Lebitiko̱ 24 - Xo̱jo̱n eén Néná

Xikó tsꞌén xchoón ndiꞌí xí tsꞌentsíjee̱n

¹ Néná atíxomaa̱ Moisee̱ nga bi̱ katsoó:

² «Bo̱a̱ tꞌíi̱n xota̱ Israee̱l tsi̱ꞌe̱ nga kji̱ndi̱bájo̱ istii̱ toꞌolibo̱, tsi̱ꞌe̱ nga ndiꞌí xí tsꞌentsíjee̱n xi síndo ndiꞌandikoón ngatsjéni̱xtjin nga ku̱i̱ti̱.

^3-4 Aaroo̱n boá xi skoón kui ndiꞌií tsi̱ꞌe̱ nga, nga ngo ni̱xtji̱e̱e̱n ku̱i̱ti̱ ki̱a̱ ndiꞌandikónna. Kui ndiꞌií ki̱a̱ kꞌuíndo ndiꞌandikoón, kó ki̱a̱ kꞌuíndosón ki̱cha̱ xi to̱nsinieé ndiꞌí xí tsꞌentsíjee̱n, kui xi tikón ki̱a̱ ngi̱ndie ndikoón. Kui nii̱ kuí bí xi ngo kjo̱a̱botíxoma xi chjiéngá ngatsjéni̱xtjin nga si̱ꞌankjatjosón.

Pan xi niꞌánkꞌasꞌiee̱n Néná

^5-6 »Ti̱ꞌinde ji tiejó pan xi si̱ꞌandajo̱ni ndso̱ko̱a̱n ṉño̱pan xi ꞌniú nda ngasee̱, kó ki̱a̱ tꞌenje̱ ji nínga tikón ngi̱ndie ndikoón. Ki̱a̱ tꞌíndesén ji ki̱a̱ yámíxa̱ xi to̱nsinié soboá soboaá, kó jó ndi̱yà xi jun jun tꞌínde ji. Nga ngo nga ngo kui paa̱n chjiéngá nijón kilo̱ masien ka̱ma é.

⁷ »Kó nga ngo nga̱ndee̱ kui ndi̱yà nínga síndo kui paa̱n, tꞌíndée̱ nisije̱n xi kui soboá soboá, xikoó tsi ngo kjo̱a̱tjó xi nga tí nganda tsa̱ꞌa̱n.

⁸ Chináꞌmii̱ boá xi chjiéngá sa̱ꞌínkꞌasꞌien kui paa̱n ki̱a̱ ndiꞌandikónna xki̱ xoto̱, ngatꞌa̱ kuí boá xi chináꞌmi ngito̱ko̱o̱ xota̱ Israee̱l, kó kuí boá xi tjiín ngo kjo̱a̱ꞌniú, nga ngatsjéni̱xtjin nga sa̱ꞌín kui nii̱.

⁹ »Chináꞌmii̱ ka̱má skji̱ni̱e̱ kui paa̱n, ta̱nga chjiéngá ki̱a̱ skji̱ni̱e̱ ki̱a̱ ngi̱ndie xi xá tikónnii̱, ngatꞌa̱ kjo̱a̱tjó xi ndikón boá kui nii̱».

Kjo̱a̱botíjé xí ko̱e̱ꞌeé xi chꞌo ka̱tso̱o̱ Néná

^10-11 Ngo ndi̱yà ngo ndií ngo xota̱chjo̱on Israee̱l, ko̱jo ngo nda̱ xi chji̱a̱ni Ejipto̱ askjanjo̱ kje̱ꞌe nda̱ Israee̱l. Kui xota̱chjo̱on Israee̱l na̱ Selomii̱t kiꞌmí, kó ndií Ndibrii̱ boá, kui nda̱ xi chji̱a̱ni xota̱ tji̱e̱e̱ Ndaa̱n. Nga ndyi̱kjánjo̱ xkjín kuí jaá, ndií Selomii̱t chꞌo katsoó Néná, kósꞌe̱ tsangínjo̱ kui nda̱a̱ ngindyi̱ko̱n Moisee̱,

¹² kó kichindá nínga kisꞌijña kui ndaa̱, ngaskande nga Néná ka̱tso̱yà mí ni xi si̱ꞌanjo̱.

¹³ Kó Néná bi̱ katsoó Moisee̱:

¹⁴ «Kjo̱a̱a̱ nga chꞌo katsóna kui nda̱a̱, kuíni nga chjiéngá ko̱ꞌna̱xié ji ki̱a̱ nínga síndo ndiꞌaa̱ xotaa̱. Ngayeje xota̱ xi tsintꞌié nga chꞌo katsóna chjiéngá tsja ku̱i̱ꞌíjñasoón to̱ko̱, sꞌe̱ jaskan ndi̱jo̱ ngatꞌaya nga sa̱ꞌínkꞌién kui nda̱a̱.

^15-16 Sꞌe̱ jaskan bi̱ sée̱ xota̱ Israee̱l: “Ta̱ꞌyaní xi chꞌo ka̱tso̱o̱ Néná, chjiéngá ko̱yà. Tsi xota̱ Israee̱l ko̱jo tsi kuijín, kó ngayeje xota̱ na̱xi̱ńdaá xí sa̱ꞌínkꞌién”.

Ni xi si̱ꞌinje̱ ji ngo xota̱, ti̱ bo̱a̱ ti̱ tsꞌén kꞌuíchjí jí nga

^17-21 »Xi ngo xota̱ sa̱ꞌínkꞌién, ti̱ bo̱a̱ ti̱ tsꞌén si̱ꞌankꞌien nga. »Xi ngo cho̱ sa̱ꞌínkꞌién, ti̱ ngo cho̱ tsjangojo nga. »Xi sa̱ꞌínꞌoón ngo xkjín, ti̱ bo̱a̱ ti̱ tsꞌén ku̱i̱ꞌíchjí xikótsꞌèn katsꞌénꞌoón nga: tsi ngo ndyi̱ko̱n tsꞌaxié, ti̱ chjiéngá ngo tsi̱ꞌe̱ ko̱ꞌna̱xié nga, tsi ngo ṉꞌni̱u̱ tsꞌeje̱n, ti̱ chjiéngá ngo tsi̱ꞌe̱ ko̱ꞌna̱je̱n nga, tsi ngo ńdaa̱ iskjítꞌó, ti̱ chjiéngá ngo tsi̱ꞌe̱ chjátꞌó nga.

²² »Kui kjo̱a̱kitii̱ tsi̱ꞌe̱ ngayeje xotaa̱ boá, tsi xota̱ Israee̱l ko̱jo tsi xota̱ xi xín nangi chji̱a̱ni. Án boá xi Nee̱ xota̱ Israee̱l».

²³ Kó Moisee̱ katsóyaà ngayeje kui nii̱ xota̱ Israee̱l, kó kui xotaa̱ tsꞌaxiéni ki̱a̱ nínga síndo ndiꞌaa̱ xotaa̱, kui xi chꞌo katsoó Néná, kó ndi̱jo̱ tsꞌaya nga katsꞌénkꞌién. Bo̱a̱ tsꞌén katsꞌénkjatjosón kui xotaa̱ kui kjo̱a̱botíxoma xi Néná katsjaá Moisee̱.