Lebitiko̱ 8 - Xo̱jo̱n eén Néná

Nga katseꞌéxaá Aaroo̱n ko̱jo ndií

¹ Néná ti̱ bi̱ ti̱ katsoó Moisee̱ nga:

^2-3 «Tꞌítikí jí Aaroo̱n ko̱jo ndií, ko̱jo ngayeje xota̱ Israee̱l, kó ki̱a̱ tꞌenje̱ ji nínga bitjasꞌi̱e̱nni ndiꞌandikoón. Chꞌi̱e̱ ji ńjño xi boajá já chináꞌmii̱, ko̱jo isti̱ xi nanginjon xotaa̱ nga boeꞌéxaá, ko̱jo ndí cho̱yojo chichí xi si̱ꞌankꞌasꞌienni kjo̱a̱tjó kjo̱a̱a̱ nga si̱ꞌanjetakón jeé, ko̱jo nga jó cho̱tsa̱nga̱a̱, ko̱jo ni̱se̱nyá xí ndyi̱a̱ pan xi jmí nisanjiín.»

⁴ Kó Moisee̱ bo̱a̱ katsꞌén xikó má tsꞌén atíxomaa̱ Néná, kó ngije síndotikó ngayeje xotaa̱ ki̱a̱ nínga bitjasꞌi̱e̱nnii̱ ndiꞌandikoón,

⁵ Moisee̱ bi̱ katsoó: «Kjo̱a̱botíxomaa̱ Néná boá xi tjítsꞌenkjatjosón an».

⁶ Kósꞌe̱ tji̱e̱nmá Moisee̱ tsíchji̱a̱a̱ Aaroo̱n ko̱jo jaá, tsi̱ꞌe̱ nga ko̱e̱je̱kon tiñaa̱, kó ki̱a̱ katsꞌéntsjiejón nga aniéjón kui jaá.

⁷ Sꞌe̱ katsꞌénkajá Aaroo̱n ńjño chináꞌmii̱, kó iskjienꞌniuú ńjño xi ꞌbíkjá ndáyaá. Kó ti̱ katsꞌénkajá chi̱nga ndioo̱ ko̱jo ńjño xi fotꞌa ni̱se̱e̱n, kó iskjienꞌniuú tji̱xi̱ín kui ńjñoo̱ tsi̱ꞌe̱ nga nda kisꞌiee̱ chi̱nga ndioo̱.

⁸ Jaskan katsꞌénkajá chi̱nga nínga indyiá Urii̱n ko̱jo Tumii̱n, nga jó kui ndí ndi̱jo̱ xi katsꞌénkjién, tsi̱ꞌe̱ nga sku̱i̱e̱ ni xi Néná kamámejeén sa̱ꞌín.

⁹ Kó to̱ko̱ íjñaá ni ꞌbíꞌá tokoo̱, kó nga̱soón kui nii̱ yítꞌaa̱ ndí axtañó xi to̱nsinieé, bo̱a̱ katsꞌén xikó má katsoó Néná nga atíxomaa̱. Kui ndí axtañó xi to̱nsinieé, kuí boá xi katsóyà nga Aaroo̱n boá xi ngo chináꞌmi xi je ta̱ xaá Néná tsí xi kisꞌijñani.

¹⁰ Jaskan iskjíbé Moisee̱ isti̱ xi nanginjon nga boeꞌéxaá ngo xota̱, kó kui istii̱ xi indyiaá ndiꞌandikoón ko̱jo ngayeje ni xi tjín ngi̱yaa̱.

¹¹ Kó ti̱ indyiaá ṉchandikoón, ko̱jo ngayeje ni xi niꞌánkjién ki̱a̱a̱ nga, ko̱jo ni xi ki̱cha̱ bronsee̱ ko̱jo ngindiee̱ kui nii̱ nga. Tsi̱ꞌe̱ nga katsꞌénkꞌasꞌiee̱n Néná kuí ṉchandikoón, yito ndi̱yà iskjitjónjón isti̱.

¹² Sꞌe̱ jaskan katsangijon isti̱ to̱ko̱ Aaroo̱n, kósꞌe̱ katsꞌénkꞌasꞌiee̱n Néná, nga kui xi ka̱ma chináꞌmii̱.

¹³ Nga fetꞌa, Moisee̱ tsíchji̱a̱ jaá Aaroo̱n tsi̱ꞌe̱ nga ko̱e̱je̱kon tiñaa̱, kó katsꞌénkajá ńjño xi boajá já chináꞌmii̱, iskjienꞌniuú ńjño xi ꞌbíkjá ndáyaá, ísoón ni ꞌbíꞌá tokoo̱, xikó má katsoó Néná nga atíxomaa̱ nga sa̱ꞌín.

