Markoo̱ 13 - Xo̱jo̱n eén Néná

Bi̱ tsꞌén katsóyà Kjisoo̱ kjo̱a̱a̱ nga ku̱i̱xo̱ndò na̱ngo̱xi̱i̱

¹ Kó nga jataxie Kjisoo̱ ndi̱tsen na̱ngo̱xi̱i̱, ngo xota̱ tsi̱ꞌe̱ bi̱ katsoó: –¡Ji Mostro̱, jànꞌa̱n xi kon kui ndi̱jo̱ yiꞌii̱, ko̱jo kui ndiꞌa nkꞌaa̱!

² Kó Kjisoo̱, bi̱ katsoó: –A ye ji kókón kui ndiꞌa nkꞌaa̱. Ngayejee̱ nga ku̱i̱xo̱ndò, kó nde ngo ndi̱jo̱ kꞌuíndojín xi sꞌi̱ńdosoón xkjín.

Bi̱ tsꞌén katsóyà Kjisoo̱ kjo̱a̱a̱ chi̱bo̱a̱ xi sꞌi̱jña ngindiee̱ nga kju̱i̱e̱ nga̱sondiee̱

³ Kó ki̱a̱ kisꞌijñando Kjisoo̱ ki̱a̱ tji̱ngi̱ nínga tjín yáꞌoliboo̱ xi tikón kje̱n na̱ngo̱xi̱i̱. Kó Peé, ko̱jo Sandiyaá, ko̱jo Juaa̱, ko̱jo Jandree̱ xín tji̱e̱n asíyaá, nga bi̱ katsoó:

⁴ –Tꞌíyéjne̱, kjiꞌání nga ka̱ma kui nii̱, kó mí chi̱bo̱a̱ xi sꞌi̱jña ngije makjatjosón nga ka̱ma kui nii̱.

⁵ Kó Kjisoo̱ ítsꞌi̱yanii̱ nga bi̱ katsoó: –Chónjnú nga jmíjín xi kꞌo̱ṉcha̱jojnú.

⁶ Ngatꞌa̱ achichí má xota̱ xi kjo̱e̱ꞌe ngajona, nga bi̱ ka̱tso̱: “Án boá xi Kristoo̱”, kó kjín xota̱ xi kꞌo̱ṉcha̱jo.

⁷ Ta̱nga kjiꞌanga ko̱nda̱ꞌyájnú nga je kjima kjo̱a̱xchán, ngata̱ ndakonjínmájnú, ngatꞌa̱ ta̱kó bo̱a̱ ka̱ma, ta̱nga kji̱e̱ kjo̱chójín ni̱xtjin nga kju̱i̱e̱ nga̱sondiee̱.

⁸ Ngatꞌa̱ na̱xi̱ńdaá skjánjo̱ xkjín, ko̱jo já ree̱ skjánjo̱ xkjín. Kꞌuié kjindiá, kó kjín ngi̱ndie nínga ka̱ma kjo̱a̱ndi̱ko̱n, ta̱nga nga ka̱ma kui nii̱, sꞌe̱ tsí ku̱i̱ꞌítsꞌi̱yanii̱ xi so xi ndakjaa̱n.

⁹ Ta̱nga ti̱ juún chónjnú yojojnú, ngatꞌa̱ si̱ꞌankꞌasꞌienjnú ngi̱ya tsja jáxaá, kó kjoájnú ki̱a̱ ngi̱ya ndiꞌa nínga ndokjo̱a̱ eén Néná, kó ngindyi̱ko̱n xtitjón ko̱jo ngindyi̱ko̱n ree̱ kongínjo̱jnú ta̱ngatꞌanii̱ an, tsi̱ꞌe̱ nga ko̱ndókjo̱a̱jnú kjo̱a̱a̱ an ngindyi̱ko̱n kui xotaa̱.

¹⁰ Ngindiee̱ nga kju̱i̱e̱ nga̱sondiee̱, chjiéngá ngayeje na̱xi̱ńdá xí tjín nga̱sondiee̱ kꞌuini̱jmi̱ì éntjatsi̱e̱e̱ Néná.

¹¹ Ta̱nga nga si̱ꞌankꞌasꞌienjnú nínga síndo jáxaá, ngata̱ nda̱jín májnú kjo̱a̱a̱ ni xi ko̱ndókjo̱a̱jnú, ti̱nde ngata̱ niꞌánkjójínjnú, ta̱sá ni xi kꞌuiyájnú nga kꞌuínjnú kui chi̱bo̱a̱a̱, kuí xí ndokjo̱a̱jnú, ngatꞌa̱ jmí tsi jún xi ko̱ndókjo̱a̱jnú, A̱si̱énni̱xtjii̱n Néná boá xi ku̱i̱chji̱a̱.

