Lebitiko̱ 13 - Xo̱jo̱n eén Néná

Chiꞌin xi tsoboaá tji̱xin yojoná

¹ Néná tsíchji̱a̱jo Moisee̱ ko̱jo Aaroo̱n nga bi̱ katsoó:

² «Kjiꞌanga ngo xi kamáske ngo ndiè tji̱xin yojoo̱, ko̱jo tsi ṉdoꞌon katjoo̱, ko̱jo tsi kamátsjie tji̱xin yojoo̱, chjiéngá ngindyi̱ko̱n ngo kui já chináꞌmii̱ ko̱e̱je̱.

³ Chináꞌmii̱ skotsíjee̱n tji̱xin yojoo̱, kó tsi kjima tiboa tsja̱ xi tjiín ki̱a̱ nínga katjo kui ṉdoo̱, kó tsi kjifísꞌienya ki̱a̱ nínga katjo kui ṉdoo̱, tsi bo̱a̱ kjiꞌi, chiꞌin xi tsꞌénkjátsón tji̱xin yojoná boá xi tjiín, kuíni nga kui xi oo̱n chjiéngá tsjiejín ka̱ma.

⁴ »Tsi tiboa ki̱a̱ nínga kamátsjiee̱, ta̱nga tsi kjifísꞌienyajín tji̱xin yojoo̱, kó tsi kjimatiboajín tsja̱ xi tjiín ki̱a̱ nínga tikón kui ṉdoo̱, kjiꞌá boá nga chináꞌmii̱ ku̱i̱ꞌíjñátꞌaxín kui xi oo̱n,

⁵ kó xi ma yito ni̱xtjin ingo ndi̱yà skotsíjen nginií. Tsi to̱kó bo̱a̱ kjiꞌi ki̱a̱ nínga tikón kui ṉdoo̱, kó tsi kjimatsiejín ngase kui nii̱, to̱kó ku̱i̱ꞌíjñátꞌaxínra kui xi oo̱n ngi yito ni̱xtjin ngase.

⁶ Ngije jaꞌa xi yito ni̱xtjii̱n, ti̱ skotsíjen nginií, kó tsi ngiti̱ kamátsiejín ngase ki̱a̱ nínga tikón kui ṉdoo̱, tsi ta̱sá je kichajá, kui nii̱ ta̱ ngo tsí ṉdo xi katjoo̱ yojoo̱. Kósꞌe̱ kjiꞌá boá nga chináꞌmii̱, bo̱a̱ ka̱tso̱ nga tsjie kuí xi oo̱n, kó kui xi oo̱n ko̱nié ńjñoo̱, kósꞌe̱ je ka̱matsjie.

⁷ »Tsi ngije askotsijee̱n kui xi oo̱n, kó tsi je kamátsjie kiꞌmií, ta̱nga tsi kui ṉdo xi tjitjoó yojoo̱ kjimatsie ngase, chjiéngá ti̱ ko̱e̱je̱kon nginií chináꞌmii̱.

⁸ Tsi ngije askotsijee̱n chináꞌmii̱ kui xi oo̱n, kó tsi kamábe nga je ngayeje tji̱xin yojoo̱ je katjoo̱ ṉdo, chjiéngá tsjiejín ka̱tso̱o̱ kui chináꞌmii̱, ngatꞌa̱ chiꞌin xi tsꞌénkjátsón tji̱xin yojoná xi koo̱n.

⁹ »Xota̱ xi ṉdo yajaá tji̱xin yojoo̱ chjiéngá ki̱a̱ kongínjo̱ ngindyi̱ko̱n chináꞌmii̱,

¹⁰ tsi̱ꞌe̱ nga skotsíjee̱n. Tsi ki̱a̱ nínga ske ngo ndiè yojoo̱ kjima tiboa, kó tsi tsja̱ xi tjiín ki̱a̱a̱, kjima tiboa, kó tsi nínga kjima skee̱ ya má yojoo̱,

¹¹ ja̱ chiꞌin xi tsꞌénkjátsón tji̱xin yojoná boá kui chiꞌii̱n. Kó chináꞌmii̱ chjiéngá bo̱a̱ ka̱tso̱ nga tsjiejín kui xotaa̱, ta̱nga ngiti̱ chjiénjín nga sa̱ꞌínkꞌijñátꞌaxín.

