Juaa̱ 2 - Xo̱jo̱n eén Néná

Bi̱ tsꞌén katsꞌén Kjisoo̱ ngo kjo̱a̱ndikón ngi̱jii̱n ngo ndiꞌibixan

¹ Kó xi ma ján ni̱xtjin kamá ngo ndiꞌibixan na̱xi̱ńdá Kanaa̱, ngi̱ndie xi tikónjii̱n nangi Ngalilea̱, kó ki̱a̱ kisꞌijña na̱aa̱n Kjisoo̱,

² kó ti̱ kiꞌmíyaà Kjisoo̱ ko̱jo xota̱ tsi̱ꞌe̱, tsi̱ꞌe̱ nga kijí kui ndiꞌibixaa̱n nga.

³ Kó kjiꞌanga je je binoo̱, na̱aa̱n Kjisoo̱, bi̱ katsó: –Jè ngiti̱ jmí bino̱jín.

⁴ Kó Kjisoo̱, bi̱ katsó: –Ji xota̱chjo̱on, ta̱nga mí xí be an kjo̱a̱a̱ kui nii̱. Kji̱e̱ fochójín chi̱bo̱a̱na.

⁵ Sꞌe̱ na̱aa̱n Kjisoo̱, bi̱ katsoó já xí ndyi̱tsꞌènseén yámíxa̱a̱: –Ti̱ꞌánjnú ngayeje ni xi ka̱tso̱jnú Kjisoo̱.

⁶ Kó kui ngi̱ndiee̱ kisꞌińdo jun tina̱xa̱ ndi̱jo̱ xi mindyia ndáfoa, xi sꞌi̱e̱nra̱ úchán litro̱ ndáfoa nga ngo nga ngo, kui nii̱ xi katsꞌénkjién já jundíoo̱ nga katsꞌéntsjie yojoo̱ ngindyi̱ko̱n Néná.

⁷ Kó Kjisoo̱, bi̱ katsoó já xí ndyi̱tsꞌènseén yámíxa̱a̱: –Tꞌíkitsiejnú ndáfoa kui tina̱xa̱a̱. Kó kui jaá íkitsie són són ndáfoa.

⁸ Sꞌe̱ Kjisoo̱, bi̱ katsó nginií: –Chií ꞌna̱xiéjnú, kó tangínjo̱jnúu̱ nda̱ xi sikóntjoón ndiꞌibixaa̱n, tsi̱ꞌe̱ nga skótꞌa. Kó bo̱a̱ katsꞌén kui jaá.

⁹ Nga askotꞌa nda̱ xi sikóntjoón ndiꞌibixaa̱n ndáfoa xi bino̱ je kamaá, ndatsi nde bejín ñá kjindibáni kui nii̱, ta̱nga be já xí ndyi̱tsꞌènseén yámíxa̱a̱, kó tsíchji̱a̱a̱ nda̱ xi tsꞌénbixaa̱n,

¹⁰ sꞌe̱ bi̱ katsoó: –Ngayeje xotaa̱ tjón mára bino̱ xi nda tsjá, sꞌe̱ ngije ꞌniú katsꞌe xotaa̱, tsjá bino̱ xi ngindiee̱, ta̱nga ji tichjeꞌétjé ji bino̱ xi ndaa̱ ngaskande ngotꞌe̱.

¹¹ Kuí bí xi̱ꞌbi̱ chi̱bo̱a̱ ndikón xi tjón katsꞌén Kjisoo̱ na̱xi̱ńdá Kanaa̱, ngi̱ndie xi tikónjii̱n nangi Ngalilea̱. Kó bo̱a̱ tsꞌén akó kjo̱a̱jee̱, kó xota̱ tsi̱ꞌe̱ Kjisoo̱ kisꞌijii̱n.

¹² Ngije kamá kui nii̱, kijí xtji̱e̱e̱n na̱xi̱ńdáꞌniú Kapernau̱n, Kjisoo̱, ko̱jo na̱aa̱n, ko̱jo ntsꞌi̱e̱, ko̱jo xota̱ tsi̱ꞌe̱, kó ta̱ chiboa tsí ni̱xtjin kamaá ki̱a̱a̱.

