Juaa̱ 6 - Xo̱jo̱n eén Néná

Bi̱ tsꞌén katsꞌénkjíén Kjisoo̱ ún mi̱ xota̱

¹ Ngije kamá kui nii̱, Kjisoo̱ kijí xi ingoboaá ngi̱ndiò tsie xi tikón nangi Ngalilea̱, kui xi ti̱ Tiberia̱ ꞌmií nga.

² Kó achichí má xota̱ xi kijítji̱ngii̱, ngatꞌa̱ kamábe ngayeje kjo̱a̱ndikón xí katsꞌén nga katsꞌéndaya xota̱ xi oo̱n.

³ Kó Kjisoo̱ kijínijíngí ngo tji̱ngi̱, kósꞌe̱ ki̱a̱ kisꞌijñando ko̱jo xota̱ tsi̱ꞌe̱.

⁴ Kó je kjimatiñaa̱ nga ka̱ma sꞌué paskuaa̱, sꞌueé já jundíoo̱.

⁵ Nga iskjininkꞌa kje̱n Kjisoo̱, achichí má xota̱ xi kamábe nga ndyi̱fíkoón, kó Kjisoo̱, bi̱ katsoó nga asíyaá Ngiripee̱: –Ñání si̱ꞌantsié pan xi skji̱ni̱e̱ kui xota̱ kjiín.

⁶ Ta̱nga katsó kuí nii̱, ta̱ tsi̱ꞌe̱ nga skótꞌayákón Ngiripee̱, ngatꞌa̱ ja̱bo̱a̱ jè be Kjisoo̱ ni xi sa̱ꞌín.

⁷ Sꞌe̱ Ngiripee̱, bi̱ katsó: –Tsi jó úchán to̱n ndenario̱ pan si̱ꞌantsié, nde kjo̱chóꞌájín tsi ndeta̱ chií tsí sa̱ko̱ó nga ngo nga ngo kui xotaa̱.

⁸ Ngo nda̱ xi xota̱ tsi̱ꞌe̱ Kjisoo̱ xi ꞌmí Jandre̱, ntsꞌi̱e̱ Ximo̱ Peé, bi̱ katsó:

⁹ Kꞌi̱e̱ tikón ngo nda̱ xo̱ngò xi yaꞌa ún pan xi sebanda̱ kamándani ko̱jo jó tji̱o̱, ta̱nga ñá kjo̱chóꞌá kui nii̱ ngayeje kui xotaa̱.

¹⁰ Kósꞌe̱ Kjisoo̱, bi̱ katsó: –Ti̱ꞌankꞌíndotiejnú kui xotaa̱. Kó achichí kꞌijñá kisꞌie kui ngi̱ndiee̱, kó mara̱ tsi ta̱ ún mi̱ jáxíꞌín xi kisꞌińdotiee̱.

¹¹ Kó Kjisoo̱ iskjíbé kuí paa̱n, kó ngije katsjaá ndokꞌóchjì Néná, katsjaá xota̱ tsi̱ꞌe̱, tsi̱ꞌe̱ nga kui jaá sa̱ꞌínkjaꞌasoón ngayeje xota̱ xi síndotiee̱, ti̱ bo̱a̱ ti̱ katsꞌeén tji̱o̱o̱ nga. Kó ngayeje xotaa̱ iskjinie ta̱ xikó kjiꞌi kamámejénrií.

¹² Kó ngije kitsie cha̱n cha̱a̱n xotaa̱, Kjisoo̱ bi̱ katsoó xota̱ tsi̱ꞌe̱: –Chja̱ꞌáꞌyájnú ngayeje pan xi tsꞌangii̱, tsi̱ꞌe̱ nga kjo̱tsònjín.

¹³ Kó kui jaá jaꞌáꞌyá pan xi tsꞌangii̱ kui xi chji̱a̱ni pan xi uún, kó tiejó ni̱se̱nyá kamá.

¹⁴ Kósꞌe̱ nga kamábe kui jaá kui chi̱bo̱a̱ xi katsꞌén Kjisoo̱, bi̱ katsó: –Ja̱koxi̱ boá nga kui nda̱a̱ xi nda̱ chji̱ni̱e̱ꞌe̱én Néná kui xi kjo̱e̱ꞌe kuí nga̱sondiee̱.

