Juaa̱ 14 - Xo̱jo̱n eén Néná

Bi̱ tsꞌén katsóyà Kjisoo̱ nga kui xi ndi̱yà tsi̱ꞌe̱ nga kjóchotꞌáa̱ Na̱ꞌmii̱

¹ Ngata̱ nda̱jín maá ini̱ma̱jnú, sꞌijin ngatamajnú Néná, kó ti̱ sꞌijin ngatamajnú án.

² Ndiꞌaa̱ Na̱ꞌmina achichí ngi̱ndie tjín, tsi bo̱a̱jín kjiꞌi, jera̱ kixiyajnúꞌun, ja̱ je tsꞌénfíkꞌijñándajnúꞌun ngo ngi̱ndie xi tsa̱jún.

³ Kó tsi kjuínkꞌijñandajnúꞌun ngo ngi̱ndie, kjoéꞌe̱ ngiñá an nga kjoéꞌe̱kjaꞌajnúꞌun, tsi̱ꞌe̱ nga nínga kotíjña̱ an ki̱a̱ ku̱i̱ndyionjnú nga.

⁴ Kó ja̱ jè yàjnú ndi̱ya̱à ngi̱ndie nínga tsꞌénfí an.

⁵ Sꞌe̱ bi̱ katsó Tomaa̱: –Ndi̱a̱, yàjínjne̱ nínga tiꞌmi ji, ja̱ kótsꞌèn xcha̱ni ji̱n ndi̱ya̱à.

⁶ Sꞌe̱ Kjisoo̱, bi̱ katsó: –Án boá xi ndi̱ya̱à, ko̱jo xi ja̱koxi̱i̱, ko̱jo xi kjo̱a̱mindyioo̱n, ta̱ꞌyajínni xi kjo̱chókoón Na̱ꞌmii̱ tsi ngatꞌaa̱ ánjín.

⁷ Tsi kamáyàjnúꞌun, ti̱ kamáyàra̱jnú Na̱ꞌmina. Kó ndeskande ngotꞌe̱ ꞌne̱ je yàjnú kuí, ngatꞌa̱ jè ndyi̱tsitsijenjnúu̱.

⁸ Sꞌe̱ bi̱ katsó Ngiripee̱: –Ndi̱a̱, takejne̱ Na̱ꞌmii̱, kó sꞌi̱ngojne̱.

⁹ Sꞌe̱ Kjisoo̱, bi̱ katsó: –Achichí kjín ni̱xtjin je kisꞌijñajinjnúꞌun, kó a kji̱e̱ yejínní Ngiripe̱. Xi je kamábena, ti̱ jè kamábe Na̱ꞌmina nga, kó kótsꞌèn bi̱ se ji: Takejne̱ Na̱ꞌmii̱.

¹⁰ A sꞌijinjiín nga Na̱ꞌmii̱ tikónjìi̱n, kó nga Na̱ꞌmii̱ tikónjinna an. Kó én xí chjiá an jmí tsi én xi tsa̱ꞌa̱n so̱bo̱a̱, tsi̱ꞌe̱ Na̱ꞌmi xi tikónjinna boá, kuí xí tsꞌén ngayeje nii̱.

¹¹ Sꞌijin ngatamaa̱ nga Na̱ꞌmii̱ tikónjìi̱n, kó nga Na̱ꞌmii̱ tikónjinna an, kó tsi jmí, sꞌijin ngatamaa̱ ni xi tjítsꞌen an.

¹² Ja̱koxi̱, ja̱koxi̱ ni xi xiánjnúꞌun: Xi sꞌijii̱n an, xá xí tsꞌen an sa̱ꞌín ndatsa kui nga, kó tsie ngase ni xi sa̱ꞌín, ngatꞌa̱ Na̱ꞌmii̱ tsꞌénfikóo̱n,

¹³ kó ngayeje ni xi chji̱e̱ꞌèe̱ Na̱ꞌmii̱ ngajona, sa̱ꞌin an, tsi̱ꞌe̱ nga xcha̱ kjo̱a̱jee̱ Na̱ꞌmii̱ kjiꞌanga xcha̱ ni xi sa̱ꞌín ndií.

¹⁴ Tsi tjín ni xi chji̱e̱ꞌe ngajona, an sa̱ꞌinkjatjosón an.

Bi̱ tsꞌén katsóyà Kjisoo̱ nga sa̱ngíyáná A̱si̱énni̱xtjii̱n Néná

¹⁵ Tsi tjójnú án, chjiéngá si̱ꞌankjatjosónjnú kjo̱a̱botíxomana.

