Lebitiko̱ 26 - Xo̱jo̱n eén Néná

Kjo̱a̱niꞌánchikonñé xi sakoó xota̱ xi ntꞌiéꞌeén kjo̱a̱kitii̱

¹ »Ngata̱ niꞌándajínjnú ngayeje to̱ko̱ya ni xi ne kꞌuínjnúu̱, ti̱nde ngata̱ niꞌándikónjínjnú, ngatꞌa̱ án boá xi Nejnú an.

² »Cha̱ndikónjnú ndiꞌandikónna, kó ti̱ꞌankjaꞌyájnú ni̱xtjin xotoo̱. Án boá xi Nee̱ xota̱ Israee̱l.

³ »Ti̱ꞌankjatjosón kixi̱ kixi̱jnú kjo̱a̱botíxomana,

⁴ kó án boá xi sangiyájnúꞌun kuí má ni̱xtjii̱n stseé, tsi̱ꞌe̱ nga nda ka̱ma ni xi maxchaá tꞌanangijnú, ko̱jo nga ko̱a̱ja̱a̱ to yá xí kꞌuítji̱e̱jnú.

⁵ Ta̱nisién tsie ka̱ma ni xi ka̱maxchájnú nga ngaskande nde xcha̱jínjnú ni xi si̱ꞌánjnúu̱ kui nii̱. Xi̱ni̱e̱jnú kui nii̱, ngaskande nga nda stsi̱e̱jnú, kó nda tsꞌén ku̱i̱ndyionjnú.

^6-8 »Án boá xi sa̱ꞌin an nga xió ko̱jo nga nda tsꞌén ku̱i̱ndyionjnú. Chjiénjín nga ko̱nda̱konjnú cho̱ xi tamaá, ti̱nde ngata̱ ndakonjínmájnú kondra̱jnú, ngatꞌa̱ nde niꞌínjín ka̱majnú nga si̱ꞌánjnúu̱: Ta̱ ún tsí jún xi ka̱manii̱ nga ko̱ngandikónjnú úchán xota̱, kó ta̱ úchán tsi jún xi ka̱manii̱ nga ko̱ngandikónjnú tie mi̱ xota̱.

⁹ »Án boá xi sa̱ꞌinkjatjosón an ngayeje ni xi je kixiyatjónjnúꞌun nga sa̱ꞌin an. Achichí tjó sa̱ꞌinjo̱jnúꞌun nga ngaskande achichí ꞌniú ka̱ma xota̱ na̱xi̱ńdájnú.

¹⁰ Achichí ni xi ka̱maxchájnú, nga ngaskande ko̱ꞌna̱xiéjnú ni xi kamáxchájnú xi xchá xi je kachjaꞌátjójnú, tsi̱ꞌe̱ nga ni xi sꞌe̱ kjimaxchaá xi chja̱ꞌátjójnú ngijee̱.

^11-12 »Án boá xi kjótsoꞌbájo̱jnúꞌun ta̱ nínga kongínjnú, kó ki̱a̱ kotíjña̱ an ki̱a̱ ndiꞌandikón xi je kiniꞌándajnúꞌun, kó jmíni̱xtjin nga chꞌo tsꞌén skotsijenjnúꞌun. Jún boá xi xota̱ na̱xi̱ńdána jún, kó án boá xi Nejnú an.

¹³ Án boá xi Nee̱ xota̱ Israee̱l. Án boá xi tsꞌaxiéjnúꞌun nangi Ejipto̱, kó án boá xi katsꞌendéjnúꞌun. Chjiéngá tsja ngatamajnú kui nii̱, ngatꞌa̱ nginijánjín moso̱ xi stiñá ka̱má nginíjnú.

Kjo̱a̱botíjé xí sa̱ko̱ó xota̱ xi ntꞌiéꞌénjiín

^14-15 »Ta̱nga tsi si̱ꞌankjatjosónjínjnú kjo̱a̱kitina, kó tsi ta̱sá ko̱nda̱ꞌyáꞌénjínjnúꞌun, kó tsi si̱ꞌankjatjosónjínjnú ni xi je índa an,

^16-17 achichí ꞌniú kotijéjnúꞌun, kó kuí nii̱ xi sa̱ꞌínkjiéjnú. Sangiyájnúꞌun chiꞌin xi ngiti̱ ka̱mandayajínjnú, ko̱jo ngo ṉtꞌe̱ xi sa̱ꞌínti̱ka̱jnú, ko̱jo xi sa̱ꞌínkjié ngaꞌniújnú. Kó an kjo̱tja̱xíntꞌajnúꞌun tsi̱ꞌe̱ nga kondra̱jnú sa̱ꞌínkjiéjnú, kó kuí xota̱ kondraa̱ xi skji̱ni̱e̱ ni xi je ikꞌítji̱e̱jnú. Ta̱ ko̱nda̱ꞌyá tsíjnú nga kui kondraa̱ je ndibá kjánjo̱jnú, kó jún ta̱tra ku̱i̱yòjnú.

