Lebitiko̱ 27 - Xo̱jo̱n eén Néná

Nga kjo̱tjoꞌa xota̱ xi chji̱a̱ni Néná

¹ Néná tsíchji̱a̱jo Moisee̱,

² tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Kjiꞌanga ngo xi mejeén sa̱ꞌíndé ngo xota̱ xi je Néná chji̱a̱ni,

³ chjiéngá bi̱ kjiꞌi ku̱i̱ꞌíchjí, xikótsꞌèn kichisoón chjií to̱ntiboa xi niꞌánkjién ki̱a̱ ndiꞌandikoón: Nga ngo nda̱ xi kan ngaskande ichítié ko̱jo tie noó, ichítié to̱ntiboa ku̱i̱ꞌíchjítáꞌín.

⁴ Nga ngo na̱ xi ti̱ bo̱a̱ ti̱ kjiꞌi noó, kantié to̱ntiboa ku̱i̱ꞌíchjítáꞌín.

⁵ Nga ngo nda̱ xi ún ngaskande kan noó, kan to̱ntiboa ku̱i̱ꞌíchjítáꞌín. Nga ngo na̱ xi ti̱ bo̱a̱ ti̱ kjiꞌi noó, tie to̱ntiboa ku̱i̱ꞌíchjítáꞌín.

⁶ Nga ngo ndí xíꞌín xí ngo saá ngaskande ún noó, ún to̱ntiboa ku̱i̱ꞌíchjítáꞌín. Nga ngo ndí chjo̱on xí ti̱ bo̱a̱ ti̱ kjiꞌi noó, ján to̱ntiboa ku̱i̱ꞌíchjítáꞌín.

⁷ Nga ngo xota̱ xi tsꞌatio ichítié ko̱jo tie noó, tjiꞌún to̱ntiboa ku̱i̱ꞌíchjítáꞌín. Nga ngo na̱ xi ti̱ bo̱a̱ ti̱ kjiꞌi noó, tie to̱ntiboa ku̱i̱ꞌíchjítáꞌín.

⁸ »Tsi kui xotaa̱ ta̱nisién ni̱ma̱ kó tsi jmíjiín kui to̱o̱n, ka̱má ko̱e̱je̱koo̱n chináꞌmii̱ tsi̱ꞌe̱ nga sa̱ꞌínkjaꞌajee̱n kui chjií, kó ngindie ngi̱chí ka̱ma ku̱i̱ꞌíchjí.

Nga chjábéꞌóyá nginí ni xi je kiniꞌánkꞌasꞌiee̱n Néná

⁹ »Cho̱ xi je ikꞌíjñátꞌaxín tsi̱ꞌe̱ nga an si̱ꞌankꞌasꞌienna xikoó ngo kjo̱a̱tjó ndikón xí tsa̱ꞌa̱n,

¹⁰ ka̱májín kje̱ꞌe cho̱ ko̱síkjoni, ngatꞌa̱ ngije kje̱ꞌe cho̱ akasíkjoni, nga jó kui cho̱o̱ jè an kiniꞌánkꞌasꞌienna.

¹¹ »Tsi kui cho̱ xi je ikꞌíjñátꞌaxiín ki̱a̱ tikón jaꞌeén xki̱ nínga kjitꞌa cho̱ xi tsjiejiín, chjiéngá chináꞌmii̱ kongínjoo̱,

¹² tsi̱ꞌe̱ nga kui ku̱i̱ꞌíjñaá ngo chjí. Kó kui chjií ka̱májín ko̱síkjo ngase,

¹³ kó tsi tjín xí ka̱mamejeén skjíbé nginí cho̱o̱, chjiéngá ngi kan nga úchán ko̱ósoón kui to̱n xi ku̱i̱ꞌíchjií, kjo̱a̱a̱ xikó tjín chjií kui cho̱o̱.

¹⁴ »Tsi tjín xí sa̱ꞌínkꞌasꞌienna ngo ndiꞌa, chináꞌmii̱ ku̱i̱ꞌíjñaá ngo chjí, kó kui chjií ka̱májín ko̱síkjo,

¹⁵ kó tsi tjín xí ka̱mamején nginií skjíbé ndiꞌaa̱, chjiéngá ngi kan nga úchán ko̱ósoón kui to̱n xi ku̱i̱ꞌíchjií, kjo̱a̱a̱ xikó tjín chjií kui ndiꞌaa̱.

¹⁶ »Tsi tjín xí sa̱ꞌínkꞌasꞌienna ngo tꞌanangi xi tsi̱ꞌe̱, chjií kui tꞌanangii̱ ki̱a̱ xchísónnii̱ xikó kjiꞌi ni sitji̱e̱, kó ichítié to̱ntiboa ka̱machjíní kjo̱a̱a̱ xki̱ jó úchán kilo̱ sebandaa̱ xi kꞌuítji̱e̱.

¹⁷ »Tsi kui xi sa̱ꞌínkꞌasꞌienna kui tꞌanangii̱, noó kjo̱a̱ndeé nga bo̱a̱ sa̱ꞌín, chjí xi je kisꞌindaa̱ ngiti̱ ka̱májín sa̱síkjo.

¹⁸ Ngije jaꞌa kui noó, chjií kui tꞌanangii̱ ki̱a̱ xchísónnii̱ xikó kjiꞌi nó chajaá nga kjo̱chó nginí noó kjo̱a̱ndeé.

