Lebitiko̱ 16 - Xo̱jo̱n eén Néná

Ni̱xtjin je nga niꞌánjetakón jeé

¹ Kó nga jó kamá jaá Aaroo̱n xi jesón kjo̱a̱a̱ nga achichí ꞌniú tiñaa̱ ṉchandikoón jachó, kuíni nga Néná, bi̱ katsoó Moisee̱:

² «Bo̱a̱ tꞌíi̱n Aaro̱n ntsꞌie ji nga ngi̱ndie xi ꞌniú ndikoón, kui xi tikón ngi̱yaa̱ ndiꞌandikoón, ngo ngi̱ndie xi ta̱nisién ꞌniú ndikón ki̱a̱a̱. Ki̱a̱ boá nínga je kamángána nga ki̱a̱ fotjokjà án, ki̱a̱ nga̱soón koxa̱a̱ kjo̱a̱ꞌbíndaa̱. Kuíni nga Aaroo̱n ka̱májín kꞌo̱sꞌien ki̱a̱a̱ ta̱jmì chi̱bo̱a̱ní, ngatꞌa̱ tsájmi̱ ko̱yà kjiꞌanga kjo̱tjokjá án ki̱a̱a̱.

^3-4 »Ta̱nga tsi ka̱mamejeén kꞌo̱sꞌien kui ngi̱ndie xi ꞌniú ndikoón, chjiéngá ko̱ngóyá, kó ngatajá ńjñoo̱ xi tsi̱ꞌe̱ chináꞌmii̱, ngayeje kui ńjñoo̱ xikoó: ńjño xi chajákjaá, ko̱jo ńjño ngindiee̱, ko̱jo ńjño xi ꞌbíkjá ndáyaá, ko̱jo ni ꞌbíꞌá tokoo̱. Kósꞌe̱ kjiꞌá boá nga sa̱ꞌínkꞌasꞌienna ngo kjo̱a̱tjó xi ngo ndií cho̱yojo tsi̱ꞌe̱ nga sa̱ꞌinjetakón an jé, kósꞌe̱ ngo cho̱tsa̱nga̱ xi jaꞌatji ndi̱ja̱a̱ ngatꞌítí nganda tsa̱ꞌa̱n.

^5-6 »Tsi̱ꞌe̱ nga si̱ꞌanjetakoón jé xí tsi̱ꞌe̱, ko̱jo tsi̱ꞌe̱ nga si̱ꞌanjetakoón jeé xota̱ ndiꞌaa̱, chjiéngá ngo ndií cho̱yojo sa̱ꞌínkꞌasꞌienna Aaroo̱n. Kó kjo̱a̱a̱ jeé xota̱ Israee̱l, chjiéngá jó tindso̱ ko̱jo ngo cho̱tsa̱nga̱ xi jaꞌatji ndi̱ja̱a̱ xi sa̱ꞌínkꞌasꞌienna xi ti̱ kuii̱ xota̱ Israee̱l tsja̱á. »Kó ku̱i̱ꞌítí cho̱tsa̱nga̱ xi jaꞌatji ndi̱ja̱a̱ nganda tsa̱ꞌa̱n.

^7-9 Sꞌe̱ jaskan xiyàa̱ ñání nga jó tindsoo̱ xi an sa̱ꞌínkꞌasꞌienna, kó ñání xi sa̱ngíyaá Asasee̱l, ki̱a̱ nangi kixií. Kui tindso̱ xi an sa̱ꞌínkꞌasꞌienna, chjiéngá ki̱a̱ nínga bitjasꞌi̱e̱nnii̱ ndiꞌandikoón sa̱ꞌínkꞌasꞌienna, xikoó ngo kjo̱a̱tjó xi niꞌánkꞌasꞌien nga niꞌánjetakón jé.

¹⁰ Kó kui tindso̱ xi tsi̱ꞌe̱ Asasee̱l, chjiéngá ku̱i̱ꞌíjñá tikón, kó ki̱a̱ sa̱ngíyá ki̱a̱ ngi̱jii̱n nangi kixií.

