Lebitiko̱ 19 - Xo̱jo̱n eén Néná

Kjo̱a̱kiti tsi̱ꞌe̱ nga tsjie ko̱jo nga kixi̱ ku̱i̱ndyión

¹ Néná atíxomaa̱ Moisee̱,

² tsi̱ꞌe̱ nga tsja̱á kui eén xota̱ Israee̱l: «Án boá xi nee̱ xota̱ Israee̱l, kó bo̱a̱jín kón an xikoó ne xi ngasee̱. Kuíni nga jún, chjiéngá bo̱a̱jín kón ka̱majnú xikoó xota̱ na̱xi̱ńdá xí ngasee̱.

³ »Cha̱ndikónjnú na̱anjnú ko̱jo na̱ꞌmijnú, kó cha̱ndikónjnú ni̱xtjin nga niꞌánkjaꞌyaá. Án boá xi Nee̱ xota̱ Israee̱l.

⁴ »Ngata̱ ta̱xkiya niꞌándikónjínjnú ne xi kuijín bo̱a̱, ti̱nde ngata̱ niꞌándajínjnú ne xi ki̱cha̱ xi kiniꞌánńdá. Án boá xi Nee̱ xota̱ Israee̱l.

⁵ »Kjiꞌanga ngo kjo̱a̱tjó si̱ꞌankꞌasꞌienjnúꞌun, tsi̱ꞌe̱ nga chji̱a̱ꞌajnúꞌun nga nda ko̱jo nga tsjatsꞌèn ku̱i̱ndyionjnú, ti̱ꞌankꞌasꞌiénjnúꞌun kui kjo̱a̱tjoó nga tsja ngatamana.

⁶ »Yojoo̱ cho̱ xi si̱ꞌankꞌasꞌienjnúꞌun, chjiéngá ti̱ kuii̱ ni̱xtjin xi̱ni̱e̱jnú ko̱jo tsi nga kamángindyiojoón, tsi xi ma ján ni̱xtjin, kꞌo̱ngi ngi̱chí kui yojoo̱, chjiéngá kꞌuitíjnú.

⁷ Xi sa̱ꞌínkjatjosónjínna kjo̱a̱a̱ kui nii̱,

⁸ tjítsꞌénjé, kó án boá xi kongatji̱ngìi̱ ki̱a̱ na̱xi̱ńdaá.

⁹ »Kjiꞌanga chja̱ꞌátikójnú cha̱a̱n ni xi kamáxchájnú, ngata̱ bichájínjnú ńtín xi kamáxchá nga̱ndee̱ jno̱o̱, ti̱nde ngata̱ chjaꞌátikójínjnú kui ńtín xí kjoyójo tꞌanangii̱.

¹⁰ Ti̱nde ngata̱ bichájínjnú eén tostsi̱jè xí fetꞌaa̱, ti̱nde ngata̱ chjaꞌángíjínjnú to xi ku̱i̱xo̱ngi tꞌanangii̱. Xota̱ xi ni̱ma̱ xi jmí to̱njiín tꞌíjñájnúu̱ kui nii̱, tsi xota̱ Israee̱l ko̱jo tsi xota̱ xi jachó kui na̱xi̱ńdaá, ngatꞌa̱ ikiyotji̱ngii̱ nangii̱. Án boá xi Nee̱ xota̱ Israee̱l.

¹¹ »Ngata̱ niꞌánchejéjínjnú. Ngata̱ ꞌbíndisójínjnú. Nga ja̱kꞌi̱e̱ ja̱ngajánjín chꞌíṉcha̱jojnú xingi̱jnú,

¹² ti̱nde ngata̱ jaꞌénnajín niꞌánkjiénjnú nga ngo ni xi si̱ꞌankjatjosónjínjnú. Án boá xi Nee̱ xota̱ Israee̱l.

