Markoo̱ 11 - Xo̱jo̱n eén Néná

Bi̱ tsꞌén tsꞌasꞌien Kjisoo̱ na̱xi̱ńdáꞌniú Jerusale̱n

¹ Kó ngije ma kjachó tiña na̱xi̱ńdáꞌniú Jerusale̱n, tꞌa ndí na̱xi̱ńdá xi ꞌmí Betfaje̱ ko̱jo Betania̱, ki̱a̱ tꞌa tji̱ngi̱ nínga tjín yáꞌoliboo̱, Kjisoo̱ katsangiya jó xota̱ tsi̱ꞌe̱,

² xi bi̱ katsoó: –Tangínjnú kui ndí nangi xi tikón kje̱e̱n, kó ngije ku̱i̱tjásꞌi̱e̱njnú kui ngi̱ndiee̱, ki̱a̱ sa̱kójnú ngo ndí bórró xí nde kji̱e̱ ngo xota̱ xi ꞌbíjñasoón, chjándójnú, kó ndibájo̱jnúꞌun kꞌi̱e̱e̱.

³ Kó tsi tjín xí ko̱síyájnú míkjo̱a̱a̱ nga bo̱a̱ ndyi̱niꞌánjnú, bi̱ tꞌínjnúu̱: Ndi̱a̱a̱ boá xí chjieén, kó jaskan xò tsja̱ꞌóyá nginíjnú.

⁴ Kó kijí kui jaá, kó ki̱a̱ kasakoo̱ ngo bórró xi tjitáꞌniú tꞌa ngo nga̱ntjo̱a̱ xtji̱e̱e̱n ndi̱yàtieé, kó iskjíndó.

⁵ Kó tjín xota̱ xi síndo ki̱a̱a̱, xi bi̱ katsoó kui jaá: –Mí xí ndyi̱niꞌánjnú nga kui bórroó ndyi̱chjándokonjnú.

⁶ Kó kui jaá bo̱a̱ tsꞌén tsíchji̱a̱ xikó katsoó Kjisoo̱, kó katseꞌékjo̱a̱a̱.

⁷ Kó tsangínjoo̱ Kjisoo̱ kui bórroó, kó kui jaá ísoón ńjñoo̱, sꞌe̱ Kjisoo̱ kisꞌijñasoón kui cho̱o̱.

⁸ Kó kjín má xota̱ xi yítie ńjñoo̱ ngi̱ya ndi̱ya̱à, kó kje̱ꞌe xí tjiaa̱ yá tsatie, kó ngi̱ya ndi̱ya̱à yíyojo.

⁹ Kó xota̱ xi tjimátjoón ko̱jo xi yajátji̱ngii̱ askjandáyà má, nga bi̱ katsó: –¡Néná ngatꞌaxiéꞌáná! ¡Ngatamachikonñé xi ndibání ngajoo̱ Ndi̱a̱ná!

¹⁰ ¡Ngatamachikonñé ngi̱ndie nínga botíxoma xi sꞌe̱ ndibaá, nínga tsꞌénbotixómá xota̱ xi xcháná Ndabii̱! ¡Néná ngatꞌaxiéꞌáná ndiꞌakꞌajmi jàn!

¹¹ Kó tsꞌasꞌien Kjisoo̱ na̱xi̱ńdáꞌniú Jerusale̱n, sꞌe̱ kijí na̱ngo̱xi̱i̱. Ngije askotsijen ni xi tjín nga ngo foaꞌatjiyajoo̱n, kijíjo̱ nga tiejó xota̱a̱ na̱xi̱ńdá Betania̱ ngatꞌa̱ je kamásajín.

Bi̱ tsꞌén katsꞌénxchánjo̱ Kjisoo̱ ngo yáꞌingo̱ xi jmí to tsjájín

¹² Kó nga kamángindyiojón, nga ndyi̱fotjo na̱xi̱ńdá Betania̱, Kjisoo̱ kamábojoó.