¹⁹ »Tsi kui xi katsꞌénkꞌasꞌienna kui tꞌanangii̱ ka̱mamején nginií skjíbé, chjiéngá ngi kan nga úchán ko̱ósoón kui to̱n xi ku̱i̱ꞌíchjií, kjo̱a̱a̱ xikó tjín kisꞌinda chjií kui tꞌanangii̱.

²⁰ Ta̱nga chjiéngá ngindiee̱ nga kje̱ꞌe xí kꞌo̱tsie kui tꞌanangii̱ nga bo̱a̱ sa̱ꞌín, ngatꞌa̱ ngije kastiñá, jè ngiti̱ ka̱májín kꞌo̱tsie nginí kui.

²¹ Kjiꞌanga kui tꞌanangii̱ ka̱mandé noó kjo̱a̱ndeé, chjiéngá tsi̱ꞌe̱ chináꞌmii̱ ka̱ma, ngatꞌa̱ kui tꞌanangii̱ án boá xi kiniꞌánkꞌasꞌienna xikoó ngo kjo̱a̱tjó xi ndikón.

²² »Tsi tjín xí sa̱ꞌínkꞌasꞌienna ngo tꞌanangi xi jmí tsi xtín xota̱ ndiꞌaa̱ chji̱a̱ni, tsi kje̱ꞌe xota̱ xi tsꞌatsiee̱,

²³ chjiéngá chináꞌmii̱ ku̱i̱ꞌíxki̱ nó xí chaja ngasee̱ nga kjo̱chó noó kjo̱a̱ndeé, kó ti̱ kuii̱ ni̱xtjin ku̱i̱ꞌíchjí kui xotaa̱ kui chjí xí ku̱i̱ꞌa chináꞌmii̱.

²⁴ Kjiꞌanga kjo̱chó noó kjo̱a̱ndeé, kui tꞌanangii̱ kui tsi̱ꞌe̱ ka̱má nginí, kui xi tjón tsi̱ꞌe̱ kamaá.

²⁵ »Ngayeje kui chjií ki̱a̱ xchísónnii̱ chjií to̱ntiboa xi niꞌánkjién ki̱a̱ ndiꞌandikoón, kui xi tiengo ngramo̱ eé.

Ni xi niꞌin

²⁶ »Ngojín xi an sa̱ꞌínkꞌasꞌienna ndí tjoón cho̱yojoo̱ ko̱jo tsi cho̱tsa̱nga̱a̱, ngatꞌa̱ to̱kó tsa̱ꞌa̱n boá kui cho̱ xi tjoón.

²⁷ »Tsi kui cho̱ xi tjíniꞌánkꞌasꞌiee̱n ki̱a̱ kjitꞌa xki̱ nínga kjitꞌa ngayeje cho̱ xi tsjiejiín, ndi̱a̱a̱ kui cho̱o̱ ka̱má skjíbé nginí. Ta̱nga chjiéngá ngi kan nga úchán ko̱ósoón kui to̱n xi ku̱i̱ꞌíchjií, kjo̱a̱a̱ xikó tjín kisꞌinda chjií kui cho̱o̱. Tsi skjíbéjín nginí kui cho̱o̱ xi tsi̱ꞌe̱ mára kamaá, ka̱má stiñá xikó kjiꞌi kisꞌinda chjií.

²⁸ »Ngojín ni xi an je kiniꞌánkꞌasꞌienna xi ka̱ma sti̱ñá, ngatꞌa̱ ni ndikón boá kui nii̱. Xikónií tsi kui kjo̱a̱tjoó je kiniꞌánkjié nga bo̱a̱ ka̱ma.

²⁹ Ti̱ bo̱a̱ ti̱ kjiꞌinii̱ kui xota̱ xi je an ndyi̱tsꞌènxátꞌana nga.

^30-32 »Tie nga úchaán ngayeje ni xi ikꞌítji̱e̱jnú tꞌanangijnú, ko̱jo to xi tsjá yá tjiéjnú xi an tsoboána. Kó ti̱ tie nga úchaán cho̱yojo, ko̱jo cho̱tsa̱nga̱ xi niꞌánxchájnú xi an tsoboána nga. Xi ka̱mamejeén skjíbé nginí kui cho̱o̱, chjiéngá ngi kan nga úchán ko̱ósoón kui to̱n xi ku̱i̱ꞌíchjií, kjo̱a̱a̱ xikó tjín kisꞌinda chjií kui cho̱o̱.

³³ »Ngojín xi chjiéngá ka̱ma skjíbé cho̱ xi ndaa̱, kósꞌe̱ cho̱ xi ndajiín an sa̱ꞌínkꞌasꞌienna. Tsi bo̱a̱ ka̱ma, cho̱ xi ndaa̱ ko̱jo cho̱ xi ndajiín tsa̱ꞌa̱n ka̱ma, kó ngiti̱ ka̱májín sa̱ꞌíntsi̱ꞌe̱ nginí ngijee̱».

³⁴ Kuí bí kui kjo̱a̱botíxomaa̱ xi Néná katsjaá Moisee̱ tsi̱ꞌe̱ xota̱ Israee̱l, ki̱a̱ na̱xi̱ Sinaii̱.