¹³ »Nda ti̱ꞌanjo̱jnú xingi̱jnú, kó ngata̱ chjaꞌéxínjínjnúu̱ ni xi tsi̱ꞌe̱. »Tꞌíchjíjnúu̱ xota̱ xi tsꞌénxájnú ngije kjife nga ngo ni̱xtjii̱n.

¹⁴ »Ngata̱ mojnóchàjínjnú xota̱ xi xtiya, ti̱nde ngata̱ ꞌbíndojnúu̱ ni xi sti̱ngí xota̱ xi ti̱ka̱a̱ ki̱a̱ ndi̱yà nínga tjimá. Cha̱ndikónjnúꞌun. Án boá xi Nee̱ xota̱ Israee̱l.

¹⁵ »Tsi ngo ni kꞌuíndajnú nínga kjimandajin ngo ni, kixi̱ ti̱ꞌánjnú kui nii̱. Ngata̱ kjo̱a̱ndaa̱jín ngo xota̱ mongínjnú, tsi cho̱n ko̱jo tsi ni̱ma̱.

¹⁶ »Ngata̱ ényàjín niꞌánjnú, ta̱nga ni xi ja̱koxi̱ xí ndókjo̱a̱jnú, tsi tsi̱ꞌe̱ nga ko̱ꞌna̱xiéꞌá ngo xota̱. Án boá xi Nee̱ xota̱ Israee̱l.

^17-19 »Ngata̱ onjín chꞌiájnú ngo xota̱ ko̱jo ngata̱ niꞌángojojínjnú. Kjiꞌanga tjín xí si̱ꞌanxchánjo̱jnú, ti̱ꞌanxchánjo̱jnú. Ngata̱ ki̱a̱jín niꞌánkamajo̱jnú xota̱ xi ni xi ndajín ndyi̱tsꞌèn. »Ngatjaꞌátsjienjnú nga chjiéngá tjó si̱ꞌánjnú xingi̱jnú xi kótsꞌèn tjójnú yojojnú. »Ti̱ꞌankjatjosónjnú kjo̱a̱botíxomana. Án boá xi nee̱ xota̱ Israee̱l. »Ngata̱ kje̱ꞌe to̱ko̱yajín cho̱ niꞌánkixanjo̱jnú ngo to̱ko̱ya cho̱ xi tjínjnú. Ngata̱ niꞌánkꞌajinjínjnúu̱ xkjín xojmá xi ꞌbítji̱e̱jnú ngo chikjan nangi. Ngata̱ chajájínjnú ńjño xi kamándani kjín to̱ko̱ya ńchjón.

²⁰ »Tsi tjín xí kjojñájo̱ ngo na̱ chji̱ni̱e̱ꞌbo xi je mejeén ku̱i̱xanjo̱ kje̱ꞌe nda̱, ta̱nga tsi kji̱e̱ tikónndéjín, kui xi bo̱a̱ katsꞌeén, chjiéngá ku̱i̱ꞌíchjií kui nda̱a̱, kui ni xi ndajínkjiꞌi xi katsꞌénjo̱. Ta̱nga ti̱nde kui nda̱ xi bo̱a̱ katsꞌeén, ti̱nde kui naa̱ jmíjiín ngo jé nga ka̱ma si̱ꞌankꞌienni, ngatꞌa̱ jmí tsi je kamándé.

²¹ Kó tsi̱ꞌe̱ nga an sa̱ꞌinjetakóo̱n jeé, kui nda̱a̱ chjiéngá ngo cho̱tsa̱nga̱ xi jaꞌatji ndi̱ja̱a̱ ko̱e̱je̱jo ki̱a̱ ndiꞌandikoón,

²² tsi̱ꞌe̱ nga chináꞌmii̱ sa̱ꞌínkꞌasꞌienna ngo kjo̱a̱tjó.

²³ »Ngije jáchójnú ngi̱ndiejnú, kó ngije kꞌuítji̱e̱jnú yá xí boajaá to, ján nó nga ka̱májín xi̱ni̱e̱jnú to xi ko̱a̱ja̱a̱ kui yaá.

