Juaa̱ 21 - Xo̱jo̱n eén Néná

Kjisoo̱ bi̱ tsꞌén akoó yojoo̱ yito xota̱ tsi̱ꞌe̱

¹ Ngije kamá kui nii̱, Kjisoo̱ akó nginií yojoo̱ xota̱ tsi̱ꞌe̱ tꞌa ngi̱ndi̱o̱ tsie Tiberia̱, kó bi̱ kamá nga akoó yojoo̱ kui jaá:

² Síndotikó Ximo̱ Peé, ko̱jo Tomaa̱ xi Nda̱ꞌni̱o̱ kiꞌmií nga, ko̱jo Natanaee̱l xi chji̱a̱ni na̱xi̱ńdá Kanaa̱ nangi xi tikón ngi̱jii̱n nangi Ngalilea̱, ko̱jo ndií Sebedeoo̱, ko̱jo ngi jó xota̱ tsi̱ꞌe̱ Kjisoo̱.

³ Kó Ximo̱ Peé, bi̱ katsoó kui jaá: –Nda̱ꞌya mára tsꞌénfíkijen an. Sꞌe̱ bi̱ katsó kui jaá: –Tjián, kongínjo̱jne̱ ji̱n. Kijí kui jaá, kó tsꞌasꞌien ngo tjotso je, kó kui jñoó nde ngo tji̱o̱ kjíyájiín.

⁴ Ngije masisie̱én, jachó Kjisoo̱ tꞌa chji̱ndi̱e̱e̱ ngi̱ndi̱o̱ò, ta̱nga xota̱ tsi̱ꞌe̱ kamábejín tsi Kjisoo̱ xi jachókoón.

⁵ Sꞌe̱ Kjisoo̱, bi̱ katsoó kui jaá: –Jún bo̱a̱ ndí, a jmíjín chiíjnú nichinie. Jmíjínjne̱ katsó kui jaá.

⁶ Kó Kjisoo̱, bi̱ katsó: –Tjiénjnú nda̱ꞌyajnú xtji̱e̱e̱n nga kixi̱i̱ tjotso jee̱, kó ki̱a̱ kjo̱yajnú tji̱o̱. Sꞌe̱ kui jaá katsꞌén ni xi kiꞌmií, kó ta̱ꞌya kamaá nga tsꞌaxié nda̱ꞌya̱a̱, ngatꞌa̱ achichí tji̱o̱ tsaꞌa.

⁷ Sꞌe̱ kui nda̱ xi xota̱ tsi̱ꞌe̱ xi achichí tjó katsꞌén Kjisoo̱, bi̱ katsoó Peé: –¡Ndi̱a̱a̱ boá! Kósꞌe̱ Ximo̱ Peé, nga tsintꞌié nga Ndi̱a̱a̱ xi̱ꞌba̱, tsajá ńjñoo̱, ngatꞌa̱ ja̱bo̱a̱ je yeꞌé ńjñoo̱, kó tsꞌajmijin yojoo̱ ngi̱jin ndáfoaa̱,

⁸ ta̱nga xota̱ tsi̱ꞌe̱ Kjisoo̱ xi ngase xi síndoyá ngi̱ya tjotso jee̱ kijítji̱ngii̱ Peé, kó iskjifé nda̱ꞌya xi achichí tji̱o̱ yaꞌaa̱, ngatꞌa̱ mara̱ tsi ta̱ tiña úchán metro̱ nínga tikóntꞌa chji̱ndi̱e̱e̱.

⁹ Nga jachó kui jaá tꞌa chji̱ndi̱e̱e̱ ngi̱ndi̱o̱ò, kamábe ngo nge̱ꞌe nínga tjítsjó ngo tji̱o̱ ko̱jo ngo pan.

¹⁰ Sꞌe̱ Kjisoo̱, bi̱ katsó: –Ndibájo̱jnú jó tji̱o̱ xi kandobájnú ngotꞌe̱ má.

¹¹ Kijíyà Ximo̱ Peé tjotso jee̱, kó iskjifé nda̱ꞌya̱a̱ nínga kixií, tjikítsie ma tji̱o̱ yiꞌi nda̱ꞌya̱a̱, úchán ichítié ko̱jo ján tji̱o̱ yiꞌi yaꞌa, kó ndatsi achichí kjín má, katjondiyájín nda̱ꞌya̱a̱.

¹² Sꞌe̱ Kjisoo̱, bi̱ katsó: –Ja̱bíjnúꞌun, kó chi̱ni̱e̱jnú. Kó nde ngojín xota̱ tsi̱ꞌe̱ xi kamámejeén asíyaá ꞌyá kuií bo̱a̱, ngatꞌa̱ be nga Ndi̱a̱a̱ xi̱ꞌba̱.

¹³ Sꞌe̱ Kjisoo̱ jachó tiña, kó iskjíbé paa̱n, kó katsjaá, kó ti̱ bo̱a̱ tsꞌén katsjaá tji̱o̱o̱ nga.

¹⁴ Kuí xi̱ꞌbi̱ xi ma jaán ndi̱yà nga Kjisoo̱ akoó yojoo̱ xota̱ tsi̱ꞌe̱, ngije ja̱bo̱a̱ je jaꞌáꞌyaá ngi̱jii̱n xota̱ xi je jesoón.

