Lebitiko̱ 6 - Xo̱jo̱n eén Néná

Jé xí niꞌán kondraa̱ xota̱ xingi̱

^1-3 Néná ti̱ bi̱ ti̱ katsoó Moisee̱, kjo̱a̱a̱ ni xi sa̱ꞌín kjiꞌanga ngo xota̱ xi sa̱ꞌín ngo jé xí xikoó xi̱ꞌbi̱: «Tsi tjín jún xi xꞌi̱ṉcha̱jojnú ngo xota̱ Israee̱l kjiꞌanga ko̱ti̱ñájnúu̱ ngo ni, ko̱jo tsi ngiti̱ si̱ꞌankꞌasꞌienjínjnúu̱ tsi ngo ni katsꞌénkondajnú, ko̱jo tsi ngo ni íjñangijnú, kui xota̱ xi bo̱a̱ sa̱ꞌiín, án boá xi tsꞌénꞌboṉcha̱jona. Kó tsi tjín ni xi sa̱ꞌínchejeé, ko̱jo tsi kjo̱a̱ꞌáxín kjo̱a̱ꞌniuú ngo ni xi tsi̱ꞌe̱, kui xota̱ xi bo̱a̱ sa̱ꞌiín, án boá xi tjítsꞌénchéjéna. Kó tsi ngo ni xi kichajá sa̱ko̱ó, kó tsi ánjín xi kasakona ka̱tso̱, kui xota̱ xi bo̱a̱ sa̱ꞌiín, kondra̱ tsa̱ꞌa̱n nga tjítsꞌénjé. Ndatsi ngiboanéná nga bo̱a̱jín katsꞌen an tsi ka̱tso̱, ti̱ kuí xi si̱ꞌniéni jé.

^4-6 »Kjo̱a̱a̱ ngayeje kui nii̱, kui xi bo̱a̱ katsꞌeén chjiéngá tsja̱ꞌóyá nginí ni xi katsꞌénchejeé. Kuí má ni̱xtjin nga sa̱ꞌínkꞌasꞌien kjo̱a̱tjó nga ku̱i̱ꞌana kjo̱a̱niꞌánjetakón, kjiꞌá má nga sa̱ꞌínkꞌasꞌien ngayeje kui nii̱, kó chjiéngá ngi kan poxo̱ nga úchán ko̱ósoón. Kó ti̱ chjiéngá kjo̱joo̱ ngo cho̱tsa̱nga̱ xi jaꞌatji ndi̱ja̱a̱ xi nda chináꞌmii̱, ko̱jo tsi to̱n xikó tjín chjií kui cho̱o̱.

⁷ Chináꞌmii̱ boá xi sa̱ꞌínkꞌasꞌienna kui kjo̱a̱tjoó nganda tsi̱ꞌe̱ xota̱ xi katsꞌénjeé, kó án boá xi sa̱ꞌinjetakóo̱n jeé».

Kjo̱a̱tjó xi niꞌánkꞌasꞌien ndyiojón ndyiojón

⁸ Néná ti̱ bi̱ ti̱ katsoó Moisee̱ nga tsíchji̱a̱jo,

^9-13 tsi̱ꞌe̱ nga kui kjo̱a̱botíxomaa̱ xi tsja̱á já chináꞌmii̱: «Kjo̱a̱tjó xi kꞌuití nganda tsa̱ꞌa̱n, chjiéngá nga ngo ni̱xtji̱e̱e̱n kꞌuijñá ngi̱jii̱n ndiꞌií ṉchandikoón, ngaskande nga ku̱i̱ti̱ yeje. Chináꞌmii̱ ngatajá ńjñondioo̱ ko̱jo xkángíndieé xi ńjño lino̱ kamándanii̱, kó ngije jaꞌátikó ndisoo̱ kjo̱a̱tjó xi ikꞌítií, ki̱a̱ ngatꞌíndotꞌa ṉchandikoón. Jaskan ngije katsꞌén kui nii̱, nga tasíkjo ńjñoo̱, kó ngatjíjo̱ kui ndisoo̱ ki̱a̱ ngi̱ndie xi ta̱ xá tikónni ki̱a̱ ndi̱tsee̱n nínga síndo ndiꞌaa̱ xotaa̱. Xki̱ ta̱jñó xki̱ ta̱jñó já chináꞌmii̱ ku̱i̱ndyiá ngasee̱ chikín ndiꞌií, kó nga̱soón kui ndiꞌií ku̱i̱ꞌíjñá kui cho̱ xi kꞌuití nganda tsa̱ꞌa̱n, ki̱a̱ ngatꞌíndo xinieé kui cho̱o̱ xi kiniꞌánkꞌasꞌiee̱n, tsi̱ꞌe̱ nga chji̱a̱ꞌana nga nda ko̱jo nga tsjatsꞌèn kꞌuíndo xotaa̱. »Ndiꞌí ngáꞌeé ṉchandikoón chjiéngá ngatsjéni̱xtjin nga kꞌuítíngá, jmíni̱xtjin si̱ꞌankꞌo kui ndiꞌií.

¹⁴ »Kjiꞌanga sa̱ꞌínkꞌasꞌienna ngo kjo̱a̱tjó chináꞌmii̱ xi ni xi maxchá jno̱, chjiéngá kui nii̱ xi sa̱ꞌín:

¹⁵ Kui chináꞌmii̱ chjiéngá skjíbé ngo tji̱ngo̱ ndso̱ko̱a̱n ṉño̱paa̱n ko̱jo istii̱ ko̱jo ngayeje nisijee̱n, kó ki̱a̱ ku̱i̱ꞌítí nga̱són ṉchandikoón, tsi̱ꞌe̱ nga jún kjo̱a̱ꞌátsjienjnú nga án boá xi tsjajnúꞌun ngayeje nii̱. Kuí boá kui nii̱ xi ngo kjo̱a̱tjó xi sije̱n, xi si̱ꞌankꞌasꞌien nganda tsa̱ꞌa̱n.

