Juaa̱ 11 - Xo̱jo̱n eén Néná

Bi̱ tsꞌén kꞌien Laá

¹ Sꞌe̱ ngo nda̱ xi oo̱n xi ꞌmí Laá kisꞌijña ki̱a̱a̱, nda̱ xi chji̱a̱ni Betania̱, ndí nangií na̱ Riyaa̱, ko̱jo ndichja xi ꞌmí na̱ Martaa̱.

² (Kuí na̱ Riyaa̱ xi ndichja Laá, nda̱ xi oo̱n, kui xi katsangijon ndásíje̱n se Ndi̱a̱a̱, kósꞌe̱ tsja̱to̱ko̱ katsꞌénxíjónni).

³ Kanangiya nga jó ndichja Laá, tsi̱ꞌe̱ nga bi̱ ka̱tso̱o̱ Kjisoo̱: –Ndi̱a̱, xota̱ xi achichí tjoó ji oo̱n.

⁴ Nga tsintꞌié Kjisoo̱ kui nii̱, bi̱ katsó: –Kui chiꞌii̱n jmí tsi tsi̱ꞌe̱ nga ko̱yà Laá, ta̱sá tsi̱ꞌe̱ nga sꞌi̱jña tsijen kjo̱a̱jee̱ Néná, ko̱jo tsi̱ꞌe̱ nga sꞌi̱jña tsijen kjo̱a̱jee̱ ndií Néná.

⁵ Kó Kjisoo̱ achichí tjó kamaá na̱ Martaa̱, ko̱jo ndichja, ko̱jo Laá.

⁶ Nga tsintꞌié Kjisoo̱ nga oo̱n Laá, ngi jó ni̱xtjin kamaá ngi̱ndie nínga tikón,

⁷ sꞌe̱ bi̱ katsoó xota̱ tsi̱ꞌe̱: –Tjián ngiñá ingo ndi̱yà nangi Jundea̱.

⁸ Kó xota̱a̱ Kjisoo̱, bi̱ katsó: –Mostro̱, a foaꞌátsjienjiín nga xota̱ jundíoo̱ kamámejeén tsꞌayaa̱ ndi̱jo̱, kó a ti̱ mején nginií kꞌuin jí ki̱a̱a̱.

⁹ Sꞌe̱ Kjisoo̱, bi̱ katsó: –A tiejójín ora̱ tjiín ni̱xtjii̱n. Xota̱ xi nga ni̱xtjin fotsoꞌbá, sti̱ngíjín, ngatꞌa̱ be ndiꞌií kui nga̱sondiee̱,

¹⁰ ta̱nga tsi ngo xota̱ xi nga jñoó fotsoꞌbá, stingí ngatꞌa̱ jmí ndiꞌíjín nga jñoó.

¹¹ Sꞌe̱ ngije katsó kui nii̱, bi̱ katsó nginií xotaa̱: –Nda̱ amingo̱ná Laá kjiꞌifé, ta̱nga an tsꞌénfítsꞌenkjaꞌáa̱.

¹² Sꞌe̱ bi̱ katsó xota̱ tsi̱ꞌe̱: –Ndi̱a̱, tsi kjiꞌifé, ka̱mandaya nginí.

¹³ Ta̱nga Kjisoo̱ katsó kuí nii̱ kjo̱a̱a̱ nga je kꞌien Laá, ta̱nga xotaa̱ katsꞌénkjó nga kjo̱a̱a̱ nga tsjayojofé ja̱koxi̱i̱ nga tsíchji̱a̱ Kjisoo̱.

¹⁴ Kósꞌe̱ Kjisoo̱, bi̱ katsó cha̱n cha̱a̱n: –Laá jè kꞌien,

¹⁵ kó tsja mana kjo̱a̱a̱ jún, ngatꞌa̱ ki̱a̱jín kisꞌijña an tsi̱ꞌe̱ nga sꞌi̱jinjnú, ta̱nga tjián nínga tikón.

¹⁶ Sꞌe̱ nda̱ xi ꞌmí Tomaa̱, xi Nda̱ꞌni̱o̱ kiꞌmií, bi̱ katsoó xota̱a̱ xi ngasee̱ Kjisoo̱: –Tjián ndatsa ñá, tsi̱ꞌe̱ nga ko̱yàjo̱.