¹⁵ Ta̱nga nga kamákjiín Kjisoo̱ nga kui jaá kjo̱jo kjo̱a̱ꞌniú, kó re sa̱ꞌín, kijí soboá nginí nínga tikón tji̱ngi̱i̱.

Bi̱ tsꞌén kistsoꞌbá Kjisoo̱ nga̱soón ndáchíkoón

¹⁶ Kó kjiꞌanga je kamájñoó, xota̱ tsi̱ꞌe̱ Kjisoo̱ kijí tꞌa ndáchíkoón,

¹⁷ kó kijíyà ngo tjotso je nga kijí xtji̱e̱e̱n na̱xi̱ńdáꞌniú Kapernau̱n. Ngije jñoó, Kjisoo̱ kji̱e̱ fochokónjiín kui jaá,

¹⁸ kó kjindibá ngo tjo̱ꞌniú, kó ngaꞌniuú ndáfoaa̱ achichí nkꞌa kamá.

¹⁹ Jera̱ ma tsi ta̱ ún ko̱jo tsi jún kilometro̱ nínga ndyi̱fochó, nga je iskjindaá tjotso jee̱ nga kamábe Kjisoo̱, nga tsoꞌbáyise nga̱soón ndáchíkoón, kó xtji̱e̱e̱n nínga tikón tjotso jee̱ tsꞌénfí, kó achichí katsakjónní kui jaá.

²⁰ Ta̱nga Kjisoo̱, bi̱ katsoó: –Án boá, ngata̱ ndakonjínmájnú.

²¹ Kósꞌe̱ kui jaá achichí tsja kamaá nga Kjisoo̱ tsꞌasꞌien ngi̱ya tjotso jee̱, kó tji̱e̱nmá jachó ngi̱ndie nínga ndyi̱fí.

Xotaa̱ bi̱ tsꞌén tsangase Kjisoo̱

²² Nga kamángindyiojón, xota̱ xi kisꞌińdo xi ingoboaá ndáchíkoón kamábe nga ta̱ ngo tsí má tjotso je xi tikón ki̱a̱a̱, kó nga xota̱ tsi̱ꞌe̱ Kjisoo̱ kijí soboá jmí tsi ko̱jo Kjisoo̱.

²³ Kósꞌe̱ kje̱ꞌe tjotso je xi chji̱a̱ni na̱xi̱ńdáꞌniú Tiberia̱ jachó ngi̱ndie nínga iskjinie pan, ngije Ndi̱a̱a̱ katsjá ndokꞌóchjì.

²⁴ Kjiꞌanga kamábe xotaa̱ nga Kjisoo̱ ko̱jo xota̱ tsi̱ꞌe̱ ki̱a̱jín síndo, kijíyà tjotso jee̱, sꞌe̱ kijí xtji̱e̱e̱n na̱xi̱ńdáꞌniú Kapernau̱n, nga tsangase Kjisoo̱.

Bi̱ tsꞌén katsóyà Kjisoo̱ nga kui boá xi paa̱n kjo̱a̱mindyioo̱n

²⁵ Kó nga kasakoo̱ Kjisoo̱ xi ingoboaá ndáchíkoón, bi̱ katsoó: –Mostro̱, kjiꞌání jéꞌe̱ ji kꞌi̱e̱e̱.

²⁶ Sꞌe̱ Kjisoo̱, bi̱ katsó: –Ja̱koxi̱, ja̱koxi̱ ni xi xiánjnúꞌun nga jún ndyi̱mindyiséjnúꞌun kjo̱a̱a̱ pan xi kichiniejnú, kó katsꞌéntsiejnú, jmí tsi kjo̱a̱a̱ chi̱bo̱a̱ xi kamáyàjnú.

²⁷ Ti̱ꞌanxájnú, ta̱nga jmí tsi kjo̱a̱a̱ nichinie xi fee̱, ta̱sá ti̱ꞌanxájnú kjo̱a̱a̱ nichinie xi tsja̱ajnú kjo̱a̱mindyion ngatsjéni̱xtjii̱n, kui xi tsja̱ajnú ndií nda̱ xi̱ꞌii̱n, ngatꞌa̱ jè Néná xí Na̱ꞌmii̱ katsjáxaá kuí.

²⁸ Sꞌe̱ bi̱ katsó kui jaá: –Mí xí chjiéngá si̱ꞌanjne̱ tsi̱ꞌe̱ nga si̱ꞌanjne̱ xaá Néná.

