Markoo̱ 10 - Xo̱jo̱n eén Néná

Bi̱ tsꞌén akóyá Kjisoo̱ kjo̱a̱a̱ xota̱ xi je ixán kó ꞌbíndo xkjín

¹ Kó Kjisoo̱ jatjo ki̱a̱a̱, sꞌe̱ kijí nangi Jundea̱ ko̱jo nangi xi tikón xtji̱e̱e̱n xi ingoboaá ndejèꞌ Jorndaa̱n, kó ki̱a̱ ti̱ kamátikótꞌa nginií xota̱ na̱xi̱ńdaá, kó xikótsꞌèn ngaá, ti̱ ítsꞌi̱ya nginí nga akóyaá xotaa̱.

² Kó já fariseoo̱ jachókón tiñaa̱ Kjisoo̱ tsi̱ꞌe̱ nga askotꞌayákón, kó asíyaá tsi tsjandiè kjo̱a̱kitii̱ nga ngo nda̱ xi je ixán sa̱ꞌínkjié kjo̱a̱bixaa̱n.

³ Kó bi̱ katsó Kjisoo̱: –Mí kjo̱a̱botíxoma xi íjñájnú Moisee̱.

⁴ Kó kui jaá, bi̱ katsó: –Moisee̱ katsjandiè nga ka̱ma xò tsí ngo nda̱ xi je ixán, skjinínkꞌá ngo xo̱jo̱n nínga je je kjo̱a̱bixaa̱n, kó nga ka̱ma xò ku̱i̱ꞌíjñá chjo̱ón.

⁵ Kósꞌe̱ Kjisoo̱, bi̱ katsó: –Ta̱ngatꞌanii̱ nga tá tajá ini̱ma̱jnú, kuíni nga bo̱a̱ tsꞌén íjñájnú Moisee̱ kui kjo̱a̱botíxomaa̱.

⁶ Ta̱nga ndeskande nga Néná ítsꞌi̱yanii̱ nga katsꞌénda nga̱sondiee̱ “xi xi̱ꞌin ko̱jo xi chjo̱on” katsꞌénda.

⁷ “Ta̱ngatꞌanii̱ kui nii̱ nga nda̱ xi̱ꞌii̱n ku̱i̱ꞌíjñá na̱ꞌmii̱ ko̱jo na̱aa̱n, kó kꞌuijñájo̱ chjo̱ón,

⁸ kó ta̱ ngo tsí yojo ka̱ma nga joó, kó bo̱a̱ tsꞌén nga jè ngiti̱ jójín má, ta̱ ngo tsí má.”

⁹ Kó kuíni nga ni xi je katsꞌéngo Néná, ka̱májiín kꞌo̱xiékjo xotaa̱.

¹⁰ Kó ngije jachó ngi̱ya ndiꞌaa̱, xota̱ tsi̱ꞌe̱ Kjisoo̱, ti̱ asíyá nginií kjo̱a̱a̱ kui nii̱.

¹¹ Kó Kjisoo̱, bi̱ katsoó: –Ta̱ ꞌyání xi ku̱i̱ꞌíjñá chjo̱ón, kó tsi kje̱ꞌe chjo̱on ku̱i̱xanjo̱, tsꞌén bendikónjín kjo̱a̱bixaa̱n,

¹² kó tsi xi chjo̱ón ku̱i̱ꞌíjñá xi̱ꞌii̱n, kósꞌe̱ kje̱ꞌe xi̱ꞌin ku̱i̱xanjo̱, tsꞌén bendikónjín kjo̱a̱bixaa̱n nga.

Kjisoo̱ bi̱ tsꞌén katsꞌénchikonñé jákjíndí xi̱xi̱i̱

¹³ Kó jachóchinií Kjisoo̱ jákjíndí xi̱xi̱ tsi̱ꞌe̱ nga sa̱ꞌínjo̱, ta̱nga xota̱ tsi̱ꞌe̱ katsꞌénxchánjo̱ xota̱ xi jachójo̱ kui jákjíndií.