¹⁶ Kó án ꞌniú kuíꞌáa̱ Na̱ꞌmii̱, nga tsja̱a ingo xi sa̱ꞌíndajonjnú, tsi̱ꞌe̱ nga kꞌuijñájo̱jnú ngatsjéni̱xtjin:

¹⁷ Kuí boá A̱siénni̱xtjin xi ko̱kóyá ja̱koxi̱i̱, kui xi ka̱májín sa̱ko̱ó xotaa̱ kui nga̱sondiee̱, ngatꞌa̱ bejín, ta̱nga jún jè yàjnú, ngatꞌa̱ ki̱a̱ tikónjinjnú, kó ki̱a̱ kꞌuijñájo̱jnú.

¹⁸ Kꞌuijñáxꞌi̱a̱njínjnúꞌun, kji̱ndi̱bákón nginíjnúꞌun.

¹⁹ Ngi chiboa ni̱xtjin, kó xotaa̱ kui nga̱sondiee̱, ngiti̱ sku̱i̱e̱jínna, ta̱nga jún xcha̱jnúꞌun, ngatꞌa̱ tikòn án, kó ti̱ ku̱i̱ndyionjnú ndatsa jún nga.

²⁰ Kui ni̱xtjin jàn xcha̱jnú nga Na̱ꞌmina tikónjìi̱n, kó jún tindyionjinjnúꞌun, kó án tikónjinjnúꞌun jún.

²¹ Xi tikoón kjo̱a̱botíxomana, kó sa̱ꞌínkjatjosón, kuí xi̱ꞌba̱ xi tjoó an, kó xi tjoó an, ti̱ sa̱ꞌíntjó Na̱ꞌmina, kó an sa̱ꞌíntjó an, kó kokòo̱ ꞌyání án.

²² Sꞌe̱ bi̱ katsó Jundaa̱ (ta̱nga jmí tsi Junda̱ Iskariotee̱): –Ndi̱a̱, kótsꞌèn ko̱kéjne̱ ji̱n ꞌyání jí, kó ko̱kéjíi̱n ꞌyání ji xotaa̱ kui nga̱sondiee̱.

²³ Sꞌe̱ Kjisoo̱, bi̱ katsó: –Xi tjoó an, sa̱ꞌínkjatjosón kjo̱a̱botíxomana, kó Na̱ꞌmina tjó sa̱ꞌín, kó kji̱ndibáchonjne̱, kó ngo ngi̱ndie nijan ku̱i̱ndyionjo̱jne̱.

²⁴ Xi tjójiín an, tsꞌénkjátjosónjín kjo̱a̱botíxomana, kó én xí je tsintꞌié tsa̱ꞌa̱njín bo̱a̱, tsi̱ꞌe̱ Na̱ꞌmi xi katsangiyana boá.

²⁵ Kuí nii̱ xi je kixiyajnúꞌun kjiꞌanga kisꞌijñajo̱jnúꞌun.

²⁶ Ta̱nga kuí A̱si̱énni̱xtjii̱n Néná xi sa̱ꞌíndajonjnú, xi ngajona nga sa̱ngíyá Na̱ꞌmina, kuí xí ko̱kóyájnú ngayeje kui nii̱, kó sa̱ꞌínkjaꞌátsjienjnú ngayeje ni xi je kixiyajnúꞌun.

²⁷ Kjo̱a̱xióna kꞌuijñájnúꞌun, kjo̱a̱xióna tsjajnúꞌun, jmí tsi bo̱a̱ tsꞌén tsja an xikótsꞌèn tsjá xotaa̱ kui nga̱sondiee̱. Ngata̱ nda̱jín maá ini̱ma̱jnú, ti̱nde ngata̱ ndakonjínmájnú.

²⁸ Jè kandaꞌyájnú nga bi̱ kixian an: Je tsꞌénfí an, ta̱nga kjo̱e̱ꞌekón nginíjnúꞌun. Tsi tjójnú an katsaki, tsjara̱ ka̱majnú, ngatꞌa̱ je kixiyajnúꞌun an, nga Na̱ꞌmina tsꞌénfikóo̱n, ngatꞌa̱ nkꞌa ngase xaá Na̱ꞌmina ta̱bo̱a̱jiín an.

²⁹ Kó ngotꞌe̱ tsꞌénxiyàjnúꞌun kui nii̱, ngindiee̱ nga ka̱ma, tsi̱ꞌe̱ nga kjiꞌa ngije ka̱ma, sꞌijin ka̱majnú.

³⁰ Ngiti̱ tsiejín ngase ni kuichjiájojnúꞌun, ngatꞌa̱ jè tsꞌéndibá tiña xi botixómaá kui nga̱sondiee̱, kó kuí, ta̱ jmíjín ni xi tjiín kjo̱a̱a̱ an,

³¹ tsꞌén án ni xi tsóna Na̱ꞌmina xi katsangiyana, tsi̱ꞌe̱ nga xotaa̱ kui nga̱sondiee̱ sku̱i̱e̱ nga tjóna Na̱ꞌmina. Ti̱sítji̱e̱njnú ꞌne̱, xín tjián.