²⁹ Sꞌe̱ Kjisoo̱, bi̱ katsó: –Kuí xi̱ꞌbi̱ xi xaá Néná, nga si̱ꞌansꞌijinjnú kui xi katsangiya kui.

³⁰ Sꞌe̱ bi̱ katsó kui jaá: –Mí kjo̱a̱ndikón xi si̱ꞌin ji tsi̱ꞌe̱ nga xcha̱jne̱, sꞌe̱ sꞌi̱jinjne̱. Mí xá xi niꞌín jí.

³¹ Xota̱ tji̱e̱ xchájne̱ iskjinie mana̱ xi katsangiyaa̱ Néná ki̱a̱ nangi kixií xikótsꞌèn kjitꞌa xo̱jo̱n eén Néná nínga bi̱ tsoó: “Paa̱n ndiꞌakꞌajmii̱ xí katsjaá xi iskjinie.”

³² Kósꞌe̱ Kjisoo̱, bi̱ katsó: –Ja̱koxi̱, ja̱koxi̱ ni xi xiánjnúꞌun: Moisee̱jín xi katsjájnú paa̱n ndiꞌakꞌajmii̱, ngatꞌa̱ Na̱ꞌmina boá xi tsjá pan xi ja̱koxi̱i̱ ndiꞌakꞌajmii̱.

³³ Ngatꞌa̱ paa̱n Néná, kuí boá xi kjindibáni ndiꞌakꞌajmii̱, kó kuí xí tsjaá kjo̱a̱mindyion xotaa̱ kui nga̱sondiee̱.

³⁴ Sꞌe̱ bi̱ katsó kui jaá: –Ndi̱a̱, te̱ꞌéjne̱ ngatsjéni̱xtjin kui paa̱n.

³⁵ Sꞌe̱ Kjisoo̱, bi̱ katsó: –Án boá kui pan xi tsjá kjo̱a̱mindyioo̱n, xi kjo̱e̱ꞌe̱kónna ngiti̱ ingojín ni̱xtjin nga ka̱ma bojoó, kó xi sa̱ꞌínsꞌijinna, nginijánjín ka̱ma xíndaá.

³⁶ Ta̱nga jè bo̱a̱ kixianjnúꞌun nga ndatsi je kamáyàjnúꞌun, ti̱ kuí xi sꞌijinjín májnú.

³⁷ Ngayeje xota̱ xi je jaꞌájin Na̱ꞌmina, kji̱ndi̱bákónna, kó xi kji̱ndi̱bákónna sa̱ꞌinchꞌójín an,

³⁸ ngatꞌa̱ ndiꞌakꞌajmi jàn kjindibáni an, tsi̱ꞌe̱ nga sa̱ꞌin an ni xi mejeén xi katsangiyana, jmí tsi tsi̱ꞌe̱ nga sa̱ꞌin an ni xi mejénna an.

³⁹ Kó kuí nii̱ xi mejeén Na̱ꞌmina xi katsangiyana: Nga ngayeje ni xi tsja̱ana, ngojín ni xi sa̱ꞌinchaja an, nga ta̱sá sa̱ꞌinkjaꞌáꞌyáa̱ nga kjo̱chó ni̱xtjin nga kju̱i̱e̱tꞌaa̱ kui nga̱sondiee̱.

⁴⁰ Ngatꞌa̱ kuí nii̱ xi mejeén na̱ꞌmina: Nga ngayeje xota̱ xi be ndií, kó xi sꞌijii̱n, sa̱ko̱ó kjo̱a̱mindyion ngatsjéni̱xtjii̱n, kó an sa̱ꞌinkjaꞌáꞌyáa̱ nga kjo̱chó ni̱xtjin nga kju̱i̱e̱tꞌa kui nga̱sondiee̱.

⁴¹ Sꞌe̱ já jundíoo̱ tsíchji̱a̱jo si̱e̱n xkjín kjo̱a̱a̱ nga Kjisoo̱, bi̱ katsó: “Án boá pan xi kjindibáni ndiꞌakꞌajmi jàn”,

⁴² kó bi̱ katsoó xkjín: –A kuijín xi̱ꞌbi̱ xi Kjisoo̱, ndií Kosiee̱. A yàjín ñá ꞌyání xi na̱ꞌmii̱ ko̱jo na̱aa̱n. Ja̱ kótsꞌèn bo̱a̱ tsóni nga ndiꞌakꞌajmi jàn xò kjindibáni.

