Lebitiko̱ 3 - Xo̱jo̱n eén Néná

Kjo̱a̱tjó xi niꞌánkꞌasꞌien tsi̱ꞌe̱ nga nda kꞌuiéná ko̱jo nga nda ku̱i̱ndyión

¹ «Kjiꞌanga tjín xí mejeén ku̱i̱ꞌana nga nda kꞌuieé ko̱jo nga nda kꞌuijñá, chjiéngá ngo ndí chjo̱on ko̱jo tsi ndí xíꞌiín ngo cho̱yojo xi nda ngatsꞌénkꞌásꞌiénna.

² »Kui xi sa̱ꞌínkꞌasꞌien kui kjo̱a̱tjoó ngatꞌíjñasoón tsja to̱ko̱ kui cho̱o̱, kósꞌe̱ ki̱a̱ nga tsꞌenkꞌién nínga bitjasꞌi̱e̱nnii̱ ndiꞌandikoón. Jaskan já chináꞌmii̱ nga kjitjónjón jiín kui cho̱o̱ nga̱ndee̱ ṉchandikoón,

^3-5 kó ki̱a̱ kꞌuítísón kui nii̱: tsiꞌee̱, nga jó chjo̱ondáyaá, nga jó yojoyìtsꞌe̱n, ngo chikjan chi̱nga̱ndaa̱, ko̱jo xinié xí kjijon ngayeje kui nii̱. Kui kjo̱a̱tjoó ki̱a̱ nijan ngatꞌítí kjo̱a̱tjó xi niꞌánkꞌasꞌien xki̱ ta̱jño̱ó. Kuí boá kui nii̱ xi ngo kjo̱a̱tjó xi sije̱n, xi si̱ꞌankꞌasꞌien nganda tsa̱ꞌa̱n.

⁶ »Tsi tjín xí sa̱ꞌínkꞌasꞌienna ngo kjo̱a̱tjó xi ngo cho̱tsa̱nga̱ ko̱jo tsi ngo tindso̱, chjiéngá nga ngo cho̱ xi nda ngatama.

⁷ »Tsi tjín xí sa̱ꞌínkꞌasꞌienna nga kjo̱a̱tjó xi ngo ndií cho̱tsa̱nga̱,

⁸ chjiéngá tsja ku̱i̱ꞌíjñasoón to̱ko̱ kui cho̱o̱, kósꞌe̱ ki̱a̱ nga tsꞌenkꞌién nínga bitjasꞌi̱e̱nnii̱ ndiꞌandikoón. Sꞌe̱ jaskan já chináꞌmii̱ skjitjónjón jiín kui cho̱o̱ ki̱a̱ nga̱ndee̱ ṉchandikoón,

^9-11 kó ki̱a̱ nga̱soón ku̱i̱ꞌítí kui ni xi̱ꞌbi̱: tsiꞌee̱, nga jó chjo̱ondáyaá, nga jó yojoyìtsꞌe̱n, ngo chikjan chi̱nga̱ndaa̱, ko̱jo xinié xí kjijon ngayeje kui nii̱, ko̱jo ńtsꞌen. Kuí boá kui nii̱ xi nichinie, xi si̱ꞌankꞌasꞌien nganda tsa̱ꞌa̱n.

^12-13 »Tsi tjín xí sa̱ꞌínkꞌasꞌienna ngo kjo̱a̱tjó xi ngo tindso̱ chjo̱on, chjiéngá nga jó tsja ku̱i̱ꞌíjñasoón to̱ko̱ kui cho̱o̱, kósꞌe̱ ki̱a̱ nga tsꞌenkꞌién nínga bitjasꞌi̱e̱nnii̱ ndiꞌandikoón. Sꞌe̱ jaskan já chináꞌmii̱ skjitjónjón jiín kui cho̱o̱ ki̱a̱ nga̱ndee̱ ṉchandikoón,

^14-16 kó ki̱a̱ nga̱soón ku̱i̱ꞌítí kui ni xi̱ꞌbi̱: tsiꞌee̱, nga jó chjo̱ondáyaá, nga jó yojoyìtsꞌe̱n, ko̱jo chi̱nga̱ndaa̱, ko̱jo ngayeje xinié xí kjijon ngayeje kui nii̱. Kuí boá kui nii̱ xi nichinie xi sije̱n, xi si̱ꞌankꞌasꞌien nganda tsa̱ꞌa̱n.

¹⁷ »Nga jmíni̱xtjin chiniejnú xinié ko̱jo jín. Jmí ndasénjín ta̱ nínga tindyiónjnú, kui nii̱ kjo̱a̱kiti boá, kó chjiéngá si̱ꞌankjatjosónjnú ngatsjéni̱xtjin».