̱ ti̱ tsꞌén, tsi ku̱i̱ꞌíjñasoón tsja xota̱ xi oo̱n, ka̱mandaya.

Bi̱ tsꞌén kijí Kjisoo̱ ndiꞌakꞌajmi jàn

¹⁹ Kó bo̱a̱ tsꞌén Ndi̱a̱ Kjisoo̱ ngije tsíchji̱a̱jo xota̱a̱, kachjaninkꞌa nga kijí ndiꞌakꞌajmi jàn, kó tsja fojnií Néná kisꞌijñatꞌa.

²⁰ Kó kui jaá kijíkꞌíni̱jmì eén Néná ngayeje són nga̱sondiee̱, kó Néná asíko̱jo nga katsjángaꞌniuú eén nga katsꞌén kjo̱a̱ndikón. Bo̱a̱ kjiꞌi.