¹² »Ta̱nga tsi kui chiꞌii̱n xi tsá xi boaꞌa kjifítsié, nga ngaskande ngayeje yojoo̱ nga stso̱ba̱a̱ kui nii̱.

¹³ Chináꞌmii̱ skotsíjee̱n kui xi oo̱n, kó tsi kui chiꞌii̱n je katsoboaá ngayeje yojoo̱, kjiꞌá boá nga xota̱ xi tsjie ka̱tso̱o̱. Jè kamátsjie, ngatꞌa̱ kui nii̱ ta̱ ngo tsí chiꞌin xi tsoboaá tji̱xin yojoná boá.

^14-15 Ta̱nga tsi xcha̱ má yojoo̱, chináꞌmii̱ chjiéngá skotsíjee̱n, kósꞌe̱ bo̱a̱ ka̱tso̱ nga tsjiejín kui xotaa̱, ngatꞌa̱ kui yojo xi yaa̱, tsjiejín, kó chiꞌin xi tsꞌénkjátsón tji̱xin yojoná boá.

¹⁶ »Tsi ka̱ma tiboa nginí kui yojoo̱, kui xi oo̱n chjiéngá ko̱e̱je̱ nginí ngindyi̱ko̱n chináꞌmii̱.

¹⁷ Kó tsi kui chináꞌmii̱ sku̱i̱e̱ nga ki̱a̱ nínga katjo kui ṉdoo̱ je kamátiboa, chjiéngá bo̱a̱ katsó nga tsjie kui xi oo̱n.

^18-19 »Tsi tjín xí katjoo̱ ṉdo tji̱xin yojoo̱, sꞌe̱ jaskan kamáske, ko̱jo tsi tiboa ko̱jo tsi kamáꞌiní, chjiéngá ko̱e̱je̱ ngindyi̱ko̱n chináꞌmii̱.

²⁰ Tsi kui chináꞌmii̱ sku̱i̱e̱ nga kjifísꞌienya tji̱xi̱ín, ko̱jo tsi kui tsja̱ xi tjiín ki̱a̱ nínga oo̱n kjima tiboa, chjiéngá bo̱a̱ ka̱tso̱ nga tsjiejín kui xotaa̱, ngatꞌa̱ jè katsoboaá chiꞌin xi tsꞌénkjátsón tji̱xin yojoná.

²¹ Tsi chináꞌmii̱ jmí ni sku̱i̱e̱jín tji̱xin yojoo̱ kui xotaa̱, chjiéngá yito ni̱xtjin ku̱i̱ꞌíjñátꞌaxín kui xi oo̱n.

²² Tsi kjifítsié kui chiꞌii̱n nga̱són tji̱xin yojoo̱, chjiéngá bo̱a̱ ka̱tso̱ nga tsjiejín kui xi oo̱n,

²³ ta̱nga tsi tjichájá kui chiꞌii̱n, chjiéngá bo̱a̱ ka̱tso̱ nga tsjie kuí xi oo̱n.

²⁴ »Tsi tjín xí ndiꞌí sa̱ꞌínchjánnii̱ yojoo̱, kó tsi nga̱són nínga kachjaán ka̱ma iní,

²⁵ chjiéngá chináꞌmii̱ skotsíjee̱n ki̱a̱ nínga kachjaán. Kó tsi tsja̱ xi tjiín ki̱a̱ nínga kachjaán kjima tiboa, ko̱jo tsi kjifísꞌienya tji̱xin yojoo̱, jè chiꞌin xi tsꞌénkjátsón tji̱xin yojoná kjima ki̱a̱ nínga kachjaán, kó kjiꞌá boá nga chináꞌmii̱ bo̱a̱ ka̱tso̱ nga tsjiejín kui xi oo̱n.

²⁶ Tsi chináꞌmii̱ jmí ni sku̱i̱e̱jín nga tjiín tji̱xin yojoo̱ kui xotaa̱, chjiéngá yito ni̱xtjin sa̱ꞌínkꞌijñátꞌaxín kui xi oo̱n.

²⁷ Xi ma yitoo̱ ni̱xtjin skotsíjee̱n, kó tsi je kjifítsié kui chiꞌii̱n ngayeje nga̱són tji̱xi̱ín, chjiéngá bo̱a̱ ka̱tso̱ nga tsjiejín kui xi oo̱n.

