Juaa̱ 12 - Xo̱jo̱n eén Néná

Bi̱ tsꞌén akatiéjón ndásíje̱n to̱ko̱ Kjisoo̱

¹ Jun ni̱xtjin ngindiee̱ sꞌué paskuaa̱, kijí Kjisoo̱ na̱xi̱ńdá Betania̱, nínga tikón nda̱ xi ꞌmí Laá, kui xi katsꞌénkjaꞌáꞌyaá.

² Kó Kjisoo̱ katseꞌeé nichinie ki̱a̱a̱, na̱ Martaa̱ katsꞌénseén, kó nda̱ xi ꞌmí Laá ki̱a̱ kisꞌijñajo̱ Kjisoo̱ tꞌa yámíxa̱a̱,

³ kósꞌe̱ na̱ Riyaa̱ iskjíbé masien litro̱ ndásíje̱n soboá xi chjií, xi naxó narndo̱ kamándani, sꞌe̱ katsangijon se Kjisoo̱, kó tsja̱to̱ko̱ kui naa̱ katsꞌénxíjónni, sꞌe̱ ngayeje ndiꞌaa̱ kamásije̱n.

⁴ Kó ngo nda̱ xi xota̱ tsi̱ꞌe̱ Kjisoo̱ xi ꞌmí Junda̱ Iskariotee̱, xi jaskan atíñá Kjisoo̱, bi̱ katsó:

⁵ –Ánní nga tsi ta̱sájín ján úchán to̱n ndenario̱ kastiñáni kui ndásíjee̱n, sꞌe̱ kui to̱o̱n xota̱ ni̱ma̱ xi jmí to̱njiín katseꞌeé.

⁶ Jundaa̱ katsó kui nii̱, jmí tsi kjo̱a̱a̱ nga tjoó xota̱ ni̱ma̱a̱, katsó kuí nii̱ kjo̱a̱a̱ nga nda̱ chejé boá, kó kuí kisꞌijñaa̱ stsatoo̱n, kó iskjíbéchéjé to̱n xi ikindyia.

⁷ Kósꞌe̱ Kjisoo̱, bi̱ katsó: –Xióchíi̱n, jaꞌátjó kuí ndásíjee̱n tsi̱ꞌe̱ ni̱xtjin nga kjónijínna.

⁸ Ngatꞌa̱ xota̱ ni̱ma̱a̱ ngatsjéni̱xtjin kꞌuíndojinjnú, ta̱nga an, jmí tsi ngatsjéni̱xtjin kotíjña̱jinjnúꞌun.

Bi̱ tsꞌén índa já ngito̱ko̱o̱ chináꞌmii̱ nga sa̱ꞌínkꞌién Laá

⁹ Achichí má xota̱ jundío̱ xi kamábe nga ki̱a̱ tikón Kjisoo̱ kó kijíkoón, jmí tsi ta̱ kjo̱a̱a̱ nga sku̱i̱e̱ tsí Kjisoo̱, kijí tsi̱ꞌe̱ nga sku̱i̱e̱ Laá, nda̱ xi Kjisoo̱ katsꞌénkjaꞌáꞌyaá ngi̱jii̱n xota̱ xi je jesoón.

¹⁰ Ta̱nga já ngito̱ko̱o̱ chináꞌmii̱ índa tsi̱ꞌe̱ nga sa̱ꞌínkꞌién Laá nga,

¹¹ ngatꞌa̱ ta̱ngatꞌanii̱ Laá nga achichí má xota̱ xi jundío̱ xi kisꞌijii̱n Kjisoo̱.

Bi̱ tsꞌén tsꞌasꞌien Kjisoo̱ na̱xi̱ńdáꞌniú Jerusale̱n

¹² Nga kamángindyiojón, achichí má xota̱ xi jachó sꞌué paskuaa̱, nga tsintꞌié nga Kjisoo̱ kjo̱chó na̱xi̱ńdáꞌniú Jerusale̱n,

¹³ kó iskjíbé tjiaa̱ xka̱jèn, sꞌe̱ jataxie nga kijíkjaꞌáyíndi̱yà Kjisoo̱, kó bi̱ katsó nga askjandáyà: –¡Néná ngatꞌaxiéꞌáná! ¡Ngatamachikonñé xi ndibání ngajoo̱ Ndi̱a̱ná, nda̱ Ree̱ Israee̱l!