Bi̱ tsꞌén katsóyà Kjisoo̱ nga kuí boá xi kjo̱a̱foaꞌáꞌyaá ko̱jo kjo̱a̱mindyioo̱n

¹⁷ Nga jachó Kjisoo̱, kamábe nga je nijón ni̱xtjinnii̱ Laá nga je kꞌien, kó nga je kjiꞌiya ngo nga̱tsjo̱ó.

¹⁸ Na̱xi̱ńdá Betania̱ tiña na̱xi̱ńdáꞌniú Jerusale̱n kisꞌijña, mara̱ tsi ta̱ ján kilometro̱.

¹⁹ Kó achichí má xota̱ jundío̱ xi jachókoón na̱ Martaa̱, ko̱jo na̱ Riyaa̱, tsi̱ꞌe̱ nga katsꞌéndajoo̱n kjo̱a̱a̱ nga kꞌien ntsꞌi̱e̱.

²⁰ Sꞌe̱ na̱ Martaa̱ nga tsintꞌié nga Kjisoo̱ je ma kjachó tiña, kijíkjaꞌáyíndi̱yà, ta̱nga na̱ Riyaa̱ ngi̱ya ndiꞌaa̱ kisꞌijña.

²¹ Kó na̱ Martaa̱, bi̱ katsoó Kjisoo̱: –Ndi̱a̱, tsi kꞌi̱e̱ kixindyin ji, nde kꞌienjínra̱ ntsꞌié án.

²² Ta̱nga jè be an nga ngayeje ni xi chji̱e̱ꞌèe̱ Néná, Néná tsja̱á.

²³ Sꞌe̱ Kjisoo̱, bi̱ katsó: –Kjo̱a̱ꞌáꞌyárií ntsꞌie.

²⁴ Sꞌe̱ na̱ Martaa̱, bi̱ katsó: –Jè be an nga kjo̱a̱ꞌáꞌyá nginií kjiꞌanga kjo̱a̱ꞌáꞌyaá xota̱ xi je jesoón, ni̱xtjin xi fetꞌaa̱.

²⁵ Sꞌe̱ Kjisoo̱, bi̱ katsó: –Án boá xi tsꞌenkjaꞌáꞌyáa̱ xota̱ xi je jesoón, ko̱jo án boá xi tsꞌénkꞌíndo ngiñá an, kó xi sꞌi̱jii̱n an, ndatsi ko̱yà, kꞌuijñá nginí,

²⁶ kó ngayeje xi síndo kó sꞌijii̱n an, ngiti̱ ko̱yàjín, kꞌuíndo ngatsjéni̱xtjin. A sꞌijii̱n kui nii̱.

²⁷ Sꞌe̱ bi̱ katsó na̱ Martaa̱: –Jo̱o̱n Ndi̱a̱, kó sꞌijinna nga jí xí Kristo̱ xi ndií Néná, xi kjo̱e̱ꞌe kuí nga̱sondiee̱.

Bi̱ tsꞌén askjandá Kjisoo̱ nga̱tsjo̱ó Laá

²⁸ Kó ngije katsó kui nii̱ na̱ Martaa̱, tsíchji̱a̱a̱ ndichja xi ꞌmí na̱ Riyaa̱, kó tsíchji̱a̱jo si̱e̱n, nga bi̱ katsoó: –Jè tikón Mostroo̱ kꞌi̱e̱e̱, kó jí tsꞌénchji̱a̱a̱.

²⁹ Kó nga tsintꞌié kuí nii̱, tji̱e̱nmá jastjíe̱n, kó kijíkoón Kjisoo̱,

³⁰ kó Kjisoo̱ nde kji̱e̱ ꞌbosꞌienjín ndí nangi chichií, ta̱kó ki̱a̱ tikón nínga kamábe na̱ Martaa̱.

³¹ Kósꞌe̱ xota̱ jundío̱ xi síndojo̱ ndiꞌaa̱ na̱ Riyaa̱ xi ndyi̱tsꞌèndàjoón kjo̱a̱a̱ nga je kꞌien ntsꞌi̱e̱, nga kamábe nga ta̱tra kijí na̱ Riyaa̱, kijítji̱ngii̱ ngatꞌa̱ katsꞌénkjó nga na̱ Riyaa̱ nga̱tsjo̱ó Laárá kijí kjandá kamaá.