⁴³ Sꞌe̱ Kjisoo̱, bi̱ katsó: –Ngata̱ ndokjo̱a̱taꞌínjínjnú xingi̱jnú.

⁴⁴ Nde ngojín xota̱ xi ka̱maa̱ kjo̱e̱ꞌe̱kónna, tsi kuijín Na̱ꞌmi xi jeꞌejo̱na xi kjo̱e̱ꞌéjo̱, kó an sa̱ꞌinkjaꞌáꞌyáa̱ kui xotaa̱, nga kjo̱chó ni̱xtjin nga kju̱i̱e̱tꞌaa̱ kui nga̱sondiee̱.

⁴⁵ Jè bi̱ tsó ni xi kjitꞌa ngo xo̱jo̱n xi katsꞌénꞌindó já chji̱ni̱e̱ꞌe̱én Néná: “Kó Néná xi ko̱kóyaá ngayeje xotaa̱”, ngayeje xota̱ xi tsintꞌieé Na̱ꞌmina, kó kamaá ni xi akóyaá, kuí boá xi kji̱ndi̱bákónna.

⁴⁶ Kji̱e̱ ngo xota̱ xi be kókjiꞌi Na̱ꞌmii̱, ta̱kuítsí xi katsangiya Néná xí be kókjiꞌi Na̱ꞌmii̱.

⁴⁷ Ja̱koxi̱, ja̱koxi̱ ni xi xiánjnúꞌun: Xi sa̱ꞌínsꞌijinna, sa̱ko̱ó kjo̱a̱mindyion ngatsjéni̱xtjii̱n.

⁴⁸ Án boá kui paa̱n kjo̱a̱mindyioo̱n.

⁴⁹ Xota̱ tji̱e̱ xchájnú iskjinie mana̱ xi katsangiyaa̱ Néná ki̱a̱ nangi kixií, kó jesón ngayejee̱.

⁵⁰ Kuí xi̱ꞌbi̱ pan xi jatjajenni ndiꞌakꞌajmi jàn, tsi̱ꞌe̱ nga xi skji̱ni̱e̱, ngiti̱ ko̱yàjín.

⁵¹ Án boá kui pan xi tikón xi jatjajenni ndiꞌakꞌajmi jàn, tsi tjín xí skji̱ni̱e̱ kui paa̱n, kꞌuijñá ngatsjéni̱xtjin, kó kui pan xi tsjàa̱ yojona boá, kui xi tsja an kjo̱a̱nda tsi̱ꞌe̱ kjo̱a̱mindyioo̱n kui nga̱sondiee̱.

⁵² Sꞌe̱ já jundíoo̱ askjoyájo̱ xkjín, nga bi̱ katsó: –Kótsꞌèn ka̱maa̱ xi̱ꞌbi̱ nga tsja̱aná yojoo̱ tsi̱ꞌe̱ nga xi̱ni̱e̱.

⁵³ Sꞌe̱ Kjisoo̱, bi̱ katsó: –Ja̱koxi̱, ja̱koxi̱ ni xi xiánjnúꞌun: Tsi xi̱ni̱e̱jínjnú yojoo̱ ndií nda̱ xi̱ꞌii̱n, kó tsi sꞌi̱o̱jínjnú jiín, jmíjínjnú kjo̱a̱mindyioo̱n.

⁵⁴ Xi skji̱ni̱e̱ yojona, ko̱jo xi kꞌuí jínna, tjiín kjo̱a̱mindyion ngatsjéni̱xtjii̱n, kó an sa̱ꞌinkjaꞌáꞌyáa̱ ni̱xtjin nga kju̱i̱e̱tꞌaa̱ kui nga̱sondiee̱.

⁵⁵ Ngatꞌa̱ yojona, nichinie ja̱koxi̱ boá, kó jínna ni ꞌyó ja̱koxi̱ boá.

⁵⁶ Xi skji̱ni̱e̱ yojona kó xi kꞌuí jínna, kui kꞌuijñájinna, kó an kotíjña̱jìi̱n.

