Markoo̱ 14 - Xo̱jo̱n eén Néná

Bi̱ tsꞌén índa jáxaá tsi̱ꞌe̱ nga stso̱ba̱ Kjisoo̱

¹ Jó ni̱xtjin ngindiee̱ nga ka̱ma sꞌué paskuaa̱, ko̱jo sꞌueé pan xi jmí nisan mindyiajiín. Já ngito̱ko̱o̱ chináꞌmii̱ ko̱jo já chji̱ni̱e̱kjo̱a̱kitii̱, tsangasee̱ kótsꞌèn stso̱ba̱ Kjisoo̱ nga ku̱i̱ꞌíndisotaꞌin tsi̱ꞌe̱ nga sa̱ꞌínkꞌién.

² Kó bi̱ katsoó xkjín: –Jmí tsi ngi̱jii̱n sꞌueé nga bo̱a̱ si̱ꞌán, tsi̱ꞌe̱ nga ka̱makjánjiín xota̱ na̱xi̱ńdaá.

Bi̱ tsꞌén akatiéjón ndásíje̱n to̱ko̱ Kjisoo̱

³ Kó nga tikón Kjisoo̱ na̱xi̱ńdá Betania̱ ki̱a̱ ndiꞌaa̱ Ximoo̱ nda̱ xi tjiín chiꞌin xi tsꞌénkjátsón tji̱xin yojoná, kó nga tikóntꞌa yámíxa̱, jachókoón ngo xota̱chjo̱on xí tsꞌényaꞌa ngo ndí ramita̱ ndásíje̱n soboá xi chjí, xi naxó narndo̱ kamándani, akján ndí ramitaa̱, kó atiéjón ndásíjee̱n to̱ko̱ Kjisoo̱.

⁴ Tjín já xí síndo kui ngi̱ndiee̱ xi katsꞌénxchán, kó ja̱kꞌi̱e̱ ja̱ngaján, bi̱ katsoó xkjín: –Ánní nga ta̱ tjíniꞌánkjatsón kón kui ndásíjee̱n.

⁵ Ngatꞌa̱ kamá tsí kastiñá kui ndásíjee̱n, kó tsꞌatiora̱ ján úchán to̱n ndenario̱ kastiñáni, kó kamá tsí kui to̱o̱n xota̱ ni̱ma̱ xi jmí to̱njiín katseꞌeé. Kó kui jaá tsíchji̱a̱taꞌin kui xota̱chjo̱on.

⁶ Ta̱nga Kjisoo̱, bi̱ katsó: –Xióchònjnú, ánní nga jún ndyi̱niꞌánxtijnúu̱. Ndakjiꞌi ni xi tjítsꞌénjo̱na.

⁷ Ngatꞌa̱ xota̱ ni̱ma̱a̱ ngatsjéni̱xtjin kꞌuíndojinjnú, kó nga ka̱ma xi si̱ꞌánjnú ka̱ma ko̱si̱ko̱jójnú, ta̱nga an, jmí tsi ngatsjéni̱xtjin kotíjña̱jinjnúꞌun.

⁸ Kui xota̱chjo̱on kamá ni xi katsꞌén, jè íjñanda yojona nga katsanginjonna ndásíje̱n tsi̱ꞌe̱ nga kjo̱nijín an.

⁹ Ja̱koxi̱ ni xi xiánjnúꞌun nga ta̱jñà ngi̱ndienií nga̱sondiee̱ nínga kꞌuiníjmì éntjatsi̱e̱e̱ Néná, ti̱ bo̱a̱ ti̱ tsꞌén ko̱ndókjo̱a̱ ni xi katsꞌén kui xota̱chjo̱on, kó bo̱a̱ tsꞌén si̱ꞌankjaꞌátsjien kui.

Bi̱ tsꞌén índa Jundaa̱ nga katsꞌénkꞌasꞌien Kjisoo̱

¹⁰ Kósꞌe̱ Junda̱ Iskariotee̱, ngo nda̱ xi chji̱a̱ni nga tiejó xota̱a̱ Kjisoo̱, kijíkoón já ngito̱ko̱o̱ chináꞌmii̱ tsi̱ꞌe̱ nga sa̱ꞌínkꞌasꞌiee̱n Kjisoo̱.

