Kjo̱a̱chaꞌaá 3 - Xo̱jo̱n eén Néná

Xi ma jaán kjo̱a̱chaꞌándaseén Nda̱ chji̱ni̱e̱ꞌe̱én Néná

¹ Án boá, kui nda̱ xi jaꞌatio kjo̱a̱ni̱ma̱ kjiꞌanga Néná tsaꞌonna nga katsꞌénxchán.

² Akóna ndi̱yà, nínga jñó kijíjo̱na, jmí tsi nínga tsijee̱n.

³ Ta̱ nga ngo án tsꞌéntsjáchjína nga ngo ni̱xtjii̱n.

⁴ Jè katsꞌénxíyà yojona ko̱jo tji̱xinna, jè iskjítꞌó ńdana,

⁵ nga ngo foaꞌatjiyajonna nga kjo̱a̱ni̱ma̱ ko̱jo kjo̱a̱xtinda je íjñána.

⁶ Nínga jñó je íjñána, xikó maá xota̱ xi jesón ndeskande koó ngasꞌe̱.

⁷ Jè íchjáꞌyána, kó ngiti̱ májín fotjo an, xikoó tsi ńꞌniúki̱cha̱ xi ꞌniú é ítꞌana,

⁸ kó ndatsi skjandáyàa̱ nga kuichjiáa̱ tsi̱ꞌe̱ nga ko̱síko̱jona, mejénjiín ntꞌiéna.

⁹ Ngo xó ndi̱jo̱ íchjáni ndi̱yàna, kó xín ndi̱yà katsꞌénkjína.

¹⁰ Kuí boá xi kamá xikó maá tsi ngo cho̱ꞌoso̱ xi tikónꞌmá xi je skjánjo̱na, ko̱jo xikó maá tsi ngo xandi̱je̱ xi tsꞌénkondana nga skji̱ni̱e̱na,

¹¹ tsꞌéntsobéjii̱n ndi̱yàna, tsꞌénxi̱na, kó ꞌbíjñá soboána.

¹² Íjñanda yáchjonyaá, kó án boá xi mejeén ku̱i̱ꞌéna yáyojoó.

¹³ An asiénna yáyojoó, kó ngaskande ngi̱jin ini̱ma̱na kastiee̱.

¹⁴ Án boá xi kjo̱a̱mojnóchaá xota̱ na̱xi̱ńdaá je kamá an, kó ndyiojón ndyiojón ndyi̱mojnókiena.

¹⁵ Jè íkitsie mána kjo̱a̱xtinda, ngo ni xi achichí sa indyiájènna.

¹⁶ Ndi̱jo̱ chikjan iskjítꞌoní ńꞌniu án, kó ngi̱jin ndisoo̱ yíjñajinna.

¹⁷ Jè ngiti̱ jmíjínna kjo̱a̱xió, kó jè kichíyána kjo̱a̱tsjaa̱,

¹⁸ je bi̱ kixian an: Jè ngiti̱ jmíjínna ngaꞌniú, jè ngiti̱ kjimaꞌniáko̱njín an Néná.

¹⁹ Ngatjaꞌátsjiee̱n kjo̱a̱ndasenna ko̱jo kjo̱a̱ni̱ma̱ xi tsꞌénfoaꞌatio an, ko̱jo kjo̱a̱xtindana ko̱jo ni sa xi katseꞌéní.

²⁰ Ngatsjéni̱xtjin nga kjo̱a̱ꞌátsjienna kui nii̱, ngatꞌa̱ achichí nda̱ kjimaa̱ ngi̱jin yojona,

²¹ ta̱nga ngi̱jin ini̱ma̱na tsꞌenkjó án, kó kuí nii̱ xi tsja nginína kjo̱a̱chiyá.

²² Kjo̱a̱ni̱ma̱takoón Néná jmíni̱xtjin fe, ti̱nde kjifejín kjo̱a̱ndaxota̱a̱.

²³ Ndyiojón ndyiojón matja̱tsi̱e̱ya. ¡Achichí je kjo̱a̱ꞌniátakóo̱n Ne!

²⁴ Kuíni nga ngayeje ini̱ma̱na nga bi̱ xian an: Néná boá xi ngayeje ni xi tjínna, kó kuí boá xi kjimaꞌniáko̱n an.

