Lebitiko̱ 23 - Xo̱jo̱n eén Néná

Ni̱xtjii̱n sꞌué ndikón xí sa̱ꞌín xota̱ Israee̱l

¹ Néná tsíchji̱a̱jo Moisee̱,

^2-4 tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Sꞌué xí si̱ꞌánjnú nganda tsa̱ꞌa̱n, kui xi an tsꞌénbotixomájnúꞌun nga ndikóntsꞌèn ka̱matikójnú, kuí bí xi̱ꞌbi̱: »Jún chjiéngá jun ni̱xtjin si̱ꞌanxájnú, ta̱nga xi ma yito ni̱xtjii̱n chjiéngá kjo̱a̱ꞌniútjínnií nga si̱ꞌankjaꞌyájnú. Ta̱ nínga tindyiónjnú, si̱ꞌanxájínjnú kui ni̱xtjii̱n, kó ngo sꞌué ti̱ꞌánjnú, nínga an si̱ꞌantsjajnúꞌun.

Ni̱xtjin nga niꞌánkjaꞌyaá Sꞌué Paskuaa̱ ko̱jo sꞌueé pan xi jmí nisanjiín

⁵ »Chjiéngá si̱ꞌánjnú sꞌué paskuaa̱ nga kjimajñoó ni̱xtjin tienijoón sá xí ꞌmí Abii̱b.

^6-8 Kó ni̱xtjin tjiꞌuún kui saá, kꞌuitsíyanijnúu̱ nga si̱ꞌánjnú sꞌueé pan xi jmí nisan mindyiajiín. Ni̱xtjin xi tjoón ko̱jo ni̱xtjin xi ma yitoo̱, ngo sꞌué ti̱ꞌánjnú nga si̱ꞌantsjajnúꞌun, kó ka̱májín si̱ꞌanxájnú kui ni̱xtjin xi̱ꞌba̱. Kó nga yito kui ni̱xtjii̱n sꞌueé, chjiéngá pan xi jmí nisanjiín xi xi̱ni̱e̱jnú, ko̱jo tꞌítíjnú kjo̱a̱tjó nganda tsa̱ꞌa̱n».

Sꞌueé cha̱n xi tjoón

⁹ Néná atíxomaa̱ Moisee̱,

¹⁰ tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Ngije tindyiónjnú tꞌanangi xi an tsjajnúꞌun, chjiéngá kongínjo̱jnúu̱ chináꞌmii̱ chꞌo̱ xi tjoón sebandaa̱ xi ku̱i̱chájnú.

¹¹ Ngije jaꞌa ni̱xtjin nga niꞌánkjaꞌyaá, chináꞌmii̱ sa̱ꞌínkꞌasꞌienna kui kjo̱a̱tjoó, kó an sa̱ꞌinchikonñé an.

^12-13 Ti̱ kuii̱ ni̱xtjin, jún chjiéngá kꞌuitíjnú nganda tsa̱ꞌa̱n ngo kjo̱a̱tjó xi sije̱n ka̱mana. Kui kjo̱a̱tjoó kuí boá xi ngo ndií cho̱tsa̱nga̱ xi je ngo noó xi nda, ko̱jo nijón kilo̱ ndso̱ko̱a̱n ṉño̱pan xi isti̱ kiniꞌánda̱ꞌyo̱ni. Kó ti̱ kjiꞌa chjatjónjnú ngo litro̱ bino̱ nganda tsa̱ꞌa̱n.

¹⁴ Ka̱májín xi̱ni̱e̱jnú pan ko̱jo to xí kamátsjó, ko̱jo tsi xi chjindié ngaskande ngije kiniꞌánkꞌasꞌienjnú kui kjo̱a̱tjoó. Ta̱ nínga tindyiónjnú, chjiéngá ngatsjéni̱xtjin si̱ꞌankjatjosónjnú kui kjo̱a̱botíxomaa̱.

Sꞌueé nga chjaꞌátikó ni xi kamáxchaá

^15-16 »Yito xomana̱ jaskan, chjiéngá ingo kjo̱a̱tjó si̱ꞌankꞌasꞌién nginíjnúꞌun,

^17-18 kó kuí bí kui nii̱ xi si̱ꞌankꞌasꞌienjnúꞌun: jó pan xi nijón kilo̱ é nga ngo nga ngo xi kiniꞌándajo̱ni ndso̱ko̱a̱n ṉño̱pan xi ꞌniú ndaa̱, xi ikindyiaa̱ nisan, ko̱jo yito ndií cho̱tsa̱nga̱ xi nda, ko̱jo xi je ngo noó, ko̱jo ngo ndií cho̱yojo, ko̱jo jó cho̱tsa̱nga̱ xi jaꞌatji ndi̱ja̱a̱. Ngayeje kui cho̱o̱ nganda tsa̱ꞌa̱n tꞌítíjnú nga̱són ṉchanna, xikoó tsi ngo kjo̱a̱tjó xi sije̱n.