Bi̱ tsꞌén tsꞌaxié Kjisoo̱ já xí ndyi̱botiñá cho̱ ndi̱tsee̱n na̱ngo̱xi̱i̱

¹³ Kó kjiꞌanga je tikón tiña sꞌué paskuaa̱ xota̱ jundíoo̱, Kjisoo̱ kijí na̱xi̱ńdáꞌniú Jerusale̱n.

¹⁴ Kó ki̱a̱ ndi̱tsen na̱ngo̱xi̱i̱ kamábe xota̱ xi ndyi̱botiñá cho̱yojo toro̱, ko̱jo cho̱tsa̱nga̱, ko̱jo tójo, ko̱jo xota̱ xi ndyi̱bosíkjo to̱o̱n xi xió síndo,

¹⁵ kó nga kamábe kui nii̱ Kjisoo̱, iskjíbé ngo ńꞌniú xi kjín yíkjoo̱, sꞌe̱ tsangatji̱ngii̱ ki̱a̱ na̱ngo̱xi̱i̱ ngayeje kui xotaa̱, ko̱jo cho̱tsa̱nga̱a̱, ko̱jo cho̱yojo xi̱ꞌii̱n, kó atítsojo to̱o̱n já xí bosíkjoo̱, sꞌe̱ tsꞌajmitójó yámíxa̱a̱,

¹⁶ kó bi̱ katsoó já xí ndyi̱botiñá tójoo̱: –Chje̱ꞌéxínjnúꞌun kui nii̱ kꞌi̱e̱e̱, ngata̱ ndiꞌa nínga stiñá nijín niꞌánjnú ndiꞌaa̱ Na̱ꞌmina.

¹⁷ Kó xota̱ tsi̱ꞌe̱ Kjisoo̱ jaꞌátsjiee̱n ni xi kjitꞌa xo̱jo̱n eén Néná nínga bi̱ tsó: “Kjo̱a̱chi̱ni̱i̱ ndiꞌàa̱ tjítsꞌénkjié ngaꞌniúna.”

¹⁸ Kó xota̱ jundíoo̱, bi̱ katsó nga tsíchji̱a̱: –Mí chi̱bo̱a̱ xi tiꞌbíjñíjne̱ nga kui nii̱ tiniꞌín ji.

¹⁹ Sꞌe̱ Kjisoo̱, bi̱ katsó: –Ti̱ꞌankjatsónjnú kui na̱ngo̱xi̱i̱, kó xi ma ján ni̱xtjin sa̱ꞌinda ngiñá an.

²⁰ Kósꞌe̱ bi̱ katsó xota̱ jundíoo̱: –Ta̱nga yichán jun nó kamándani kui na̱ngo̱xi̱i̱, kó a ji ján ni̱xtjin ka̱manda nginií.

²¹ Ta̱nga Kjisoo̱, yojoo̱ boá xi na̱ngo̱xi̱ katsoó.

²² Kó kuíni nga, kjiꞌanga jaꞌáꞌyaá Kjisoo̱ ngi̱jii̱n xota̱ xi je jesoón, xota̱ tsi̱ꞌe̱ jaꞌátsjiee̱n nga kui nii̱ xi katsó, kó kisꞌijii̱n xo̱jo̱n eén Néná ko̱jo én xí katsó Kjisoo̱.

Bi̱ tsꞌén kamábe Kjisoo̱ kókón ngayeje xotaa̱

²³ Tji̱e̱nga kisꞌijña Kjisoo̱ na̱xi̱ńdáꞌniú Jerusale̱n ni̱xtjii̱n sꞌué paskuaa̱, achichí má xota̱ xi kisꞌijii̱n jaꞌeén nga kamábe ngayeje kjo̱a̱ndikón xí katsꞌén,

²⁴ ta̱nga Kjisoo̱ kamáꞌniátakónjín kui xotaa̱, ngatꞌa̱ be kókón ngayejee̱,

²⁵ kó jmí kjo̱a̱jín nga tjín xí katsóyaà kókón xotaa̱, ngatꞌa̱ ja̱bo̱a̱ je be kui kókón, ko̱jo kótsꞌèn tsꞌénkjó.