³² Kósꞌe̱ nga jachó na̱ Riyaa̱ nínga tikón Kjisoo̱, nga kamábe Kjisoo̱, asiéntꞌaa̱tikoó, nga bi̱ katsoó: –Ndi̱a̱, tsi kꞌi̱e̱ kixindyin ji, nde kꞌienjínra̱ ntsꞌié án.

³³ Kósꞌe̱ Kjisoo̱ nga kamábe nga ndyi̱kjandà na̱ Riyaa̱ ko̱jo xota̱ jundíoo̱, askjandá ndatsa kui nga, on kamákón, kó ni̱ma̱ kamaá,

³⁴ kó bi̱ katsó nga asíyá: –Ñání akjanijínjnú Laá. Sꞌe̱ bi̱ kiꞌmií Kjisoo̱: –Ndi̱a̱, ja̱bítsitsíjìi̱n.

³⁵ Askjandá Kjisoo̱.

³⁶ Sꞌe̱ bi̱ katsó já jundíoo̱: –Tsitsíjenjnúu̱, kótsꞌèn ꞌniú tjó kamaá.

³⁷ Kó tjín kuí xotaa̱ xi bi̱ katsó: –Kui nda̱a̱ xi katsꞌéntsijee̱n ndyi̱ko̱n ngo nda̱ xi ti̱ka̱, kó a kamájínrií katsꞌéndaya tsi̱ꞌe̱ nga kꞌienjín Laá.

Kjisoo̱ bi̱ tsꞌén katsꞌénkjaꞌáꞌyaá Laá

³⁸ Ingo ndi̱yà kamándasén nginií Kjisoo̱, sꞌe̱ kijí nínga tikón nga̱tsjo̱ó ndie Laá. Kó kui nga̱tsjo̱ó kuí boá ngo ti̱xa̱ xi kjiꞌixtioo̱ ngo ndi̱jo̱.

³⁹ Sꞌe̱ Kjisoo̱, bi̱ katsó: –Chje̱ꞌéxínjnúu̱ ndi̱jo̱o̱. Sꞌe̱ na̱ Martaa̱, ndichja nda̱ xi je kꞌiee̱n, bi̱ katsó: –Ndi̱a̱, jè chꞌoje̱n, ngatꞌa̱ jè nijón ni̱xtjinnii̱ nga kꞌien.

⁴⁰ Sꞌe̱ Kjisoo̱, bi̱ katsó: –A jejín bo̱a̱ kixiaan nga tsi sꞌijii̱n, xchi̱e̱ ji ngayeje kjo̱a̱jee̱ Néná.

⁴¹ Sꞌe̱ kachjeꞌéxín ndi̱jo̱ xi kjiꞌixtio nga̱ntjo̱a̱a̱ nga̱tsjo̱ó. Kó Kjisoo̱ askotsijen ndiꞌakꞌajmi jàn, nga bi̱ katsó: –Na̱ꞌmi, ndokꞌóchjì tsjàa̱ ji ngatꞌa̱ kandaꞌyéní.

⁴² Jè be an nga ngatsjéni̱xtjin ndaꞌyéní, ta̱nga bo̱a̱ kixian an kjo̱a̱a̱ xota̱ xi síndotꞌana, tsi̱ꞌe̱ nga sꞌi̱jii̱n nga ji xi kanangiyení.

⁴³ Sꞌe̱ ngije bo̱a̱ katsó Kjisoo̱, askjandáyà má nga bi̱ katsó: –¡Lá, ti̱tjaxi̱e̱ ji!

⁴⁴ Kó nda̱ xi je kꞌiee̱n jatjoxieni ngi̱ya nga̱tsjo̱ó, se ko̱jo tsja tjítsakjájón maá ńjño xi̱, kó kje̱n ngo poño tjiꞌmá. Sꞌe̱ Kjisoo̱, bi̱ katsó: –Chjándójnúu̱ ńjñoo̱, kó tꞌíjñandéjnú.

