Lebitiko̱ 22 - Xo̱jo̱n eén Néná

Kjo̱a̱tjó xi ꞌniú ndikón

¹ Néná tsíchji̱a̱jo Moisee̱,

^2-3 tsi̱ꞌe̱ nga ko̱tíxomaa̱ Aaroo̱n ko̱jo ndií kjo̱a̱a̱ kjo̱a̱tjó xi niꞌánkꞌasꞌien ngandaa̱ Néná. Já chináꞌmii̱ chjiéngá ndikóntsꞌèn sa̱ꞌínjo̱ kui nii̱, ngatꞌa̱ kjo̱a̱tjó xi ꞌniú ndikón boá kui xi kjo̱jo xota̱ Israee̱l, kó bi̱ katsoó: «Tsi ngo chináꞌmii̱ xi kjo̱e̱ꞌéjo̱na ngo kjo̱a̱tjó xi ꞌniú ndikón, tji̱e̱nga tsjiejín tikón yojoo̱, ka̱májín kjo̱chókasién ngase ngindyikón án. Án boá xi Nee̱ xota̱ Israee̱l, kó kuí bí kui kjo̱a̱tjoó xi tsꞌenkꞌásꞌién xota̱ na̱xi̱ńdána.

^4-7 »Tsi ngo chináꞌmii̱ xi tjiín ngo chiꞌin tji̱xin yojoo̱, ko̱jo tsi yojo ndikoón, ka̱májín skji̱ni̱e̱ kjo̱a̱tjó xi ꞌniú ndikón xi an kiniꞌánkꞌasꞌienna, ngaskande tsí ngije katsꞌéntsjie yojoo̱. »Ngojín chináꞌmii̱ xi ka̱ma sa̱ꞌínjo̱ ngo ni xi kisitꞌaa̱ ngo ini̱ma̱, ti̱nde ka̱májín sa̱ꞌínjo̱ ngo nda̱ xi chiꞌin tjiín yojo ndikoón. Ti̱nde ka̱májín sa̱ꞌínjo̱ ngo cho̱ xi ꞌbifé yojoo̱ nga̱són tꞌanangii̱, ko̱jo tsi ngo nda̱ xi je kiꞌmíyà nga tsjiejín. Tsi bo̱a̱ sa̱ꞌín, tsjiejín ka̱ma ngaskande nga ka̱majñoó, kó ka̱májín skji̱ni̱e̱ ni xi niꞌánkꞌasꞌienna nga kjo̱a̱tjó xi ꞌniú ndikón, tsi tjónjín ko̱ngóyá.

⁸ »Já chináꞌmii̱ ka̱májín skji̱ni̱e̱ yojoo̱ cho̱ xi jesón soboá, ko̱jo tsi tꞌiuaá yojoo̱ cho̱ xi cho̱ tamá katsꞌénkꞌién, tsi bo̱a̱ sa̱ꞌín, ngiti̱ tsjiejín ka̱ma. Án boá xi Nee̱ xota̱ Israee̱l.

⁹ »Ngayeje chináꞌmii̱ chjiéngá sa̱ꞌínkjatjosón kui kjo̱a̱botíxomaa̱. Tsi sa̱ꞌínkjatjosónjín, ko̱yà. An, Nee̱ xota̱ Israee̱l boá xi je katsjaxáa̱ nga ta̱ xána tsí xi sa̱ꞌín.

^10-11 »Ni xi si̱ꞌankꞌasꞌienna nga kjo̱a̱tjó xi ꞌniú ndikoón, ta̱kuítsí chináꞌmii̱ xi ka̱ma skji̱ni̱e̱, ko̱jo xota̱ ndiꞌaa̱, ko̱jo mosoo̱ nga. Ngojín xota̱ xi tsꞌénxaá, ko̱jo tsi xota̱ xi jachókón ngotjoón xi ka̱ma skji̱ni̱e̱.

¹² »Tsi tsa̱kji̱ín ngo chináꞌmii̱ ku̱i̱xanjo̱ ngo nda̱ xi chináꞌmijín, kui tsa̱kji̱ín, ngiti̱ ka̱májín skji̱ni̱e̱ ni xi niꞌánkꞌasꞌienna nga kjo̱a̱tjó xi ꞌniú ndikón.

¹³ Ta̱nga ka̱ma skji̱ni̱e̱ tsi ka̱ma kꞌán nga ko̱yà xi̱ꞌii̱n, ko̱jo tsi ku̱i̱ꞌíjñá ndi̱yà xi̱ꞌii̱n nga kji̱e̱ jmí ndíjiín, sꞌe̱ ko̱e̱je̱kꞌíjñá nginí ndiꞌaa̱ na̱ꞌmii̱.

¹⁴ »Tsi tjín xí bejín, kó ta̱xkiya iskjinie ni xi niꞌánkꞌasꞌienna nga kjo̱a̱tjó xi ꞌniú ndikón, chjiéngá chináꞌmii̱ ka̱machjií kui nii̱, kó ngi kan nga úchán ko̱ósoón xikó kjiꞌi chjií ni xi iskjinie.

¹⁵ Kuíni nga, ngata̱ niꞌánchꞌójínjnú kui kjo̱a̱tjoó, ngatꞌa̱ xota̱ Israee̱l nganda tsa̱ꞌa̱n boá nga katsꞌénkꞌasꞌien.

¹⁶ Xi ta̱xkiya skji̱ni̱e̱, sa̱ꞌín jé. An, Nee̱ xota̱ Israee̱l boá xi je katsjaxáa̱ nga ta̱ xána tsí xi sa̱ꞌín».

