Lebitiko̱ 18 - Xo̱jo̱n eén Néná

Ni xi tsjandièjín Néná kjo̱a̱a̱ nga si̱ꞌantsjajo̱ yojoná

¹ Néná tsíchji̱a̱jo Moisee̱,

² tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Án boá xi Nee̱ xota̱ Israee̱l.

³ Jún xota̱ Israee̱l xi ki̱a̱ kixindyionjnú nangi Ejipto̱ ngasꞌe̱, kó ngotꞌe̱ ꞌne̱ ki̱a̱ nangi Kanaa̱n tsꞌénfijo̱jnúꞌun. Ka̱májín bo̱a̱ si̱ꞌánjnú xikó tsꞌén xota̱ Ejiptoo̱, ko̱jo tsi xikó tsꞌén xota̱ Kanaa̱n.

^4-5 Ti̱ꞌankjatjosónjnú ngayeje kjo̱a̱botíxomana, kó nda ku̱i̱ndyionjnú. Án boá xi Nee̱ xota̱ Israee̱l.

^6-7 »Ngi̱jii̱n jún ka̱májín ngo nda̱ kjojñájo̱ ngo na̱ xi xkjín má, ti̱nde ka̱májín tsi na̱aa̱n kjojñájo̱, ngatꞌa̱ tsi bo̱a̱ sa̱ꞌín, tsꞌénbendikónjín na̱ꞌmii̱. Án boá xi Nee̱ xota̱ Israee̱l.

⁸ »Ngojín nda̱ xi ka̱ma kjojñájo̱ chjo̱ón na̱ꞌmii̱,

⁹ ti̱nde ka̱májín kjojñájo̱ ndichja, ndatsi ndichjajon xi xtji̱e̱e̱n na̱ꞌmii̱ ko̱jo tsi xtji̱e̱e̱n na̱aa̱n mani, kó ndatsi xín ndiꞌa xi kje̱ꞌe xtín xota̱ kamáxchá.

¹⁰ »Ngojín nda̱ xi ka̱ma kjojñájo̱ tsa̱kjìndeé, tsi xtji̱e̱e̱n ndí xíꞌiín ko̱jo tsi xtji̱e̱e̱n ndí chjo̱ón.

¹¹ »Ngojín nda̱ xi ka̱ma kjojñájo̱ ndí chjo̱ón kui xota̱chjo̱on xi chjo̱ón na̱ꞌmii̱ ka̱ma. Ngatꞌa̱ tsi bo̱a̱ sa̱ꞌín xikónií tsi ndichja xi tsꞌénfojñajo̱.

¹² »Ngojín nda̱ xi ka̱ma kjojñájo̱ ndyikjoaa̱n, kui xi ndichja na̱ꞌmii̱,

¹³ ko̱jo tsi ndichja na̱aa̱n,

¹⁴ ko̱jo tsi chjo̱ón tsinii̱, ngatꞌa̱ ndyikjoaa̱n boá nga.

¹⁵ »Ngojín nda̱ xi ka̱ma kjojñájo̱ kja̱ndaa̱,

¹⁶ ko̱jo tsi xo̱ngo̱ò.

¹⁷ »Ngojín nda̱ xi ka̱ma kjojñájo̱ tsa̱kji̱ín ko̱jo tsi tsa̱kjìndeé kui xota̱chjo̱on xí ja̱bo̱a̱ je kisꞌijñajo̱ ngasꞌe̱, ngatꞌa̱ ngayejee̱ nga ta̱ ngo xtín xota̱ chji̱a̱ni. Tsi kjojñájo̱ kui ínchjiín, jé ꞌniú boá, tsi bo̱a̱ sa̱ꞌín.

¹⁸ »Ngojín nda̱ xi ka̱ma chjo̱ón sa̱ꞌín ndichja chjo̱ón, ti̱nde ka̱májín kjojñájo̱ tji̱e̱nga tikón chjo̱ón. Ngata̱ kondraa̱ xkjínjín niꞌín ji nga jó kui ínchjiín.

¹⁹ »Ngojín nda̱ xi ka̱ma kjojñájo̱ ngo na̱ xi kjimaa̱ saá.

²⁰ »Ngojín nda̱ xi ka̱ma kjojñájo̱ chjo̱ón kje̱ꞌe nda̱. Tsi bo̱a̱ sa̱ꞌín, ngiti̱ tsjiejín ka̱ma.

²¹ »Ngojín xota̱ xi ndií sa̱ꞌínkjién nga sa̱ꞌínkꞌasꞌiee̱n ngo kjo̱a̱tjó ne xi ꞌmí Moloo̱k. Ngata̱ niꞌánkjatsónjínjnú jaꞌénna, ngatꞌa̱ án boá xi Nee̱ xota̱ Israee̱l.

²² »Ngojín nda̱ xi ka̱maa̱ kjojñájo̱ kje̱ꞌe nda̱. Ngatꞌa̱ achichí ꞌniú chꞌóna kui nii̱.

²³ »Ngayeje xi chꞌo sa̱ꞌínjo̱ ngo cho̱, ngiti̱ tsjiejín ka̱ma.

^24-26 »Ngata̱ ngojín kui nii̱ niꞌánjnú, ngatꞌa̱ tsi bo̱a̱ si̱ꞌánjnú, ngiti̱ tsjiejín ka̱majnú. Kui xota̱ na̱xi̱ńdá xi kꞌoxié an kui nangi xi jún tsjajnúꞌun, jè katsꞌén ngayeje kui ni xi ndajiín, kó kui ko̱jo kui tꞌanangii̱ xi je kamándándí. Ta̱nga ti̱nde jún, ko̱jo xota̱ xi xín nangi xi síndo kui na̱xi̱ńdaá, chjiénjín nga ni xi ndajín xi si̱ꞌánjnú.

^27-28 Tsi bo̱a̱ si̱ꞌánjnú, jún ko̱jo kui tꞌanangii̱ jè ngiti̱ tsjiejín ka̱ma, kó chjiéngá ko̱jo jún kongatji̱ngijnúꞌun kui ngi̱ndiee̱ nga.

^29-30 »Ti̱ꞌankjatjosónjnú kjo̱a̱botíxomana tsobo̱a̱, kó ngata̱ niꞌandándíjínjnú yojojnú, nga ki̱a̱ kongintjingíjnú ni xi ndajín xi katsꞌén kui xotaa̱. Kui xota̱ xi sa̱ꞌín kui ni xi achichí ꞌniú chꞌóna, kongatji̱ngíñáa̱ ki̱a̱ na̱xi̱ńdaá. Án boá xi nee̱ xota̱ Israee̱l».