⁵⁷ Xikó tsꞌén katsangiyana Na̱ꞌmina xi tikoón, kó ta̱ngatꞌanii̱ kui nga tikòn an, ti̱ bo̱a̱ ti̱ tsꞌén xi skji̱ni̱e̱ yojona, kꞌuijñá ta̱ngatꞌanii̱ an.

⁵⁸ Kuí xi̱ꞌbi̱ pan xi jatjajenni ndiꞌakꞌajmi jàn, jmí tsi xikoó xota̱ tji̱e̱ xchájnú nga iskjinie mana̱ xi katsangiyaa̱ Néná, kó jesón ngayejee̱, ta̱nga xi skji̱ni̱e̱ kui paa̱n, kꞌuijñá ngatsjéni̱xtjin.

⁵⁹ Ngayeje kui nii̱ xi katsó Kjisoo̱ nga kisꞌijña ndiꞌa nínga ndokjo̱a̱ eén Néná, ki̱a̱ na̱xi̱ńdáꞌniú Kapernau̱n.

Bi̱ tsꞌén katsóyà Kjisoo̱ eén kjo̱a̱mindyion ngatsjéni̱xtjii̱n

⁶⁰ Nga tsintꞌié kuí eén, achichí má xota̱ tsi̱ꞌe̱ Kjisoo̱, xi bi̱ katsó: –Achichí tajá kuí eén, ꞌyá xí ka̱makjiín nga ku̱i̱ntꞌiè.

⁶¹ Ja̱ bo̱a̱ je be Kjisoo̱ kjo̱a̱a̱ ni xi ndyi̱chji̱a̱si̱e̱n xota̱ tsi̱ꞌe̱, kó bi̱ katsoó: –A chꞌo májnú kuí eén.

⁶² Ja̱, kó ka̱majnú tsi xcha̱jnú nga ndií nda̱ xi̱ꞌii̱n ko̱e̱je̱nijíngí nginí nínga ja̱bo̱a̱ tikón.

⁶³ A̱si̱énni̱xtjii̱n xí tsjá kjo̱a̱mindyioo̱n, yojoo̱ jmí ni chjíjiín, én xí je kixiyajnúꞌun, kuí xí a̱siénni̱xtjin, kó kuí xí kjo̱a̱mindyioo̱n.

⁶⁴ Ta̱nga tjín jún xi sꞌijinjínjnú. Ngatꞌa̱ Kjisoo̱ ja̱bo̱a̱ je be ndeskande koó nga ítsꞌi̱yanii̱ ꞌyá xota̱ xi sꞌijinjiín, kó ꞌyání xi ko̱tíñá.

⁶⁵ Kó bi̱ katsó Kjisoo̱: –Ja̱ kuíni je bo̱a̱ kixianjnúꞌun nga nde ngojín xi ko̱e̱je̱konna, tsi Na̱ꞌminajín xi tsja̱á kjo̱a̱.

⁶⁶ Ti̱ kjiꞌa achichí má xota̱ tsi̱ꞌe̱ Kjisoo̱ xi íjñámasien, kó ngiti̱ kijítji̱ngijiín.

⁶⁷ Sꞌe̱ Kjisoo̱, bi̱ katsoó xota̱a̱ xi tiejoó: –A ko̱jo jún mejénjnú kongínjnú.

⁶⁸ Sꞌe̱ Ximo̱ Peé, bi̱ katsó: –Ndi̱a̱, ꞌyá xí kongínchonjne̱. Xi jí boá xi tjiín eén kjo̱a̱mindyion ngatsjéni̱xtjii̱n.

⁶⁹ Kó ji̱n jè kisꞌijinjne̱, kó je yàjne̱ nga ji xi Kristoo̱, ndií Néná xí tikoón.

⁷⁰ Sꞌe̱ Kjisoo̱, bi̱ katsó: –A ánjín xi jaꞌajinjnúꞌun nga tiejójnú. Ta̱nga ngo jún xi xindajín ndiabloo̱ chji̱a̱ni.

⁷¹ Kjisoo̱ katsó kui nii̱, kjo̱a̱a̱ Junda̱ Iskariotee̱, ndií Ximoo̱, ngatꞌa̱ kuí xíꞌbi̱ xi jaskan ko̱tíñá, kó kuí boá xi chji̱a̱ni ngo nda̱ xi tiejó xi jaꞌájin Kjisoo̱.