Lebitiko̱ 25 - Xo̱jo̱n eén Néná

Nó xí ma yitoo̱ nga tsꞌénkjaꞌyá tꞌanangii̱

¹ Néná tsíchji̱a̱jo nginí Moisee̱ ki̱a̱ na̱xi̱ Sinaii̱,

² tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Kjiꞌanga ku̱i̱tjásꞌi̱e̱njnú tꞌanangi xi tsjajnúꞌun, tꞌanangii̱ chjiéngá ngo nó sa̱ꞌínkjaꞌyá nganda tsa̱ꞌa̱n.

³ Jun nó nga ka̱ma kꞌuítji̱e̱jnú ni tꞌanangijnú, ka̱ma ku̱i̱chátꞌajnú xtjieé ńꞌniuú tostsi̱jè xí tjitjíe̱njnú, ko̱jo ka̱ma ku̱i̱chájnú tostsi̱je̱è,

^4-7 ta̱nga nga kjo̱chó nó xí yitoo̱, ka̱májín kꞌuítji̱e̱jnú ni tꞌanangijnú, ti̱nde ka̱májín ku̱i̱chájnú xtjieé ńꞌniuú tostsi̱jè xí tjitjíe̱njnú, ti̱nde ka̱májín ku̱i̱chájnú ni xi tjitjíe̱njnú tꞌanangijnú, ti̱nde ka̱májín ku̱i̱chájnú tostsi̱jè xi ko̱a̱ja̱ nga fetꞌanii̱. »Ni xi kjo̱a̱ꞌá soboaá tꞌanangii̱ nga kjo̱chó nó xí yitoo̱, kjo̱chóꞌá tsi̱ꞌe̱ nga xi̱ni̱e̱jnú jún, ko̱jo moso̱jnú, ko̱jo xota̱ xi tsꞌénxájnú, ko̱jo xota̱ xi xín nangi chji̱a̱ni xi síndo kui na̱xi̱ńdaá, ko̱jo cho̱ xi ndyi̱ꞌbítji̱e̱jnú, ko̱jo cho̱ tamá xí tjín kuí ngi̱ndiee̱ nga. Kó bo̱a̱ tsꞌén nga tꞌanangii̱ ngo nó sa̱ꞌínkjaꞌyá nganda tsa̱ꞌa̱n.

Noó kjo̱a̱ndeé

^8-13 »Kó ti̱ chjiéngá ko̱ꞌna̱xiéjnú ngo xki̱, nínga yito ndi̱yà nga yito nó kꞌuijñaá, kó chjiéngá yichán nijan nó ka̱ma, kósꞌe̱ nó xí ingoo̱, kui xi nó ichítieé, kuí boá xi̱ꞌba̱ xi noó kjo̱a̱ndeé ka̱ma. Ni̱xtjin tiee̱ sá xí ꞌmí Etanii̱n tsi̱ꞌe̱ kui noó, kuí boá xi ni̱xtjin nga sa̱ꞌinjetakón an jeé, kó chjiéngá si̱ꞌankjaniéjnú tjio ngayeje na̱xi̱ńdaá, kó kui tjioo̱ xi ka̱tso̱yaa̱ xotaa̱ nga kuí boá kui noó xi noó kjo̱a̱ndeé. Kó kui noó, xota̱ xi je kichajá ni xi kisꞌiee̱ tsi atíñá, ka̱ma tsi̱ꞌe̱ ka̱ma nginí, kó kui moso̱ xi kitsꞌítsieé, ka̱mandé, kó ka̱ma ko̱e̱je̱kon nginií xota̱ xkjín. »Nó ichítieé ka̱májín si̱ꞌanxájin tꞌanangii̱, ta̱kuítsí ni xi tsja̱á tꞌanangii̱ xi ka̱ma xi̱ni̱e̱jnú.

¹⁴ »Tsi̱ꞌe̱ nga ngojín xota̱ xi kꞌo̱ṉcha̱ kjiꞌanga ngo tꞌanangi kꞌo̱tsie ko̱jo tsi ko̱tíñá,

^15-16 chjiéngá chjií kui tꞌanangii̱ ki̱a̱ chjábénií kótjín ndi̱yà ka̱ma kꞌuítji̱e̱ ni kui tꞌanangii̱ ngaskande nga kjo̱chó nginí nó xi ingo nga ka̱mandeé.

¹⁷ »Ngata̱ ngojín xi ꞌboṉcha̱jo xkjín, cha̱ndikónjnúꞌun. Án boá xi Nee̱ xota̱ Israee̱l.