Kjo̱a̱tjó xi niꞌánkꞌasꞌien nga boeꞌéxaá ngo xota̱

¹⁴ Kó Moisee̱ katsangiyakjaꞌá ndií cho̱yojo xi si̱ꞌankꞌasꞌien kjo̱a̱a̱ nga si̱ꞌanjetakón jeé, kósꞌe̱ Aaroo̱n ko̱jo jaá íjñasoón tsja to̱ko̱ kui cho̱o̱,

¹⁵ kó Moisee̱ katsꞌénkꞌién kui cho̱o̱. Sꞌe̱ tji̱e̱nmá katsꞌénkꞌandyi̱ni xtín tsja jiín kui cho̱o̱, kósꞌe̱ katsangijon kui jiín nga ngo nga ngo nga̱ndee̱ kui ṉchandikoón, sꞌe̱ jaskan jín xí ngasee̱ ki̱a̱ iskjitjónjón ngindiee̱ kui ṉchandikoón, bo̱a̱ tsꞌén katsꞌéntsjie kui ngi̱ndiee̱, kósꞌe̱ katsꞌénkꞌasꞌiee̱n Néná.

¹⁶ Moisee̱ ti̱ iskjíbé ngayeje xinié xí kjijon tsiꞌee̱ kui ndií cho̱yojoo̱, ko̱jo ngo chikjan chi̱nga̱ndaa̱, ko̱jo nga jó chjo̱ondáyaá, ko̱jo xinieé, kó ki̱a̱ ítí nga̱són ṉchandikoón,

¹⁷ ta̱nga tji̱xi̱ín, yojoo̱, ko̱jo yeꞌee̱ kui cho̱o̱, ki̱a̱ ítí ndi̱tsee̱n ngi̱ndie nínga síndo ndiꞌaa̱ xotaa̱, xikó má katsoó Néná nga atíxomaa̱ nga sa̱ꞌín.

^18-19 Kó Moisee̱ katsangiyakjaꞌá ndií cho̱tsa̱nga̱ xi jaꞌatji ndi̱ja̱a̱ xi si̱ꞌankꞌasꞌien nga kꞌuití ngandaa̱ Néná, kósꞌe̱ Aaroo̱n ko̱jo ndií íjñasoón tsja to̱ko̱ kui cho̱o̱, kósꞌe̱ Moisee̱ katsꞌénkꞌién kui cho̱o̱. Jaskan ngije kamá kui nii̱, iskjitjónjón jiín nga nijon nga̱ndee̱ kui ṉchandikoón,

²⁰ kó tsatieya kui cho̱tsa̱nga̱ xi jaꞌatji ndi̱ja̱a̱, kó ítí kui yojoo̱, ko̱jo to̱ko̱, ko̱jo xinieé.

²¹ Kó aniéjón sé ko̱jo tsiꞌee̱ kui cho̱o̱, kó ítí ngayeje cho̱tsa̱nga̱ xi jaꞌatji ndi̱ja̱a̱, xikótsꞌèn ꞌbítí kjo̱a̱tjó xi sije̱n maa̱, nganda tsi̱ꞌe̱ Néná. Moisee̱ bo̱a̱ má tsꞌén, xikó má katsoó Néná nga atíxomaa̱.

^22-23 Kó Moisee̱ katsangiyakjaꞌá xí ingo cho̱tsa̱nga̱ xi jaꞌatji ndi̱ja̱a̱ xi niꞌánkꞌasꞌien tsi̱ꞌe̱ nga boeꞌéxaá ngo xota̱. Kó Aaroo̱n ko̱jo ndií íjñasoón tsja to̱ko̱ kui cho̱o̱, sꞌe̱ Moisee̱ katsꞌénkꞌién kui cho̱o̱. Jaskan ngije kamá kui nii̱, Moisee̱ katsꞌénkꞌandyi̱ni xtín tsja jiín kui cho̱o̱, kósꞌe̱ tji̱bo̱a̱nijon xi kixi̱ Aaroo̱n katsangijon, ko̱jo xtín jeé tsja xi kixi̱, ko̱jo xtín jeé se xi kixi̱ Aaroo̱n nga.

²⁴ Kó ti̱ tsíchji̱a̱a̱ nga ko̱e̱je̱kon tiñaa̱ jaá Aaroo̱n, kó ti̱ bo̱a̱ ti̱ katsꞌénjo̱ kui jaá nga, kó jín xí ngasee̱ ki̱a̱ iskjitjónjón nga nijón nga̱ndee̱ ṉchandikoón.