¹² Kó ngo ntsꞌie ti̱ kuii̱ sa̱ꞌínkꞌasꞌien xi ingo ntsꞌiee̱ nga si̱ꞌankꞌien, kó na̱ꞌmii̱ sa̱ꞌínkꞌasꞌien ndií, kó ti̱ kui ndií kondra̱ ko̱e̱je̱e̱ xi xchaá, kó sa̱ꞌínkꞌién xkjín.

¹³ Kó ngayeje xota̱ sa̱ꞌínchꞌójnú ta̱ngatꞌanii̱ jaꞌénna, ta̱nga xi sa̱ꞌínchíkjo̱a̱ ngaskande nga kju̱i̱e̱tꞌa, kuí xi̱ꞌba̱ xi kjo̱tjoꞌa.

¹⁴ Ta̱nga kjiꞌanga xcha̱jnú jún ngo ni xi ta̱nisién ꞌniú chꞌokjiꞌi xi tsíchji̱a̱ nda̱ chji̱ni̱e̱ꞌe̱én Néná xi ꞌmí Ndanii̱ nga ki̱a̱jín tikón nínga kꞌuijñá (xi sa̱ꞌínyà kui eén, ngatamakjiín), kósꞌe̱ kjiꞌá boá nga kui xota̱ xi síndo nangi Jundea̱ ngatanga ngi̱jin kꞌijñá jàn.

¹⁵ Kó xi tikón nkꞌaa̱ ndiꞌaa̱, ngata̱ fotjajénjín tsi̱ꞌe̱ nga kꞌo̱sꞌien ndiꞌaa̱ nga skjíbé ngo nii̱,

¹⁶ kó xi ngi̱jin jno̱o̱ tsoꞌbá, ngata̱ fíꞌoyájín tsi̱ꞌe̱ nga ko̱e̱je̱kjaꞌá ńjño xi bótꞌa nga̱xto̱n.

¹⁷ ¡Ni̱ma̱ xò ndí ínchjín xi ndí ndyi̱yaꞌa, ko̱jo xi ndí ndyi̱tsꞌènxchá kui ni̱xtjin xi̱ꞌba̱!

¹⁸ Ndókjo̱a̱jnúu̱ Néná tsi̱ꞌe̱ nga, nga ku̱i̱yòjnú ni̱xtjii̱n cho̱nchꞌànjín nga bo̱a̱ ka̱ma,

¹⁹ ngatꞌa̱ kui ni̱xtjin jàn achichí kjo̱a̱ni̱ma̱ kjo̱a̱ꞌatio ngayeje xotaa̱, kó ngo ni xi kji̱e̱ jmíni̱xtjin ma xi ka̱ma, ndeskande koó nga Néná ítjatsꞌennii̱ nga katsꞌénda nga̱sondiee̱ ngaskande ngotꞌe̱, ti̱nde ngiti̱ ka̱májín jaskan.

²⁰ Kó tsi Néná chiboajín ku̱i̱ꞌíjñaá kui ni̱xtjii̱n, ta̱ꞌyajín xi kjo̱tjoꞌa, ta̱nga ta̱ngatꞌanii̱ xota̱ xi je jaꞌájin, chiboa ni̱xtjin íjñaá nga ka̱ma kui ni̱xtjii̱n.

²¹ Kó tsi tjín káꞌá xota̱, xi bi̱ ka̱tso̱jnú: “Jénꞌe̱n tsitsíjenjnúu̱, kꞌi̱e̱ tikón Kristoo̱”, ko̱jo tsi “jénꞌe̱n ki̱a̱a̱ tikón”, ngata̱ niꞌánsꞌijinjínjnúu̱.

²² Ngatꞌa̱ kjín Kristo̱ ndiso xi kuijín xi kjo̱tjokjá, ko̱jo kjín já chji̱ni̱e̱ꞌén ndiso xi kji̱ndi̱bá, kó sa̱ꞌín kjo̱a̱ndikón, ko̱jo chi̱bo̱a̱ tsi̱ꞌe̱ nga kꞌo̱ṉcha̱jo xotaa̱, kó ngaskande ka̱maa̱ kꞌo̱ṉcha̱jo xota̱ xi je jaꞌájin Néná.