¹⁸ »Kó tsi ndatsi bo̱a̱ tsꞌén to̱kó ko̱nda̱ꞌyáꞌénjínjnúꞌun, achichí ꞌniú kotijéjnúꞌun kjo̱a̱a̱ nga ngo nga ngo jé xi je kiniꞌánjnú,

¹⁹ ngaskande ngije ni̱ma̱kjo̱a̱ katsꞌenkꞌíndojnúꞌun. Kó ngiti̱ jmí stsé sangiyajín an. Nkꞌa jàn ngaskande xikó maá tsi ki̱cha̱ ka̱ma, kó nga̱són tꞌanangi nínga mińtja̱jnú xikó maá tsi ki̱cha̱ kobre̱ ka̱ma.

²⁰ Ta̱ kjo̱a̱ndaní nga si̱ꞌanxájin ngasejnú tꞌanangii̱, ngatꞌa̱ ngiti̱ jmí ni ka̱maxchájiín.

²¹ »Kó tsi to̱kó an ndyi̱niꞌánxchánjo̱jnúꞌun, tsie ngase sa̱ꞌinjéjnúꞌun xikó kjiꞌi tsoboaá jé xí kiniꞌánjnú.

²² Tsjandiè an nga cho̱ xi tamaá skji̱ni̱e̱jnú, ko̱jo nga skji̱ni̱e̱ ndíjnú nga, ko̱jo cho̱yojojnú. Xota̱ xi kꞌuíndo ngasee̱ jè ta̱ chiboa tsí ka̱ma, nga ngaskande ndi̱ya̱à sꞌi̱tiya.

²³ »Kó tsi to̱kó bo̱a̱ tsꞌén nga kitikjo̱a̱ ngase ka̱majnú,

²⁴ tsie ngase sa̱ꞌinjéjnúꞌun xikó kjiꞌi tsoboaá jé xí kiniꞌánjnú.

²⁵ Án boá xi sa̱ꞌin an nga ko̱yàjnú ngi̱jii̱n kjo̱a̱xcha̱án, xikoó tsi ngo kjo̱a̱botíjé kjo̱a̱a̱ nga kiniꞌánkjatjosónjínjnú kjo̱a̱ꞌbíndana. Ngaskande ku̱i̱yòmájnú nga konginkíndyiónꞌmájnú na̱xi̱ńdájnú, ta̱nga án boá xi sangiyájnúꞌun chiꞌin xi ta̱nisién ꞌniú, kó án boá xi sa̱ꞌin an, nga ngi̱ya tsja kondra̱jnú kꞌo̱kayàjnú.

²⁶ Kó ngiti̱ jmí nichinie tsjajínjnúꞌun. Ta̱ chiboa tsí nichinie kꞌuié, nga ngaskande ngo orjno̱ chichí tie tsí ínchjín sa̱ꞌínchján pan. ¡Nde ngo pan sa̱ꞌíntsiejínjnú!

²⁷ »Kó tsi to̱kó bo̱a̱ tsꞌén nga ndaꞌyáꞌénjínjnúꞌun,

²⁸ án má xi skjanjo̱jnúꞌun, kó tsie ngase kotijéjnúꞌun xikó kjiꞌi tsoboaá jé xí kiniꞌánjnú.

²⁹ ¡Ngaskande nga ndí xí xi̱ꞌinjnú ko̱jo tsi ndí xí ínchjínjnú xi̱ni̱e̱jnú!

³⁰ Án boá xi kokojnúꞌun nga je chꞌóna jún, nga sa̱ꞌinkjatsón án ndí na̱ngo̱xi̱ xi síndo nínga tji̱ngi̱i̱, sa̱ꞌinkjatsón án ṉchanjnú, kó ki̱a̱ kꞌuíndotikó án yojo kꞌienjnú nga̱soón nínga síndo kui ni xi ne ndyi̱ꞌmìjnúu̱.

³¹ »Án boá xi sa̱ꞌinkjatsón án na̱xi̱ńdáꞌniújnú. Sa̱ꞌinkjatsón án ndiꞌandikónjnú, kó ngiti̱ skjíbéjín an nda̱ sije̱e̱n kjo̱a̱tjójnú.