¹⁴ Kó Kjisoo̱ ngo ndí bórró kasakoo̱ xi kisꞌijñasoón, xikótsꞌèn kjitꞌa xo̱jo̱n eén Néná nínga bi̱ tsoó:

¹⁵ Ngata̱ ndakonjínmájnú jún xota̱ na̱xi̱ńdáꞌniú Jerusale̱n, tsitsíjìi̱n, nga kꞌi̱e̱ ndibá nda̱ Ree̱, xi tikónsoón ngo ndí bórró.

¹⁶ Nga tjón tjón kamákjínjiín kui nii̱ xota̱ tsi̱ꞌe̱ Kjisoo̱, ta̱nga ngije kamábe nga katseꞌeé kjo̱a̱je, kjiꞌa kjin jaꞌátsjiee̱n ko̱jo kamákjiín nga jatjosón ni xi kjitꞌa xo̱jo̱o̱n kjo̱a̱a̱ kui, ko̱jo nga kui nii̱ kiniꞌaán.

¹⁷ Kó xota̱ xi nijan síndojo̱ Kjisoo̱, katsóyà kjo̱a̱a̱ kjiꞌanga katsꞌénkjaꞌáꞌyaá Laá ngi̱jii̱n xota̱ xi je jesoón.

¹⁸ Kó ti̱ kuii̱ kjo̱a̱ nga jachókjaꞌayíndi̱yà kjín xota̱, kjo̱a̱a̱ kjo̱a̱ndikón xí katsꞌén.

¹⁹ Ta̱nga xota̱ fariseoo̱, bi̱ katsoó xkjín: –A yàjnú ꞌne̱ nga jmí ni ka̱májín xi si̱ꞌán, ngatꞌa̱ ngayeje xotaa̱ kui nga̱sondiee̱ fítji̱ngii̱ Kjisoo̱.

Já ngriengo̱ xi bi̱ tsꞌén tsangase Kjisoo̱

²⁰ Kó ki̱a̱ ngi̱jii̱n xota̱ xi kijí na̱xi̱ńdáꞌniú Jerusale̱n, nga kijítsꞌéndíkón kui sꞌué paskuaa̱ tjimájin xota̱ ngriengo̱.

²¹ Kui xotaa̱, kijíkóntiñaa̱ Ngiripee̱, nda̱ xi chji̱a̱ni Betsainda̱, na̱xi̱ńdá xi tikónjii̱n nangi Ngalilea̱, kó bi̱ kiꞌmií nga ikꞌíndasee̱n: –Ndi̱a̱, mejénjne̱ xcha̱jne̱ Kjisoo̱.

²² Ngiripee̱ kijítsáyaá kui nii̱ Jandree̱, sꞌe̱ Jandree̱ ko̱jo Ngiripee̱ katsóyaà Kjisoo̱.

²³ Sꞌe̱ Kjisoo̱, bi̱ katsó: –Jè jachó chi̱bo̱a̱ nga ko̱e̱ꞌeé kjo̱a̱je ndií nda̱ xi̱ꞌii̱n.

²⁴ Ja̱koxi̱, ja̱koxi̱ ni xi xiánjnúꞌun, nga tsi ngo xojmaá to ndso̱ko̱a̱n ṉño̱pan xi kꞌo̱kajín tꞌanangii̱, kó tsi ko̱yàjín, kꞌuijñá soboá, ta̱nga tsi ko̱yà, achichí to kꞌuieé.

²⁵ Xi tjoó kjo̱a̱mindyioo̱n, sa̱ꞌínchaja, kó xi chꞌoo̱ kjo̱a̱mindyioo̱n xikótsꞌèn tikón kui nga̱sondiee̱, kuí boá xi ta̱sá tsꞌénfoaꞌátjó, kó kꞌuijñá ngatsjéni̱xtjii̱n.