¹⁴ Kó nga kamábe Kjisoo̱ kui nii̱, kamáxtií, kó bi̱ katsó: –Te̱ꞌéndièjnúu̱ kui jákjíndií nga kjo̱e̱ꞌe̱kónna, kó ngata̱ ꞌbíchjájínjnúu̱, ngatꞌa̱ nínga botíxomaa̱ Néná kuí xí ka̱ma kꞌo̱sꞌien kui xi xikoó kui jákjíndií.

¹⁵ Ja̱koxi̱ ni xi xiánjnúꞌun, nga xi kꞌo̱sꞌienjín nínga botixómá Néná xikoó ngo nda̱chí, ka̱májín kꞌo̱sꞌien.

¹⁶ Kó Kjisoo̱ ngije tsankꞌá jákjíndií, katsꞌénchikonñé nga íjñasoón tsja.

Bi̱ tsꞌén tsíchji̱a̱ni̱jmìjo Kjisoo̱ ngo nda̱ cho̱n xo̱ngò

¹⁷ Kó nga tsꞌénfí Kjisoo̱ ngi̱ya ndi̱ya̱à, ngo nda̱ jachókón monga mongaa̱, asiéntꞌaa̱tikoó, kó bi̱ katsoó nga asíyaá: –Ji Mostro̱ nda, mí ni xi sa̱ꞌin an tsi̱ꞌe̱ nga sa̱kóna kjo̱a̱mindyion ngatsjéni̱xtjii̱n.

¹⁸ Kó Kjisoo̱, bi̱ katsoó: –Míkjo̱a̱a̱ nga nda sení. Ta̱ꞌyajín xi nda, ta̱ ngototo Néná.

¹⁹ Jè yé ji kjo̱a̱botíxomaa̱ Néná xí bi̱ tsoó: “Che̱ndikín jí kjo̱a̱bixàa̱n, ngata̱ niꞌínkꞌínjín ji xota̱, ngata̱ niꞌínchejéjín ji, ngata̱ ꞌbíndisetaꞌinjín ji ngo xota̱, ngata̱ chꞌíṉche̱jín ji, che̱ndikín jí na̱ꞌmíi̱ ko̱jo na̱áa̱n.”

²⁰ Kó bi̱ katsó kui nda̱a̱: –Mostro̱, ngayeje kui nii̱ je katsꞌenkjatjosón an ndeskande koó nga nda̱chí an.

²¹ Kósꞌe̱ Kjisoo̱ askotsijen ndá ndaá kui nda̱a̱, katsꞌéntjó, sꞌe̱ bi̱ katsoó: –Ta̱ ngo tsí ni xi chaja ngasee̱: Tꞌen, kó tatíñí ngayeje ni xi tjiín, kó to̱o̱n kui nii̱ xota̱ ni̱ma̱a̱ te̱ꞌée̱, kó bo̱a̱ tsí tsꞌén nga kꞌuieé ngo kjo̱a̱cho̱n ndiꞌakꞌajmi jàn, sꞌe̱ ndibétji̱ngíní ngije kachjábé jí króo̱.

²² Ta̱nga nga tsintꞌié kuí nda̱ xo̱ngo̱ò kui eén, achichí ndasen kamaá nga kijí, ngatꞌa̱ achichí ni tjiín.

²³ Kósꞌe̱ Kjisoo̱ askotsijee̱n xota̱ xi jaꞌatjindee̱, kó bi̱ katsoó xota̱ tsi̱ꞌe̱: –¡Achichí niꞌin kjiꞌi nga xota̱ xi tsie kjo̱a̱cho̱n tjiín nga kꞌo̱sꞌien nínga botíxomaa̱ Néná!