¹⁹ Ti̱ ti̱ꞌankꞌasꞌiénjnúꞌun ngo kjo̱a̱tjó, xi ngo tindso̱ xi̱ꞌin, tsi̱ꞌe̱ nga sa̱ꞌinjetakón an jéjnú, ko̱jo jó ndií cho̱tsa̱nga̱ xi je ngo noó xi kjo̱a̱tjó si̱ꞌánjnú, tsi̱ꞌe̱ nga chji̱a̱ꞌajnúꞌun nga nda ko̱jo nga tsjatsꞌèn ku̱i̱ndyionjnú.

²⁰ Kui kjo̱a̱tjoó chináꞌmii̱ boá xi nijan sa̱ꞌínkꞌasꞌienna, ko̱jo paa̱n ko̱jo, nga jó ndií cho̱tsa̱nga̱a̱. Kjo̱a̱tjó xi niꞌánkꞌasꞌien nganda tsa̱ꞌa̱n boá, kó chináꞌmii̱ boá xi tsoboaá kui nii̱.

²¹ »Ti̱ kuii̱ ni̱xtjin nga niꞌánna ngo sꞌué nínga si̱ꞌantsjana, kó jmí xá si̱ꞌánjínjnú kui ni̱xtjii̱n. Ta̱ nínga tindyiónjnú, chjiéngá ngatsjéni̱xtjin si̱ꞌankjatjosónjnú kui kjo̱a̱botíxomaa̱.

²² »Kjiꞌanga chja̱ꞌátikójnú cha̱a̱n ni xi ikꞌítji̱e̱jnú, ngata̱ bichájínjnú ńtín xí kamáxchá nga̱ndee̱ kui tꞌanangii̱, ti̱nde ngata̱ chjaꞌátikónjínjnú ńtín xí ixóngí tꞌanangii̱. Ki̱a̱ tꞌíndojnú, tsi̱ꞌe̱ nga skjíbé xota̱ xi ni̱ma̱ xi jmí to̱njiín, ko̱jo xota̱ xi xín nangi chji̱a̱ni, xi kui na̱xi̱ńdaá síndo. Án boá xi Nee̱ xota̱ Israee̱l».

Sꞌueé tjioo̱

²³ Néná bi̱ tsꞌén tsíchji̱a̱jo Moisee̱,

^24-25 tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Ni̱xtjin tjoón sá xí ꞌmí Etanii̱n, ti̱ꞌankjaꞌyájnú, kó ngo sꞌué xí ꞌniú ti̱ꞌánjnú. Kui ni̱xtjii̱n ngojín xota̱ xi síndo Israee̱l xi sa̱ꞌínxá, chjiéngá ka̱matikójnú ngayejejnú, tsi̱ꞌe̱ nga an si̱ꞌandikónjnúꞌun. Kó ti̱ꞌankjaniéjnú tjioo̱, kó tꞌítíjnú ngo kjo̱a̱tjó nganda tsa̱ꞌa̱n ki̱a̱ nga̱són ṉchanna».

Ni̱xtjin nga niꞌánjetakoón

²⁶ Néná ti̱ bi̱ ti̱ katsoó Moisee̱ nga:

^27-32 «Ni̱xtjin tiee̱ sá xí ꞌmí Etanii̱n, kjiꞌá boá nga ka̱ma ni̱xtjin nga niꞌánjetakoón. Kui ni̱xtjii̱n chjiéngá kjindiá ku̱i̱ndyionjnú, kó ndikóntsꞌèn si̱ꞌantsjajnúꞌun, nínga kꞌuitíjnú ngo kjo̱a̱tjó nganda tsa̱ꞌa̱n, ki̱a̱ nga̱són ṉchanna. Kó kjo̱a̱a̱ nga kuí bí kui ni̱xtjii̱n nga sa̱ꞌinjetakónjnúꞌun jéjnú, kuíni nga ngojín xota̱ xi sa̱ꞌínxá. Kui xi sa̱ꞌínkjatjosónjín kui kjo̱a̱botíxomaa̱, chjiéngá ku̱i̱yòtjíngií ki̱a̱ na̱xi̱ńdaá. »Kui sꞌueé, kjiꞌa ku̱i̱ꞌítsꞌi̱yanii̱ nga kamángixoón ni̱xtjin xi ma nijaa̱n kui saá, kó nga kamángixoón ni̱xtjin xi ma tiee̱ kju̱i̱e̱. Kui kjo̱a̱botíxomaa̱ chjiéngá ngatsjéni̱xtjin nga si̱ꞌankjatjosónjnú».

