Lebitiko̱ 5 - Xo̱jo̱n eén Néná

Kje̱ꞌe ngase kjo̱a̱tjó xi niꞌánkꞌasꞌien tsi̱ꞌe̱ nga niꞌánjetakón jéná

^1-6 »Tsi tjín xí ko̱ndókjo̱a̱a̱ tsi̱ꞌe̱ nga chistiko̱ ka̱ma kjo̱a̱a̱ nga sꞌi̱nda ngo ni, kó tsi ka̱mamejénjiín ku̱i̱chji̱a̱ kjo̱a̱a̱ ni xi kamábe ko̱jo ni xi tsintꞌié, kui xota̱ xi̱ꞌba̱ tjítsꞌénjé, kó chjiéngá ka̱majeé. »Tsi tjín xí sa̱ꞌínjo̱ ngo cho̱ xi je kꞌien xi nijón sé, ko̱jo tsi cho̱ xi ꞌbifé yojoo̱ xi tsjiejín ngindyi̱ko̱n Néná, kui xi bo̱a̱ sa̱ꞌiín, sa̱ꞌínjé, kó chjiéngá xota̱ xi tsjiejín ka̱ma nga, ndatsi nde bejín ni xi katsꞌén. »Tsi tjín xí sa̱ꞌínjo̱ ngo ni xi ndándí xí jatjoo̱ yojoo̱ ngo xota̱, chjiéngá xota̱ xi tsjiejín ka̱ma nga, ndatsi nde bejín ni xi katsꞌén. Ngije sku̱i̱e̱ nga ndajínkjiꞌi ni xi katsꞌén, ka̱ma sꞌi̱nié ngo jé. »Tsi tjín xí ku̱i̱chji̱a̱ nga ngiboanéná katsó nga sa̱ꞌínkjatjosón ngo ni, tsi ndajín katsꞌénkjó nga bo̱a̱ katsó, kó tsi kamákjiín nga ndajínkjiꞌi ni xi katsó, ka̱ma sꞌi̱nié ngo jé. »Tsi tjín xí sa̱ꞌín ngo kui jeé, chjiéngá sa̱ꞌínkie yojoo̱ nga bo̱a̱ katsꞌén, kó ngatsꞌénkꞌásꞌiénna ngo kjo̱a̱tjó kjo̱a̱a̱ jé xí katsꞌén ngo tindso̱ chjo̱on, ko̱jo tsi ngo ndí chjo̱ón tindso̱. Kó chináꞌmii̱ kuí boá xi sa̱ꞌínkꞌasꞌien kui kjo̱a̱tjoó nganda tsi̱ꞌe̱ kui xi katsꞌénjeé, kó án sa̱ꞌinjetakóo̱n jeé.

^7-8 »Tsi xi katsꞌénjeé jmíjiín to̱n xi kꞌo̱tsieni ngo ndí tindso̱ chjo̱on, chjiéngá jó tójo ko̱jo tsi jó toṉña̱ xi ngatsꞌénkꞌásꞌiénna. Chináꞌmii̱ ngatjíjoo̱ nga jó kui cho̱o̱, kó chináꞌmii̱ ngo kui cho̱o̱ xi sa̱ꞌínkꞌasꞌienna tsi̱ꞌe̱ nga sa̱ꞌinjetakóo̱n jeé, kó xi ingo kui cho̱o̱ nganda tsa̱ꞌa̱n ngatꞌítí. Cho̱ xi tjoón nga kjítꞌósén, ta̱nga nga ꞌboxiékjojín to̱ko̱,

⁹ sꞌe̱ jaskan nga kjitjónjón chií jiín kui cho̱o̱ ki̱a̱ tꞌa ṉchandikoón, kó xi ngase jiín ki̱a̱ nga kjitjón ngindiee̱ nínga tikón kui ṉchaa̱n. Kuí boá kui nii̱ xi ngo kjo̱a̱tjó xi niꞌánkꞌasꞌien kjo̱a̱a̱ nga niꞌánjetakón jé.

¹⁰ Cho̱ xi ingoo̱, chináꞌmii̱ ngatꞌítí nganda tsa̱ꞌa̱n, xikótsꞌèn je atixoma an nga si̱ꞌan, tsi̱ꞌe̱ nga an sa̱ꞌinjetakóo̱n kui xi katsꞌénjeé.