²⁵ Achichí nda tsꞌénjo̱ Néná xota̱ xi kui ndyi̱koyaa̱, ko̱jo xota̱ xi kui ndyi̱mongase.

²⁶ Achichí ndakjiꞌi nga xió tsꞌén xchiyàa̱ nga Néná kꞌo̱xiéꞌáná.

²⁷ Achichí ndakjiꞌi nga ndeskande nga kjindí xota̱ nga̱sondiee̱ nga ku̱i̱ꞌínieé yojoo̱ kjo̱a̱chji̱ni̱e̱e̱ Néná.

²⁸ Ngatꞌíjñá soboá ko̱jo xió ngatꞌíjñá, ngatꞌa̱ Néná boá xi bo̱a̱ tsꞌén tsꞌénꞌbinieé.

²⁹ Ni̱ma̱kjo̱a̱ ngatꞌaxié yojoo̱, kó ngatítꞌaa̱ kje̱n tꞌanangii̱, tsi ta̱ꞌaa̱ tjín ngase kjo̱a̱chiyá.

³⁰ Ngatiejeén xi ingo tꞌanijon xi tsꞌénbeꞌeé, kó ngatsꞌénjóꞌo ni chꞌo tsó xi kꞌuiín.

³¹ Ngatꞌa̱ Néná jmí tsi ngatsjéni̱xtjin nga sa̱ꞌínchꞌóná.

³² Ndatsi kjo̱a̱ni̱ma̱ tsꞌénkꞌatióná, ti̱ ni̱ma̱ maá ñá, ngatꞌa̱ achichí kjo̱a̱ni̱ma̱takón tjiín.

³³ Néná jmí tsi kui xi bo̱a̱ tsꞌén mejeén nga kjo̱a̱ni̱ma̱ sa̱ꞌínkꞌatio, ko̱jo nga sa̱ꞌíndasee̱n ndií xota̱ nga̱sondiee̱.

³⁴ Kjiꞌanga jnánié ngayeje xota̱ xi síndo ndo̱bo̱a̱yà kuí nga̱sondiee̱,

³⁵ ko̱jo kjiꞌanga ꞌbíchjaá kjo̱a̱nda xi tjiín xotaa̱ ngindyi̱ko̱n Néná,

³⁶ ko̱jo kjiꞌanga niꞌánkjatsón kjo̱a̱kixi̱i̱ xotaa̱. A bejín Néná ngayeje kui nii̱.

³⁷ ꞌYání bo̱a̱ xi bo̱a̱ ka̱tso̱ nga ngo ni kamá, kó nga Nénájín xi bo̱a̱ katsꞌén.

³⁸ A mí tsí nga tsꞌoa Néná boá nínga fotjo ngayeje ni xi ndaa̱ ko̱jo ni xi ndajiín nga.

³⁹ Míkjo̱a̱a̱ nga ni̱ma̱ tsó xota̱ nga̱sondiee̱. ¡Ngatjaꞌa kjo̱a̱ni̱ma̱ xota̱ xi chꞌokoo̱n tsi katsꞌénjé!

⁴⁰ Xchítꞌa cha̱n cha̱n ndi̱yà xí timá, ku̱i̱ndyi̱sé Néná, kó tjianchón ngiñáa̱.

⁴¹ Chjanínkꞌáa̱ ini̱ma̱ná ko̱jo ndsa̱, kui Néná xi tikón nkꞌajmii̱ nga bi̱ kꞌuíi̱n:

⁴² Kiniꞌánjéjne̱ ko̱jo kitikjo̱a̱ kamájne̱, ta̱nga ji, jè kiniꞌínjetakínjne̱.

⁴³ Achichí ꞌniú kiniꞌínxchín jí, kó ikiyitji̱ngijne̱, kiniꞌínkꞌínjne̱, kó kiniꞌínjetakínjínjne̱,

⁴⁴ ngo ṉdi̱ kixindyinjin ji, tsi̱ꞌe̱ nga kandaꞌyéjíi̱n kjiꞌanga kandokjo̱a̱jne̱ ji.

⁴⁵ Xikoó tsi yeꞌe ko̱jo tsi xtjié kiniꞌínje̱jne̱ ngi̱jii̱n xota̱ na̱xi̱ńdaá.

