Juaa̱ 3 - Xo̱jo̱n eén Néná

Kjisoo̱ bi̱ tsꞌén tsíchji̱a̱ni̱jmìjo Nikondemoo̱

¹ Ngo nda̱ fariseo̱ kisꞌijña kui ngi̱ndiee̱ xi ꞌmí Nikondemo̱, xi nda̱ ngito̱ko̱o̱ xota̱ jundíoo̱ kamá,

² kui nda̱a̱ kijíkatsijee̱n Kjisoo̱ nga jñoó, kó bi̱ katsoó: –Mostro̱, jè yàjne̱ nga Néná katsangiyaa ji nga mostro̱ ji, ngatꞌa̱ jmíjín xi sa̱ꞌín kui chi̱bo̱a̱ ndikón xí niꞌín ji tsi Nénájín tikónjo̱.

³ Sꞌe̱ Kjisoo̱, bi̱ katsó: –Ja̱koxi̱, ja̱koxi̱ ni xi xiáa̱n nga tsi ngo xi stse̱njín nginí, ka̱májiín sku̱i̱e̱ xikótsꞌèn botixómá Néná.

⁴ Sꞌe̱ bi̱ katsó Nikondemoo̱: –Kótsꞌèn ka̱maa̱ stse̱n nginí ngo nda̱ tsi je xchá. A ka̱márií kꞌo̱sꞌien nginí xi ma joó ndi̱yà ndo̱bo̱a̱ndií na̱aa̱n, sꞌe̱ stse̱n nginí.

⁵ Sꞌe̱ Kjisoo̱, bi̱ katsó: –Ja̱koxi̱, ja̱koxi̱ ni xi xiáa̱n nga tsi ngo xi ndáfoajín ko̱jo A̱si̱énni̱xtjii̱n Nénájín stse̱n nginí, ka̱májiín kꞌo̱sꞌien nínga botixómá Néná.

⁶ Tsi ngo xota̱ xi yojo nga katsen, yojo boá, kó tsi xi ngatꞌaa̱ nga A̱siénni̱xtjin Néná stse̱nní, a̱siénni̱xtjin boá.

⁷ Ngata̱ nda̱jín maá kjo̱a̱a̱ nga bi̱ kixiaan: “Chjiéngá ingo ndi̱yà stse̱n nginíjnú.”

⁸ Tjo̱o̱ botsié ta̱ nínga mejénrií, kó ndaꞌyé ji nga fonie, ta̱nga nde yejín ñá tsꞌéndibání, kó ti̱nde yejín ji ñá tsꞌénfí, bo̱a̱ fóyanii̱ ngayeje xota̱ xi A̱si̱énni̱xtjii̱n Néná katsenni.

⁹ Kó ti̱ tsíchji̱a̱ nginí Nikondemoo̱, nga bi̱ katsó: –Kó kótsꞌèn nga ka̱ma kui nii̱.

¹⁰ Sꞌe̱ Kjisoo̱, bi̱ katsó: –Ngo mostro̱ xi chji̱a̱ni Israee̱l ji, kó a yejín ji kui nii̱.

¹¹ Ja̱koxi̱, ja̱koxi̱ ni xi xiáa̱n ji, nga ni xi yàjne̱ ndokjo̱a̱jne̱, kó ni xi kamáyàjne̱, kuí ni xi ꞌmíyajne̱, ta̱nga sꞌijinjín májnú ni xi ndyi̱ndokjo̱a̱jne̱.

¹² Tsi nii̱ kui nga̱sondiee̱ xi tsíchji̱a̱jojnúꞌun, kó sꞌijinjín májnú, ja̱ kótsꞌèn ka̱ma sꞌi̱jinjnú tsi nii̱ ndiꞌakꞌajmii̱ xi kuichjiájojnúꞌun.

¹³ Kó nde kji̱e̱ ngo xi fí ndiꞌakꞌajmi jàn, ta̱kuítsí xi jatjajenni ndiꞌakꞌajmi jàn, kuí xí ndií nda̱ xi̱ꞌii̱n, xi tikón ndiꞌakꞌajmi jàn.

¹⁴ Kó xikótsꞌèn iskjininkꞌa Moisee̱ ye̱e̱ ki̱a̱ nangi kixií, ti̱ bo̱a̱ ti̱ tsꞌén chjanínkꞌá ndií nda̱ xi̱ꞌii̱n nga,

¹⁵ tsi̱ꞌe̱ nga ngayeje xi sꞌijii̱n kui, xcha̱jàjín, kó ta̱sá ngatꞌieé kjo̱a̱mindyion ngatsjéni̱xtjii̱n.

Bi̱ tsꞌén kamátjoó Néná xotaa̱ kui nga̱sondiee̱

¹⁶ Ngatꞌa̱ Néná achichí tjó kamaá xotaa̱ kui nga̱sondiee̱, nga katsjá ndí ngototoo̱, tsi̱ꞌe̱ nga ngayeje xi sꞌijii̱n kui, xcha̱jàjín, kó ta̱sá ngatꞌieé kjo̱a̱mindyion ngatsjéni̱xtjii̱n.

¹⁷ Ngatꞌa̱ Néná jmí tsi katsangiya ndií kui nga̱sondiee̱ tsi̱ꞌe̱ nga sa̱ꞌínjeé xotaa̱, katsangiya tsi̱ꞌe̱ nga kui ndií xi kꞌo̱xiéꞌá xotaa̱.

¹⁸ Xi sꞌi̱jii̱n kui, ka̱majéjiín, ta̱nga xi sꞌi̱jinjiín kui, jè tji̱e̱e̱n jé, ngatꞌa̱ kisꞌijinjiín jaꞌeén ndí ngototoo̱ Néná.