¹¹ Kó kui já ngito̱ko̱o̱ chináꞌmii̱ nga tsintꞌié ni xi katsó Junda̱ Iskariotee̱, achichí tsjá kamaá, kó índajo̱ nga to̱n tsja̱á. Kó tsangasendie Jundaa̱ kótsꞌèn nga sa̱ꞌínkꞌasꞌienni Kjisoo̱.

Kjisoo̱ bi̱ tsꞌén iskjiniejo̱ ngase ṉño̱ xota̱a̱

¹² Ni̱xtjin tjoón nga chinie pan xi jmí nisan mindyiajiín, kjiꞌanga niꞌánkꞌién ngo cho̱tsa̱nga̱ tsi̱ꞌe̱ sꞌué paskuaa̱, xota̱ tsi̱ꞌe̱ Kjisoo̱, bi̱ katsoó: –Ñání nga mejeén nga kꞌuijñándajne̱ ni xi xi̱ni̱ ji sꞌué paskuaa̱.

¹³ Kó katsangiya Kjisoo̱ jó xota̱ tsi̱ꞌe̱, xi bi̱ katsoó: –Tangínjnú na̱xi̱ńdáꞌniuú, kó ki̱a̱ sa̱kójnú ngo nda̱ xi tsꞌényaꞌa ngo nisa ndáfoa, kó kui tangíntji̱ngíjnúu̱,

¹⁴ kó ta̱ nínga kꞌo̱sꞌien kuí nda̱a̱, bi̱ tꞌínjnúu̱ ndi̱a̱a̱ ndiꞌaa̱: “Nda̱ Mostroo̱ bosíyá: Ñá xò tikón ngi̱ndie nínga skji̱ni̱e̱jo ṉño̱ xota̱ tsi̱ꞌe̱ ni̱xtjii̱n sꞌué paskuaa̱.”

¹⁵ Kó kui nda̱a̱ ko̱kójnú ngo ngi̱ya tiyá nkꞌaa̱ ngo ndiꞌa xi je tikónnda, ki̱a̱ tꞌíjñandajnú nichinie xi xi̱ni̱e̱.

¹⁶ Kó kijí xota̱ tsi̱ꞌe̱, kó jachó ngi̱jii̱n na̱xi̱ńdáꞌniú jàn, kó bo̱a̱ tsꞌén kasakoo̱ xikó katsoó Kjisoo̱, kó ki̱a̱ katsꞌénda nichinie tsi̱ꞌe̱ sꞌué paskuaa̱.

¹⁷ Kó nga kamájñoó jeꞌejo̱ Kjisoo̱ nga tiejó xota̱a̱.

¹⁸ Kó tji̱e̱nga síndotꞌa yámíxa̱a̱, nga ndyi̱kjinie ṉño̱, Kjisoo̱, bi̱ katsoó: –Ja̱koxi̱ ni xi xiánjnúꞌun nga ngo jún xi tsꞌénkjiniejo̱na ṉño̱ xi sa̱ꞌínkꞌasꞌienna.

¹⁹ Kósꞌe̱ achichí ndasen kamaá kui jaá, kó ńgó ńgó ítsꞌi̱yanii̱ nga bi̱ katsó: –A án tsobo̱a̱. Ingo xi bi̱ katsó: –A án tsobo̱a̱.

²⁰ Kó Kjisoo̱, bi̱ katsoó: –Ngo xi chji̱a̱ni nga tiejó xota̱na, kuí boá, kui xi nijan ndyi̱nangindájne̱ panjne̱ ngi̱yaa̱ ti̱ kuii̱ ti̱bo̱a̱a̱.

²¹ Ja̱koxi̱ nga ndií nda̱ xi̱ꞌii̱n chjiéngá bo̱a̱ ka̱maa̱ xikótsꞌèn kjitꞌa xo̱jo̱n eén Néná, ta̱nga ¡ni̱ma̱ xò kuí nda̱ xi ta̱ngatꞌanii̱ kui nga si̱ꞌankꞌasꞌien! Ta̱sara̱ nda tsi ta̱ bo̱a̱a̱ katsenjín.

²² Kó tji̱e̱nga ndyi̱kjinie nichiniee̱, Kjisoo̱ iskjíbé ngo pan, katsꞌénchikonñé, akjángá, sꞌe̱ katsjaá xotaa̱, nga bi̱ katsoó: –Chjábéjnú, kuí xi̱ꞌbi̱ xi yojona.