²⁴ Kó xota̱ tsi̱ꞌe̱ Kjisoo̱ achichí kijíndikoón kui én xí tsíchji̱a̱, ta̱nga Kjisoo̱, ti̱ bi̱ ti̱ katsó nginií: –Jún bo̱a̱ ndí, ¡achichí niꞌin kjiꞌi nga kꞌo̱sꞌien nínga botíxomaa̱ Néná kuí xota̱ xi kjimaꞌniátakón kjo̱a̱cho̱o̱n!

²⁵ Ta̱sá niꞌínjín kjiꞌi nga ngo cho̱toꞌoyitsꞌe̱n kjo̱a̱ꞌaya ngo ti̱xa̱a̱ ngo ńdo, ta̱bo̱a̱jiín nga ngo nda̱ cho̱n kꞌo̱sꞌien nínga botíxomaa̱ Néná.

²⁶ Ta̱nga kui jaá ta̱sá má achichí kijíndikón ngasee̱, kó ja̱kꞌi̱e̱ ja̱ngaján, bi̱ katsoó xkjín: –Ja̱ ꞌyání xi kjo̱tjoꞌa tsobo̱a̱.

²⁷ Kósꞌe̱ Kjisoo̱ askotsijee̱n kui jaá, kó bi̱ katsoó: –Ka̱májiín sa̱ꞌín kui nii̱ ngo xota̱, ta̱nga Néná ngayeje nii̱ xi ka̱maa̱ sa̱ꞌín.

²⁸ Kósꞌe̱ Peé, ítsꞌi̱yanii̱ nga bi̱ katsoó: –Ja̱ jè yé, nga ji̱n ngayeje nii̱ ikꞌíjñájne̱, kó kꞌi̱e̱ timatji̱ngijne̱ ji.

²⁹ Sꞌe̱ Kjisoo̱, bi̱ katsó: –Ja̱koxi̱ ni xi xiánjnúꞌun nga jmíjín ngo xota̱ xi íjñámasien ndiꞌaa̱, ko̱jo ntsꞌi̱e̱, ko̱jo ndichja, ko̱jo na̱ꞌmii̱, ko̱jo na̱aa̱n, ko̱jo ndií, ko̱jo tꞌanangii̱, ta̱ngatꞌanii̱ an ko̱jo éntjatsi̱e̱e̱ Néná,

³⁰ nga sa̱kójiín ngotꞌe̱ nga tindyión kuí nga̱sondiee̱ úchán bo̱a̱ kjiꞌi ngase ndiꞌa, ko̱jo ntsꞌi̱e̱, ko̱jo ndichja, ko̱jo na̱aa̱n, ko̱jo ndí, ko̱jo tꞌanangii̱, ndatsi ku̱i̱yòtjíngií. Kó ni̱xtjin xi ndibaá sa̱ko̱ó kjo̱a̱mindyion ngatsjéni̱xtjii̱n.

³¹ Kjín má xota̱ xi tjón ngotꞌe̱, xi fetꞌa ka̱ma, kó kjín má xota̱ xi fetꞌa ngotꞌe̱, xi tjón ka̱ma.

Kjisoo̱ bi̱ tsꞌén katsóyà nginí xi ma jaán ndi̱yà nga ko̱yà

³² Kó nga ndyi̱fínijíngí xtji̱e̱e̱n na̱xi̱ńdáꞌniú Jerusale̱n, Kjisoo̱ kistsoꞌbátjoón xota̱ tsi̱ꞌe̱. Kó kui jaá kijíndikoón, kó katsakjónní nga tjimátji̱ngii̱. Sꞌe̱ Kjisoo̱ ti̱ tsíchji̱a̱tꞌaxín nginií já xí tiejoó, kó íni̱jmi̱ì ni xi sꞌe̱ ka̱maa̱,

³³ bi̱ katsoó: –Tsitsíjenjnúu̱ nga kꞌi̱e̱ ndyi̱mongínnijíngí xtji̱e̱e̱n na̱xi̱ńdáꞌniú Jerusale̱n, kó ndií nda̱ xi̱ꞌii̱n si̱ꞌankꞌasꞌiee̱n já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, kó kuí xí tsja̱akjo̱a̱ nga si̱ꞌankꞌien, ko̱jo nga si̱ꞌankꞌasꞌiee̱n xota̱ xi jundío̱jín.

