Markoo̱ 12 - Xo̱jo̱n eén Néná

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín moso̱ xi ndajiín

¹ Kósꞌe̱ ítsꞌi̱yanii̱ nga tsíchji̱a̱ Kjisoo̱ nga katsóyaà ngo énkjín xi bi̱ tsó: –Ngo nda̱ íjñanda ngo jno̱ nínga maxchá tostsi̱jè, kó íchjáꞌyá, sꞌe̱ katsꞌénda ngo ngi̱ndie nínga ꞌnaxié ndaá kui too̱, kó ti̱ katsꞌénda ngo tarié xi nkꞌa, kósꞌe̱ katsjá chjínangií já xí tsꞌén kuí xaá. Sꞌe̱ kui nda̱ xi katsjá chjínangí kui ngi̱ndiee̱, kjin kijí.

² Kó nga jachó ni̱xtjii̱n nga je kamáxchá kuí too̱, katsangiya mosoo̱ kui nda̱a̱ nínga síndo já xí katsjaá chjínangí jno̱ tostsi̱je̱è, tsi̱ꞌe̱ nga ko̱kjángá, kó tsja̱á to xi tsoboaá nda̱ xi tsi̱ꞌe̱ kui ngi̱ndiee̱.

³ Ta̱nga kui já xí ndyi̱tsꞌènxájin kui ngi̱ndiee̱, katsoboá kó katsꞌénkijenꞌon kui mosoo̱, kó jmí ni íyatsjajín.

⁴ Kó nda̱ xi tsi̱ꞌe̱ kui ngi̱ndiee̱ ingo mosoo̱ katsangiyakón nginií kui jaá, kó kui mosoo̱ ndi̱jo̱ akjaya, kó kachjátjií to̱ko̱, ko̱jo chꞌo kiꞌmií.

⁵ Kó ti̱ katsangiya nginí ingo moso̱, kó kui xi̱ꞌbi̱ kiniꞌánkꞌién. Kó kjín ngase moso̱ xi katsangiya, tjín xí ikꞌieé, kó ti̱ tjín xi kiniꞌánkꞌién.

⁶ Kisꞌijñaa̱ ingo xi fetꞌa xi katsangiya: Ndí tsi̱ꞌe̱, kui xi achichí tjoó kó katsangiyaa̱ kui jaá, ngatꞌa̱ bi̱ katsó: “Kui jaá sku̱i̱e̱ndikón ndína.”

⁷ Ta̱nga kui já xí ndyi̱tsꞌènxájin kui ngi̱ndiee̱ ja̱kꞌi̱e̱ ja̱ngaján, bi̱ katsoó xkjín: “Kuí xi̱ꞌbi̱ xi tsi̱ꞌe̱ ka̱ma ngayeje kui ngi̱ndiee̱, ta̱sá si̱ꞌankꞌién, ki̱a̱ ka̱maa̱ nga tsa̱ñá ka̱ma ngayeje kui nii̱.”

⁸ Kó bo̱a̱ tsꞌén katsoboá kui nda̱a̱, kó katsꞌénkꞌién, sꞌe̱ tsꞌaxié ki̱a̱ ngi̱ndie nínga tjitjíe̱ tostsi̱je̱è.

⁹ Kósꞌe̱ bi̱ tsꞌén asíyá Kjisoo̱: –Kó mí xí sa̱ꞌín ndi̱a̱ xi tsi̱ꞌe̱ kui jno̱ tostsi̱je̱è. Ja̱ kji̱ndi̱bá, kó sa̱ꞌínkjié ngayeje já xí ndyi̱tsꞌènxájin kui ngi̱ndiee̱, kósꞌe̱ kje̱ꞌe xí tsja̱á kui ngi̱ndiee̱.

¹⁰ A kji̱e̱ niꞌányàjínjnú xo̱jo̱n eén Néná, nínga bi̱ tsoó: Ndi̱jo̱ xi katsꞌénchꞌó já chji̱ni̱e̱xo̱ó, kuí xí ndi̱jo̱ ngaꞌniuú ndiꞌaa̱ kamá.

¹¹ Néná boá xi katsꞌén kui nii̱, kó achichí fíndikoón ndyikón.

¹² Kó kamámejeén stso̱ba̱ Kjisoo̱, ngatꞌa̱ kui tsakiín énkjín xi tsíchji̱a̱, ta̱nga kjo̱a̱a̱ nga katsakjónnií xota̱ kjiín, jmí ni katsꞌénjo̱jín, ta̱sá íjñámasien, sꞌe̱ kijí kui jaá.

