Lebitiko̱ 17 - Xo̱jo̱n eén Néná

Ngi̱jii̱n jiín tikón kjo̱a̱mindyioo̱n

¹ Néná tsíchji̱a̱jo Moisee̱,

² tsi̱ꞌe̱ nga ko̱tíxomaa̱ chináꞌmii̱ ko̱jo ngayeje xota̱ Israee̱l kjo̱a̱a̱ ni xi chjiéngá sa̱ꞌín:

^3-4 «Tsi ngo xota̱ Israee̱l xi ka̱mamejeén sa̱ꞌínkꞌasꞌienna ngo kjo̱a̱tjó xi ngo cho̱yojo toro̱, ko̱jo tsi ngo cho̱tsa̱nga̱, ko̱jo tsi ngo tindso̱ chjo̱on, chjiéngá ki̱a̱ nínga bitjasꞌi̱e̱nni ndiꞌandikón sa̱ꞌínkꞌién kui cho̱o̱. Tsi xín ngi̱ndie sa̱ꞌínkꞌién, tsi ngi̱yaa̱ ko̱jo tsi ndi̱tsee̱n nínga síndo ndiꞌaa̱ xotaa̱, xikónií tsi xota̱ xi tjítsꞌénkꞌién xi bo̱a̱ tjítsꞌeén, kó chjiéngá ku̱i̱yòtjíngií ki̱a̱ na̱xi̱ńdaá.

⁵ »Xota̱ Israee̱l xi sa̱ꞌínkꞌasꞌienna kui cho̱o̱ xikoó tsi ngo kjo̱a̱tjó tsi̱ꞌe̱ nga ku̱i̱ꞌana nga nda ko̱jo nga tsjatsꞌèn kꞌuíndo, chjiéngá ki̱a̱ nínga bitjasꞌi̱e̱nnii̱ ndiꞌandikoón ko̱e̱je̱jo. Kósꞌe̱ ki̱a̱ sa̱ꞌínkꞌasꞌiee̱n chináꞌmii̱, kó kui chináꞌmii̱ an sa̱ꞌínkꞌasꞌienna ngijee̱.

⁶ Jaskan chináꞌmii̱ skjitjónjón ṉchandikónna jiín kui cho̱o̱, kó nganda tsa̱ꞌa̱n ngatꞌítí xinieé, xikoó tsi ngo kjo̱a̱tjó xi sije̱n ka̱mana.

⁷ Kó bo̱a̱ tsꞌén nga xota̱ Israee̱l ngiti̱ sa̱ꞌínkꞌasꞌienjiín kjo̱a̱tjó xindajín, kui xi ja̱ kon tindso̱ má kón. Kui kjo̱a̱botíxomaa̱ jmíni̱xtjin sa̱síkjo.

⁸ »Tsi ngo xota̱ Israee̱l, ko̱jo tsi ngo xota̱ xi xín nangi chji̱a̱ni, ta̱nga tsi ki̱a̱ tikón kui na̱xi̱ńdaá, xi sa̱ꞌínkꞌasꞌien ngo cho̱ tsi̱ꞌe̱ nga kꞌuití nganda tsa̱ꞌa̱n,

⁹ chjiéngá ki̱a̱ nínga bitjasꞌi̱e̱nnii̱ ndiꞌandikoón sa̱ꞌínkꞌasꞌienna. Tsi bo̱a̱jín sa̱ꞌín, chjiéngá ku̱i̱yòtjíngií ki̱a̱ na̱xi̱ńdaá.

¹⁰ »Tsi ngo xota̱ Israee̱l, ko̱jo tsi ngo xota̱ xi xín nangi chji̱a̱ni, ta̱nga tsi ki̱a̱ tikón kui na̱xi̱ńdaá, xi skji̱ni̱e̱ yojo xi tjiín jín, kondraa̱ kotíjña̱ an, kó kongatji̱ngìi̱ ki̱a̱ na̱xi̱ńdaá.

¹¹ Jiín boá xi tsjaá kjo̱a̱mindyion yojoo̱. Ti̱ ánní bo̱a̱ xi katsjajnúꞌun jiín kui cho̱o̱, tsi̱ꞌe̱ nga ki̱a̱ si̱ꞌankꞌasꞌienjnúꞌun ṉchandikónna, kó ndokꞌóchji̱nií kui kjo̱a̱mindyion xi tjiín kui jiín, nga an tsꞌenjetakónjnúꞌun jéjnú.

¹² Kuíni nga xota̱ Israee̱l ko̱jo tsi xota̱ xi xín nangi chji̱a̱ni, chjiénjín nga yojo xi tjiín ndeta̱ ngo tsí tín jín xí ka̱ma skji̱ni̱e̱.

¹³ »Tsi ngo xota̱ Israee̱l, ko̱jo tsi ngo xota̱ xi xín nangi chji̱a̱ni, ta̱nga tsi ki̱a̱ tikón kui na̱xi̱ńdaá, xi sa̱ꞌínkꞌién ngo cho̱ xi tjiín tsja̱nga̱, ko̱jo tsi ngo cho̱ xi ma chinie, chjiéngá skjitjón yeje jiín kui cho̱o̱, kósꞌe̱ ńdie ngatindyiaá kui jiín ngijee̱.

¹⁴ Ngatjaꞌátsjienjnú nga kuí jiín xi tsjaá kjo̱a̱mindyion ngayeje cho̱o̱. Kuíni nga tsjandièjínjnúꞌun nga ka̱ma xi̱ni̱e̱jnú yojo xi tjiín jín, kó kui xi bo̱a̱ sa̱ꞌiín, chjiéngá ku̱i̱yòtjíngií ki̱a̱ na̱xi̱ńdaá.

¹⁵ »Kjiꞌanga ngo xota̱ Israee̱l, ko̱jo tsi ngo xota̱ xi xín nangi chji̱a̱ni, ta̱nga tsi ki̱a̱ tikón kui na̱xi̱ńdaá, sa̱ko̱ó ngo cho̱ xi je kꞌien, kó tsi skji̱ni̱e̱ kui cho̱o̱, ngiti̱ tsjiejín ka̱ma ngaskande nga ka̱majñoó, kó chjiéngá ko̱nié ńjñoo̱ ko̱jo ngatangóyá.

¹⁶ Tsi sa̱ꞌínkjatjosónjín kjo̱a̱botíxomana, ka̱majérií kjo̱a̱a̱ nga tsintꞌiéꞌénjín».