Kjo̱a̱chaꞌaá 5 - Xo̱jo̱n eén Néná

Xi ma uún kjo̱a̱chaꞌaá Xota̱ na̱xi̱ńdáꞌniú Jerusalee̱n

¹ Ji Ne, ngatjaꞌátsjiee̱n ni xi ndajín xi je kjindibániéjne̱, kó tsitsíjìi̱n kjo̱a̱soboá xi ndyi̱bitjatiójne̱.

² Ngayeje ni xi tjínjne̱ jè ngi̱ya tsja kondraa̱ je tikón, kó ndiꞌajne̱ jè xota̱ xi xín nangii̱, je kui tsi̱ꞌe̱.

³ Jè xikoó tsi ndíxꞌi̱a̱n xi jmí na̱ꞌmijiín je kamájne̱, ko̱jo je xikoó tsi ínchjín kꞌán xi je kꞌien xi̱ꞌii̱n je kamá na̱anjne̱.

⁴ ¡Jè ngaskande ndáfoa xi ꞌyójne̱, ko̱jo chikín xí niꞌánkjiénjne̱ je ndyi̱tsꞌítsiéjne̱!

⁵ Jè xikoó tsi je tjimíyotji̱ngitiñajne̱, jè jendajne̱, kó jè ngiti̱ májín niꞌánkjaꞌyájne̱.

⁶ Ni̱ma̱ kiꞌmíjne̱ nga ikjienjne̱ ndsa̱jne̱ xota̱ Ejiptoo̱, ko̱jo xota̱ Asiriaa̱ nga kichjiáꞌájne̱ ni xi xi̱ni̱e̱jne̱.

⁷ Xota̱ xi xchájne̱ katsꞌénjé, kó je jesón, ¡ta̱nga ji̱n boá xi ndyi̱ꞌbíchjíjne̱ jé xí katsꞌén!

⁸ Ngotꞌe̱ ꞌne̱ mosoo̱ boá xi ndyi̱botixómájne̱, ¡kó nde ngojín xota̱ xi tsꞌéndéjne̱ ngi̱ya tsja kui!

⁹ Ndasénjín kamájne̱ yojojne̱ nga ikindyiséjne̱ ni xi xi̱ni̱e̱jne̱, ndatsi yajne̱ nga xota̱ chꞌokon xi ndajín tjín ki̱a̱ nangi kixií.

¹⁰ Jè sibéjón má kjima yojojne̱, xikoó tsi ngo orjno̱ tjítsꞌénchjánjne̱, ta̱ngatꞌanii̱ nga bojójne̱.

¹¹ Ki̱a̱ na̱xi̱ńdáꞌniú Jerusalee̱n ko̱jo na̱xi̱ńdá Jundáa̱ chꞌo kiniꞌánjo̱ kjo̱a̱ꞌniú ínchjín xo̱ngòjne̱ ko̱jo ínchjín xí ngasee̱.

¹² Xota̱ xi ngito̱ko̱jne̱ tsja ikꞌítꞌaꞌniú nga ikjienboaꞌa, kó nde kamáyàndikónjín xota̱ xi xchájne̱.

¹³ Já xo̱ngòjne̱ kiniꞌaán kjo̱a̱ꞌniú nga katsꞌo to ndso̱ko̱a̱n ṉño̱paa̱n, kó jákjíndíjne̱ kiniꞌaán kjo̱a̱ꞌniú nga kiniꞌánkꞌiniján chikín.

¹⁴ Xota̱ xi xchájne̱ jè ngiti̱ ꞌbíndojín ki̱a̱ nga̱ntjo̱a̱a̱ na̱xi̱ńdáꞌniuú, kó já xo̱ngòjne̱ jè ngiti̱ siejín.

¹⁵ Jè ngiti̱ jmí kjo̱a̱tsjajiín ini̱ma̱jne̱, kó kjo̱a̱xa̱ꞌya̱ kiniꞌán kjo̱a̱chájne̱.

¹⁶ Jè ngiti̱ ji̱njín xi botíxomajne̱. ¡Ni̱ma̱ xò ji̱n, ta̱ngatꞌanii̱ nga kiniꞌánjéjne̱!

¹⁷ Kuíni nga je ndasen tikón ini̱ma̱jne̱, kuíni nga je inda inda kjimaxa̱ ndyikonjne̱.

¹⁸ Ngatꞌa̱ na̱xi̱ Sioo̱n je kisꞌijña soboá, kó cho̱ńdaa̱ je bo̱a̱ fí bo̱a̱ ndibá ndyi̱tsꞌèn.

¹⁹ Ta̱nga ji Ne, jí boá xi Re ji ngatsjéni̱xtjin, ¡jí boá xi botíxome ji ta̱kjiꞌání!

²⁰ Míkjo̱a̱a̱ nga si̱ꞌinchíyé kjin kjinjne̱ ji̱n. Míkjo̱a̱a̱ nga bo̱a̱ kjiꞌi ni̱xtjin kꞌuijñímasinjne̱.

²¹ ¡Ji Ne, te̱ꞌéndiè ji nga kongínchon nginíjne̱ ji, kó konginꞌóyánginíji̱n, ti̱ꞌintja̱tsi̱e̱ye ji ni̱xtjinjne̱, xikó maá ni̱xtjin xi kisꞌie ngasꞌe̱!

²² Axa̱ jè kiniꞌínchꞌí yejejne̱, kó a ngatsjéni̱xtjin nga ꞌniú si̱ꞌinxchínje̱jne̱ ji̱n.