⁴⁶ Ngayeje kondra̱jne̱ tsajnókiejne̱, kó chꞌo katsójne̱,

⁴⁷ ndikón, ko̱jo chja̱ya̱, ko̱jo kjo̱a̱niꞌánkjiéná, ko̱jo ni xi je jatson, kuí nii̱ xi tjisákójne̱ ngotꞌe̱.

⁴⁸ Ja̱ma ndejèꞌ má má ndándyíkón án kjiꞌanga be an ngayeje ni xi ndajín xi kamaá na̱xi̱ńdána.

⁴⁹ Nde ngiti̱ xixiójín ndándyíkón án, ngatꞌa̱ jè ngiti̱ jmí ndikijiín ni xi kjimaa̱,

⁵⁰ ngototo tsi Néná xí ni̱ma̱ ka̱maa̱ ji̱n kó skotsíjenjne̱ ndeskande ki̱a̱ ndiꞌakꞌajmii̱.

⁵¹ Achichí on kamaá ini̱ma̱na nga kamábe an ngayeje kjo̱a̱ni̱ma̱ xi jaꞌatio ínchjiín na̱xi̱ńdáꞌniúna.

⁵² Nde jmí kjo̱a̱jiín kondra̱na nga katsoboána xikótsꞌèn ndoboà ngo ni̱sie,

⁵³ askjanjo̱na, kó ngo ti̱xa̱ ndáńchꞌi̱ tsꞌajmiyána, sꞌe̱ ngo ndi̱jo̱je íjñaniéna,

⁵⁴ kó ndáfoaa̱ yíꞌmá tokó án, kósꞌe̱ bi̱ kixian an: Jè kꞌien an ꞌne̱.

⁵⁵ Ta̱nga ndeskande nínga na̱nga̱a̱ nga̱tsjo̱ó katsꞌenkaxoma an jaꞌée̱n ji Ne,

⁵⁶ kó ji kandaꞌyé ji nda̱na, ¡kó ikꞌíchjéjín ji tji̱bo̱a̱nijin kjiꞌanga ni̱ma̱ kixian an!

⁵⁷ ¡Ni̱xtjin nga tsíchji̱a̱a̱ ji, kꞌichintiñíní, kó bi̱ kasení: Ngata̱ ndakinjín má ji!

⁵⁸ Kaꞌnaxiéꞌéní ji Ne, kjo̱a̱a̱ ni xi kjimana, kó kaꞌnaxiéꞌé ji kjo̱a̱mindyionna.

⁵⁹ Jè kamáyè ji kjo̱a̱ni̱ma̱ xi tsꞌénfoaꞌatio an ji Ne, ngo kjo̱a̱nda, ¡tasíke̱jení nga kixi̱ tsꞌén ka̱masenna!

⁶⁰ Jè kamáyè ji nga katsꞌéngojo, ko̱jo kamáyè ji ngayeje ni xi ndyi̱ꞌbínda kondra̱ tsa̱ꞌa̱n.

⁶¹ Jè kandaꞌyé ji Ne, nga chꞌo ndyi̱tsóna, ko̱jo ngayeje ni xi ndyi̱ꞌbínda kondra̱ tsa̱ꞌa̱n.

⁶² Jè yé ji ngayeje ni xi ndyi̱chji̱a̱ kondra̱na, ko̱jo nga, nga ngo ni̱xtjii̱n nga an ndyi̱chji̱a̱taꞌinna.

⁶³ Tsitsíjìi̱n ngatꞌa̱ nga ꞌbíndo ko̱jo nga fostjíe̱n ngo nga án ndyi̱mojnókiena.

⁶⁴ Ta̱nga ji Ne, jí boá xi ko̱e̱ꞌéchjíi̱ kjo̱a̱a̱ xikó kjiꞌi ni xi katsꞌén.

⁶⁵ Jí boá xi si̱ꞌintejé jí ini̱ma̱a̱, kó kuí ngatꞌákanieé ni xi ndajiín.

⁶⁶ Ti̱yítji̱ngìi̱ kjiꞌanga tiniꞌíxchín jí Ne, kó ti̱ꞌinkjieni ji kui nga̱sondiee̱.