Bi̱ tsꞌén akóyá Kjisoo̱ kjo̱a̱a̱ ꞌyá xí chjiéngá kꞌuíchjií ni xi machjítjeé

¹³ Kó kanangiyachoo̱n Kjisoo̱ já fariseo̱ ko̱jo xota̱ xi majo̱ Erondee̱, tsi̱ꞌe̱ nga ku̱i̱ntꞌiè tsí ta̱ꞌa ngo ni xi ndajínkjiꞌi ku̱i̱chji̱a̱ Kjisoo̱, tsi̱ꞌe̱ nga ko̱óngítaꞌin.

¹⁴ Kó ngije jachó kui jaá, bi̱ katsoó: –Mostro̱, jè yàjne̱ nga ja̱koxi̱ ni xi bokoyé ji, kó nga ndasénjiín ni xi tsó xota̱ xi ngasee̱ kjo̱a̱a̱ ni xi ndokjo̱e̱ ji, ngatꞌa̱ jmí tsi ni xi ya sónkꞌaá xi titsitsijìi̱n, ta̱sá ja̱koxi̱i̱ ndi̱yà xí tsi̱ꞌe̱ Néná xí tibokoyé ji. A tsjandiè kjo̱a̱kitii̱, axa̱ tsjandièjín nga kꞌuíchjíjne̱ to̱n xi machjítjé ni nda̱ xtitjón xi ꞌmí Sesaa̱. A ko̱e̱ꞌéjne̱ axa̱ ko̱e̱ꞌéjínjne̱.

¹⁵ Ta̱nga Kjisoo̱ tji̱e̱nmá kamákjiín kjo̱a̱jókje̱e̱n kui jaá, kó bi̱ katsoó: –Ánní nga an ndyi̱chjatꞌayákónjnúꞌun. Te̱ꞌéjnúꞌun ngo to̱n xi chji̱a̱ni Roma̱, tsi̱ꞌe̱ nga skotsijèe̱n.

¹⁶ Kó kui jaá katsjaá ngo to̱n ndenario̱, sꞌe̱ Kjisoo̱, bi̱ katsó: –ꞌYá xí tsi̱ꞌe̱ kui a̱si̱én ko̱jo kui jaꞌén xí kjitꞌa kui to̱o̱n. Kó kui jaá, bi̱ katsó: –Tsi̱ꞌe̱ nda̱ xtitjón xi ꞌmí Sesaa̱ boá.

¹⁷ Kó Kjisoo̱, bi̱ katsó: –Ja̱ te̱ꞌéjnúu̱ nda̱ xtitjón xi ꞌmí Sesaa̱ ni xi tsi̱ꞌe̱ nda̱ xtitjoón, kó ni xi tsi̱ꞌe̱ Néná, Néná te̱ꞌéjnúu̱. Kó achichí kijíndikoón kui jaá kjo̱a̱a̱ Kjisoo̱.

Bi̱ tsꞌén akóyá Kjisoo̱ kjo̱a̱a̱ xota̱ xi foaꞌáꞌyá nginií ngije fesón

¹⁸ Kósꞌe̱ jachókoón Kjisoo̱ já sanduseo̱ xi tsó nga ngiti̱ foaꞌáꞌyájín xoò xota̱ xi je jesoón, kó bi̱ katsó nga asíyaá:

¹⁹ –Ji Mostro̱, Moisee̱ ítꞌaná ngo xo̱jo̱n xi bi̱ tsó: Tsi ngo nda̱ ko̱yà, kó ku̱i̱ꞌíjñá chjo̱ón kó jmí ndí kꞌuiéjiín, ntsꞌi̱e̱ kui nda̱a̱ chjiéngá kuí ku̱i̱xanjo̱ kui xota̱chjo̱on tsi̱ꞌe̱ nga xcha̱jàjín tji̱e̱e̱ ntsꞌi̱e̱ xi kꞌiee̱n.

²⁰ Ngo ndi̱yà kisꞌińdo yito já xí ta̱ ngo ntsꞌi̱e̱ kamá, nda̱ xi tjoón ixánjo̱ chjo̱ón, kó kꞌien kui nda̱a̱, kó jmí ndí kisꞌiejiín.

²¹ Kó ntsꞌie xi ma joó ixánjo̱ kui xota̱chjo̱on, kó ti̱ kꞌien nginí kui nda̱a̱, kó ti̱ jmí ndí kisꞌiejiín nga. Ti̱ bo̱a̱ ti̱ kamaá xi ma jaán,

²² kó bo̱a̱ kamaá nga yito kui jaá, kó ta̱ꞌyajín xi kisꞌiee̱ ndí. Nga fetꞌa kꞌien kui xota̱chjo̱on.