²³ Kó iskjíbé chi̱tse̱én, kó ngije katsjaá ndokꞌóchjì Néná, katsjaá xota̱a̱, kó ngayejee̱ nga katsꞌeyà.

²⁴ Kó Kjisoo̱, bi̱ katsó: –Kuí xi̱ꞌbi̱ xi jínna, nínga tjíꞌbínda ngo kjo̱a̱tja̱tsi̱e̱ tsi̱ꞌe̱ Néná ko̱jo jún. Jín xí xtjoón, ta̱ngatꞌanií kjo̱a̱ndaa̱ kjín xota̱ nga xtjón.

²⁵ Ja̱koxi̱ nga xiyàjnúꞌun nga ngiti̱ kꞌuijín an ndaá tostsi̱je̱è, ngaskande nga kꞌuí an xi tja̱tsi̱e̱e̱ nga ko̱tíxoma Néná.

Bi̱ tsꞌén katsóyàtjón Kjisoo̱ nga Peé sa̱ꞌínkiejín yojoo̱

²⁶ Ngije kisie só xi ndaa̱ Néná, kijí nínga tikón tji̱ngi̱ nínga tjín yáꞌoliboo̱.

²⁷ Kósꞌe̱ Kjisoo̱, bi̱ katsoó xota̱a̱: –Ngayejejnú nga kui ni̱xtji̱e̱e̱n ngiti̱ sꞌi̱jinjínjnú án, ngatꞌa̱ jè kjitꞌa xo̱jo̱n eén Néná, nínga bi̱ tsoó: “Sa̱ꞌinꞌóo̱n nda̱ xi koo̱n cho̱tsa̱nga̱a̱, kó cho̱tsa̱nga̱a̱ stso̱joboa.”

²⁸ Ta̱nga ngije kjo̱a̱ꞌáꞌyána, ki̱a̱ kjuíntjónjnúꞌun nangi Ngalilea̱.

²⁹ Kósꞌe̱ Peé, bi̱ katsoó Kjisoo̱: –Nda tsi ngayeje xi ngiti̱ sꞌi̱jinjiín ji, ta̱nga an bo̱a̱jín sa̱ꞌin an.

³⁰ Kó Kjisoo̱, bi̱ katsoó: –Ja̱koxi̱ ni xi xian an nga kui ni̱xtji̱e̱e̱n ji, ngindiee̱ nga jó ndi̱yà skja̱ndáyà xo̱nda̱xi̱ꞌii̱n, ji je ján ndi̱yà je kiniꞌínkiejín yojòo̱ nga yení.

³¹ Ta̱nga Peé achichí ꞌniú katsꞌén, nga bi̱ katsó: –Kjo̱a̱jiín ndatsi ngaskande nijan ko̱yà, ta̱nga jmíni̱xtjin nga sa̱ꞌinkiejín an yojona nga bee ji. Kó ngayeje xota̱a̱ xi ngasee̱, ti̱ bo̱a̱ ti̱ katsó nga.

Kjisoo̱ bi̱ tsꞌén tsíchji̱a̱a̱ Néná

³² Kó jachó Kjisoo̱ ko̱jo xota̱ tsi̱ꞌe̱ ngo ngi̱ndie xi ꞌmí Jetsemani̱, kó Kjisoo̱, bi̱ katsoó xota̱a̱: –Kꞌi̱e̱ ti̱ndyionrajnú kꞌi̱e̱e̱, tji̱e̱nga kuichjiáa̱ Na̱ꞌmina.

³³ Kó kijíjo̱ Peé, ko̱jo Sandiyaá, ko̱jo Juaa̱, kó ítsꞌi̱yanii̱ nga ꞌniú ndasen ko̱jo ꞌniú nda̱ kamaá.

³⁴ Kó Kjisoo̱, bi̱ katsoó: –Achichí ndasen tikón ini̱ma̱na ngaskande nga ko̱yà an, ti̱ndyionrajnú kꞌi̱e̱e̱, kó ngata̱ tsjayojoféjínjnú.

³⁵ Ti̱ kjiꞌa Kjisoo̱ ngi̱chí kijíboaꞌá, asiéntikoó, kó yejénxtien kje̱n ngaskande nga kisitꞌaa̱ tꞌanangii̱, sꞌe̱ tsíchji̱a̱a̱ Néná tsi̱ꞌe̱ nga tsi ta̱ꞌa ka̱ma nga kjo̱chójín chi̱bo̱a̱ nga bo̱a̱ ka̱mataꞌin.