¹³ Kó ta̱ kjin kamábeni ngo yáꞌingo̱ xi tjiín xka̱, kijíkatsijen tiñaa̱ tsi ta̱ꞌa nga yajaá to, kó nga jachó tꞌa yaá, ta̱ jmíjín ni xi kasakoo̱, ta̱ xka̱ tsí xi yajaá kui yaá, ngatꞌa̱ kuijín ni̱xtjii̱n nga boajá toꞌingoo̱.

¹⁴ Sꞌe̱ Kjisoo̱, bi̱ katsoó yáꞌingoo̱: –Nginijánjín tjín xí skji̱ni̱e̱ to xi ko̱a̱ja̱a̱. Kó xota̱ tsi̱ꞌe̱ Kjisoo̱ tsintꞌié ni xi katsó.

Bi̱ tsꞌén tsꞌaxié Kjisoo̱ já xí ndyi̱botiñá cho̱ ndi̱tsee̱n na̱ngo̱xi̱i̱

¹⁵ Kó jachójo̱ xota̱a̱ na̱xi̱ńdáꞌniú Jerusale̱n, kó nga jachó ndi̱tsen na̱ngo̱xi̱i̱, Kjisoo̱ ítsꞌi̱yanii̱ nga tsangatji̱ngii̱ ngayeje xota̱ xi ndyi̱botiñá ko̱jo xi ndyi̱ꞌbotsie ni ki̱a̱a̱, kó tsꞌajmitójó yámíxa̱a̱ xota̱ xi ndyi̱bosíkjo to̱n, ko̱jo tsꞌajmitójó yáxíríee̱ xota̱ xi ndyi̱botiñá tójoo̱,

¹⁶ kó chiíjín katsjandiè nga jaꞌaxtikjá jaꞌaxtijen ndi̱tsen na̱ngo̱xi̱i̱ xota̱ xi tjimájo̱ nii̱.

¹⁷ Kó bi̱ katsó nga akóyá: –A kjitꞌajín xo̱jo̱n eén Néná nínga bi̱ tsoó: “Ndiꞌana, ndiꞌa nínga ku̱i̱chji̱a̱a̱ Néná ngayeje xota̱ na̱xi̱ńdá xí tjín nga̱sondiee̱ kꞌuiín”. Ta̱nga jún ndo̱bo̱a̱a̱ chejé jè kiniꞌánjnú.

¹⁸ Kó tsintꞌieé já chji̱ni̱e̱kjo̱a̱kitii̱, ko̱jo já ngito̱ko̱o̱ chináꞌmii̱, kó tsangasee̱ kótsꞌèn sa̱ꞌínkꞌién Kjisoo̱, ngatꞌa̱ katsakjónní kjo̱a̱a̱ nga ngayeje xota̱ na̱xi̱ńdaá kijíndikoón ni xi akóyá.

¹⁹ Kó ngije kjimajñoó, jatjo Kjisoo̱ ko̱jo xota̱ tsi̱ꞌe̱ kui na̱xi̱ńdaá.

Bi̱ kamaá yáꞌingo̱ xi katsꞌénxchánjo̱ Kjisoo̱

²⁰ Kó nga ta̱jño̱ó nga kamángindyiojón jaꞌa nínga tikón yáꞌingoo̱, kó kamábe nga je kixí ndeskande ja̱ma̱a̱.

²¹ Kósꞌe̱ Peé jaꞌátsjiee̱n ni xi kamaá, sꞌe̱ bi̱ katsoó Kjisoo̱: –Ji Mostro̱, jànꞌa̱n kui yáꞌingo̱ xi kiniꞌínxchínje̱ je kixí.

²² Sꞌe̱ Kjisoo̱, bi̱ katsoó: –Ti̱ꞌansꞌijinjnú Néná.