²³ Ni̱xtjin nga kjo̱a̱ꞌáꞌyaá xota̱ xi je jesoón, ja̱ ꞌyání nga yito kui jaá xi xi̱ꞌii̱n kui xota̱chjo̱on ka̱ma, ngatꞌa̱ nga yitoo̱ nga kisꞌińdojo̱.

²⁴ Kósꞌe̱ Kjisoo̱, bi̱ katsó: –Ta̱nisién bo̱a̱jín kjiꞌi ni xi ndokjo̱a̱jnú ngatꞌa̱ yàjínjnú ni xi kjitꞌa xo̱jo̱n eén Néná, ti̱nde yàjínjnú ngaꞌniuú Néná.

²⁵ Ngatꞌa̱ ngije kjo̱a̱ꞌáꞌyaá ngayeje xota̱ xi je jesoón, ti̱nde ngiti̱ ku̱i̱xánjín, kó ti̱nde ngiti̱ sa̱ꞌínkixanjín xkjín, ngatꞌa̱ xikónií tsi ndítsjie xi síndo ndiꞌakꞌajmi jàn ka̱ma.

²⁶ Ta̱nga kjo̱a̱ ngaá nga foaꞌáꞌyá nginií xota̱ xi je jesoón, a kji̱e̱ niꞌányàjínjnú xo̱jo̱n xi katsꞌénda Moisee̱, nínga ítꞌa kjo̱a̱a̱ yá sarsa̱ xi tjítií. Néná bi̱ katsoó Moisee̱: “Án boá xi Nee̱ Abraa̱n, ko̱jo Nee̱ Isaa̱, ko̱jo Nee̱ Jako̱b.”

²⁷ ¡Kó Néná jmí tsi Nee̱ xota̱ xi je jesón, Nee̱ xota̱ xi síndo boá, kuíni nga jún ki̱a̱jiín ni xi ndokjo̱a̱jnú!

Bi̱ tsꞌén akóyá Kjisoo̱ kjo̱a̱a̱ kjo̱a̱botíxoma xi ꞌniú chjí ngasee̱

²⁸ Nga kamábe nga Kjisoo̱ nda tsꞌén tsíchji̱a̱, ngo nda̱ chji̱ni̱e̱kjo̱a̱kiti xi tsintꞌié nga askjotí, kijíkóntiñaa̱ Kjisoo̱, kó bi̱ tsꞌén asíyaá: –Ñání kjo̱a̱botíxoma xi ꞌniú chjí ngasenii̱ ngi̱jii̱n ngayeje kjo̱a̱botíxoma xi tjiín.

²⁹ Sꞌe̱ Kjisoo̱, bi̱ katsoó: –Kjo̱a̱botíxoma xi ꞌniú chjí ngasenii̱ ngayeje kjo̱a̱botíxomaa̱, kuí xi̱ꞌbi̱: “Ndaꞌyájnú jún xota̱ Israee̱l, Ndi̱a̱ná, ta̱ ngo tsí má,

³⁰ kó ti̱ꞌintjé ji Nèe̱, kui xi Ndi̱a̱a̱ ngayeje ini̱màa̱, ngayeje kjo̱a̱mindyiòo̱n, ko̱jo ngayeje takín, ko̱jo ngayeje ngaꞌniúu̱.” Kuí bí xi̱ꞌbi̱ xi ꞌniú chjínií ko̱jo xi kjo̱a̱botíxoma xi tjoón

³¹ Xi ma joó, ti̱ mején ti̱ bi̱ ti̱ tsó: “Ti̱ꞌintjé ji xotaa̱ xikó má tsꞌén tjoó yojòo̱.” Jmíjín ingo kjo̱a̱botíxoma xi chjí ngasenii̱ xikoó nga jó xi̱ꞌbi̱.

³² Kó bi̱ katsó kui nda̱ chji̱ni̱e̱kjo̱a̱kitii̱: –Ndakjiꞌi Mostro̱, ja̱koxi̱ boá ni xi kase: Ta̱ ngo tsí má Néná, kó jmíjín kje̱ꞌe ngase.

³³ Kó nga tjó ka̱máná Néná ngayeje ini̱ma̱ná, ko̱jo ngayeje kjo̱a̱mindyionná, ko̱jo ngayeje takón, ko̱jo ngayeje ngaꞌniúná, kó nga tjó si̱ꞌán xotaa̱ xikó má tsꞌén tjóná yojoná, chjí ngasenii̱ kui nii̱ ta̱bo̱a̱jiín ngayeje kjo̱a̱tjó xi ꞌbítí ki̱a̱ ṉchandikoón ko̱jo chji̱e̱ xi niꞌánkꞌasꞌiee̱n Néná.