³⁶ Kó bi̱ katsó nga tsíchji̱a̱a̱ Néná: –Abba, (Na̱ꞌmi, tsó kui eén), ji xi ngayeje nii̱ xi máa niꞌín ji, tsi ka̱ma, chje̱ꞌéxín boeꞌéní kui kjo̱a̱ni̱ma̱a̱, ta̱nga jmí tsi ni xi xian an xi ngatama, ta̱sá ngatama ni xi mejeén ji.

³⁷ Kó nga jachó Kjisoo̱ nínga síndo xota̱a̱, kamábe nga kjiyojofé, sꞌe̱ bi̱ katsoó Peé: –Ximo̱, a titsjafé jí. A kamájín chi ikindyie ndyikin tsi ta̱ ngo ora̱.

³⁸ Ngata̱ tsjayojoféjínjnú, ta̱sá Néná ndókjo̱a̱jnúu̱, tsi̱ꞌe̱ nga chjátꞌayákónjínjnú, ngatꞌa̱ nga ja̱koxi̱ a̱si̱énni̱xtjinjnú ꞌniú tikón, ta̱nga inda tikón yojoo̱.

³⁹ Kó ti̱ kijí nginí Kjisoo̱ ingo ndi̱yà, ti̱ tsíchji̱a̱ nginií Néná nga ti̱ kuii̱ én tsíchji̱a̱.

⁴⁰ Kó nga jachó nginí Kjisoo̱ nínga síndo kui jaá, ti̱ kamábe nginí nga kjiyojofé, ngatꞌa̱ ngaskande tjísichjá má ndyi̱ko̱n nga ńjñaá, kó nde bejín mí ni xi ka̱tso̱ nga ku̱i̱chji̱a̱jo Kjisoo̱.

⁴¹ Xi ma ján ndi̱yà nga jachókón nginí Kjisoo̱ nínga síndo xota̱a̱, bi̱ katsoó: –Tsjayojoféjnú ꞌne̱, kó ti̱ꞌankjaꞌyájnú, jè jachó chi̱bo̱a̱ nga ndií nda̱ xi̱ꞌii̱n si̱ꞌankꞌasꞌien ngi̱ya tsja xota̱ jé.

⁴² ¡Ti̱sítji̱e̱njnú, tjián ꞌne̱! Kꞌi̱e̱ je ndibá tiña xi sa̱ꞌínkꞌasꞌienna.

Bi̱ tsꞌén kandobá Kjisoo̱

⁴³ Kó ti̱ tsꞌénchji̱a̱ ngase Kjisoo̱ nga jachókoón nda̱ xi ꞌmí Jundaa̱, ngo nda̱ xi chji̱a̱ni nga tiejó xota̱ tsi̱ꞌe̱, kó kjín xota̱ tji̱e̱njo xi ndyi̱yaꞌa ki̱cha̱ ko̱jo yá, kó kui xotaa̱, já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, ko̱jo já xchá ngito̱ko̱o̱ na̱xi̱ńdaá xi katsangiya.

⁴⁴ Kó kui nda̱ xi katsꞌénkꞌasꞌien Kjisoo̱ ngo chi̱bo̱a̱ katsjaá kui xotaa̱, nga bi̱ katsoó: –Kui xi ngo ndsó tsjàa̱ tꞌanijon, kuí boá xi Kjisoo̱, ndo̱bo̱a̱jnú, kó nda tꞌítaꞌniújnú nga kongínjo̱jnú.

⁴⁵ Kó Jundaa̱ nga jachókón tiñaa̱ Kjisoo̱, kó bi̱ katsoó: –¡Mostro̱, Mostro̱! Kó ngo ndsó katsjaá tꞌanijon.

⁴⁶ Kósꞌe̱ kui jaá katsoboá Kjisoo̱.

⁴⁷ Ta̱nga ngo nda̱ xi tikón ki̱a̱a̱, tsꞌaxié ki̱cha̱ndojoó, kó katsꞌénꞌoón nga tsatie tji̱bo̱a̱nijon ngo nda̱ mosoo̱ chináꞌmi xi ꞌniú nkꞌa xaá.