²⁸ Ta̱nga tsi kjifítsiéjín kui chiꞌii̱n, kó tsi je mejeén tjichájá, chjiéngá bo̱a̱ ka̱tso̱ nga tsjie kui xi oo̱n, ngatꞌa̱ ta̱ chi̱ꞌbi̱í nínga kachjaán yojoo̱ tsí bo̱a̱.

²⁹ »Tsi ngo xi chjo̱on ko̱jo tsi ngo xi xi̱ꞌin kjo̱tjoo̱ ngo ṉdo tsi to̱ko̱ ko̱jo tsi ngiꞌboa,

³⁰ chjiéngá chináꞌmii̱ skotsíjee̱n kui ṉdoo̱. Tsi kjifísꞌienya tji̱xi̱ín, kó tsi tsja̱ xi tjiín ki̱a̱ nínga tikón kui chiꞌii̱n kjima sinié ko̱jo tsi kjima chiboa, chjiéngá chináꞌmii̱ bo̱a̱ ka̱tso̱ nga tsjiejín kui xi oo̱n, ngatꞌa̱ kuí boá kui nii̱ xi ngo chiꞌin xi tsꞌénkjátsón tji̱xin yojoná.

³¹ »Tsi sku̱i̱e̱ chináꞌmii̱ nga kjifísꞌienyajín tji̱xin yojoo̱, ta̱nga tsi kji̱e̱ mandayajín tsja̱ xi yajaá ki̱a̱ nínga tikón kui chiꞌii̱n, chjiéngá yito ni̱xtjin ngatꞌijñátꞌaxín kui xi oo̱n.

³² Xi ma yito ni̱xtjin nga kotsijee̱n, kó tsi sku̱i̱e̱ nga kjifítsiéjín kui ṉdoo̱,

³³ kui xi oo̱n, chjiéngá ku̱i̱ꞌíjoón tsja̱ꞌaa̱, ta̱nga ka̱májín ko̱tie tsja̱ xi yajaá ki̱a̱ nínga oo̱n. Chjiéngá chináꞌmii̱ ngi yito ni̱xtjin ku̱i̱ꞌíjñátꞌaxín,

³⁴ kó xi ma yito ni̱xtjin ti̱ skotsíjen nginí. Tsi kui ṉdoo̱ ngiti̱ kjifítsiéjín ngase, chjiéngá bo̱a̱ ka̱tso̱ nga tsjie kui xi oo̱n.

^35-37 Ta̱nga tsi ti̱ ko̱e̱je̱ tsie nginí kui chiꞌii̱n, chjiéngá bo̱a̱ ka̱tso̱ chináꞌmii̱ nga tsjiejín kui xi oo̱n.

³⁸ »Tsi ngo xi chjo̱on ko̱jo tsi ngo xi xi̱ꞌin kjo̱tjoo̱ ngo tsjiexkoa xi tiboa ko̱jo tsi chjanga,

³⁹ ta̱xkiya chiꞌin tsí bo̱a̱ xi̱ꞌba̱ xi katsoboaá tji̱xin yojoo̱, kó chjiéngá kꞌuiyá nga tsjie kui xotaa̱.

^40-41 »Tsi ngo nda̱ xi ku̱i̱xo̱ tsja̱a̱, kó tsi ka̱ma takayítsjá, ko̱jo tsi ku̱i̱xo̱ tsja̱xtjien, ka̱májín tsi tsjiejín kꞌuiín.

⁴² Ta̱nga tsi nínga kjima takayítsjaá, ka̱ma iní ko̱jo tsi ka̱ma tiboaꞌandá, kuí nii̱ xi bokó nga ki̱a̱ nínga kamátakatꞌaa̱ chiꞌin xi tsꞌénkjátsón tji̱xin yojoná boá xi je katsoboaá.

⁴³ Kó tsi bo̱a̱ kamá, chjiéngá chináꞌmii̱ skotsíjee̱n. Tsi sku̱i̱e̱ nga ki̱a̱ nínga tikón kui chiꞌii̱n, bo̱a̱ má kjiꞌi xikoó nínga tjo chiꞌin xi tsꞌénkjátsón tji̱xin yojoná,

⁴⁴ kui nda̱a̱ chiꞌin xi tsꞌénkjátsón tji̱xin yojoná boá xi tjiín, kó chjiéngá bo̱a̱ ka̱tso̱ nga tsjiejín.