^16-18 »Já chináꞌmii̱ boá xi skji̱ni̱e̱ ni xi kꞌo̱ngii̱ kui kjo̱a̱tjoó, ngatꞌa̱ kuí boá kui nii̱ xi ngatsjéni̱xtjin nga tsꞌéntsjàa̱. Kjiꞌanga sa̱ꞌínchján kui nii̱ ka̱májín ku̱i̱ndyiaá nisan, kó chjiéngá ki̱a̱ skji̱ni̱e̱ ndi̱tsee̱n ndiꞌandikoón, kui ngi̱ndie xi xá tikónni tsi̱ꞌe̱ nga ki̱a̱ skji̱ni̱e̱. Kuí boá kui nii̱ xi ngo kjo̱a̱tjó xi ndikón, xikoó kui kjo̱a̱tjó xi niꞌánkꞌasꞌien tsi̱ꞌe̱ nga niꞌánjetakón ngo jé. Tsi tjín ni xi ki̱a̱ si̱tꞌaa̱ kui kjo̱a̱tjoó, chjiéngá ndikón ka̱ma xikoó kui kjo̱a̱tjoó nga».

Kje̱ꞌe ngase kjo̱a̱tjó

¹⁹ Néná ti̱ bi̱ katsoó Moisee̱ nga atíxomaa̱ nga:

^20-23 «Kjiꞌanga Aaroo̱n ko̱jo xota̱ tji̱e̱ tsi̱ꞌe̱ ko̱e̱ꞌéxaá nga chináꞌmina ka̱ma, chjiéngá jó kilo̱ ndso̱ko̱a̱n ṉño̱pan sa̱ꞌínkjién nga sa̱ꞌínkꞌasꞌienna ngo kjo̱a̱tjó. Ngo kilo̱ sa̱ꞌínkꞌasꞌienna nga ta̱jño̱ó, kó xi ingo kiloo̱ nga kamángixoón sa̱ꞌínkꞌasꞌienna. »Kui kjo̱a̱tjó xi ndso̱ko̱a̱n ṉño̱paa̱n, chjiéngá tsie isti̱ ku̱i̱ndyiaa̱, kó ngo ngi̱ya sarte̱n si̱ꞌandayá, kó ku̱i̱chíyá nga si̱ꞌankꞌasꞌienna. Jaskan kꞌuití yeje, xikoó ngo kjo̱a̱tjó xi sije̱n. Kui kjo̱a̱tjoó, ka̱májín tjín xí skji̱ni̱e̱. »Kui kjo̱a̱kitii̱ jmíni̱xtjin sa̱síkjo».

Bi̱ tsꞌén si̱ꞌankꞌasꞌien kjo̱a̱tjó tsi̱ꞌe̱ nga si̱ꞌanjetakón jeé

²⁴ Néná ti̱ bi̱ katsoó Moisee̱ nga,

²⁵ tsi̱ꞌe̱ nga tsja̱á já chináꞌmii̱ kui kjo̱a̱botíxomaa̱: «Cho̱ xi si̱ꞌankꞌasꞌienjnúꞌun tsi̱ꞌe̱ nga chji̱a̱ꞌajnúꞌun kjo̱a̱niꞌánjetakoón jeé, chjiéngá ki̱a̱ si̱ꞌankꞌiénjnú ki̱a̱ ṉchandikónna, ki̱a̱ ngi̱ndie nínga ꞌbítína cho̱.

²⁶ Kui chináꞌmi xi sa̱ꞌínkꞌasꞌien kui kjo̱a̱tjoó, chjiéngá skji̱ni̱e̱ ngo tjín kuí kjo̱a̱tjoó ki̱a̱ ndi̱tsee̱n ndiꞌandikoón, ki̱a̱ nínga tikón kui ngi̱ndie xi ta̱ xá ki̱a̱ xi̱ni̱e̱ni.

^27-30 »Tsi tjín ni xi ki̱a̱ si̱tꞌaa̱ kui kjo̱a̱tjoó, chjiéngá ndikón ka̱ma, xikoó kui kjo̱a̱tjoó nga. »Tsi ngo ti̱jì si̱ꞌanchjányá yojoo̱ kui cho̱ xi si̱ꞌankꞌasꞌiee̱n, chjiéngá ko̱kjan kui ti̱ji̱í ngije kamá kui nii̱. Kó tsi ti̱jì xi ki̱cha̱ bronse̱ si̱ꞌanchjányá, kui ti̱ji̱í chjiéngá chjajoón ngi̱yaa̱, kósꞌe̱ ndáfoa ko̱niéyáni ngijee̱. »Tsi jiín kui cho̱o̱ skji̱jon ńjñoo̱ ngo kui já chináꞌmii̱, chjiéngá ko̱niéjón ki̱a̱ nínga katjonjón kui jiín, kó ki̱a̱ ko̱niéjón ngo ngi̱ndie xi ta̱ xá tikónni. »Tsi kui jiín ki̱a̱ kongínjo̱ ndiꞌandikoón tsi̱ꞌe̱ nga chji̱a̱ꞌa ngo kjo̱a̱niꞌánjetakón kjo̱a̱a̱ ngo jé, ka̱májín xi̱ni̱e̱ yojoo̱, chjiéngá kꞌuití. »Ndikón kuí kjo̱a̱tjoó, kó ta̱ chináꞌmii̱ tsí xi ka̱ma skji̱ni̱e̱ kui nii̱.