⁴⁸ Kó Kjisoo̱, bi̱ katsoó kui xotaa̱: –A chejé án nga ki̱cha̱ndojó ko̱jo nga yá kichꞌiájnú nga jéꞌe̱ndoboájnúꞌun.

⁴⁹ Ndyiojón ndyiojón akoyá an ndi̱tsen na̱ngo̱xi̱i̱, kó kandobájínjnúꞌun, ta̱nga kui nii̱ kjimá tsi̱ꞌe̱ nga kjo̱tjosón ni xi kjitꞌa xo̱jo̱n eén Néná.

⁵⁰ Kósꞌe̱ ngayeje xota̱ tsi̱ꞌe̱ Kjisoo̱ íjñámasien, kó tsanga.

⁵¹ Ta̱nga ngo nda̱ xi tsoꞌbátji̱ngii̱ Kjisoo̱ xi tjítsakjájón yojoo̱ ngo ńjñotjibé tiboa, kandobá kui nda̱a̱.

⁵² Kó kui nda̱a̱ íjñámasien ńjñotjibé xi tjítsakjájón, kó ta̱ tsanga kjiꞌixtí.

Bi̱ tsꞌén tsangínjo̱ Kjisoo̱ ngindyi̱ko̱n jáxaá

⁵³ Kó tsangínjo̱ Kjisoo̱ nínga tikón chináꞌmi xi ꞌniú nkꞌa xaá, kó ki̱a̱ kamátikó ngayeje já ngito̱ko̱o̱ chináꞌmi xi ngasee̱, ko̱jo já xchá ngito̱ko̱o̱ na̱xi̱ńdaá, ko̱jo já chji̱ni̱e̱kjo̱a̱kitii̱.

⁵⁴ Kó Peé ńkjin ńkjin kijítji̱ngii̱ Kjisoo̱ ngaskande nga jachó ndi̱tsen ndiꞌaa̱ chináꞌmi xi ꞌniú nkꞌa xaá, kó ki̱a̱ kisꞌijñajii̱n jájún xi kondaa̱ nínga ndyi̱tsꞌènꞌásoo̱ yojoo̱ tꞌa ndiꞌí xí tjitsieé.

⁵⁵ Kó já ngito̱ko̱o̱ chináꞌmii̱, ko̱jo ngayeje jáxá ngito̱ko̱o̱ ndyi̱mongase ngo éndísó kondraa̱ Kjisoo̱, ta̱ tsi̱ꞌe̱ nga si̱ꞌankꞌién, ta̱nga jmí ni kasakojiín.

⁵⁶ Ngatꞌa̱ ndatsi kjín má xota̱ xi índisotaꞌin Kjisoo̱, ta̱nga kamáchjíjiín ni xi katsó, ngatꞌa̱ ndse̱je̱njín kamá eén.

⁵⁷ Kó tjín xota̱ xi jastjíe̱n má nga índiso nga yíngítaꞌin Kjisoo̱, nga bi̱ katsó:

⁵⁸ –Ji̱n má xi kandaꞌyájne̱ nga bi̱ katsó: “An sa̱ꞌinkixóndó án kui na̱ngo̱xi̱i̱ xi katsꞌénda tsja xotaa̱, kó ta̱ ján tsí ni̱xtjin sa̱ꞌinda ngiñá an xi jmí tsja xota̱ sa̱ꞌíndajín.”

⁵⁹ Kó ti̱nde bo̱a̱ tsꞌén kamángojín én xí katsó kui jaá.

⁶⁰ Kó chináꞌmi xi ꞌniú nkꞌa xaá jastjíe̱n ngamasiee̱n xota̱ kjiín, kósꞌe̱ asíyaá Kjisoo̱, nga bi̱ katsoó: –A jmí ni séjín. Mí ni xi ndyi̱chji̱a̱ kui jaá kondra̱ tse̱.

⁶¹ Ta̱nga Kjisoo̱ jmí ni katsójín, kó nde ngo én tsíchji̱a̱jín. Sꞌe̱ chináꞌmi xi ꞌniú nkꞌa xaá ti̱ asíyá nginií, nga bi̱ katsoó: –A jí xí Kristoo̱ ji, a jí xí ndií Néná jí.

⁶² Kó Kjisoo̱, bi̱ katsó: –Jo̱o̱n, Án boá, kó xcha̱jnú nga ndií nda̱ xi̱ꞌii̱n kꞌuijñá nínga kixi̱i̱ ngaꞌniuú Néná, ko̱jo nga kjo̱e̱ꞌéjinni ngi̱jin ṉdi̱ nga kji̱ndi̱báni ndiꞌakꞌajmi jàn.