²⁵ Moisee̱ ti̱ iskjíbé ńtsꞌen ko̱jo ngayeje xinié xí kjijon tsiꞌee̱ kui cho̱o̱, ko̱jo ngo chikjan chi̱nga̱ndaa̱, ko̱jo nga jó chjo̱ondáyaá, ko̱jo ti̱ꞌmi xí kixi̱i̱ kui cho̱o̱ nga,

²⁶ kó nga̱soón ngayeje kui nii̱ ki̱a̱ íjñasón ngo paa̱n, ko̱jo ngo pan kjikjojó xi isti̱ kiniꞌánda̱ꞌyo̱ni, ko̱jo ngo ngayita̱ xi tsꞌaxiéni ni̱se̱nyá nínga ndyi̱a̱ pan xi jmí nisanjiín xi tikón kje̱n ṉchandikoón Néná.

²⁷ Sꞌe̱ jaskan Moisee̱ katsjandieè Aaroo̱n ko̱jo jaá nga kui xi sa̱ꞌínkꞌasꞌien kui kjo̱a̱tjó xi niꞌánkꞌasꞌiee̱n Néná.

²⁸ Jaskan ngije kamá kui nii̱, Moisee̱ iskjíbé kui kjo̱a̱tjó xi katsꞌénkꞌasꞌien Aaroo̱n ko̱jo jaá, kó ki̱a̱ ítí ki̱a̱ nga̱són ṉchandikoón ko̱jo kui kjo̱a̱tjó xi sije̱n xi ꞌbítí ngandaa̱ Néná, ngatꞌa̱ nga jó kui kjo̱a̱tjoó xí niꞌánkꞌasꞌien kjiꞌanga boeꞌéxaá ngo xota̱.

²⁹ Sꞌe̱ Moisee̱ iskjíbé ni̱se̱e̱n kui cho̱o̱, kui xi chji̱a̱ni kui kjo̱a̱tjoó, ta̱nga xi tsoboaá kui, kó katsꞌénkꞌasꞌien xikótsꞌèn niꞌánkꞌasꞌien kui kjo̱a̱tjoó. Ngayeje kui nii̱ bo̱a̱ má katsꞌén, xikó má katsoó Néná nga atíxomaa̱.

Nga niꞌánkꞌasꞌien kjo̱a̱tjó kjo̱a̱a̱ nga boeꞌéxaá ngo xota̱

³⁰ Moisee̱ katsangijon to̱ko̱ Aaroo̱n ko̱jo jaá isti̱ xi nanginjon xotaa̱ nga boeꞌéxaá ko̱jo jín xí tikón nga̱soón ṉchandikoón. Kó ti̱ iskjitjónjón ńjño chináꞌmi xi ndyi̱yajá kui jaá nga.

³¹ Ngije kamá kui nii̱, Moisee̱ bi̱ katsoó: «Ti̱ꞌanchjánjnú yojo xi tsoboájnú jún, kó ki̱a̱ chi̱ni̱e̱jnú ki̱a̱ nínga bitjasꞌi̱e̱nnii̱ ndiꞌandikoón. Kó chi̱ni̱e̱tꞌajnú pan xi ndyi̱a̱ ni̱se̱nya̱á, kui xi niꞌánkꞌasꞌien nga boeꞌéxaá ngo xota̱.

³² Ngayeje ni xi kꞌo̱ngii̱, chjiéngá kꞌuití.

^33-35 »Kjiꞌanga si̱ꞌankꞌasꞌien kjo̱a̱tjó tsi̱ꞌe̱ nga ko̱e̱ꞌéxaá já chináꞌmii̱, chjiéngá yito ni̱xtjin ka̱ma kui nii̱, kó ngayeje kui ni̱xtjii̱n chjiéngá nga ki̱a̱ ku̱i̱ndyionjnú ki̱a̱ nínga bitjasꞌi̱e̱nnii̱ ndiꞌandikoón. Kó tsi̱ꞌe̱ nga ka̱matsjiejnú ngayejejnú, Néná jè atíxoma nga nga yito kui ni̱xtjii̱n nga bo̱a̱ si̱ꞌan xikó má kamá ngotꞌe̱. Ti̱ꞌankjatjosónjnú kui nii̱, kó ko̱yàjínjnú. Kuí bí kui kjo̱a̱botíxomaa̱ xi katsjána Néná».

³⁶ Kó Aaroo̱n ko̱jo jaá katsꞌénkjatjosón ngayeje ni xi Néná atíxomaa̱ Moisee̱ nga si̱ꞌan.