^11-12 »Tsi kui xi katsꞌénjeé jmíjiín to̱n nga kꞌo̱tsieni jó tójo ko̱jo tsi jó toṉña̱, ka̱ma jó kilo̱ ndso̱ko̱a̱n ṉño̱pan xi nda sa̱ꞌínkꞌasꞌienna tsi̱ꞌe̱ nga sa̱ꞌinjetakóo̱n jeé. Kó chináꞌmii̱ ngatjíjoo̱, kó kui chináꞌmii̱ skjíbé ngo tji̱ngo̱ kui ndso̱ko̱a̱n ṉño̱paa̱n, kó ki̱a̱ ku̱i̱ꞌítí nga̱soón ṉchandikoón. Kó bo̱a̱ tsꞌén nga jún kjo̱a̱ꞌátsjienjnú nga án boá xi tsjajnúꞌun ngayeje nii̱. Kuí boá kui nii̱ xi ngo kjo̱a̱tjó xi niꞌánkꞌasꞌien kjo̱a̱a̱ nga niꞌánjetakón jé, kó nga jmí isti̱ ko̱jo nga jmí nisije̱n mindyiajínjnúu̱.

¹³ »Bo̱a̱ tsꞌén nga sa̱ꞌínkꞌasꞌien chináꞌmii̱ kui kjo̱a̱tjoó, tsi̱ꞌe̱ nga an sa̱ꞌinjetakóo̱n ta̱ꞌyaní xi katsꞌén ngo kui jeé. »Ni xi kꞌo̱ngii̱ kui kjo̱a̱tjoó, tsi̱ꞌe̱ chináꞌmii̱ ka̱ma, xikó niꞌaán nga niꞌánkꞌasꞌien ni xi maxchá jno̱o̱».

¹⁴ Néná ti̱ bi̱ ti̱ katsoó Moisee̱:

^15-16 «Tsi tjín xí nde bejín, kó ndajín tjítsꞌénjo̱na nga tjítsꞌénkꞌásꞌiénjín ni xi tsoboaá nga sa̱ꞌínkꞌasꞌienna, chjiéngá ngo cho̱tsa̱nga̱ xi jaꞌatji ndi̱ja̱a̱ xi nda sa̱ꞌínkꞌasꞌienna. Kó chináꞌmii̱ sa̱ꞌínkꞌasꞌienna kui cho̱o̱, kó an sa̱ꞌinjetakóo̱n kui xi ndajín katsꞌénjo̱na. Ta̱nga tsi kui xi mejeén, ka̱ma sa̱ꞌínkꞌasꞌienna ngo to̱n xikó kjiꞌi chjií kui cho̱o̱, kó ngi kan poxo̱ nga úchán ngatásoón xikó tjín chjií kui cho̱o̱, kó tsi̱ꞌe̱ chináꞌmii̱ ka̱ma kui to̱n xi̱ꞌba̱. Chjií kui cho̱o̱ ki̱a̱ xchísónnii̱ to̱n xi machjién ki̱a̱ ndiꞌandikoón.

¹⁷ »Tsi tjín xí nde bejín nga tsintꞌiéꞌénjínna, kó tsi sa̱ꞌínjé, chjiéngá ngo kjo̱a̱tjó sa̱ꞌínkꞌasꞌienna.

¹⁸ Chjiéngá kjo̱joo̱ chináꞌmii̱ ngo cho̱tsa̱nga̱ xi jaꞌatji ndi̱ja̱a̱ xi kui katsꞌénxchá, ko̱jo tsi to̱n xi kótjín chjií kui cho̱o̱. Bo̱a̱ tsꞌén nga sa̱ꞌínkꞌasꞌien chináꞌmii̱ kui kjo̱a̱tjoó nganda tsi̱ꞌe̱ kui xi katsꞌénjeé, kó án sa̱ꞌinjetakóo̱n jeé.

¹⁹ Kuí boá kui nii̱ xi ngo kjo̱a̱tjó xi niꞌánkꞌasꞌien kjo̱a̱a̱ nga niꞌánjetakón jé».