Kjisoo̱ bi̱ tsꞌén katsjáxaá Peé

¹⁵ Ngije iskjinie ṉño̱, Kjisoo̱, bi̱ katsoó Ximo̱ Peé: –Ximoo̱, ndií Jonaa̱, a ꞌniú ngase tjoó án, ta̱bo̱a̱jiín kui jaá. Sꞌe̱ bi̱ katsó Ximo̱ Peé: –Jo̱o̱n, Ndi̱a̱, jè yé ji nga tjóna ji. Sꞌe̱ Kjisoo̱, bi̱ katsó: –Chíi̱n cho̱tsa̱nga̱na.

¹⁶ Sꞌe̱ bi̱ katsó nginí Kjisoo̱ xi ma jó ndi̱yà: –Ximoo̱, ndií Jonaa̱, a tjoó án. Sꞌe̱ bi̱ katsó Peé: –Jo̱o̱n, Ndi̱a̱, jè yé nga tjóna ji. Sꞌe̱ Kjisoo̱, bi̱ katsó: –Te̱ꞌée̱ ndi̱xcho̱ cho̱tsa̱nga̱na.

¹⁷ Sꞌe̱ xi ma jaán ndi̱yà Kjisoo̱ asíyá nginií Ximo̱ Peé, nga bi̱ katsó: –Ximoo̱, ndií Jonaa̱, a tjoó án. Sꞌe̱ Peé ndasen kamaá nga xi ma ján ndi̱yà nga Kjisoo̱, bi̱ katsó: –A tjoó án. Kó bi̱ katsó Peé: –Ndi̱a̱, ji jè yé ji ngayeje nii̱, kó ja̱ jè yé ji nga tjóna ji. Sꞌe̱ Kjisoo̱, bi̱ katsó: –Chíi̱n cho̱tsa̱nga̱na.

¹⁸ Ja̱koxi̱, ja̱koxi̱ ni xi xiáa̱n: Nga kjiꞌanga kjindí ngase ji, ti̱ jíní xi kichejé ji ńjñóo̱, ko̱jo ta̱ nínga kamámejeénri kꞌin, ta̱nga ngije ka̱maxchá jí, chjanínkꞌé ndse̱, kó kje̱ꞌe xí sa̱ꞌínkajaá ńjñóo̱, kó nínga mejénjiín kꞌuín, kó ki̱a̱ kongínjoo̱.

¹⁹ Kjisoo̱ katsó kui nii̱ kjo̱a̱a̱ kótsꞌèn nga ko̱yà Peé, kó nga bo̱a̱ tsꞌén tsja̱á kjo̱a̱je Néná. Kó ngije katsó kui nii̱, bi̱ katsó ngase: –Ndibétji̱ngíní.

Nda̱ xi ꞌniú tjó kamaá Kjisoo̱

²⁰ Peé askotsijen nga̱xto̱n, kó kamábe nga tji̱e̱ngii̱ nda̱ xi xota̱ tsi̱ꞌe̱ Kjisoo̱ kui xi tjó katsꞌén, kui nda̱ xi ítꞌaa̱ to̱ko̱ ni̱se̱e̱n Kjisoo̱, kjiꞌanga iskjinie ṉño̱ nga kamájñoó nga kamá sꞌué paskuaa̱, xi bi̱ katsoó Kjisoo̱: “Ndi̱a̱, ꞌyá xí sa̱ꞌínkꞌasꞌiee̱n.”

²¹ Nga kamábe Peé kui nda̱a̱, bi̱ katsoó Kjisoo̱: –Ndi̱a̱, kó kui nda̱a̱, mí xí sa̱ꞌín.

²² Sꞌe̱ Kjisoo̱, bi̱ katsó: –Tsi mejénna nga kꞌuijñá kui nda̱a̱ ngaskande nga kji̱ndi̱bá an, kó jí, mí ndaseén. Ndibétji̱ngíní jí.

²³ Kui eén ngayeje já ntsꞌiee̱ xi tsintꞌié, nga kui nda̱ xi xota̱ tsi̱ꞌe̱ Kjisoo̱ kui xi tjó kamaá, ko̱yàjín, ta̱nga Kjisoo̱ jmí tsi katsó nga ko̱yàjín, bi̱ katsó: “Tsi mejénna an nga kui kꞌuijñá ngaskande nga kji̱ndi̱bá an, kó jí, mí ndaseén.”

²⁴ Kuí xi̱ꞌbi̱ nda̱ xi xota̱ tsi̱ꞌe̱ Kjisoo̱ xi katsóyà ngayeje kui nii̱, kó kuí xí katsꞌénꞌindó kui nii̱, kó jè ya ñá nga ja̱koxi̱ ni xi katsóyà.

²⁵ Kó achichí má ni xi tjín ngase xi katsꞌén Kjisoo̱, ni xi tsi xo̱jo̱n akjatꞌa nga ngo nga ngo, tsꞌenkjó án nga nde kisꞌiénjínra̱ xo̱jo̱n xi tjín nga̱sondiee̱. Bo̱a̱ kjiꞌi.