¹¹ »Jaskan ngije Aaroo̱n katsꞌénkꞌasꞌienna ngo kjo̱a̱tjó xi ndií cho̱yojo xi tsi̱ꞌe̱, kjo̱a̱a̱ nga ka̱majetakoón jeé ko̱jo kjo̱a̱a̱ jeé xota̱ ndiꞌaa̱,

¹² nga kjíbé ni xi ꞌbítíyá nisijee̱n ko̱jo jó tji̱ngo̱ nisije̱n, kó xꞌué xí síndo ki̱a̱ ṉchandikónna ngatindyiá kuí nii̱,

¹³ kó ngije tjiyátsjà kui nii̱, ngatꞌasꞌien ki̱a̱ ngi̱ndie nínga ꞌniú ndikoón, kui xi tikón nga̱xto̱n kortina̱ je xi tji̱e̱e̱n. Ki̱a̱ ngatindyiá nisijee̱n ngi̱jii̱n xꞌueé, tsi̱ꞌe̱ nga ṉdi̱i̱ ko̱e̱je̱jon ki̱a̱ tsꞌoa xi kjiꞌmani koxa̱a̱ kjo̱a̱ꞌbíndaa̱. Kó ko̱yàjín nga bo̱a̱ sa̱ꞌín.

¹⁴ »Jaskan ngije kamá kui nii̱, Aaroo̱n ngatsꞌénkꞌándyi̱ni xtín tsja, jiín ndí cho̱yojo chichií, kósꞌe̱ nga kjitjónjón nga ngo nga ngo nga̱ndee̱ tsꞌoa koxa̱a̱ kjo̱a̱ꞌbíndaa̱. Sꞌe̱ jaskan yito ndi̱yà nga kjitjónjón kje̱n tsꞌoa kui koxa̱a̱.

¹⁵ Sꞌe̱ tji̱e̱nmá ngatsꞌénkꞌásꞌiénna tindsoo̱, kui xi kjo̱a̱tjó tsi̱ꞌe̱ nga si̱ꞌanjetakoón jeé xota̱ na̱xi̱ńdaá boá, sꞌe̱ ngatjíjo̱ jiín kui cho̱o̱ ki̱a̱ ngi̱ndie nínga ꞌniú ndikoón, kó ti̱ bo̱a̱ ti̱ ngatsꞌeén kui jiín xikó katsꞌeén jiín ndí cho̱yojo chichií.

¹⁶ Kó bo̱a̱ tsꞌén nga Aaroo̱n ka̱majetakoón jeé, kó sa̱ꞌíntsjie xota̱ Israee̱l nga, ki̱a̱ ngi̱ndie nínga ꞌniú ndikoón ko̱jo ki̱a̱ ndiꞌandikoón.

Nga si̱ꞌantsjie ṉchandikoón

¹⁷ »Ngojín xota̱ xi ka̱ma kꞌuíndo tiña ki̱a̱ ndiꞌandikoón, tji̱e̱nga Aaroo̱n kꞌuijñá ki̱a̱a̱ tsi̱ꞌe̱ nga ku̱i̱ꞌa nga si̱ꞌanjetakoón jeé ngayeje xotaa̱.

¹⁸ Ngije kjo̱tjoni ki̱a̱a̱, ko̱e̱je̱ ngaskande nínga tikón ṉchanna, kó chjiéngá sa̱ꞌíntsjie. Ngatsꞌénkꞌándyi̱ni xtín tsja jiín kui ndí cho̱yojo chichií ko̱jo jiín tindsoo̱, kó nga tsanginjon kui jiín nga nijón ni xi ja̱kon ndi̱ja̱ koo̱n kui ṉchandikoón,

¹⁹ sꞌe̱ jaskan yito ndi̱yà nga kjitjónjón. Bo̱a̱ tsꞌén nga ka̱matsjie kui ṉchandikoón kjo̱a̱a̱ ni xi tsjiejiín xota̱ Israee̱l, kósꞌe̱ an si̱ꞌankꞌasꞌienna kui ṉchaa̱n ngijee̱.

Tindso̱ xi kiniꞌánkjí nangi kixií

²⁰ »Ngije kamaá Aaroo̱n nga katsꞌén ngayeje kui nii̱, an sa̱ꞌínkꞌasꞌienna kui tindso̱ xi ingoo̱, kui xi kiniꞌánkꞌiénjiín.