²⁴ Xi ma nijoón nó ngo sꞌué si̱ꞌánjnú, kó Néná si̱ꞌankꞌasꞌienjnúu̱ ngayeje too̱ kui yaá.

²⁵ Ngaskande tsí xi ma uún noó nga ka̱ma xi̱ni̱e̱jnú to xi ko̱a̱ja̱a̱ kui yaá, kó achichí kjín ko̱a̱ja̱a̱. Án boá xi nee̱ xota̱ Israee̱l.

²⁶ »Ngata̱ chiniejínjnú ni xi tjiín jín. »Ngata̱ niꞌánjínjnú ngayeje to̱ko̱ya kjo̱a̱tjiꞌe.

^27-28 »Ngata̱ bichájínjnú tsja̱ tꞌanijonjnú, ti̱nde ngata̱ ꞌbíjónjínjnúu̱ ngayeje tsja̱ ngiꞌboajnú, ti̱nde ngata̱ niꞌánꞌónjínjnúu̱ yojojnú nga chi̱bo̱a̱ kjótꞌajnúu̱, nga xikoó tsi xota̱ xi je jesoón ndyi̱niꞌándikónjnú. Án boá xi Nee̱ xota̱ Israee̱l.

²⁹ »Ngata̱ niꞌánjínjnúu̱ kjo̱a̱ꞌniú ndí xí ínchjínjnú nga na̱masien sa̱ꞌín yojoo̱. Kui ni xi̱ꞌba̱, ngo ni xi ndajín xi ka̱maa̱ kui ínchjiín ko̱jo ngayeje na̱xi̱ńdaá.

³⁰ »Cha̱ndikónjnú ni̱xtjin nga niꞌánkjaꞌyaá, kó cha̱ndikónjnú ndiꞌandikónna. Án boá xi Nee̱ xota̱ Israee̱l.

³¹ »Ngata̱ xota̱ xi chji̱a̱jo xota̱ xi je jesónjín mongínchonjnúu̱ nga xchítꞌajnú yojojnú. Tsi bo̱a̱ si̱ꞌánjnú, je ngiti̱ tsjiejín ka̱majnú. Án boá xi Nee̱ xota̱ Israee̱l.

³² »Kjiꞌanga ngindyi̱ko̱n ngo xota̱ xi xchaá tindyiónjnú, ko̱jo tsi ngindyi̱ko̱n ngo xota̱ xi xchá ngase ta̱bo̱a̱jiín jún, cha̱ndikónjnú, kó ti̱ndyiakixi̱jnú.

³³ »Ngata̱ niꞌánxtíjínjnúu̱ xota̱ xi xín nangi chji̱a̱ni xi ki̱a̱ jachókꞌíndo nangi nínga tindyiónjnú.

³⁴ Bo̱a̱ ti̱ꞌanjo̱jnú xikoó tsi xota̱ Israee̱l, kó tjó ti̱ꞌanjo̱jnú xikoó tsi ti̱ juún bo̱a̱, ngatꞌa̱ jún, xota̱ xi xín nangi kamájnú ngasꞌe̱ ki̱a̱ nangi Ejipto̱. Án boá xi Nee̱ xota̱ Israee̱l.

^35-37 »Ngata̱ chꞌíṉcha̱jínjnú kjiꞌanga ngo ni xꞌi̱chi̱bo̱a̱jnú. Ni xi niꞌánkjiénjnú xi xꞌi̱chi̱bo̱a̱jojnú ngo ni, chjiéngá bo̱a̱ má kjiꞌi ngatama. Án boá xi Nejnú, xi tsꞌaxiéjnú nangi Ejipto̱. Kuíni nga nda nda má tsꞌén ti̱ꞌankjatjosónjnú ngayeje kjo̱a̱botíxomana. Án boá xi Nee̱ xota̱ Israee̱l.»