²³ Ngatꞌa̱ ja̱koxi̱ ni xi xiánjnúꞌun nga ta̱ꞌya xota̱ní, xi bi̱ ka̱tso̱o̱ kui tji̱ngi̱i̱: “Ti̱xín ji kꞌi̱e̱e̱, kó tjajmijin ji yojòo̱ ngi̱jin ndáchíkoón”, ka̱ma ni xi ku̱i̱ꞌa, tsi kui xotaa̱ nga jó nga jánjín ku̱i̱ꞌíjñaá ini̱ma̱a̱, nga ta̱sá sꞌijii̱n nga ka̱ma ni xi katsó.

²⁴ Kuíni nga bo̱a̱ xiánjnúꞌun nga ngayeje ni xi chji̱a̱ꞌajnú nga ko̱ndókjo̱a̱jnúu̱ Néná, sꞌijin ngatamajnú nga sa̱kójnú, kó sa̱kójnú kui nii̱.

²⁵ Kó kjiꞌanga ndyi̱ndokjo̱a̱jnúu̱ Néná, ti̱ꞌanjetakónjnú tsi tjín káꞌá xota̱ xi ngo ni xi ndajínkjiꞌi katsꞌénjo̱jnú, tsi̱ꞌe̱ nga kui Na̱ꞌmijnú xi tikón ndiꞌakꞌajmi jàn sa̱ꞌínjetakónjnú ni chꞌokjiꞌi xi kiꞌmíjnú jún.

²⁶ Ngatꞌa̱ tsi si̱ꞌanjetakónjínjnú, ti̱nde Na̱ꞌmijnú xi tikón ndiꞌakꞌajmi jàn sa̱ꞌínjetakónjínjnú kjo̱a̱chꞌokjiꞌi xi si̱ꞌánjnú.

Bi̱ kamá nga jáxaá asíyaá Kjisoo̱ ꞌyá xí katsjáxaá

²⁷ Kó ti̱ kijí nginí na̱xi̱ńdáꞌniú Jerusale̱n, kó tji̱e̱nga tsoꞌbá Kjisoo̱ ki̱a̱ ndi̱tsen na̱ngo̱xi̱i̱, já ngito̱ko̱o̱ chináꞌmii̱, já chji̱ni̱e̱kjo̱a̱kitii̱, ko̱jo já xchá ngito̱ko̱o̱ na̱xi̱ńdaá jachókón tiñaa̱,

²⁸ kó bi̱ katsoó nga asíyaá: –Mí xá xí tjiín nga kui nii̱ niꞌín ji. Kó ꞌyá xí katsjaá kui xaá nga niꞌín ji kui nii̱.

²⁹ Kó Kjisoo̱, bi̱ katsoó: –Ti̱ bo̱a̱ ti̱ tsꞌén kosíyájnúꞌun jún ngo ni, kó tsi ka̱ma kꞌuiyájnúꞌun, ti̱ bo̱a̱ ti̱ tsꞌén ka̱ma xiyàjnúꞌun mí xá xí tjínna nga tsꞌen an kui nii̱.

³⁰ ꞌYá xí katsangiya Jua̱ xi botíndaá nga atíndá xotaa̱. A Néná, axa̱ xotaa̱. Tꞌíyájnúꞌun.

³¹ Kósꞌe̱ kui jaá, ítsꞌi̱yanii̱ nga bi̱ katsoó xkjín: –Tsi Néná xí katsangiya tsi kꞌuíi̱n: “Kó ánní nga kisꞌijinjínjnú”, ka̱tso̱ná,

³² kó tsi xotaa̱ xí katsangiya tsi kꞌuíi̱n... Ta̱nga katsakjónní xota̱ na̱xi̱ńdaá, ngatꞌa̱ ngayeje xotaa̱ xi katsó nga Juaa̱ xí ja̱koxi̱ nga ngo nda̱ chji̱ni̱e̱ꞌe̱én Néná.

³³ Kó bi̱ katsó kui jaá nga tsíchji̱a̱jo Kjisoo̱: –Yàjínjne̱. Kó Kjisoo̱, bi̱ katsó: –Ja̱ ti̱ xiyàjínjnúꞌun mí xá xí tjínna nga tsꞌen an kui nii̱ nga.