^21-22 Ngatꞌíjñasoón nga jó tsja to̱ko̱ kui cho̱o̱, kó nga tsáyà ngayeje jé xí katsꞌén xota̱ Israee̱l, kó bo̱a̱ tsꞌén nga kui tindsoo̱ xi si̱ꞌankaꞌa jeé xota̱ na̱xi̱ńdaá. Sꞌe̱ jaskan kui tindsoo̱ ki̱a̱ kongínjo̱ nangi kixií, tsi̱ꞌe̱ nga ko̱e̱je̱jo ngayeje jé xí katsꞌén xota̱ Israee̱l.

²³ »Jaskan ngije kamá kui nii̱, Aaroo̱n kꞌo̱sꞌien ndiꞌandikoón, kó kjo̱a̱ꞌáxín ńjño lino̱ xi tsajá nga tsꞌasꞌien ngi̱ndie xi ꞌniú ndikoón,

²⁴ kó ngatangóyá ki̱a̱ ngi̱ndie nínga xá tikónnii̱, kó ngatajá nginí ńjño xi ta̱ xá boajáni. Kósꞌe̱ kjo̱tjoni kui ngi̱ndiee̱, kó ku̱i̱ꞌítí kjo̱a̱tjoó nganda tsa̱ꞌa̱n ko̱jo kjo̱a̱tjó xi tsi̱ꞌe̱ xota̱ na̱xi̱ńdaá, tsi̱ꞌe̱ nga sa̱ꞌinjetakóo̱n jé xí tsi̱ꞌe̱ ko̱jo jeé xota̱ na̱xi̱ńdaá.

²⁵ Kó ti̱ ku̱i̱ꞌítí nga̱són ṉchanna xinieé kui cho̱ xi niꞌánkꞌasꞌien tsi̱ꞌe̱ nga niꞌánjetakón jeé.

²⁶ »Kui xi kjo̱jo tindsoo̱ ki̱a̱ nangi kixií, chjiéngá ko̱nié ńjñoo̱, ko̱jo ngatangóyá ngindiee̱ nga kꞌo̱sꞌien nginí nínga síndo ndiꞌaa̱ xotaa̱.

²⁷ Ni xi kꞌo̱ngii̱ cho̱yojo chichií ko̱jo tindsoo̱, chjiéngá ko̱ꞌna̱xiéni kui ngi̱ndiee̱, kó ndi̱tsee̱n nínga síndo ndiꞌaa̱ xotaa̱ ki̱a̱ kꞌuití.

²⁸ Kui xi ku̱i̱ꞌítí kui nii̱, chjiéngá ko̱nié ńjñoo̱, ko̱jo ngatangóyá ngindiee̱ nga kꞌo̱sꞌien nginí nínga síndo ndiꞌaa̱ xotaa̱.

^29-31 »Kui kjo̱a̱botíxomaa̱ jmí tsi ta̱ tsi̱ꞌe̱ xota̱ Israee̱l tsí bo̱a̱, ko̱jo tsi̱ꞌe̱ ngayeje xota̱ xi ki̱a̱ síndo kui ngi̱ndiee̱ boá, kui xi xín nangi chji̱a̱ni. Sá xi ma yitoo̱ kui xi ꞌmí Tebee̱t, ka̱májín ni skji̱ni̱e̱, ti̱nde ka̱májín sa̱ꞌínxá. Kuí boá xi̱ꞌba̱ xi ngo ni̱xtjin ndo̱jò nga niꞌánkjaꞌyá, ko̱jo nga niꞌánkjaꞌa kjindiá yojoná, ngatꞌa̱ kuí boá kui ni̱xtjii̱n nga sa̱ꞌinjetakón an ngayeje jeé.

³² »Chináꞌmi xi xá katseꞌéxaá kuí boá xi sa̱ꞌín kui nii̱. Kó ngatajá ńjño chináꞌmii̱, kui xi lino̱ kamándanii̱,

³³ kó ngatsꞌéntsjie ngi̱ndie xi ꞌniú ndikoón, ko̱jo ndiꞌandikoón, ko̱jo ṉchandikoón, ko̱jo chináꞌmii̱, ko̱jo ngayeje xota̱ na̱xi̱ńdaá.

³⁴ Tsi̱ꞌe̱ nga ka̱majetakoón jeé, chjiéngá sa̱ꞌínkjatjosón kui kjo̱a̱botíxomaa̱ ngo ndi̱yà nga ngo noó». Ngayeje kui nii̱ xi kiniꞌán, xikó má tsꞌén atíxoma Moisee̱ nga si̱ꞌan.