Sꞌueé ndiꞌa xi xka̱ ꞌbíndoo̱ nkꞌaa̱

^33-43 Néná tsíchji̱a̱jo Moisee̱ tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Ni̱xtjin xi ma tjiꞌuún sá xí ꞌmí Etanii̱n, jaskan ngije kachjaꞌáꞌyájnú to xi kamáxchaá tꞌanangii̱, ngojín xi sa̱ꞌínxá, ta̱sá chjiéngá ngayeje xota̱ na̱xi̱ńdaá ka̱matikó, tsi̱ꞌe̱ nga an sa̱ꞌíndikónna. Kui ni̱xtjii̱n ku̱i̱ꞌítsꞌi̱yani ngo sꞌué nganda tsa̱ꞌa̱n, xi yito ni̱xtjin kꞌo̱ndíyaá, kó nga yito kui ni̱xtjii̱n, ko̱jo ni̱xtjin xi ma jii̱n, chjiéngá kꞌuití kjo̱a̱tjó nga̱soón ṉchanna, kó ndikóntsꞌèn ti̱ꞌantsjàjnúꞌun. Ni̱xtjin xi tjoón ko̱jo ngaskande ni̱xtjin xi ma jii̱n kui saá, ni̱xtjin nga niꞌánkjaꞌyá boá. Ni̱xtjin xi tjoón chjiéngá xꞌi̱je̱n to xi ꞌniú nda ngase xi tjiín yaá, kó tjiaa̱ yá xka̱jèn, ko̱jo tjiaa̱ yá si̱ꞌandanijnú ndiꞌańkꞌién. Nga yito kui ni̱xtjii̱n nga ka̱ma kui sꞌueé, chjiéngá ki̱a̱ ku̱i̱ndyiongíjnú kui ndiꞌańkꞌieén, tsi̱ꞌe̱ nga kjo̱a̱ꞌátsjienjnú, nga án boá xi tsꞌaxiéjnúꞌun ki̱a̱ nangi Ejipto̱, kó nga án boá xi ngindiee̱ ndiꞌańkꞌién katsꞌenkꞌindongíjnúꞌun. »Kui sꞌueé chjiéngá xki̱ nó nga si̱ꞌan, kó kui nii̱, kuí boá xi ngo kjo̱a̱botíxoma xi ngatsjéni̱xtjin nga si̱ꞌankjatjosón. Án boá xi Nee̱ xota̱ Israee̱l. »Kuí bi̱ xi̱ꞌbi̱ ngayeje sꞌué xí si̱ꞌánjnú nganda tsa̱ꞌa̱n. Kjiꞌanga bo̱a̱ si̱ꞌánjnú chjiéngá ndikóntsꞌèn ka̱matikójnú ngayejejnú, kó ti̱ꞌankꞌasꞌiénjnúꞌun ngayeje to̱ko̱ya kjo̱a̱tjó, ta̱ xikó kjíꞌí kjo̱a̱tjó xi tsoboaá nga niꞌánkꞌasꞌien nga ngo ni̱xtjii̱n. Kó ingo ni ngase, chjiéngá xcha̱ndikónjnúꞌun nga si̱ꞌankjatjosónjnú ngayeje ni̱xtjin nga niꞌánkjaꞌyaá, kó ti̱ꞌankꞌasꞌiénjnúꞌun kjo̱a̱tjoó, ko̱jo ni xi mejénjnú ko̱e̱ꞌéjnúꞌun, ko̱jo tsi ni xi kandokjo̱a̱tjónjnú nga si̱ꞌankꞌasꞌienjnúꞌun».

⁴⁴ Kó bo̱a̱ tsꞌén Moisee̱ katsóyaà xota̱ Israee̱l kjo̱a̱a̱ kui sꞌué xí chjiéngá si̱ꞌan nganda tsi̱ꞌe̱ Néná.