¹⁸ Tsi ko̱nda̱ꞌyáꞌénjnúu̱ kjo̱a̱kitina, kó tsi si̱ꞌankjatjosónjnú kjo̱a̱botíxomana, nda ku̱i̱ndyionjnú kui na̱xi̱ńdaá,

¹⁹ kó tꞌanangii̱ tsja̱ajnú to xi kꞌuítji̱e̱jnú, kó jún ka̱ma xi̱ni̱e̱jnú ngaskande nga nda stsi̱e̱jnú.

Néná katsóyàtjón nga sa̱ꞌínchikonñé xota̱ na̱xi̱ńdaá

²⁰ »Bi̱ra̱ ndyi̱ꞌmìjnú: “Kó mí ni xi xi̱ni̱e̱ nó xí ma yitoo̱, tsi ka̱májín kꞌuítji̱e̱ ni, kó ti̱nde ka̱májín chja̱ꞌátikó cha̱a̱n ni tjieé.”

²¹ Ja̱ bi̱ sa̱ꞌin an, nó xí ma juu̱n, tsie sa̱ꞌinchikonñéjnúꞌun, nga ngaskande ka̱ma xi̱ni̱e̱jnú ngi ján nó ngase kui ni xi chja̱ꞌátikójnú.

²² Kó bo̱a̱ tsꞌén nga nó xí ma jii̱n, tji̱e̱nga jún ndyi̱ꞌbítji̱e̱jnú ni tjié, ka̱ma xi̱ni̱e̱jnú ni xi kachjaꞌáꞌtikójnú, kó kachjaꞌátjójnú. Kó ti̱ bo̱a̱ ti̱ ka̱ma nó xí ma nijaa̱n nga, tji̱e̱nga kjo̱chó ni̱xtjin nga chja̱ꞌátikójnú cha̱a̱n ni xi sꞌe̱ ikꞌítji̱e̱jnú.

Nga tsi̱ꞌe̱ ka̱má nginí xi atíñá ngo xoꞌba

²³ »Ngojín xi ka̱ma ko̱tíñá kjin kjin ni xi tsi̱ꞌe̱ xkjín. Án boá xi tsa̱ꞌa̱n tꞌanangii̱. Jún boá xota̱ xi síndo ndiꞌana, kó ta̱ ngotjón tsí nga tindyiónjnú ki̱a̱a̱.

²⁴ »Tsi tjín xí kꞌo̱tsie ngo tꞌanangi, ngataꞌa xki̱ nga kui xi atíñá kui tꞌanangii̱ tjínrií kjo̱a̱nda nga ka̱ma tsi̱ꞌe̱ ka̱má nginí.

²⁵ »Tsi ngo xota̱ Israee̱l xi ka̱mani̱ma̱ nga ngiti̱ jmí ni kꞌuiéjiín, kó tsi kꞌuieé ngo kjo̱a̱ꞌniú nga ko̱tíñá tꞌanangii̱, ngo xota̱ xi xkjín xi ꞌniú tiñanii̱ tjínrií kjo̱a̱nda, nga ka̱maa̱ skjántjé kui tꞌanangii̱, tsi̱ꞌe̱ nga ka̱má tsi̱ꞌe̱ ka̱má nginí kui xi tsi̱ꞌe̱ kamá kui tꞌanangii̱.

²⁶ Tsi jmíjiín xota̱ xi xkjín xi ꞌniú tiña manii̱, kó tsi sa̱kó nginií to̱n, ka̱má sa̱ꞌíntsi̱ꞌe̱ nginí kui tꞌanangii̱,

²⁷ ta̱nga chjiéngá ku̱i̱ꞌíxki̱ kótjín ndi̱yà ka̱maxchá ngasee̱ ni tjié, ngaskande nga kjo̱chó ni̱xtjii̱n nó ndeé, kó bo̱a̱ kjiꞌi nga kosoón xikó kjiꞌi ku̱i̱ꞌíchjí kuí tꞌanangii̱.

²⁸ »Tsi xi atíñá kui tꞌanangii̱ jmíjiín to̱n tsi̱ꞌe̱ nga ku̱i̱ꞌíchjí, kui xi tsꞌatsiee̱ to̱kó kuí tsi̱ꞌe̱ ka̱ma kui tꞌanangii̱ ngaskande nga kjo̱chó nó ndeé. Kó kui noó, kjiꞌá boá nga ka̱mandé kuí tꞌanangii̱, kó kui xi tjón kamá tsi̱ꞌe̱, kui tsi̱ꞌe̱ ka̱má nginí.