Cho̱ xi niꞌánkꞌasꞌiee̱n Néná

¹⁷ Néná tsíchji̱a̱jo Moisee̱,

¹⁸ tsi̱ꞌe̱ nga tsja̱á Aaroo̱n ko̱jo ndií, ko̱jo ngayeje xota̱ Israee̱l kui kjo̱a̱botíxoma xi̱ꞌbi̱: «Tsi ngo xota̱ Israee̱l, ko̱jo tsi ngo xota̱ xi xín nangi chji̱a̱ni xi ki̱a̱ tikón kui na̱xi̱ńdaá, kó tsi ka̱mamejeén ku̱i̱ꞌítí ngo cho̱ nganda tsa̱ꞌa̱n, tsi kjo̱a̱a̱ nga sa̱ꞌínkjatjosón ngo ni xi tsíchji̱a̱tjón, ko̱jo tsi ngi̱jin ini̱ma̱a̱ ndibánií nga sa̱ꞌínkꞌasꞌienna kui nii̱,

^19-20 chjiéngá ngo ndií cho̱yojo, ko̱jo tsi ngo cho̱tsa̱nga̱, ko̱jo tsi ngo tindso̱ xi ngatsꞌénkꞌásꞌiénna. Kui cho̱o̱, chjiéngá ngo cho̱ xi nda ngatama, ngatꞌa̱ tsi jmí, skjíbéjín an kui kjo̱a̱tjoó.

²¹ »Tsi tjín xí sa̱ꞌínkꞌasꞌienna ngo kjo̱a̱tjó, tsi̱ꞌe̱ nga ku̱i̱ꞌana nga nda ko̱jo nga tsjatsꞌèn kꞌuijñá, chjiéngá ngo cho̱ xi nda xi ngatsꞌénkꞌásꞌiénna.

²² »Ngata̱ niꞌánkꞌasꞌiénjínjnú nga̱són ṉchanna ngo cho̱ xi ti̱ka̱, ko̱jo xi katsꞌoo̱, ko̱jo xi kitii̱, ko̱jo xi kiniꞌánkijenꞌon yojoo̱, ko̱jo xi tjiá tjiín.

^23-24 Ti̱nde ngata̱ niꞌánkꞌasꞌiénjínjnúꞌun cho̱ xi kijítie too̱, ko̱jo tsi xi kijísꞌién too̱, ko̱jo tsi kiti too̱, ko̱jo tsi kachjóntindsó too̱. Tsi kui ndií cho̱yojoo̱ ko̱jo tsi kui cho̱tsa̱nga̱ xi si̱ꞌankꞌasꞌienjnúꞌun ndajínkjiꞌi yojoo̱, ka̱má si̱ꞌankꞌasꞌienjnúꞌun tsi ngayeje ini̱ma̱jnú, ta̱nga ka̱májín si̱ꞌankꞌasꞌienjnú tsi̱ꞌe̱ nga kjo̱tjosón ngo ni xi kiꞌmíyatjónjnú nga si̱ꞌánjnú.

²⁵ »Ngata̱ chjábéjínjnúu̱ tsi ngo xota̱ xi xín nangi chji̱a̱ni xi sa̱ꞌínkꞌasꞌienjnú ngo kui cho̱o̱, tsi̱ꞌe̱ nga kjo̱a̱tjó xi tsa̱ꞌa̱n si̱ꞌánjnú. Skjíbéjín an ngo cho̱ xi ndajínkjiꞌi».

²⁶ Néná bi̱ katsoó Moisee̱:

²⁷ «Kjiꞌanga ngo ndií cho̱yojo stse̱n, ko̱jo tsi ngo ndií cho̱tsa̱nga̱, ko̱jo tsi ngo ndií tindso̱, yito ni̱xtjin ngatꞌíjñajo̱ na̱aa̱n kui cho̱o̱, kósꞌe̱ ngaskande xi ma jii̱n ni̱xtjin, ka̱ma si̱ꞌankꞌasꞌienjnúꞌun xikoó ngo kjo̱a̱tjó.

²⁸ »Ngata̱ nijan niꞌánkꞌiénjínjnú nga ti̱ kuii̱ ni̱xtjin ngo cho̱yojo na̱an ko̱jo ndií, ko̱jo tsi ngo cho̱tsa̱nga̱ na̱an ko̱jo ndií.

²⁹ »Kjiꞌanga si̱ꞌankꞌasꞌienjnúꞌun ngo kjo̱a̱tjó kjo̱a̱a̱ nga ndokꞌóchjì ndyi̱boeꞌéjnúꞌun, nda tsꞌén ti̱ꞌankꞌasꞌiénjnúꞌun, tsi̱ꞌe̱ tsja ka̱mana nga skjíbé án.

³⁰ Chjiéngá ti̱ kuii̱ ni̱xtjin xi̱ni̱e̱jnú yojoo̱ kui cho̱o̱, kó ngata̱chiíjín chjaꞌátjójnú tsi̱ꞌe̱ nga kamángindyiojón xi̱ni̱e̱jnú. Án boá xi Nee̱ xota̱ Israee̱l.

^31-33 »Jún xota̱ Israee̱l, ti̱ꞌankjatjosónjnú kjo̱a̱botíxomana, kó ngata̱ chꞌójín ꞌmíjnúu̱ jaꞌénna, ngatꞌa̱ ndikón boá, kó chjiéngá ko̱kójnú ngayejejnú nga yandikónjnúꞌun. Án boá xi Nee̱ xota̱ Israee̱l, kui xi tsꞌaxiéjnú nangi Ejipto̱, tsi̱ꞌe̱ nga xota̱ na̱xi̱ńdá xi kje̱ꞌe kón ka̱majnú, kó jmí tsi xikoó xi ngasee̱ katsꞌenjnúꞌun».