²⁶ Tsi tjín xí sa̱ꞌínsénna, ngatjandibátjingína, kó nínga kotíjña̱ an, ti̱ ki̱a̱ kꞌuijñá nda̱ xi sa̱ꞌínsénna. Tsi tjín xí sa̱ꞌínsénna, Na̱ꞌmina sku̱i̱e̱ndikón.

Bi̱ tsꞌén katsóyà Kjisoo̱ nga si̱ꞌankꞌien

²⁷ Ngotꞌe̱ achichí nda̱ kjimaa̱ ini̱ma̱na, kó mí ni xi xián án. Na̱ꞌmi, ꞌna̱xiéꞌéní kui chi̱bo̱a̱a̱. Ta̱nga kuí xá jachó an kui chi̱bo̱a̱a̱.

²⁸ Na̱ꞌmi, ngatꞌieé kjo̱a̱je jaꞌée̱n. Kósꞌe̱ kandaꞌyá ngo nda̱ ndiꞌakꞌajmi jàn, xi bi̱ katsó: –Jè tjiín kjo̱a̱je, kó kꞌuié nginií ingo ndi̱yà.

²⁹ Kó ngayeje xota̱ kjín xi síndo ki̱a̱a̱, xi tsintꞌié kuí nda̱a̱, cho̱ꞌo̱n boá katsó. Kje̱ꞌe xi bi̱ katsó: –Ngo ndítsjiee̱ Néná xí tsíchji̱a̱jo.

³⁰ Sꞌe̱ Kjisoo̱, bi̱ katsó: –Kui nda̱a̱ jmí tsi kjo̱a̱a̱ an nga kandaꞌyá, kandaꞌyá ta̱ngatꞌanii̱ jún.

³¹ Ngotꞌe̱ boá ꞌne̱ nga Néná tsꞌéntsáyà tsi nda ko̱jo tsi ndajín tjítsꞌén xindajín kui xi botixómaá kui nga̱sondiee̱, kó ndi̱tsén jàn je ko̱ꞌna̱xié.

³² Kó tsi an nkꞌa chjanínkꞌána kui tꞌanangii̱, ngayeje xotaa̱ xi kji̱ndi̱bákón tiñana.

³³ Kó Kjisoo̱ katsó kui nii̱, tsi̱ꞌe̱ nga kamákjiín xotaa̱ kótsꞌèn ko̱yà.

³⁴ Sꞌe̱ bi̱ katsó kui xotaa̱: –Ta̱ngatꞌanii̱ kjo̱a̱kitii̱ nga yàjne̱ nga Kristoo̱ kꞌuijñá ngatsjéni̱xtjin. Ja̱ kótsꞌèn se ji nga ndií nda̱ xi̱ꞌii̱n chjiéngá xtjonínkꞌá. ꞌYání bo̱a̱ kui ndií nda̱ xi̱ꞌin xi̱ꞌbi̱.

³⁵ Sꞌe̱ Kjisoo̱, bi̱ katsó: –Ta̱ ngi chiboa tsí ni̱xtjin nga tikónjinjnú ndiꞌií, tangínjnú tji̱e̱nga tikónjnú ndiꞌií, tsi̱ꞌe̱ nga jñoó sa̱kójiín jún, ngatꞌa̱ xi tjimá nga jñoó, bejín ñá ndyi̱fí.

³⁶ Tji̱e̱nga tikónjnú ndiꞌií, sꞌijin ngatamajnú ndiꞌií, tsi̱ꞌe̱ nga ndií ndiꞌií ka̱majnú jún. Ngije katsó Kjisoo̱ kui nii̱, kijí, sꞌe̱ kisꞌijña ꞌmaa̱ kui xotaa̱.