Nga tsi̱ꞌe̱ ka̱má nginí xi atíñá ngo ndiꞌa

²⁹ »Tsi tjín xí ko̱tíñá ngo ndiꞌa xi kamánda ngi̱yaa̱ nínga tjíchjáꞌyáni ngo na̱xi̱ńdá, ngo tsí nó tikoón nga ka̱ma kꞌo̱tsie nginí kui ndiꞌaa̱.

³⁰ Tsi ngije jaꞌa kui noó, kó kamájín tsꞌatsie nginí, kui ndiꞌaa̱ ngiti̱ ko̱e̱ꞌéꞌoyájiín nga kjo̱chó noó kjo̱a̱ndeé, kó kui xi tsꞌatsiee̱ jè kuí tsi̱ꞌe̱ ndi̱yà ko̱jo xota̱ tji̱e̱e̱ ka̱ma.

³¹ »Kó kjo̱a̱a̱ ndiꞌa xi kamánda ndi̱tsee̱n kui na̱xi̱ńdaá, ti̱ bo̱a̱ ti̱ si̱ꞌaa̱n xikoó tꞌanangii̱: Ka̱ma tsi̱ꞌe̱ ka̱má nginí kui xi tjón atíñaá, kjiꞌanga kjo̱chó noó kjo̱a̱ndeé.

Ni xi kisꞌiee̱ xota̱ tji̱e̱e̱ Lebii̱

³² »Xota̱ tji̱e̱e̱ Lebii̱ ka̱ma kꞌo̱tsie nginí ta̱ kjiꞌání ndiꞌa xi katsꞌénda ki̱a̱ na̱xi̱ńdá nínga síndo.

³³ Tsi tjín kuí xotaa̱ xi ngiti̱ ka̱májín kꞌo̱tsie nginí, ka̱ma kui tsi̱ꞌe̱ ka̱má nginí kjiꞌanga kjo̱chó noó kjo̱a̱ndeé.

³⁴ Ngayeje tꞌanangi xi jaꞌatjiyajonnii̱ na̱xi̱ńdá nínga síndo xota̱ tji̱e̱e̱ Lebii̱, jmíni̱xtjin ka̱ma stiñá, ngatꞌa̱ kuí tsi̱ꞌe̱ kui tꞌanangii̱ ngatsjéni̱xtjin.

Nda ti̱ꞌanjo̱jnú xota̱ xi ni̱ma̱ nga jmí to̱njiín

³⁵ »Kjiꞌanga ngo xota̱ Israee̱l xi ka̱mani̱ma̱ nga jmí to̱njiín, chjiéngá ko̱si̱ko̱jójnú, xikoó tsi ngo xota̱ xi xín nangi chji̱a̱ni xi ki̱a̱ jachókꞌíjñá kui na̱xi̱ńdaá.

^36-37 Tsi ngo to̱n si̱ꞌankíyájnúu̱, ngata̱ jmí ndyi̱ko̱n chjaꞌáchjíjínjnúu̱, tsi nichinie ko̱e̱ꞌéjnúu̱, nga jmí tsi kjo̱a̱a̱ nga to̱n si̱ꞌánjnú nga bo̱a̱ si̱ꞌánjnú. Cha̱ndikónjnúꞌun, kó te̱ꞌéndièjnúu̱ kui xotaa̱ nga ki̱a̱ kꞌuijñájinjnú.

³⁸ Án boá xi tsꞌaxiéjnúꞌun nangi Ejipto̱ tsi̱ꞌe̱ nga katsjajnúꞌun nangi Kanaa̱n, kó ko̱jo tsi̱ꞌe̱ nga an xi kamá an Nejnú. Án boá xi Nee̱ xota̱ Israee̱l.

Xota̱ moso̱ xi chji̱a̱ni Israee̱l

³⁹ »Tsi ngo xota̱ Israee̱l xi ka̱mani̱ma̱ kjin kjin nga jmí to̱njiín, kó tsi tsi̱ꞌe̱ nga kꞌuijñá ngase, moso̱ xi stiñá sa̱ꞌín yojoo̱, nda ti̱ꞌanjo̱jnú.