⁶³ Kósꞌe̱ chináꞌmi xi ꞌniú nkꞌa xaá, katsꞌénxchán, kó iskjíndiyájón má ńjño xi yajá kuí, nga bi̱ katsó: –Kó si̱ꞌan ngase chistiko̱.

⁶⁴ Ja̱ jè kandaꞌyájnú nga chꞌo katsoó Néná, kótsꞌèn sasiénjnú kui nii̱ jún. Kó ngayeje xotaa̱ nga ndse̱je̱n kamá nínga bo̱a̱ katsó nga tjiín jé, ko̱jo nga chjiéngá si̱ꞌankꞌien.

⁶⁵ Kó ítsꞌi̱yanii̱ nga tjín xí atítiajón, ko̱jo akjaꞌma kje̱n, sꞌe̱ ikꞌieé tji̱ngo̱, kósꞌe̱ bi̱ kiꞌmií: –¡Tꞌíyetjén ji xikoó ngo nda̱ chji̱ni̱e̱ꞌe̱én Néná, ꞌyá xí yeꞌeé tji̱ngo̱! Kó jájún xi ndyi̱konda Kjisoo̱ tsatꞌa tꞌanijon.

Bi̱ katsó Peé nga katsꞌénkiejín yojoo̱ nga be Kjisoo̱

⁶⁶ Kó kjiꞌanga tikón Peé ngindie ndi̱tsee̱n kui ndiꞌaa̱, jachó ngo na̱ chji̱ni̱e̱ꞌboo̱ chináꞌmi xi ꞌniú nkꞌa xaá,

⁶⁷ kó nga kamábe nga Peé xi tjítsꞌénꞌásoo̱ yojoo̱ tꞌa ndiꞌií, askotsijen ndá ndaá, kó bi̱ katsoó: –Ko̱jo jí boá xi tińtje̱je ji Kjiso̱ xi chji̱a̱ni Nasaree̱t nga.

⁶⁸ Ta̱nga Peé katsꞌénkiejín yojoo̱, nga bi̱ katsó: –Bejín an kui nda̱a̱, ti̱nde bejín an ni xi tꞌísé ji. Kó jataxie ndi̱tsén jàn ki̱a̱ tꞌa nga̱ntjo̱a̱a̱. Kó askjandáyà ngo ndi̱yà xo̱nda̱xi̱ꞌii̱n.

⁶⁹ Kó kui na̱ chji̱ni̱e̱ꞌboo̱, ti̱ kamábe nginí ingo ndi̱yà Peé, kó bi̱ katsoó xota̱ xi síndo ki̱a̱a̱: –Kui xi̱ꞌbi̱, xota̱a̱ Kjisoo̱ boá nga.

⁷⁰ Ta̱nga Peé, ti̱ katsꞌénkiejín nginí yojoo̱ nga be Kjisoo̱. Kó ngi̱chí sájín, já xí síndo ki̱a̱a̱, ti̱ bi̱ ti̱ katsó nginií Peé: –Ta̱nisién ja̱koxi̱ boá nga xota̱ tsi̱ꞌe̱ Kjisoo̱ ji, ngatꞌa̱ xota̱ Ngalilea̱ jí, kó xikótsꞌèn chji̱a̱ kui jaá, bo̱a̱ tsꞌén ndokjo̱e̱ ji.

⁷¹ Kósꞌe̱ Peé ítsꞌi̱yanii̱ nga chꞌo tsꞌén tsíchji̱a̱, ko̱jo nga ngiboanéná katsó nga bi̱ katsó: –¡Bejín an kui nda̱ xi ndyi̱ꞌmìjnú!

⁷² Kó askjandáyà xo̱nda̱xi̱ꞌii̱n xi ma joó ndi̱yà, kósꞌe̱ Peé jaꞌátsjiee̱n ni xi katsó Kjisoo̱, nga bi̱ katsoó: “Ngindiee̱ nga jó ndi̱yà skja̱ndáyà xo̱nda̱xi̱ꞌii̱n, ji ján ndi̱yà jè kiniꞌínkiejín yojòo̱ nga yení.” Kó katsꞌénkjó kuí nii̱, sꞌe̱ askjandá.