Já jundío̱ xi kisꞌijinjiín Kjisoo̱

³⁷ Ta̱nga ndatsi kjín kjo̱a̱ndikón katsꞌén Kjisoo̱ ngindyi̱ko̱n kui xotaa̱, ta̱kó kisꞌijinjiín,

³⁸ kó bo̱a̱ tsꞌén jatjosón ni xi katsó nda̱ chji̱ni̱e̱ꞌe̱én Néná xi ꞌmí Isayaa̱, nga bi̱ katsó: Ji Ndi̱a̱, ꞌyání xi kisꞌijii̱n énná. Kó ꞌyání xi akakoo̱ ngaꞌniuú Ndi̱a̱ná.

³⁹ Kuíni nga kamájín kisꞌijii̱n, ngatꞌa̱ ti̱ bi̱ ti̱ katsó Isayaa̱ nga:

⁴⁰ Íchjá ndyi̱ko̱n kui xotaa̱, kó katsꞌéntajá ini̱ma̱a̱, tsi̱ꞌe̱ nga ka̱matsijenjiín ndyi̱ko̱n, ko̱jo tsi̱ꞌe̱ nga ka̱makjínjiín ini̱ma̱a̱, ko̱jo tsi̱ꞌe̱ nga sa̱ꞌínkꞌoyàjín yojoo̱, tsi̱ꞌe̱ nga an sa̱ꞌindaya an.

⁴¹ Kui nii̱ xi katsó Isayaa̱ ngatꞌa̱ kamábe kjo̱a̱jee̱ Kjisoo̱, kó tsíchji̱a̱ kjo̱a̱a̱ kui.

⁴² Kó ngaskande tjín já xí tjiín xá xí kisꞌijii̱n Kjisoo̱, ta̱nga ta̱ngatꞌanii̱ xota̱ fariseoo̱ nga tsíchji̱a̱jín, tsi̱ꞌe̱ nga ikiyotji̱ngíjiín ngi̱yaa̱ ndiꞌa nínga ndokjo̱a̱ eén Néná.

⁴³ Ngatꞌa̱ tjó ngase kamaá kjo̱a̱jee̱ xotaa̱, ta̱bo̱a̱jiín kjo̱a̱jee̱ Néná.

Eén Kjisoo̱ kuí xí sa̱tíjénií xotaa̱

⁴⁴ Ta̱nga Kjisoo̱ askjandáyà má, nga bi̱ katsó: –Xi sꞌi̱jii̱n an, ánjín xi tsꞌensíjinna, kuí xí katsangiyana xi tsꞌensíjin,

⁴⁵ kó xi bena, be xí katsangiyana.

⁴⁶ Án xí jéꞌe̱ an xikoó ndiꞌií kui nga̱sondiee̱, tsi̱ꞌe̱ nga ngayeje xi sꞌi̱jii̱n an, kꞌuijñájñójín.

⁴⁷ Xi ku̱i̱ntꞌiè énna, kó sa̱ꞌínkjatjosónjín, ánjín xi kotijée̱, ngatꞌa̱ jmí tsi jéꞌe̱ an kui nga̱sondiee̱, tsi̱ꞌe̱ nga sa̱ꞌinjée̱ xotaa̱, ta̱sá jéꞌe̱ an, tsi̱ꞌe̱ nga kꞌoxiéꞌá an.

⁴⁸ Xi sa̱ꞌínchꞌóna, kó sa̱ꞌínjo̱ꞌojín énna, jè tikoón xi ko̱tíjeé, én xí je tsíchji̱a̱ an, kuí xí ko̱tíjeé nga kjo̱chó ni̱xtjin nga kju̱i̱e̱tꞌaa̱.

⁴⁹ Ngatꞌa̱ jmí tsi ta̱xkiya tsíchji̱a̱ an, Na̱ꞌmina xí katsangiyana, kuí xí katsjána kui kjo̱a̱botíxoma xi tsꞌénchji̱a̱ an ko̱jo xi sꞌe̱ kuichjiá an.

⁵⁰ Kó be án nga kjo̱a̱botíxomaa̱ kui, kuí boá xi kjo̱a̱mindyion ngatsjéni̱xtjii̱n. Kó kuíni nga ngayeje ni xi xian an, tsꞌénxiya án xikó katsóna Na̱ꞌmina.