³⁴ Kósꞌe̱ nga tsintꞌié Kjisoo̱ nga ta̱nisién nda tsíchji̱a̱ kui nda̱ chji̱ni̱e̱kjo̱a̱kitii̱, bi̱ katsoó: –Kjinjín tindyinníi̱ nínga botixómá Néná. Kó ngiti̱ ingojín xota̱ xi kamákón nga asíyá ngasee̱.

Bi̱ tsꞌén akasíyaá Kjisoo̱ kjo̱a̱a̱ ꞌyání xi xota̱ tji̱e̱ xi kjindibáni Kristoo̱

³⁵ Nga tsꞌénbokoyá Kjisoo̱ ndi̱tsen na̱ngo̱xi̱i̱, bi̱ katsó: –Kótsꞌèn nga já chji̱ni̱e̱kjo̱a̱kitii̱ tsó nga Kristoo̱ xota̱ tji̱e̱e̱ Ndabii̱ xò kjindibáni.

³⁶ Xi ti̱kuíní Ndabii̱, xi bi̱ katsó nga A̱si̱énni̱xtjii̱n Néná katsꞌénkíchji̱a̱: Ndi̱a̱ná bi̱ katsoó Ndi̱a̱na: “Ti̱ndyintꞌení nga fojnína nínga botixoma an, ngaskande nga kꞌuindo an ngindie ndsa̱ki ji kondra̱ tse̱.”

³⁷ Ti̱ kuíní Ndabii̱ xi Ndi̱a̱ tsoó, kó kótsꞌèn nga xota̱ tji̱e̱e̱ kjindibáni Kristoo̱. Kó xota̱ kjiín achichí tsjá kamaá nga tsintꞌieé Kjisoo̱.

Kjisoo̱ bi̱ tsꞌén yíngítaꞌin já fariseoo̱ ko̱jo já chji̱ni̱e̱kjo̱a̱kitii̱

³⁸ Kó bi̱ katsó ngase Kjisoo̱ nga akóyá eén Néná: –Chónjnú já chji̱ni̱e̱kjo̱a̱kitii̱, ngatꞌa̱ achichí tsjá máa nga ꞌbítso̱ma nga boajá ńjñondio tsjakon, kó tsja máa nga ndikóntsꞌèn niꞌántinde nínga síndo ndi̱tse̱n,

³⁹ kó tsja máa nga ꞌbíndonié yáxíríe̱ xi tjón síndo ngi̱ya ndiꞌa nínga ndokjo̱a̱ eén Néná, kó tsja máa nga kui tjón ꞌbíndo ngi̱ndie xi tjón síndoo̱ yámíxa̱ nínga chinie ṉño̱o̱.

⁴⁰ Kui jaá, kuí boá xi tsꞌénchéjeé ni xi tjiín ínchjín kꞌán xi je kꞌien xi̱ꞌii̱n, kó achichí xò tsí Néná chji̱a̱a̱ ꞌne̱ ja̱ma, tsi̱ꞌe̱ nga sku̱i̱e̱ndikón xotaa̱. Kuí xota̱ xi̱ꞌba̱ xi tsie ngase ka̱majeé.

Bi̱ tsꞌén akóyá Kjisoo̱ kjo̱a̱a̱ to̱nchji̱e̱e̱

⁴¹ Ngo ni̱xtjin Kjisoo̱ kisꞌijña kje̱n nínga mindyia to̱nchji̱e̱e̱, kó askotsijee̱n xota̱ na̱xi̱ńdaá nga ndyi̱mindyiá to̱nchji̱e̱e̱ ngi̱ya koxa̱a̱. Kó kjín xota̱ cho̱n xi tsie to̱n indyiá.

⁴² Kjiꞌa má jachó ngo xota̱chjo̱on kꞌán xi je kꞌien xi̱ꞌii̱n xi ni̱ma̱ xi jmí to̱njiín, kó jó ndí to̱n xi chiboa chjií indyiá ngi̱ya koxa̱ to̱nchji̱e̱e̱.

⁴³ Kó Kjisoo̱ tsíchji̱a̱a̱ xota̱ tsi̱ꞌe̱, kó bi̱ katsoó: –Ja̱koxi̱ ni xi xiánjnúꞌun nga kui xota̱chjo̱on kꞌaán, ndatsi ni̱ma̱, tsie ngase katsjá ta̱bo̱a̱jiín ngayeje xota̱ xi je indyiá to̱nchji̱e̱e̱ ngi̱ya koxa̱a̱,

⁴⁴ ngatꞌa̱ ngayeje xotaa̱, to̱n xi ꞌbongii̱ boá xi indyiá, ta̱nga kui xota̱chjo̱on, ndatsi ni̱ma̱, indyiá ngayeje to̱n xi skji̱ni̱e̱ ko̱jo xi kꞌuiní nga kꞌuijñá nga̱sondie.