Lebitiko̱ 12 - Xo̱jo̱n eén Néná

Xikó tsꞌén sa̱ꞌíntsjie yojoo̱ ngo na̱ xi yeꞌé ndí

¹ Néná bi̱ katsoó Moisee̱,

² tsi̱ꞌe̱ nga sa̱ꞌínkꞌasꞌiee̱n xota̱ Israee̱l kui kjo̱a̱botíxomaa̱: «Kjiꞌanga ngo na̱ xi ku̱i̱ꞌé ngo ndí xíꞌín, chjiéngá tsjiejín ka̱ma yito ni̱xtjin, xikó maá kjiꞌanga kjimaa̱ saá.

³ Kui ndií chjiéngá xi ma jii̱n ni̱xtjin si̱ꞌaa̱n sirkunsisioo̱n,

⁴ ta̱nga kui naa̱, chjiéngá to̱kó sa̱ꞌíntsjiera yojoo̱ ngi kantié ján ni̱xtjin, kó ka̱májín sa̱ꞌínjo̱ ni xi niꞌánkjién nganiꞌántsjaá Néná, ti̱nde ka̱májín ko̱e̱je̱ ndiꞌandikoón Néná.

⁵ »Tsi ndí chjo̱on xi yeꞌé kui naa̱, chjiéngá tsjiejín ka̱ma jó xomana̱, xikoó kjiꞌanga kjimaa̱ saá, kó chjiéngá sa̱ꞌíntsjiera yojoo̱ ngi ichítié ko̱jo tjiꞌún ngo ni̱xtjin ngase.

^6-7 »Ngije jatjosón ni̱xtjin nga katsꞌéntsjie yojoo̱ kui na̱ xi yeꞌé kui ndií, tsi chjo̱on ko̱jo tsi xi̱ꞌin, chjiéngá ko̱e̱je̱ nínga bitjasꞌi̱e̱nni ndiꞌandikoón. Kó ki̱a̱ sa̱ꞌínkꞌasꞌiee̱n chináꞌmii̱ ngo cho̱tsa̱nga̱ xi sꞌe̱ tsí ngo noó, ko̱jo tsi jó tójo, ko̱jo tsi jó toṉña̱. Kósꞌe̱ kui chináꞌmii̱ ku̱i̱ꞌítí kui cho̱tsa̱nga̱a̱ nganda tsi̱ꞌe̱ Néná, kó sa̱ꞌínkꞌasꞌiee̱n Néná kui tójoo̱ ko̱jo tsi kui toṉñaa̱, tsi̱ꞌe̱ nga si̱ꞌanjetakón jeé, kó bo̱a̱ tsꞌén nga na̱aa̱n kui ndií je kamátsjie. »Kuí bí kui kjo̱a̱kitii̱ xi chjiéngá sa̱ꞌínkjatjosón ngo na̱ xi ku̱i̱ꞌé ngo ndí chjo̱on ko̱jo tsi ngo ndí xíꞌín.

⁸ Ta̱nga tsi kui naa̱ jmíjín to̱n xi kꞌo̱tsieni ngo cho̱tsa̱nga̱, ka̱má jó tójo ko̱jo tsi jó toṉña̱ sa̱ꞌínkꞌasꞌien. Kó chináꞌmii̱ ngo kui cho̱o̱ xi ku̱i̱ꞌítí nganda tsi̱ꞌe̱ Néná, kó xi ingoo̱, kjo̱a̱tjó tsi̱ꞌe̱ nga niꞌánjetakón jé sa̱ꞌín. Kó bo̱a̱ tsꞌén nga ka̱matsjie kui naa̱».