^32-33 Ngayeje na̱xi̱ńdájnú kꞌuijñá tiya, kó na̱xi̱ńdáꞌniuú kjo̱tsòn yeje, ngatꞌa̱ kjoyandsa̱ má an ki̱cha̱ndojoó nga kongatji̱ngijnúꞌun, kó ki̱a̱ ku̱i̱yòjnú nínga síndo na̱xi̱ńdá xí síndotꞌajnú. ¡Ngaskande kondra̱jnú ta̱ bi̱ ta̱ ka̱maa̱ nga sku̱i̱e̱jnú!

^34-35 Tji̱e̱nga tꞌanangii̱ kꞌuijñá tiya, sa̱ꞌínkjaꞌyá, xikó má kamá xki̱ yito nó katsaki, kjiꞌanga ki̱a̱ kixindyionjnú. Bo̱a̱ tsí tsꞌén nga ka̱maa̱ sa̱ꞌínkjaꞌyá. Kó tji̱e̱nga jún ki̱a̱ stso̱jo̱boájnú na̱xi̱ńdaá xota̱ xi kondra̱jnú.

³⁶ Kó kui xi kꞌuíndo ngasee̱, achichí ꞌniú kuindyiandikóo̱n ki̱a̱ nangii̱ kondraa̱ nínga síndo. Kó nga ku̱i̱ntꞌie̱é nga kꞌo̱ka ngo xka̱a̱ ngo yá, ko̱ngandikón xikótsꞌèn monga ngo xi ki̱cha̱ndojó tjimíyotji̱nginii̱, ¡ku̱i̱xo̱ kui xotaa̱ ndatsi jmíjín xi ndyi̱mongatji̱ngii̱!

³⁷ Ja̱kꞌi̱e̱ ja̱ngaján tsja̱nié xkjín nga ko̱nga, kó ka̱májín kón nga skjánjo̱ kondraa̱.

^38-40 »Jún ska̱niejnú jé xí katsꞌén xi xchájnú, ko̱jo jé xí kiniꞌánjnú jún. ¡Xín nangi ko̱yàjnú, kó kondra̱jnú boá xi sa̱ꞌínkꞌiénjnú! Kósꞌe̱ kjiꞌá boá nga si̱ꞌankiejnú yojojnú nga án boá xi ikixkánjo̱jnúꞌun.

⁴¹ Ngotꞌe̱ ꞌne̱ xota̱ kitikjo̱a̱ boá jún, kó bo̱a̱ niꞌánjnú xikoó xota̱ na̱xi̱ńdá xí sꞌijinjiín an, ta̱nga kjiꞌá boá nga ni̱ma̱kjo̱a̱ ka̱majnú, kó si̱ꞌanjo̱ꞌojnú kjo̱a̱botíjé xí tsoboájnú kjo̱a̱a̱ ni xi ndajín xi kiniꞌánjnú.

⁴² »Án boá xi sa̱ꞌinkjatjosón an ni xi kixiyatjóo̱n Abraa̱n, ko̱jo Isaa̱, ko̱jo Jakoo̱b, kó sa̱ꞌinchikonñé an tꞌanangi xi je kixian an nga tsjajnúꞌun,

⁴³ kui tꞌanangi xi jún kꞌuijñámasienjnú, kui tꞌanangi xi je nda katsꞌénkjaꞌyaá. ¡Ta̱nga jún ko̱ti̱jéjnú kjo̱a̱a̱ ni xi ndajín xi kiniꞌánjnú, ko̱jo kjo̱a̱a̱ nga kiniꞌánkjatjosónjínjnú kjo̱a̱botíxomana!

^44-45 Kó ndatsi ngo na̱xi̱ńdá xi tsi̱ꞌe̱ kondra̱jnú ku̱i̱ndyionjnú, jmí tsi sa̱ꞌinkjié kjin kjinjnúꞌun. Ki̱a̱jín kjin fochó kjo̱a̱xchánna. Án boá xi Nee̱ xota̱ Israee̱l, kó sa̱ꞌintja̱tsi̱e̱ya nginí an ni xi indajo̱ an xota̱ xi xchájnú, kjiꞌanga tsꞌaxié an nangi Ejipto̱, tsi̱ꞌe̱ nga an kamá an Nee̱. ¡Kui nii̱ xi kamábe ngayeje xota̱ na̱xi̱ńdaá!»

⁴⁶ Kuí bí kui kjo̱a̱kitii̱ xi Néná katsjaá Moisee̱ tsi̱ꞌe̱ nga ñá sa̱ꞌínkꞌasꞌienná, kjiꞌanga kisꞌijña ki̱a̱ na̱xi̱ Sinaii̱.