³⁴ Kó ko̱jno̱cha, ko̱jo ko̱ti̱tiajón, ko̱jo kjoaá, ko̱jo si̱ꞌankꞌien, ta̱nga xi ma ján ni̱xtjin kjo̱a̱ꞌáꞌyaá.

Sandiyaá ko̱jo Juaa̱ bi̱ tsꞌén tsíꞌaá ngo kjo̱a̱nda Kjisoo̱

³⁵ Kósꞌe̱ jachókón tiñaa̱ Sandiyaá ko̱jo Juaa̱, nga jó ndií Sebedeoo̱, kó bi̱ katsoó: –Mostro̱, mejénjne̱ nga si̱ꞌinjne̱ ngo kjo̱a̱nda, nga ko̱e̱ꞌéjne̱ ni xi chji̱a̱ꞌajne̱.

³⁶ Kó Kjisoo̱, bi̱ katsó nga asíyaá: –Mí ni xi mejénjnú nga sa̱ꞌinjnúꞌun.

³⁷ Kó bi̱ katsó kui jaá: –Te̱ꞌéndièjne̱ nga ki̱a̱ ku̱i̱ndyiontꞌajne̱ ji nga ko̱ti̱xome ji nga kꞌuieé kjo̱a̱je, ngo xi ngatꞌíjñá nga fojníi̱, sꞌe̱ ngo xi ngatꞌíjñá nga skóo̱n.

³⁸ Kósꞌe̱ Kjisoo̱, bi̱ katsoó: –Yàjínjnú ni xi ndyi̱chjiáꞌájnú. A kjo̱chíkjo̱a̱jnú nga on xcha̱jnú xikótsꞌèn on xcha̱na an, kó a kjo̱chíkjo̱a̱jnú kjo̱a̱ni̱ma̱ xi kjo̱a̱ꞌatio an.

³⁹ Kó bi̱ katsó kui jaá: –Jo̱o̱n, kjo̱chíkjo̱a̱jne̱. Kó Kjisoo̱, bi̱ katsó: –Ja̱koxi̱ nga jún xchíkjo̱a̱jnú xikótsꞌèn chꞌo xꞌi̱a̱na ko̱jo kui kjo̱a̱ni̱ma̱ xi kjo̱a̱ꞌatio an,

⁴⁰ ta̱nga nga ki̱a̱ ku̱i̱ndyiontꞌajnúꞌun nga skónna ko̱jo tsi nga fojnína, ánjín tsoboána nga tsja an kjo̱a̱, Na̱ꞌmina xí je tikónndaa̱ ꞌyá xí tsja̱á kui ngi̱ndiee̱.

⁴¹ Kó nga tsintꞌié kuí nii̱ xota̱a̱ Kjisoo̱ xi ngi tiee̱, achichí katsꞌénxchánjo̱ Sandiyaá ko̱jo Juaa̱.

⁴² Kó Kjisoo̱ tsíchji̱a̱a̱, kó bi̱ katsoó: –Jè yàjnú nga kui nga̱sondiee̱, xota̱ xi botixómaá nangii̱, tsjandièjiín xotaa̱ nga ta̱xkiya sa̱ꞌín ngo ni tsi tsjakjo̱a̱jiín. Ko̱jo nga já xí ngito̱ko̱o̱ na̱xi̱ńdaá xi nkꞌa xaá, ta̱ ni xi mejénrií tsꞌénjo̱ xota̱ na̱xi̱ńdaá.

