Lebitiko̱ 4 - Xo̱jo̱n eén Néná

Kjo̱a̱tjó xi si̱ꞌankꞌasꞌién tsi̱ꞌe̱ nga si̱ꞌanjetakónná jéná

¹ Néná bi̱ katsoó Moisee̱,

^2-13 tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Kjiꞌanga tjín xí jmí tsi xá ku̱i̱ntꞌiéꞌénjínna, chjiéngá kui nii̱ xi sa̱ꞌín: »Tsi ngito̱ko̱o̱ chináꞌmii̱ boá xi tsintꞌiéꞌénjínna, chjiéngá ngayeje xota̱ na̱xi̱ńdaá xi ko̱a̱ꞌa̱nijín kui jeé. Kó tsi̱ꞌe̱ nga sa̱ꞌinjetakóo̱n, kui ngito̱ko̱o̱ chináꞌmii̱ chjiéngá ngo ndií cho̱yojo sa̱ꞌínkꞌasꞌienna, ngo cho̱ xi nda. Ki̱a̱ ngatjíjo̱ nínga bitjasꞌi̱e̱nnii̱ ndiꞌandikoón, ngatꞌíjñasoón tsja to̱ko̱ kui cho̱o̱, kósꞌe̱ ki̱a̱ nga tsꞌenkꞌién nga̱són ṉchandikoón. Jaskan nga kjíbé jiín kui cho̱o̱, kó ki̱a̱ ngatjíjo̱ ngi̱yaa̱ kui ndiꞌandikoón, ngatsꞌénkꞌándyi̱ni xtín tsja kui jiín, kósꞌe̱ yito ndi̱yà nga kjitjónjón xtji̱e̱e̱n nínga tikón koxa̱a̱ kjo̱a̱ꞌbíndaa̱ Néná, nga̱xto̱n ńjño kortinaa̱ ngi̱ndie xi ꞌniú ndikoón. »Jaskan kui ngito̱ko̱o̱ chináꞌmii̱ ngatindyiá chií kui jiín ndyi̱ko̱n ṉchandikón nínga tí nisijee̱n, kó jín xí ngasee̱ ki̱a̱ nga kjitjón ngindiee̱ kui ṉchandikón xí tikón nínga bitjasꞌi̱e̱nnii̱ ndiꞌandikoón. Sꞌe̱ ngatjaꞌáxiín kui cho̱o̱ ngayeje ni xi ndyi̱a̱a̱ ngi̱ya nga̱tsꞌo̱a̱, xikó niꞌaán kui cho̱ xi niꞌánkꞌasꞌien nga chjiáꞌá kjo̱a̱a̱ nga nda ko̱jo nga tsjatsꞌèn mindyión, kó ki̱a̱ ngatꞌítí nga̱són ṉchandikoón. Kó ni xi kꞌo̱ngii̱ kui ndí cho̱yojo chichií, xikoó: tji̱xi̱ín, ngayeje yojoo̱, to̱ko̱, se, tsiꞌee̱, ko̱jo yeꞌee̱ kui cho̱o̱, ki̱a̱ ngatjíjo̱ ndi̱tsee̱n nínga síndo ndiꞌaa̱ xotaa̱, kó ki̱a̱ ngatꞌítí, ki̱a̱ nínga tikón ngi̱ndie nínga mindyia ndisoo̱. »Kó tsi ngayeje xota̱ na̱xi̱ńdaá boá xi tsintꞌiéꞌénjínna,

¹⁴ ngo ndií cho̱yojo xi nda xi ngatsꞌénkꞌásꞌiénna, kó bo̱a̱ tsí tsꞌén nga sa̱ꞌinjetakóo̱n jeé. »Ngayeje xota̱ na̱xi̱ńdaá ngatjíjo̱ kui ndií cho̱yojoo̱ nínga bitjasꞌi̱e̱nnii̱ ndiꞌandikoón,

¹⁵ kó xota̱ xi ngito̱ko̱o̱ ngatꞌíjñasoón tsja to̱ko̱ kui cho̱o̱, sꞌe̱ jaskan nga tsꞌenkꞌién kui cho̱o̱ ki̱a̱ nga̱són ṉchandikónna,

¹⁶ kó ngito̱ko̱o̱ já chináꞌmii̱ ngatjíjo̱ jiín kui cho̱o̱ ki̱a̱ ngi̱ya ndiꞌandikoón.

¹⁷ Kó ki̱a̱ ngatsꞌénkꞌándyi̱ni xtín tsja kui jiín, kósꞌe̱ yito ndi̱yà nga kjitjón xtji̱e̱e̱n nínga tikón ńjño kortinaa̱ ngi̱ndie xi ꞌniú ndikoón.

¹⁸ Jaskan ngatindyiá chií kui jiín ndyi̱ko̱n ṉchandikón nínga tí nisijee̱n, ki̱a̱ ngi̱ya ndiꞌandikoón, kó jín xí ngasee̱ ki̱a̱ nga kjitjónjón ngindiee̱ kui ṉchandikón xí tikón ki̱a̱ nínga bitjasꞌi̱e̱nni ki̱a̱ ndiꞌandikoón.