¹⁹ Ta̱ngatꞌanii̱ kui nii̱ nga ka̱majéná: Ngatꞌa̱ ndiꞌií jeꞌe kui nga̱sondiee̱, ta̱nga xotaa̱ tjó ngase kamaá kjo̱a̱jñoó ta̱bo̱a̱jiín ndiꞌií, ngatꞌa̱ ndajínkjiꞌi ni xi katsꞌén kui xotaa̱.

²⁰ Ngatꞌa̱ ngayeje xota̱ xi ndajínkjiꞌi ni xi ndyi̱tsꞌèn, chꞌoo̱ ndiꞌí xí tsꞌentsíjee̱n, kó fíkón tiñajiín ndiꞌií, tsi̱ꞌe̱ nga xcha̱jín ni xi ndyi̱tsꞌèn,

²¹ ta̱nga xota̱ xi ni xi ja̱koxi̱ ndyi̱tsꞌèn, fíkoón ndiꞌií, tsi̱ꞌe̱ nga ka̱maya ngayeje ni xi ndyi̱tsꞌèn nga ndyi̱tsꞌènkjátjosoón Néná.

Juaa̱ bi̱ tsꞌén katsóyà kjo̱a̱a̱ Kjisoo̱

²² Jaskan ngije kamá kui nii̱, Kjisoo̱ ko̱jo xota̱ tsi̱ꞌe̱ kijí nangi Jundea̱, kó ki̱a̱ kisꞌijñajo̱ kui jaá, kó kjín xota̱ atíndá.

²³ Kó ti̱ ki̱a̱ kisꞌijña Juaa̱ nga atíndá xota̱ ki̱a̱ na̱xi̱ńdá Enoo̱n, tꞌa na̱xi̱ńdá Salii̱n, ngatꞌa̱ achichí ndáfoa kisꞌie ki̱a̱a̱, kó xotaa̱ ki̱a̱ kijí tsi̱ꞌe̱ nga kastindá.

²⁴ Kui nii̱ kamá ngindiee̱ nga kisiꞌya ndo̱bo̱a̱yà Juaa̱.

²⁵ Sꞌe̱ já xí xota̱ tsi̱ꞌe̱ Juaa̱ ko̱jo ngo nda̱ jundío̱ askjoyá kjo̱a̱a̱ xikótsꞌèn sa̱ꞌíntsjie yojoo̱ xotaa̱ ngindyi̱ko̱n Néná.

²⁶ Kó kui jaá kijíkoón Juaa̱, kó bi̱ katsoó: –Mostro̱, kui nda̱ xi tikónjoo̱ ji xi ingoboaá ndejèꞌ Jorndaa̱n kui xi kandokjo̱e̱jejne̱, tsꞌénbotíndá, kó ngayeje xota̱ xi ndyi̱fochókoón.

²⁷ Sꞌe̱ bi̱ katsó Juaa̱: –Nde ngojín xota̱ xi skjíbé ngo ni, tsi ndiꞌakꞌajmii̱jín xi tsja̱á.

²⁸ Ti̱ júnní xi chistiko̱na kamájnú nga bi̱ kixian an: Ánjín xi Kristoo̱, án boá xí kanangiyatjónna.

²⁹ Kjiꞌanga ma ngo ndiꞌibixan, kuí nda̱ xi ku̱i̱xaa̱n xi tsi̱ꞌe̱ ka̱ma na̱ xi ku̱i̱xaa̱n, ta̱nga nda̱ amingoo̱ nda̱ xi ku̱i̱xaa̱n xi tikóntꞌaa̱ ntꞌieé, kó ꞌniú tsja maá ni xi tsó nda̱ xi ku̱i̱xaa̱n, bo̱a̱ tsꞌén nga je kjimando̱jo kjo̱a̱tsjana ngotꞌe̱.

³⁰ Kuí boá xi chjiéngá ꞌniú ngase ngatamayandikón, kó an chiboa ngase ngatamayandikónna.

Xi ndibání ndiꞌakꞌajmi jàn

³¹ Kui xi kjindibáni nkꞌa jàn, kuí xí je ngase ta̱bo̱a̱jínnii̱ ta̱ꞌya xota̱ní, kó kui xi nga̱sondiee̱ nangii̱, kuí xí xota̱ nga̱sondie, kó ni xi tsi̱ꞌe̱ nga̱sondiee̱ xí chji̱a̱. Ta̱nga kui xi ndiꞌakꞌajmi jàn kjindibáni, je ngase ta̱bo̱a̱jínnii̱ ta̱ꞌya xota̱ní,

³² kó chji̱a̱ xikoó ngo chistiko̱ kjo̱a̱a̱ ni xi je kamábe, ko̱jo ni xi je tsintꞌié, kó ta̱ꞌyajín xi sꞌi̱jii̱n ni xi tsó.

³³ Kó kui xota̱ xi tjisꞌíjii̱n, kuí xí be nga tjiín kjo̱a̱kixi̱ Néná.

³⁴ Ngatꞌa̱ kui xi katsangiya Néná, eén Néná xí chji̱a̱, ngatꞌa̱ Néná tsjaá ngayeje ngaꞌniuú.

³⁵ Néná xí Na̱ꞌmii̱ tjoó ndií, kó ngayeje nii̱ ngi̱ya tsja íjñá.

³⁶ Xi sꞌijii̱n ndií Néná, tjiín kjo̱a̱mindyion ngatsjéni̱xtjii̱n, ta̱nga xi sꞌijinjiín sa̱kójiín kjo̱a̱mindyioo̱n, ta̱sá kjo̱a̱xcha̱án Néná sa̱ko̱ó.