^45-46 »Xota̱ xi tjiín chiꞌin xi tsꞌénkjátsón tji̱xin yojoná, chjiéngá skjíndiyá ńjñoo̱, kó ngatꞌítso̱ma ndso̱toko, kó tji̱e̱nga tjiín kui chiꞌii̱n, chjiéngá xota̱ xi tsjiejín kꞌuiín. Kjin kꞌuíndo, kjinnii̱ nínga síndo ndiꞌaa̱ xotaa̱. Kó chjiéngá masien kje̱n ko̱óꞌmá, kó skja̱ndáyà nga bi̱ ka̱tso̱: “¡Tsjiejín an! ¡Tsjiejín an!”

Ni jmá xi fotjoo̱ ńjñoo̱ ko̱jo ni xi tji̱xi̱ín cho̱o̱

⁴⁷ »Tjín ni̱xtjin nga fotjoo̱ ngo chi̱bo̱a̱ xi jmá ńjño xi tsa̱nga̱a̱ cho̱tsa̱nga̱ kamándani ko̱jo tsi ńjño xi lino̱,

⁴⁸ ko̱jo tsi ni xi tji̱xi̱ín cho̱ kamándani.

⁴⁹ Tsi kui chi̱bo̱a̱a̱ sinié ko̱jo tsi iní ka̱ma, chjiéngá chináꞌmii̱ ko̱ko̱ó,

⁵⁰ tsi̱ꞌe̱ nga skotsíjee̱n, kó kui nii̱ yito ni̱xtjin ku̱i̱ꞌíjñátꞌaxín.

^51-52 Xi ma yitoo̱ ni̱xtjin, chináꞌmii̱ ti̱ skotsíjen nginií kui chi̱bo̱a̱a̱, kó tsi je kamátsié ngase, kui nii̱ chjiéngá ni xi tsjiejín ka̱ma, kó chjiéngá kꞌuití, ngatꞌa̱ chiꞌin xi tsꞌenkjié ngo ni boá.

⁵³ »Tsi kui chi̱bo̱a̱a̱ ngiti̱ kjifítsiéjín ngase,

⁵⁴ chináꞌmii̱ chjiéngá tsjákjo̱a̱ nga ko̱niéjón ki̱a̱ nínga tikón kui chi̱bo̱a̱a̱, kó kui nii̱ ngi yito ni̱xtjin kꞌuijñátꞌaxínra.

⁵⁵ Ngije akaniéjón nínga jatjoo̱ kui chi̱bo̱a̱a̱, chináꞌmii̱ ti̱ skotsíjen nginií, kó tsi kji̱e̱ chajajín, chjiéngá kꞌuití kui nii̱, ngatꞌa̱ ni xi tsjiejín boá.

⁵⁶ »Tsi kjiꞌanga ko̱niéjón kui nii̱, kó tsi kju̱i̱e̱jon a̱sie̱én kui chi̱bo̱a̱a̱, chináꞌmii̱ chjiéngá ko̱tie ngo chikjan kui ńjñoo̱ ko̱jo tsi kui ni tji̱xi̱ín, ki̱a̱ nínga tikón kui chi̱bo̱a̱a̱.

⁵⁷ Tsi ngi̱chí sájín kui nii̱, ti̱ kjo̱tjo nginií kui chi̱bo̱a̱a̱, chjiéngá kꞌuití kui nii̱.

⁵⁸ Ta̱nga tsi kui chi̱bo̱a̱a̱ xcha̱ja kjin, kui nii̱ ti̱ ko̱niéjón nginí, sꞌe̱ jaskan ni xi tsjie kꞌuiín ngijee̱.

⁵⁹ »Kuí bí kui kjo̱a̱botíxomaa̱ kjo̱a̱a̱ ni xi chi̱bo̱a̱ fotjoo̱, tsi̱ꞌe̱ nga xcha̱, kjiꞌání nga ni xi tsjie ka̱ma ko̱jo tsi ni xi tsjiejín».