¹⁹ »Sꞌe̱ tji̱e̱nmá kui ngito̱ko̱o̱ já chináꞌmii̱ nga kjíbé ngayeje xinieé kui ndí cho̱yojo chichií, kó ki̱a̱ ngatꞌítí nga̱són ṉchandikoón,

^20-21 kó bo̱a̱ tsꞌén nga sa̱ꞌinjetakóo̱n jeé xota̱ na̱xi̱ńdaá. Nga fetꞌani chináꞌmii̱ kꞌo̱xiéni ki̱a̱ nínga síndo ndiꞌaa̱ xotaa̱ ngayeje ni xi ngasee̱ kui cho̱o̱, kó ki̱a̱ ngatꞌítí ki̱a̱ nínga tikón ngi̱ndie nínga mindyia ndisoo̱.

²² »Tsi ngito̱ko̱o̱ xota̱ na̱xi̱ńdaá boá xi ku̱i̱ntꞌiéꞌénjínna,

²³ ka̱ma kꞌuiyaá nga katsꞌénjé. Kósꞌe̱ kui ngito̱ko̱o̱ ngo tindso̱ xi nda sa̱ꞌínkꞌasꞌienna, tsi̱ꞌe̱ nga sa̱ꞌinjetakóo̱n jeé.

²⁴ Ngatꞌíjñasoón tsja to̱ko̱ kui cho̱o̱, kósꞌe̱ ki̱a̱ nga tsꞌenkꞌién tꞌa ṉchandikónna, ngatꞌa̱ kjo̱a̱tjó xi niꞌánkꞌasꞌien tsi̱ꞌe̱ nga si̱ꞌanjetakón jé boá.

²⁵ Jaskan chináꞌmii̱ ngatsꞌénkꞌándyi̱ni xtín tsja kui jiín tindsoo̱, kósꞌe̱ ngatindyiaá ndyi̱ko̱n kui ṉchandikoón, kó jín xí ngasee̱ ki̱a̱ nga kjitjónjón ngindiee̱ kui ṉchandikoón.

²⁶ Jaskan ngatꞌítí ngayeje xinieé kui cho̱o̱, xikó niꞌaán nga niꞌánkꞌasꞌien ngo kjo̱a̱tjó kjo̱a̱a̱ nga chjiáꞌá nga nda ko̱jo nga tsjatsꞌèn mindyión. Kó bo̱a̱ tsꞌén nga chináꞌmii̱ boá xi sa̱ꞌínkꞌasꞌien kui kjo̱a̱tjoó kjo̱a̱a̱ kui xota̱ xi katsꞌénjeé, kó án sa̱ꞌinjetakóo̱n jeé.

²⁷ »Tsi ngo xota̱ na̱xi̱ńdaá xi ku̱i̱ntꞌiéꞌénjínna,

²⁸ ka̱ma kꞌuiyaá nga katsꞌénjé. Kósꞌe̱ kui xotaa̱ chjiéngá ngo tindso̱ chjo̱on xí nda sa̱ꞌínkꞌasꞌienna.

²⁹ Ngatꞌíjñasoón tsja to̱ko̱ kui cho̱o̱, kósꞌe̱ ki̱a̱ nga tsꞌenkꞌién tꞌa ṉchandikónna.

³⁰ Chináꞌmii̱ ngatsꞌénkꞌándyi̱ni xtín tsja kui jiín tindso̱ chjo̱on, kósꞌe̱ ngatindyiaá ndyi̱ko̱n kui ṉchandikoón, kó jín xí ngasee̱ ki̱a̱ nga kjitjónjón ngindiee̱ kui ṉchandikoón.

³¹ Jaskan ngatꞌítí ngayeje xinieé kui cho̱o̱ nga̱són ṉchandikoón, xikó niꞌaán nga niꞌánkꞌasꞌien ngo kjo̱a̱tjó kjo̱a̱a̱ nga chjiáꞌá nga nda ko̱jo nga tsjatsꞌèn mindyión. Kó bo̱a̱ tsꞌén nga chináꞌmii̱ sa̱ꞌínkꞌasꞌien ngo kjo̱a̱tjó xi sije̱n kjo̱a̱a̱ kui xotaa̱, kó án sa̱ꞌinjetakóo̱n jeé.

³² »Tsi xi katsꞌénjeé ngo ndí chjo̱ón cho̱tsa̱nga̱ sa̱ꞌínkꞌasꞌienna, chjiéngá nda ka̱ma kui cho̱o̱.

³³ Ngatꞌíjñasoón tsja to̱ko̱ kui cho̱o̱, kósꞌe̱ ki̱a̱ nga tsꞌenkꞌién tꞌa ṉchandikónna.

³⁴ Chináꞌmii̱ ngatsꞌénkꞌándyi̱ni xtín tsja kui jiín tindso̱ chjo̱on, kósꞌe̱ ngatindyiaá ndyi̱ko̱n kui ṉchandikoón, kó jín xí ngasee̱ ki̱a̱ nga kjitjónjón ngindiee̱ kui ṉchandikoón.

³⁵ Jaskan ngatꞌítí ngayeje xinieé kui cho̱o̱ nga̱són ṉchandikoón, xikó niꞌaán nga niꞌánkꞌasꞌien ngo kjo̱a̱tjó kjo̱a̱a̱ nga chjiáꞌá nga nda ko̱jo nga tsjatsꞌèn mindyión, ko̱jo kjo̱a̱tjó xi niꞌánkꞌasꞌien nganda tsa̱ꞌa̱n. Kó bo̱a̱ tsꞌén nga chináꞌmii̱ sa̱ꞌínkꞌasꞌien ngo kjo̱a̱tjó kjo̱a̱a̱ kui xotaa̱, kó án sa̱ꞌinjetakóo̱n jeé.