Lebitiko̱ 2 - Xo̱jo̱n eén Néná

Kjo̱a̱tjó xi niꞌánkꞌasꞌien nga boeꞌeé ndokꞌóchjì Néná

¹ «Kjiꞌanga tjín xí sa̱ꞌínkꞌasꞌienna ngo kjo̱a̱tjó xi ni xi maxchá jno̱o̱, chjiéngá to ndso̱ko̱a̱n ṉño̱pan xi ꞌniú ndaa̱ xi kjo̱e̱ꞌéjo̱na. Nga̱soón kui to ndso̱ko̱a̱n ṉño̱paa̱n nga kjitjónjón chií isti̱, kó ngatindyiá chií ni sije̱n,

² sꞌe̱ jaskan ngatsjaá já chináꞌmii̱. Kó kui jaá chináꞌmii̱ nga kjíbé ngo tji̱ngo̱ kui to ndso̱ko̱a̱n ṉño̱pan xi je ndyi̱a̱a̱ isti̱ ko̱jo ni sije̱e̱n, kó ki̱a̱ ngatꞌítísón nga̱són ṉchandikoón, tsi̱ꞌe̱ nga jún kjo̱a̱ꞌátsjienjnú nga án boá xi tsꞌéntsjájnúꞌun ngayeje nii̱. Kuí boá kui nii̱ xi ngo kjo̱a̱tjó xi sije̱n, xi si̱ꞌankꞌasꞌien nganda tsa̱ꞌa̱n.

³ Ni xi kꞌo̱ngii̱ kui kjo̱a̱tjoó, ni ndikón boá, kó ta̱kuítsí já chináꞌmii̱ xi ka̱ma skji̱ni̱e̱.

⁴ »Kjiꞌanga tjín xí sa̱ꞌínkꞌasꞌienna ngo chji̱e̱ xi pan ko̱jo tsi ngayita̱, to ndso̱ko̱a̱n ṉño̱pan xi si̱ꞌandani kui nii̱, chjiéngá xi ꞌniú ndaa̱ xi si̱ꞌankjién. Kui paa̱n ko̱jo kui ngayitaa̱ jmí nisan ku̱i̱ndyiajiín, ndso̱ko̱a̱n ṉño̱pan xi si̱ꞌandajo̱ni paa̱n chjiéngá isti̱ ku̱i̱ndyiaa̱ nga si̱ꞌanda̱ꞌyo̱ni, kó ngayitaa̱ ta̱ ko̱na̱ngínjón tsí istii̱.

⁵ »Tsi tjín xí ni xi maxchá jno̱ xi kiniꞌánchjánni ngi̱yaa̱ ngo sarte̱n sa̱ꞌínkꞌasꞌienna, ndso̱ko̱a̱n ṉño̱paa̱n chjiéngá isti̱ si̱ꞌanda̱ꞌyo̱ni, kó kamájín ku̱i̱ndyiaa̱ nisan.

⁶ Kó chjiéngá ku̱i̱chíyá xi̱xi̱ xi̱xi̱, kó ku̱i̱ndyiaa̱ isti̱ nga̱soón. Kuí boá kui nii̱ xi ngo kjo̱a̱tjó xi niꞌánkꞌasꞌien xi ni xi maxchá jno̱.

⁷ »Tsi tjín xí sa̱ꞌínkꞌasꞌienna ni xi maxchá jno̱ xi ti̱jìꞌásó kiniꞌánchjányáni, chjiéngá ndso̱ko̱a̱n ṉño̱pan xi ꞌniú ndaa̱ xi sa̱ꞌínkjién, kó isti̱ nga tsꞌennda̱ꞌyo̱ni nga sa̱ꞌínda.

⁸ »Kui xi sa̱ꞌínkꞌasꞌienna ta̱jñàní kui kjo̱a̱tjoó, chjiéngá ngatjíjoo̱ já chináꞌmii̱, kó kui já chináꞌmii̱ ngatjíjo̱ tiña ki̱a̱ nínga tikón ṉchandikoón.

⁹ Kó ki̱a̱, já chináꞌmii̱ ku̱i̱ꞌítí chiboa kui kjo̱a̱tjoó, tsi̱ꞌe̱ nga jún kjo̱a̱ꞌátsjienjnú nga án boá xi tsꞌéntsjájnúꞌun ngayeje nii̱. Kuí boá kui nii̱ xi ngo kjo̱a̱tjó xi sije̱n, xi si̱ꞌankꞌasꞌien nganda tsa̱ꞌa̱n.

¹⁰ Ni xi kꞌo̱ngii̱ kui kjo̱a̱tjoó, ni ndikón boá, kó ta̱kuítsí já chináꞌmii̱ xi ka̱ma skji̱ni̱e̱.

¹¹ »Ngojín kjo̱a̱tjó xi si̱ꞌankꞌasꞌienna xi ka̱ma ku̱i̱ndyiaa̱ ntsjién ko̱jo tsi nisan, ngatꞌa̱ kuí nii̱ xi sa̱ꞌínkijintjo̱.

¹² Ka̱má nijan si̱ꞌankꞌasꞌienjnúꞌun ntsjién ko̱jo nisan nga si̱ꞌankꞌasꞌienjnú ni xi tjón kamáxchájnú, ta̱nga jmí tsi tsi̱ꞌe̱ nga kꞌuitíjnú kui nii̱ nga nganda tsa̱ꞌa̱n.

¹³ »Ta̱nga chjiéngá na̱xa̱ ku̱i̱ndyiajnúu̱ ngayeje kjo̱a̱tjó xi si̱ꞌankꞌasꞌienjnúꞌun, ngatꞌa̱ na̱xa̱a̱ kuí boá xi ngo chi̱bo̱a̱ kjo̱a̱a̱ kjo̱a̱ꞌbínda xi kiniꞌánjo̱jnúꞌun.

¹⁴ »Tsi tjín xí sa̱ꞌínkꞌasꞌienna ngo kjo̱a̱tjó kjo̱a̱a̱ ni xi tjón kamáxchaá, chjiéngá ńtín xí kiniꞌántsjóni ngi̱jin ndiꞌií xi ngatsꞌénkꞌásꞌiénna, ko̱jo tsi ndso̱ko̱a̱a̱n kui ni xi kamáxchá jno̱o̱ xi sꞌe̱ kichꞌieje̱n má.

¹⁵ Nga̱soón kui kjo̱a̱tjoó nga kjitjónjón isti̱, kó ngatindyiá chií nisije̱n.

¹⁶ »Chináꞌmii̱ ki̱a̱ ku̱i̱ꞌítí nga̱són ṉchandikoón chiboa kui kjo̱a̱tjoó, tsi̱ꞌe̱ nga jún kjo̱a̱ꞌátsjienjnú nga án boá xi tsꞌéntsjájnúꞌun ngayeje nii̱».