⁴⁰ Kuí boá xi mosoo̱ ndi̱a̱a̱ ka̱ma, kó xá xí tsi̱ꞌe̱ ndi̱a̱a̱ boá xi sa̱ꞌín, kó ki̱a̱ kꞌuijñá ndiꞌaa̱, kó ngaskande tsí nga kjo̱chó noó kjo̱a̱ndeé nga ka̱ma sa̱ꞌínxájo̱.

⁴¹ Kui noó kjo̱a̱ndeé ka̱ma kꞌuijñándé, kó kui ko̱jo ndií ka̱ma ko̱e̱je̱kꞌíndojo̱ nginí xkjín ko̱jo tsi ki̱a̱ ko̱e̱je̱kꞌíjñá nginí tꞌanangi xi kamá tsi̱ꞌe̱.

⁴² Án tsa̱ꞌa̱n xota̱ Israee̱l. Ka̱májín moso̱ xi stiñá ka̱ma, ngatꞌa̱ jè moso̱ kamá ki̱a̱ nangi Ejipto̱, kó án boá xi je katsꞌendé án.

⁴³ »Nda ti̱ꞌanjo̱jnú ngayeje xota̱ Israee̱l. Cha̱ndikónjnúꞌun.

Moso̱ xi stiñá xi xín nangi chji̱a̱ni

⁴⁴ »Tsi mejénjnú kꞌuiéjnú moso̱ xi stiñá, ki̱a̱ tsꞌi̱tsiéjnú ki̱a̱ na̱xi̱ńdá xi tiñanii̱ nangi nínga tindyiónjnú,

^45-46 ko̱jo tsi ngi̱jii̱n ndií xota̱ xi xín nangi xi katsen ki̱a̱ na̱xi̱ńdájnú xi ki̱a̱ síndojinjnú. Kui xotaa̱ ka̱ma moso̱jnú ka̱ma, kó ngaskande ndíjnú ka̱ma kꞌuíndojnúu̱ kui mosoo̱ ngije ngiti̱ jmíjínjnú. Ta̱nga nda ti̱ꞌanjo̱jnú ngayeje xota̱ Israee̱l.

Kjo̱a̱ndeé moso̱ xi stiñá xi xota̱ Israee̱l

⁴⁷ »Tsi tjín xota̱ xi xín nangi chji̱a̱ni xi síndo ki̱a̱ na̱xi̱ńdaá xi ka̱macho̱n, kó tsi ngo xota̱ Israee̱l xi ka̱mani̱ma̱ nga jmí to̱njiín, nga ngaskande ka̱mamején maá nga moso̱ xi stiñaá ngo nda̱ cho̱n xi xín nangi ka̱ma,

^48-49 kui nda̱ Israee̱l, tjínrií kjo̱a̱nda nga ka̱ma ko̱ꞌna̱xiéꞌá. Ka̱ma kꞌo̱xiéꞌá nga ku̱i̱ꞌíjñandé ngo xota̱ xi xkjín xi ꞌniú tiñanii̱, kó ngaskande ti̱ kui yojoo̱ ka̱ma ku̱i̱ꞌíjñandé tsi tjiín ni xi ku̱i̱ꞌíchjí nginí.

^50-52 Ndi̱a̱a̱ kui mosoo̱ chjiéngá ko̱a̱ꞌa̱xki̱ nó xí chajaa̱ nga kjo̱chó noó kjo̱a̱ndeé, kó chjiéngá skósoón xi kótjín to̱n sa̱ꞌín kui mosoo̱, kui ni̱xtjin xi chaja ngasee̱. Kuí boá xi̱ꞌba̱ chjí xí ku̱i̱ꞌíchjí kuí mosoo̱ tsi̱ꞌe̱ nga sꞌi̱jñandé.

⁵³ Jún chjiéngá xchindàjnú nga ngojín xota̱ xi xín nangi xi ndajín sa̱ꞌínjo̱ ngo moso̱ xi xota̱ Israee̱l.

⁵⁴ »Tsi kui nda̱ Israee̱l xi atíñá yojoo̱ nga moso̱ kamá, kó tsi bo̱a̱jín tsꞌén sꞌi̱jñandé, chjiéngá kjiꞌa kꞌuijñándé kjiꞌanga kjo̱chó noó kjo̱a̱ndeé, kó ti̱ bo̱a̱ ka̱maa̱ ndií nga.

⁵⁵ Xota̱ tsa̱ꞌa̱n boá jún, ngatꞌa̱ án boá xi tsꞌaxiéjnúꞌun nangi Ejipto̱. Án boá xi Nee̱ xota̱ Israee̱l.