²³ Ta̱nga jún chónjnú yojojnú, ngatꞌa̱ jè katsóyàtjónjnúꞌun ngayeje ni xi ka̱ma.

Bi̱ ka̱ma ni̱xtjin nga kjo̱e̱ꞌe nginí ndií nda̱ xi̱ꞌii̱n

²⁴ Ta̱nga kui ni̱xtjin jàn, ngije jaꞌa ni̱xtjii̱n kui kjo̱a̱ni̱ma̱a̱, tsꞌueé ka̱majñó, saá ngiti̱ jmí ndiꞌí tsja̱ajín,

²⁵ kó ńñoo ku̱i̱xo̱ngini ndiꞌakꞌajmi jàn, kó kjo̱tsiè ngayeje ngaꞌniú xí tjín ndiꞌakꞌajmi jàn.

²⁶ Kósꞌe̱ kjiꞌá boá nga xcha̱ ndií nda̱ xi̱ꞌii̱n nga ngo ṉdi̱ kji̱ndi̱bájinni, kó achichí ngaꞌniú kꞌuieé, ko̱jo tsie kjo̱a̱jee̱ kji̱ndi̱bájo̱.

²⁷ Kó kjiꞌá boá nga sa̱ngíyá ndítsjiee̱, kó ku̱i̱ꞌítikó xota̱ xi je jaꞌájin nga nijón tji̱ngi̱i̱ kui nga̱sondiee̱, ndeskande nínga fetꞌaa̱ tꞌanangii̱, ngaskande nínga fetꞌaa̱ ndiꞌakꞌajmii̱.

²⁸ Ngatamakjínjnú énkjiín yáꞌingoo̱, xi bi̱ tsoó: Nga fotjoo̱ tjia ńtsꞌieén ko̱jo xka̱a̱, ja̱ jè ya nga je tikón tiña cho̱ndoboaá.

²⁹ Ti̱ bo̱a̱ ti̱ tsꞌén jún, ngije xcha̱jnú nga je kjima kui nii̱, ja̱ jè yàjnú nga ndií nda̱ xi̱ꞌii̱n je jeꞌe tiña, xikoó tsi je tikón ngi̱xtio nga̱ntjo̱a̱a̱.

³⁰ Ja̱koxi̱ ni xi xiánjnúꞌun jún nga kji̱e̱ ko̱yàjín xota̱ xi síndo ngotꞌe̱, tsi tjónjín kjo̱tjosón kui nii̱.

³¹ Ndiꞌakꞌajmii̱ ko̱jo tꞌanangii̱ kjo̱a̱ꞌa, ta̱nga énna kjo̱a̱ꞌatiyàjín.

³² Ta̱nga kui ni̱xtjin jàn ko̱jo kui chi̱bo̱a̱ jàn, ta̱ꞌyajín xi be, nde ndítsjiee̱ Néná xí síndo ndiꞌakꞌajmi jàn bejín, nde ndií Néná bejín, ta̱ ngototo Na̱ꞌmii̱ xi be.

³³ Kó kuíni nga ti̱ndyiondajnú, ngata̱ tsjayojoféjínjnú, kó ndókjo̱a̱jnúu̱ Néná, ngatꞌa̱ yàjínjnú nga kjo̱chó kui ni̱xtjii̱n.

³⁴ Xikónií ngo nda̱ xi kjin kijí, kó íjñámasien ndiꞌaa̱, kó já mosoo̱ katsjaá xá nga ngo nga ngo, kó nda̱ xi konda nga̱ntjo̱a̱a̱ katsangiya tsi̱ꞌe̱ nga skondá.

³⁵ Kuíni nga ti̱ndyiondajnú tsobo̱a̱, ngatꞌa̱ yàjínjnú mí ni̱xtjin nga kjo̱e̱ꞌe ndi̱a̱ xi tsi̱ꞌe̱ ndiꞌaa̱, tsi nga kjimajñoó, ko̱jo tsi nga masien ni̱xtji̱e̱n, ko̱jo tsi nga skja̱ndá xo̱nda̱xi̱ꞌii̱n, ko̱jo tsi nga ndibáꞌásie̱én,

³⁶ tsi bi̱ ma tji̱e̱n kjo̱e̱ꞌe nga kjiꞌájín ndyi̱tsjayojoféjnú.

³⁷ Kó kui ni xi tꞌíxiánjnúꞌun jún, ngayeje xotaa̱ boá xi bo̱a̱ tꞌíxiaán: ¡Ngata̱ tsjayojoféjínjnú!