Bi̱ tsꞌén índa jáxaá tsi̱ꞌe̱ nga si̱ꞌankꞌien Kjisoo̱

⁴⁵ Achichí má xota̱ jundío̱ xi kisꞌijii̱n Kjisoo̱ xi kijíkoón na̱ Riyaa̱, kó kamábe ni xi katsꞌén Kjisoo̱,

⁴⁶ ta̱nga tjín kuí xota̱ jundíoo̱ xi kijíkoón xota̱ fariseoo̱, kó katsóyaà ni xi katsꞌén Kjisoo̱.

⁴⁷ Sꞌe̱ já ngito̱ko̱o̱ chináꞌmii̱ ko̱jo já fariseoo̱ kamátikó, kó bi̱ katsoó xkjín: –Mí xí si̱ꞌán, ngatꞌa̱ kui nda̱a̱ achichí kjo̱a̱ndikón tjítsꞌén.

⁴⁸ Tsi ko̱e̱ꞌéndièe̱, ngayeje xotaa̱ sa̱ꞌínsꞌijin, kósꞌe̱ kji̱ndi̱bá já xí chji̱a̱ni Roma̱, kó sa̱ꞌínkjatsón ngi̱ndie ndikónná, ko̱jo sa̱ꞌínkjié na̱xi̱ńdáná.

⁴⁹ Ta̱nga nda̱ xi ꞌmí Kaifaa̱, ngo nda̱ chináꞌmi xi ꞌniú nkꞌa xaá kui nó ján, bi̱ katsó: –Ndeta̱ jmíjín ni xi yàjnú jún,

⁵⁰ ti̱nde niꞌánkjójínjnú nga nda ka̱máná tsi ta̱ ngo tsí xi ko̱yà ta̱ngatꞌanii̱ na̱xi̱ńdaá, ta̱bo̱a̱jínnii̱ tsi ngayeje na̱xi̱ńdaá xi kju̱i̱e̱.

⁵¹ Kaifaa̱ katsó kui nii̱, ngatꞌa̱ kuí xí tikón chináꞌmi xi ꞌniú nkꞌa xaá kui noó, kó katsóyàtjón xikoó ngo chji̱ni̱e̱ꞌe̱én Néná nga Kjisoo̱ ko̱yátjéni xota̱ jundíoo̱,

⁵² kó jmí tsi ta̱ kjo̱a̱a̱ tsií kui na̱xi̱ńdaá, ko̱yà Kjisoo̱ kjo̱a̱a̱ nga ka̱matikó ngayeje ndií Néná xi tjimásoón.

⁵³ Kó kuíni nga ndeskande koó kjiꞌa índa kui jaá nga sa̱ꞌínkꞌién.

⁵⁴ Kó kuíni nga Kjisoo̱ ngiti̱ ta̱xkiya kistsoꞌbájín ngi̱jii̱n xota̱ jundíoo̱, ta̱sá kjin kijí xtji̱e̱e̱n nangi kixií, ngo ngi̱ndie xi ꞌmí Efraii̱n, kó ki̱a̱ kisꞌijñajo̱ xota̱ tsi̱ꞌe̱.

⁵⁵ Kó ngije kjimatiña sꞌué paskuaa̱ xota̱ jundíoo̱, achichí má xota̱ xi kijí na̱xi̱ńdáꞌniú Jerusale̱n, ngindiee̱ sꞌué paskuaa̱ tsi̱ꞌe̱ nga sa̱ꞌíntsjie yojoo̱.

⁵⁶ Kó tjín xí tsangase Kjisoo̱, kó tji̱e̱nga síndo ndi̱tsen na̱ngo̱xi̱i̱, bi̱ katsó nga asíyaá xkjín: –Kótsꞌèn bee̱takónjnú. A kji̱ndi̱bá kui sꞌueé.

⁵⁷ Kó já ngito̱ko̱o̱ chináꞌmii̱ ko̱jo já fariseoo̱ katsjá ngo kjo̱a̱, nga tsi tjín xí sku̱i̱e̱ Kjisoo̱, ka̱tso̱yà nínga tikón, ko̱jo nga ko̱óngítaꞌin, tsi̱ꞌe̱ nga ko̱ndo̱bo̱a̱.