⁴³ Ta̱nga chjiénjín nga bo̱a̱ ka̱ma ngi̱jinjnú, ta̱sá kuí xota̱ xi mejeén nga ꞌniú nkꞌa ngase ka̱ma ngi̱jinjnú, kuí xí chjiéngá sa̱ꞌínseén xota̱ xi ngasee̱,

⁴⁴ kó kui xi mejeén nga tjón ka̱ma ngi̱jinjnú kuí xí chjiéngá sa̱ꞌínseén xota̱ xi ngasee̱.

⁴⁵ Ngatꞌa̱ ndií nda̱ xi̱ꞌii̱n jmí tsi jeꞌe kui nga̱sondiee̱ tsi̱ꞌe̱ nga kui xi si̱ꞌansee̱n, ta̱sá jeꞌe tsi̱ꞌe̱ nga kui xi sa̱ꞌínseén xotaa̱, ko̱jo tsi̱ꞌe̱ nga tsja̱a yojoo̱ tsi̱ꞌe̱ nga ku̱i̱ꞌíchjítáꞌín kjín xota̱.

Bi̱ tsꞌén katsꞌéndaya Kjisoo̱ nda̱ ti̱ka̱ xi ꞌmí Bartimeoo̱

⁴⁶ Kósꞌe̱ jachó na̱xi̱ńdáꞌniú Jeriko̱, kó nga tsꞌénfotjo Kjisoo̱ kui na̱xi̱ńdaá, ko̱jo xota̱ tsi̱ꞌe̱ ko̱jo kjín ngase xota̱ xi tji̱e̱njo, ngo nda̱ ti̱ka̱ xi ꞌmí Bartimeo̱ xi ndií Timeoo̱, tikónndo ki̱a̱ tꞌa ndi̱ya̱à nga tsꞌénmíꞌá to̱nchji̱e̱.

⁴⁷ Kó nga tsintꞌié nga Kjisoo̱, nda̱ Nasaree̱t xi kjoaꞌaa̱, kui nda̱ ti̱ka̱a̱, bi̱ katsoó nga askjandáyaá: –¡Kjiso̱, ji xi xota̱ tji̱e̱e̱ Ndabii̱ ji, ngatamani̱ma̱a̱ an!

⁴⁸ Kó kjín má xi katsꞌénxchánjo̱ tsi̱ꞌe̱ nga ngiti̱ skja̱ndáyàjín, ta̱nga kui nda̱ ti̱ka̱a̱ ta̱sá má ꞌniú askjandáyà ngase nga bi̱ katsó nginí: –¡Xota̱ tji̱e̱e̱ Ndabi̱, ngatamani̱ma̱a̱ an!

⁴⁹ Kósꞌe̱ Kjisoo̱ kasasien, kó tsíꞌá tsi̱ꞌe̱ nga kjo̱chóchinií, kó kandokjo̱a̱a̱ nda̱ ti̱ka̱a̱ nga bi̱ kiꞌmií: –Te̱ꞌéngaꞌníi̱ yojòo̱, ti̱sítji̱n ji, ngatꞌa̱ tsꞌénchji̱a̱ári.

⁵⁰ Kó kui nda̱ ti̱ka̱a̱ tsꞌajmi ńjño xi kjitꞌa nga̱xto̱n, sꞌe̱ jastjíe̱n, kó kijíkoón Kjisoo̱.

⁵¹ Kó Kjisoo̱, bi̱ katsó nga asíyaá: –Mí ni xi mejeén nga sa̱ꞌin an nganda tse̱. Sꞌe̱ nda̱ ti̱ka̱a̱, bi̱ katsó: –Mostro̱, mejénna nga ka̱matsijenna.

⁵² Kó Kjisoo̱, bi̱ katsoó: –Tꞌen ꞌne̱, kjo̱a̱sꞌijìi̱n xí je tsꞌaxiéꞌaá ji. Kó ti̱ kjiꞌa kamátsijen nginií nda̱ ti̱ka̱a̱, sꞌe̱ kijítji̱ngii̱ Kjisoo̱ ndi̱yà xí tsoꞌbá.